కరీంనగర్ జిల్లాలోని గన్నేరువరం మండలం మైలారం గ్రామంలో గౌడ సంఘం ఆధ్వర్యంలో పోచమ్మ బోనాల వేడుకలను అత్యంత ఘనంగా నిర్వహించారు. ఈ వేడుకలో గ్రామస్తులు తమ ప్రతి ఇంటి నుండి బోనం ఎత్తుకొని, డప్పు చప్పుళ్లతో, శివశక్తుల పూనకాలతో, బైండ్ల పూజారుల వెంట పోచమ్మ దేవాలయానికి చేరుకున్నారు. అనంతరం అమ్మవారికి భక్తిశ్రద్ధలతో నైవేద్యం సమర్పించారు. వర్షాలు సమృద్ధిగా కురవాలని, అలాగే అందరినీ చల్లగా చూడాలని గ్రామస్తులు అమ్మవారిని వేడుకున్నారు. ఈ కార్యక్రమంలో గౌడ సంఘం సభ్యులు తదితరులు ఉత్సాహంగా పాల్గొన్నారు.

కరీంనగర్ జిల్లాలోని గన్నేరువరం మండలం మైలారం గ్రామంలో గౌడ సంఘం ఆధ్వర్యంలో పోచమ్మ బోనాల వేడుకలను అత్యంత ఘనంగా నిర్వహించారు. ఈ వేడుకలో గ్రామస్తులు తమ ప్రతి ఇంటి నుండి బోనం ఎత్తుకొని, డప్పు చప్పుళ్లతో, శివశక్తుల పూనకాలతో, బైండ్ల పూజారుల వెంట పోచమ్మ దేవాలయానికి చేరుకున్నారు. అనంతరం అమ్మవారికి భక్తిశ్రద్ధలతో నైవేద్యం సమర్పించారు. వర్షాలు సమృద్ధిగా కురవాలని, అలాగే అందరినీ చల్లగా చూడాలని గ్రామస్తులు అమ్మవారిని వేడుకున్నారు. ఈ కార్యక్రమంలో గౌడ సంఘం సభ్యులు తదితరులు ఉత్సాహంగా పాల్గొన్నారు.

కేంద్రంలో నరేంద్రమోదీ ప్రభుత్వం 12 ఏళ్ల పాలనను పూర్తి చేసుకున్న సందర్భంగా, కేంద్ర హోంశాఖ సహాయ మంత్రి బండి సంజయ్ కుమార్ తాను ప్రాతినిధ్యం వహిస్తున్న కరీంనగర్ పార్లమెంట్ నియోజకవర్గంలో వినూత్న కార్యక్రమాలకు శ్రీకారం చుట్టారు. ఇందులో భాగంగా, ఆయన "స్వచ్ఛ పాఠశాల" పేరుతో తన నియోజకవర్గంలోని 7 అసెంబ్లీ నియోజకవర్గాల్లోని అన్ని గ్రామాలలోని ప్రభుత్వ ప్రాథమిక, ప్రాథమికోన్నత, ఉన్నత పాఠశాలలను పరిశుభ్రం చేయాలని నిర్ణయించారు. ఈరోజు కరీంనగర్‌లోని చైతన్యపురిలో కరీంనగర్ పార్లమెంట్ నియోజకవర్గంలోని జిల్లాల అధ్యక్షులు, మండలాధ్యక్షులతో కేంద్ర మంత్రి బండి సంజయ్ కుమార్ సమావేశమయ్యారు. మోదీ 12 ఏళ్ల పాలనను పూర్తి చేసుకున్న నేపథ్యంలో కరీంనగర్ పార్లమెంట్ పరిధిలో చేపట్టాల్సిన కార్యక్రమాలపై చర్చించారు. ఈనెల 15 నుండి పాఠశాలలు ప్రారంభమవుతున్నందున, మే 13న అన్ని ప్రభుత్వ పాఠశాలలను పరిశుభ్రం చేసి సుందరంగా తీర్చిదిద్దాలని పిలుపునిచ్చారు. దీనికి సంబంధించి, మే 10న మండలాల వారీగా పార్టీ కార్యకర్తలంతా సమావేశమై ఒక్కో పాఠశాలకు ఇంచార్జీలను నియమించాలని ఆయన సూచించారు. మే 11, 12 తేదీల్లో భారతీయ జనతా పార్టీ కార్యకర్తలు గ్రామాలకు వెళ్లి ప్రభుత్వ పాఠశాలల్లో "టిఫిన్ బైఠక్" పేరుతో సమావేశాలు నిర్వహించాలని బండి సంజయ్ పిలుపునిచ్చారు. ప్రతి స్కూల్‌లోని తరగతి గదుల సంఖ్యకు అనుగుణంగా, ఒక్కో గదికి ఇద్దరు చొప్పున కార్యకర్తలను కేటాయించి, మే 13న