অসম বিধানসভাৰ অধ্যক্ষ ৰণজিৎ কুমাৰ দাসে জনতাক হাৰাশাস্তি কৰা আৰক্ষী বিষয়া-কৰ্মচাৰীসকলক কঠোৰ সকীয়নি প্ৰদান কৰিছে। তেওঁ স্পষ্ট কৰি দিছে যে আৰক্ষীৰ বিৰুদ্ধে জনসাধাৰণক হাৰাশাস্তি কৰাৰ অভিযোগ পালেই এনে ব্যৱস্থা লোৱা হ'ব, যিটোৱে সমগ্ৰ অসমকে কঁপাই তুলিব। অধ্যক্ষই লগতে ঘোষণা কৰিছে যে জনতাক হাৰাশাস্তি কৰা আৰক্ষীক তেওঁ নিজেই আহি থানাৰ পৰা চোঁচৰাই লৈ যাব। কেৱল আৰক্ষীয়েই নহয়, জনসাধাৰণক হাৰাশাস্তি কৰা বন বিষয়া আৰু ৰাজহ চক্ৰৰ বিষয়াসকলকো বিধানসভাৰ অধ্যক্ষগৰাকীয়ে একেই কঠোৰ সকীয়নি দিছে।

বঙাইগাঁৱত ফিট ইণ্ডিয়া মুভমেণ্টৰ ৭৫তম সংস্কৰণৰ অংশ হিচাপে SSB-য়ে এক বৰ্ণাঢ্য চাইকেল ৰেলীৰ আয়োজন কৰে। এই অভিযানৰ মুখ্য উদ্দেশ্য আছিল চৌহদসমূহক পৰিৱেশ-বান্ধৱ কৰি তোলা আৰু জোৱানৰ লগতে তেওঁলোকৰ পৰিয়ালৰ মাজত সুস্থ জীৱনশৈলীৰ সজাগতা বৃদ্ধি কৰা। ইয়াৰ জৰিয়তে ফিটনেছ আৰু পৰিৱেশ সংৰক্ষণৰ এক গুৰুত্বপূৰ্ণ বাৰ্তা প্ৰচাৰ কৰা হয়।

আজি ৰঙিয়াৰ কনিহাত কামৰূপ জিলা জ্যেষ্ঠ নাগৰিক সন্মিলনৰ নৱম দ্বি-বাৰ্ষিক অধিৱেশন অনুষ্ঠিত কৰা হয়। বড়িগোগ আঞ্চলিক জ্যেষ্ঠ নাগৰিক সন্মিলনৰ সৌজন্যত স্থানীয় তৰুণ সঙ্ঘ প্ৰেক্ষাগৃহত দিনযোৰা কাৰ্যসূচীৰে এই অধিৱেশন অনুষ্ঠিত হয়। কাৰ্যসূচী অনুসৰি পুৱা অৱসৰী অধ্যক্ষ সুৰেশ চন্দ্ৰ ভট্টাচাৰ্য, বড়িগোগ গাওঁ পঞ্চায়তৰ সভাপতি দীপাংকৰ শৰ্মা প্ৰমুখ্যে কেইবাগৰাকীও বিশিষ্ট ব্যক্তিয়ে বন্তি প্ৰজ্বলন কৰে। ইয়াৰ পিছতে কামৰূপ জিলা জ্যেষ্ঠ নাগৰিক সন্মিলনৰ সভাপতি নৰেন্দ্ৰ নৰ্মাই পতাকা উত্তোলন কৰে। এই কাৰ্যসূচীত অৱসৰী আৰক্ষী অধীক্ষক হেমন্ত কুমাৰ ভট্টাচাৰ্য আৰু আদৰণি সমিতিৰ কাৰ্যকৰী সভাপতি দীজেন্দ্ৰ মোহন শৰ্মা সহ আন কেইবাগৰাকীও বিশিষ্ট ব্যক্তিয়ে সহযোগ কৰে। সন্মিলনৰ কাৰ্যকৰী সভাপতি ৰমেন চৌধুৰীয়ে স্মৃতি তৰ্পণ কৰে। প্ৰতিনিধি পঞ্জীয়ন আৰু গছপুলি ৰোপণ কাৰ্যসূচী ৰূপায়নৰ অন্তত প্ৰতিনিধি সভা অনুষ্ঠিত কৰা হয়। বিয়লি কামৰূপ জিলা জ্যেষ্ঠ নাগৰিক সন্মিলনৰ সাধাৰণ সম্পাদক বীৰেন্দ্ৰ নাথ শৰ্মাৰ আদৰণি ভাষণৰে মুকলি অধিৱেশন শুভাৰম্ভ কৰা হয়। একেখন মঞ্চতে অধিৱেশন উপলক্ষে প্ৰকাশিত স্মৃতিগ্ৰন্থ 'অপৰাহ্ন' উন্মোচন কৰা হয়। এই অধিৱেশনত কামৰূপ জিলাৰ অন্তৰ্গত বিভিন্ন শাখা সমিতিৰ বিষয়ববীয়াসকল আৰু সদস্যসকলে উপস্থিত থাকি সৌষ্ঠৱ বৃদ্ধি কৰে।