అన్ని తరగతి గదులను శుభ్రం చేయాలని సూచించారు. అవసరమైతే చీపురు, క్లాత్ వంటి వస్తువులను తీసుకెళ్లి పాఠశాలలను సుందరంగా తీర్చిదిద్ది మంచి వాతావరణం కల్పించాలని కోరారు. ఈ కార్యక్రమాలను ఫేస్‌బుక్, ట్విట్టర్, ఇన్‌స్టాగ్రామ్ వంటి సోషల్ మీడియా ద్వారా విస్తృతంగా ప్రచారం చేయాలని ఆయన ఆదేశించారు. దీంతోపాటు, మే 16న ప్రతి గ్రామంలో "మీ పిల్లలను పాఠశాలల్లో చేర్చించండి" అనే నినాదంతో ఊరూవాడా ర్యాలీలు నిర్వహించి, దీనిపై విస్తృత ప్రచారం చేయాలని సూచించారు. ఈ ఏడాది కూడా ప్రభుత్వ పాఠశాలల్లో టెన్త్ చదివే విద్యార్థులకు "మోదీ గిఫ్ట్" పేరుతో ఉచితంగా బ్రాండెడ్ సైకిళ్లను అందజేయాలని నిర్ణయించినట్లు కేంద్ర మంత్రి వెల్లడించారు. ఈ విషయాన్ని ప్రజల్లోకి తీసుకెళ్తూ, గతంలో మాదిరిగా కాకుండా, ఈసారి ఒకేసారి, ఒకే సమయంలో అన్ని ప్రభుత్వ పాఠశాలల విద్యార్థులందరికీ రికార్డు స్థాయిలో సైకిళ్లను పంపిణీ చేసి, అవసరమైతే గిన్నిస్ బుక్ రికార్డులో నమోదయ్యేలా కృషి చేసి, ప్రజలకు మంచి సందేశాన్ని పంపాలని ఆయన పేర్కొన్నారు. మరోవైపు, మోదీ 12 ఏళ్ల పాలనను పురస్కరించుకుని కేంద్ర మంత్రి బండి సంజయ్ కుమార్ మే 10న ఉదయం కరీంనగర్ మహాశక్తి ఆలయంలో ప్రత్యేక పూజలు నిర్వహించనున్నారు.

కరీంనగర్ నగరంలోని ఆర్టీసీ వర్క్‌షాప్ క్వార్టర్స్ ప్రాంతంలోని హిందూపురి, గత 12 ఏళ్లుగా తీవ్ర నిర్లక్ష్యానికి గురవుతోంది. దాదాపు నాలుగు డివిజన్లకు సంబంధించిన చెత్తాచెదారాన్ని ఇక్కడే వేస్తుండటంతో, ఈ ప్రాంతం మరొక డంపింగ్ యార్డ్‌గా మారిపోయింది. దీనివల్ల స్థానిక ప్రజలు తీవ్ర దుర్వాసనతో, దోమల బెడదతో నరకయాతన అనుభవిస్తున్నారు. అధికారులు, పాలకులు మారినప్పటికీ ఈ సమస్యకు శాశ్వత పరిష్కారం లభించకపోవడంతో చుట్టుపక్కల కాలనీ ప్రజలు రోగాల బారిన పడుతున్నారు. ఈ సమస్య పరిష్కారం కోసం 22వ డివిజన్ బీజేపీ కార్పొరేటర్ బండ రమణారెడ్డి రంగంలోకి దిగారు. ఆయన ఈ విషయాన్ని నగర మేయర్ కొలగాని శ్రీనివాస్ దృష్టికి తీసుకువెళ్లారు. సమస్యపై వెంటనే స్పందించిన మేయర్, చెత్తను తరలించడానికి తక్షణం చర్యలు చేపట్టాలని మున్సిపల్ సిబ్బందిని ఆదేశించారు. స్థానిక బీజేపీ కార్పొరేటర్ బండ రమణారెడ్డి మంగళవారం ఈ చెత్తను తరలించేందుకు పూనుకున్నారు. కేవలం తాత్కాలికంగా చెత్తను తరలించడం మాత్రమే కాకుండా, ఇకపై ఇక్కడ నాలుగు డివిజన్ల చెత్తను వేయకుండా మున్సిపల్ అధికారులు శాశ్వత చర్యలు చేపట్టాలని, ఈ ప్రాంతాన్ని శుభ్రంగా ఉంచాలని స్థానిక ప్రజలు డిమాండ్ చేస్తున్నారు. చెత్తను తరలించడానికి తక్షణ చర్యలు తీసుకున్న మేయర్ కోలగాని శ్రీనివాస్ మరియు కార్పొరేటర్ బండ రమణారెడ్డికి కాలనీ ప్రజలు కృతజ్ఞతలు తెలియజేశారు.

కరీంనగర్ పోలీస్ కమిషనర్ గౌష్ ఆలం మంగళవారం హుజురాబాద్ ఏసీపీ కార్యాలయాన్ని వార్షిక తనిఖీల్లో భాగంగా సందర్శించారు. ఈ సందర్భంగా సాయుధ బలగాలు సీపీకి గౌరవ వందనం సమర్పించగా, ఆయన కార్యాలయ ప్రాంగణంలో మొక్కను నాటారు. అనంతరం సీపీ కార్యాలయాన్ని, పెండింగ్ కేసులను, రికార్డులను క్షుణ్ణంగా తనిఖీ చేశారు. ఈ సందర్భంగా సీపీ గౌష్ ఆలం పలు కీలక ఆదేశాలు, వివరాలను వెల్లడించారు. గౌరవ డీజీపీ ఆదేశాల మేరకు పోలీసింగ్‌లో సాంకేతికతను విరివిగా ఉపయోగించాలని స్పష్టం చేశారు. ప్రివెంటివ్ పోలీసింగ్, సీసీటీఎన్ఎస్ 2.0, ‘ఈ-సాక్ష్య’ యాప్‌లలో కేసులకు సంబంధించిన పూర్తి వివరాలను జూన్ 15 లోగా తప్పనిసరిగా పొందుపరచాలని ఆదేశించారు. పాత పెండింగ్ కేసుల వివరాలతో పాటు, కొత్తగా నమోదయ్యే కేసుల డేటాను ఎప్పటికప్పుడు అప్‌లోడ్ చేయాలని, కేసుల ఆధారాల సేకరణలో ‘ఈ-సాక్ష్య’ను సమర్థవంతంగా వినియోగించాలని ఆయన సూచించారు. గత నెలలో కరీంనగర్ పీఎంజే నగల షోరూంలో జరిగిన దారిదోపిడీ ఘటనను దృష్టిలో ఉంచుకుని కమిషనరేట్ వ్యాప్తంగా భద్రతను కట్టుదిట్టం చేశామని, జిల్లా, మండల స్థాయిల్లోని నగల దుకాణాలు, బ్యాంకులు, లాడ్జీలు, హోటళ్లలో భద్రతా ప్రమాణాలను సమీక్షించి సీసీ కెమెరాల ఏర్పాటుపై స్పష్టమైన నిబంధనలు జారీ చేసినట్లు తెలిపారు. భద్రతా లోపాలు ఉన్న యాజమాన్యాలకు ఇప్పటికే నోటీసులు జారీ చేశామన్నారు. నేరాల నియంత్రణలో భాగంగా బేసిక్ పోలీసింగ్‌పై దృష్టి సారించినట్లు సీపీ పేర్కొన్నారు. వలస కార్మికుల డేటాలో భాగంగా నేపాలీలతో పాటు ఇతర రాష్ట్రాల నుండి వచ్చిన కార్మికులు, ఇతర వ్యక్తుల పూర్తి వివరాలతో కూడిన రికార్డులను కమిషనరేట్ పరిధిలోని అన్ని పోలీస్ స్టేషన్లలో మైంటైన్ చేస్తున్నట్లు తెలిపారు. కార్డన్ అండ్ సెర్చ్‌లో భాగంగా అనుమానాస్పద ప్రాంతాలు, రైల్వే స్టేషన్లు, హోటళ్లు, లాడ్జీలు, వాహన తనిఖీలను ముమ్మరం చేశామని, పాత నేరస్థులపై నిరంతర నిఘా ఉంచినట్లు చెప్పారు. డ్రగ్స్ నిర్మూలనకై నార్కోటిక్స్‌లో శిక్షణ పొందిన ప్రత్యేక పోలీస్ డాగ్స్ సహాయంతో పాన్ షాపులు, హాస్టళ్లు, పబ్లిక్ ప్రదేశాలను తనిఖీ చేస్తున్నామన్నారు. డ్రగ్ టెస్ట్ కిట్‌లు అందుబాటులో ఉన్నాయని, అనుమానితులకు పరీక్షలు నిర్వహించి పట్టుబడితే ఎన్డీపీఎస్ చట్టం ప్రకారం కఠిన కేసులు నమోదు చేస్తామని