ঈদ-উল-আজহা উপলক্ষে দক্ষিণ গাঁও শ্বাহী জামা মছজিদে এক বিশেষ আহ্বান জনাইছে। মছজিদ কৰ্তৃপক্ষই কৈছে যে পৱিত্ৰ ঈদ-উল-আজহাৰ বলিদানৰ দিনা কোনো ধৰণৰ অবৈধ জন্তুৰ বলিদান নকৰিব। তেওঁলোকে স্পষ্টকৈ কৈছে যে কেৱল চৰকাৰৰ দ্বাৰা অনুমতিপ্ৰাপ্ত জন্তুৰহে বলিদান কৰা উচিত।

পলাশবাৰীৰ বজৰাপাৰাত মাজনিশা দুখন মটৰচাইকেলৰ মুখামুখি সংঘৰ্ষত এক ভয়ংকৰ পথ দুৰ্ঘটনা সংঘটিত হৈছে। এই দুৰ্ঘটনাত থিতাতে তিনিজন যুৱকৰ মৃত্যু হয়। পিছত গুৱাহাটী চিকিৎসা মহাবিদ্যালয় হাস্পতালত আন এজন যুৱকৰ মৃত্যু হোৱাত মুঠ মৃতকৰ সংখ্যা ৪ জনলৈ বৃদ্ধি পায়।

ধুবুৰীত চোৰাং গৰুৰ বিৰুদ্ধে আৰক্ষীৰ অভিযান চলি থকাৰ মাজতে ধুবুৰী বজাৰ নগৰ আৰক্ষীয়ে পুৱতি নিশা আয়ৰনজংলা তৃতীয় খণ্ড গাঁৱৰ পৰা এক অভিযান চলাইছিল। এই অভিযানত আৰক্ষীয়ে দুটা গৰু সহ চাৰিজন চোৰক আটক কৰে। গাঁও ৰক্ষী বাহিনী আৰু স্থানীয় ৰাইজে পুৱতি নিশা দুটা গৰু চুৰি কৰি লৈ যোৱাৰ সময়তে তেওঁলোকক আটক কৰি ধুবুৰী বজাৰ নগৰ আৰক্ষী চকীত খবৰ দিয়ে। ইয়াৰ পাছতে আৰক্ষীয়ে চোৰকেইজনক আৰু গৰু দুটা থানালৈ লৈ আনে। আটক কৰা চোৰকেইজন হ’ল ছমেৰ আলী মোল্লা, ৰাজব আলী, মজিফুল মণ্ডল আৰু নুৰ হক মণ্ডল। কুৰ্বানিৰ পূৰ্বেই সংঘটিত এই ঘটনাত বৰ্তমানে এই চাৰিজনক ধুবুৰী বজাৰ নগৰ আৰক্ষী চকীত জেৰা অব্যাহত ৰখা হৈছে আৰু আৰক্ষীৰ তদন্ত চলি আছে।

ধুবুৰী জিলাৰ গোলকগঞ্জস্থিত জগমোহন বিদ্যাপীঠত আজিৰে পৰা বিদায়ী বেষমা উৎসৱ আৰম্ভ হৈছে। ইউ জি আক্ৰাছু, চিলাৰাই সেনা, কোচ ৰাজবংশী মহিলা সমিতি আৰু স্থানীয় ৰাইজৰ সহযোগত পতাকা উত্তোলন আৰু চিলাৰায়ৰ প্ৰতিচ্ছবিত মাল্য অৰ্পণেৰে কাৰ্যসূচী আৰম্ভ কৰা হয়।

কামৰূপৰ বকোৰ উকিয়াম নিবাসী ৰজনী বড়োলৈ জি এইছ আৰ পি এফ ৰিচাৰ্চ ইষ্টিটিউটৰ তৰফৰ পৰা ড° বি আৰ আম্বেদকাৰ নেচনেল এৱাৰ্ড ২০২৬ আগবঢ়োৱা হৈছে। এই বঁটা গ্ৰহণ কৰি তেওঁ জিলাখনলৈ গৌৰৱ কঢ়িয়াই আনিছে।

মৰিগাঁও আৰক্ষীয়ে এক সফল অভিযান চলাই দীৰ্ঘদিন ধৰি সমগ্ৰ অঞ্চলটোত ধাৰাবাহিকভাৱে চুৰি কাণ্ড সংঘটিত কৰি এক আতংকময় পৰিৱেশ সৃষ্টি কৰি অহা এটা কুখ্যাত গভাইত চোৰক অৱশেষত জালত পেলায়। ধৃত চোৰটোক অজয় কুণ্ডু বুলি চিনাক্ত কৰা হৈছে। চোৰটোক আটক কৰাৰ পাছত বৰ্তমান আৰক্ষীয়ে অধিক তথ্য লাভৰ বাবে সোধা-পোছা অব্যাহত ৰাখিছে।

শোনিতপুৰৰ শিঙৰী আৰক্ষীয়ে এক সফল অভিযান চলাই ১২ টা চোৰাং গৰু উদ্ধাৰ কৰিছে। এই অভিযানত জড়িত ৫ জন লোকক আৰক্ষীয়ে আটক কৰিবলৈ সক্ষম হৈছে। অঞ্চলটোত গৰুৰ চোৰাং বেহা ৰোধ কৰাত এইটো এক বৃহৎ সফলতা।