హెచ్చరించారు. మహిళలు, విద్యార్థినుల రక్షణ కోసం 'షీ లీడ్స్', 'స్నేహిత' కార్యక్రమాలకు పెద్దపీట వేస్తున్నట్లు, అలాగే నిరుపయోగంగా ఉన్న సీసీ కెమెరాలకు తక్షణమే మరమ్మతులు చేయించి పునరుద్ధరిస్తున్నట్లు పేర్కొన్నారు. తనిఖీల్లో భాగంగా హుజురాబాద్ సబ్ డివిజన్ పోలీసుల పనితీరు, రికార్డుల నిర్వహణ పట్ల సీపీ గౌష్ ఆలం సంతోషం వ్యక్తం చేస్తూ “భేష్” అని అభినందించారు. ఈ సమీక్షలో చర్చించిన అంశాలను క్షేత్రస్థాయిలో పూర్తి స్థాయిలో అమలు చేస్తారనే ఆశాభావాన్ని వ్యక్తం చేశారు. ఈ వార్షిక తనిఖీ కార్యక్రమంలో హుజురాబాద్ ఏసీపీ మాధవి, ఇన్స్పెక్టర్లు కరుణాకర్, రామకృష్ణ, వెంకట్, శ్రీనివాస్, ఎస్సైలు స్వాతి, ఆవుల తిరుపతి మరియు ఇతర పోలీస్ అధికారులు, సిబ్బంది పాల్గొన్నారు.

రాజన్న సిరిసిల్ల జిల్లా డీఎస్పీ నాగేంద్రచారి మాట్లాడుతూ, ప్రకృతిని పరిరక్షించడం ప్రతి ఒక్కరి బాధ్యత అని ఉద్ఘాటించారు. మనం ప్రకృతిని కాపాడితే, అది మనల్ని కాపాడుతుందని ఆయన స్పష్టం చేశారు.

రాజన్న సిరిసిల్ల జిల్లా కలెక్టర్ గరిమ అగర్వాల్, ధాన్యం అన్ లోడింగ్ ప్రక్రియను వేగవంతం చేయాలని అధికారులను ఆదేశించారు. హమాలీల సంఖ్యను పెంచి, అన్ లోడింగ్ పనులను పూర్తి చేయాలని ఆమె స్పష్టం చేశారు. మంగళవారం రోజున, సిరిసిల్ల మున్సిపల్ పరిధిలోని సర్దాపూర్ వ్యవసాయ మార్కెట్ యార్డులోని గోదాముల్లో జరుగుతున్న ధాన్యం అన్ లోడింగ్ తీరును అదనపు కలెక్టర్ గడ్డం నగేష్‌తో కలిసి జిల్లా కలెక్టర్ స్వయంగా పరిశీలించారు. ఈ సందర్భంగా, కలెక్టర్ అధికారులకు పలు సూచనలు చేశారు. వాహనాల్లోని ధాన్యం అన్ లోడింగ్ వేగవంతం చేయడానికి హమాలీల సంఖ్యను మరింత పెంచేలా చర్యలు తీసుకోవాలని ఆమె ఆదేశించారు. అలాగే, అన్ లోడ్ అయిన వాహనాలను ధాన్యం లోడింగ్ కోసం ఇతర కేంద్రాలకు తరలించాలని సూచించారు. వ్యవసాయ మార్కెట్ యార్డులోని గోదాముల్లో ధాన్యం నిల్వ చేస్తున్న తీరు, గోదాముల సామర్థ్యం వివరాలను కూడా ఆమె అధికారులను అడిగి తెలుసుకున్నారు. కొనుగోలు కేంద్రాల నుండి వాహనాలను ఎటువంటి జాప్యం లేకుండా లోడింగ్ చేసి తరలించేలా పర్యవేక్షించాలని కలెక్టర్ అధికారులకు ఆదేశాలు జారీ చేశారు. ఈ సందర్శనలో పౌర సరఫరాల అధికారి బుచ్చిబాబు, మేనేజర్ నరసింహ, సిరిసిల్ల, వేములవాడ తహసీల్దార్లు మహేష్, జయంత్ తదితరులు పాల్గొన్నారు.

సిరిసిల్ల కోర్టు మైనర్ బాలికపై లైంగిక వేధింపులకు పాల్పడిన ఒక కేసులో సంచలన తీర్పును వెలువరించింది. గంభీరావుపేట పోలీస్ స్టేషన్ పరిధిలో జరిగిన ఈ ఘటనలో, గోరింటాల గ్రామానికి చెందిన నిందితుడు కోటగిరి శ్రీనివాస్ కు 20 సంవత్సరాల జైలు శిక్షతో పాటు ₹5,000 జరిమానా విధించింది. బాధితురాలి తండ్రి ఫిర్యాదు ఆధారంగా గంభీరావుపేట పోలీస్ స్టేషన్ లో కేసు నమోదు చేసిన పోలీసులు, దర్యాప్తు చేపట్టి నిందితుడిని అరెస్టు చేశారు. అనంతరం, కోర్టులో చార్జిషీట్ దాఖలు చేయడం జరిగింది. సిరిసిల్ల పోక్సో కోర్టు ప్రధాన న్యాయమూర్తి రాధికా జైస్వాల్ ఈ రోజున తీర్పు వెల్లడించినట్లు జిల్లా ఎస్పీ మహేష్ బి. గితే తెలిపారు. ఈ సందర్భంగా కేసు దర్యాప్తులో పాల్గొన్న సిబ్బందిని ఎస్పీ అభినందించారు.

బీజేపీ ఎంపీ రఘునందన్ రావు యువతను అవమానించే విధంగా చాట్, పానీపూరి, స్విగ్గీ, జొమాటో, మిర్చి బజ్జీలు అమ్ముకోవాలని చేసిన వ్యాఖ్యలను డీవైఎఫ్‌ఐ కరీంనగర్ జిల్లా కార్యదర్శి నరేష్ పటేల్ తీవ్రంగా ఖండించారు. ఈరోజు కరీంనగర్‌లో జిల్లా అధ్యక్షులు సురేష్ అధ్యక్షతన జరిగిన డీవైఎఫ్‌ఐ జిల్లా ముఖ్య కార్యకర్తల సమావేశంలో నరేష్ పటేల్ ఈ వ్యాఖ్యలను ఉద్దేశించి మాట్లాడారు. దేశంలో లక్షలాది మంది యువకులు ఉన్నత విద్యను పూర్తి చేసి ఉద్యోగాల కోసం ఎదురు చూస్తున్న తరుణంలో, వారికి ఉపాధి అవకాశాలు కల్పించాల్సిన బాధ్యత కలిగిన మెదక్ ఎంపీ రఘునందన్ రావు యువతను కించపరిచే విధంగా మాట్లాడటం అత్యంత బాధ్యతారాహిత్యమని నరేష్ పటేల్ మండిపడ్డారు. 2014 ఎన్నికల సమయంలో ప్రతి సంవత్సరం రెండు కోట్ల ఉద్యోగాలు కల్పిస్తామని హామీ ఇచ్చిన బీజేపీ ప్రభుత్వం, అధికారంలోకి వచ్చి 12 సంవత్సరాలు గడుస్తున్నా ఆ హామీని అమలు చేయకుండా యువతను మోసం చేసిందని ఆయన ఆరోపించారు. ఉద్యోగాలు కల్పించడంలో విఫలమైన ప్రభుత్వం తన వైఫల్యాలను కప్పిపుచ్చుకునేందుకే ఇలాంటి వ్యాఖ్యలు చేస్తోందని విమర్శించారు. కేంద్ర ప్రభుత్వ శాఖలు, రైల్వేలు, బ్యాంకులు, రక్షణ శాఖ, పోస్టల్ శాఖ, కేంద్ర విద్యాసంస్థలు తదితర విభాగాల్లో లక్షలాది పోస్టులు ఖాళీగా ఉన్నప్పటికీ వాటిని భర్తీ చేయకుండా నిర్లక్ష్యం చేస్తున్నారని పేర్కొన్నారు. ఉద్యోగాలు ఇవ్వలేకపోయిన పాలకులు యువతకు క్షమాపణ చెప్పాల్సింది పోయి యువతనే అవమానించడం దుర్మార్గమని నరేష్ పటేల్ తీవ్రంగా ఖండించారు. రఘునందన్ రావు వెంటనే తన వ్యాఖ్యలను వెనక్కి తీసుకుని దేశ యువతకు బహిరంగ క్షమాపణ చెప్పాలని, కేంద్ర ప్రభుత్వంలోని అన్ని ఖాళీ పోస్టులను తక్షణమే భర్తీ చేయాలని డీవైఎఫ్‌ఐ డిమాండ్ చేసింది. లేకపోతే యువతను సమీకరించి దేశవ్యాప్తంగా ఆందోళనలు చేపడతామని హెచ్చరించింది. ఈ సమావేశంలో జిల్లా కమిటీ సభ్యులు విజయ్, నాయకులు దినేష్, అరవింద్, సతీష్, వాసు తదితరులు పాల్గొన్నారు.