ఇప్పటివరకు పౌరసత్వం కోసం పాస్‌పోర్టును ప్రమాణ పత్రంగా పరిగణించేవారు. అయితే, ఇటీవల ఒక కేంద్ర మంత్రి పాస్‌పోర్టు కేవలం ప్రయాణ పత్రం మాత్రమేనని, దానిని పౌరసత్వ ధ్రువీకరణ పత్రంగా చూడబోమని ప్రకటించారు. ఈ ప్రకటనను గుంటూరులో ప్రజాసంఘాలు తీవ్రంగా ఖండించాయి. మంత్రి చేసిన ఈ ప్రకటన బాధ్యతారహితంగా ఉందని పేర్కొన్న ప్రజాసంఘాలు, పాస్‌పోర్టును పౌరసత్వ ధ్రువీకరణ పత్రంగా ఆమోదించాలని డిమాండ్ చేశాయి.

బ్రైట్ హారిజాన్ అకాడెమిక్ ఎక్సలెన్స్ అవార్డుల కార్యక్రమానికి హాజరుకావాలని BHF చైర్మన్ M. K. S. మొహియుద్దీన్ మీడియా సమావేశంలో పిలుపునిచ్చారు. గుంటూరు పరిసర ప్రాంతాల్లోని ప్రతి ఒక్క స్వచ్ఛంద సేవా సంస్థ ప్రతినిధులు, విద్యార్థులు, మరియు వారి తల్లిదండ్రులు ఈ కార్యక్రమానికి విధిగా హాజరుకావాలని ఆయన కోరారు. ఈ కార్యక్రమం 28.06.2026 ఆదివారం ఉదయం 10:00 గంటల నుండి మధ్యాహ్నం 1:00 గంటల వరకు గుంటూరు పట్టాభిపురంలోని అబుల్ కలాం ఆజాద్ ఉర్దూ ఘర్ కమ్ షాదీ ఖానాలో జరగనుంది.

పల్నాడు జిల్లాలోని వినుకొండ పట్టణంలో గత నెల 21న వేక్షితా జ్యూయలర్స్ లో జరిగిన దొంగతనం కేసును పోలీసులు ఛేదించారు. ఈ చోరీకి పాల్పడిన అంతర్ రాష్ట్ర దొంగను అరెస్టు చేసిన పోలీసులు, అతని వద్ద నుంచి సుమారు 27 లక్షల రూపాయల విలువైన వెండి, బంగారు వస్తువులతో పాటు ఒక బుల్లెట్ వాహనం, ఒక ఆటోను స్వాధీనం చేసుకున్నారు. నరసరావుపేట డిఎస్పి హనుమంతరావు తెలిపిన వివరాల ప్రకారం, ఈ నిందితుడిపై రాష్ట్ర వ్యాప్తంగా సుమారు 25 దొంగతనం కేసులు నమోదై ఉన్నాయి.

కర్నూలు జిల్లాలోని జొన్నగిరి ప్రాంతంలో ఉత్పత్తి చేయబడిన స్వచ్ఛమైన బంగారం 'మేడిన్ జొన్నగిరి' పేరుతో బులియన్ మార్కెట్‌లోకి ప్రవేశించింది. ఈ ప్రత్యేక బంగారు బిస్కెట్లపై ఆంధ్రప్రదేశ్ మ్యాప్‌ను ముద్రించారు. ప్రస్తుతం, కర్నూలులోని ప్రముఖ దుకాణాల్లో లభిస్తున్న ఈ బంగారు బిస్కెట్లను కొనుగోలు చేయడానికి వినియోగదారులు అధిక ఆసక్తిని ప్రదర్శిస్తున్నారు.

పాలనాడు జిల్లాలోని సత్తెనపల్లి రంగా కాలనీలో 22 ఏళ్ల గౌస్ అనే యువకుడు తన స్నేహితుడి ఇంట్లో ఉరివేసుకుని ఆత్మహత్యకు పాల్పడ్డాడు. ఒక కేసు విషయంలో పోలీసులు గౌస్‌ను స్టేషన్‌కు పిలవడంతో అతను భయపడి ఈ దారుణానికి ఒడిగట్టినట్లు సమాచారం. ఘటనకు ముందు, ఒక హెడ్ కానిస్టేబుల్ గౌస్‌కు ఫోన్ చేసి, వెంటనే ఇంటికి వెళ్లి స్టేషన్‌కు రావాలని హుకుం జారీ చేసినట్లు తెలుస్తోంది. పోలీసుల పిలుపుతో తీవ్ర భయానికి గురైన గౌస్ ఆత్మహత్యకు పాల్పడ్డాడు. ఆత్మహత్యకు ముందు గౌస్ తన స్నేహితుడు మహేష్‌కు ఇన్‌స్టాగ్రామ్ ద్వారా సందేశం పంపాడు. పోలీసులు స్టేషన్‌కు రమ్మని ఫోన్ చేశారని అందులో పేర్కొన్నాడు. ఆ తర్వాత, "బార్గవ్ వాళ్ల ఇంట్లో ఉరివేసుకుంటున్న మహేష్ సారి రా" అంటూ మరో సందేశం పంపి ప్రాణాలు తీసుకున్నాడు. ఈ ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.

మత్తు పదార్థాలు సేవించడం వల్ల భవిష్యత్తు అంధకారమవుతుందని, కుటుంబాలు చిన్నాభిన్నం అవుతాయని ప్రొహిబిషన్ అండ్ ఎక్సైజ్ సీఐ ఆర్. దివాకర్ హెచ్చరించారు. శుక్రవారం రేపల్లె పట్టణంలో చైల్డ్ రైట్స్ అడ్వకేసి ఫౌండేషన్ ఆధ్వర్యంలో మాదక ద్రవ్యాలపై నిర్వహించిన ర్యాలీలో ఆయన ఈ విషయాలు తెలిపారు. ఈ సందర్భంగా సీఐ దివాకర్ మాట్లాడుతూ, ప్రతి ఒక్కరూ తమ కుటుంబాలను ఉన్నత స్థితిలో ఉంచుకునేలా ప్రణాళికలు సిద్ధం చేసుకోవాలని సూచించారు. గ్రామాలలో, పట్టణాలలో మత్తు పదార్థాలకు బానిసలై కుటుంబాలకు దూరమైన వ్యక్తులను తాము ఎంతోమందిని చూస్తున్నామని పేర్కొన్నారు. అలాంటి వాటికి తావివ్వకుండా, మంచి ఆరోగ్యం, మంచి జీవితం, మంచి కుటుంబం కోసం మత్తు పదార్థాలకు దూరంగా ఉండాలని ఆయన ప్రజలకు హితవు పలికారు. గ్రామాలలో ఎవరైనా మాదక ద్రవ్యాలను విక్రయించినా లేదా సేవించినా హెల్ప్‌లైన్ నెంబర్ 1922కు లేదా వాట్సాప్ నెంబర్ 897781972కు సమాచారం అందించాలని, సమాచారం అందించిన వారి వివరాలను గోప్యంగా ఉంచుతామని ఆయన స్పష్టం చేశారు. చైల్డ్ రైట్స్ అడ్వకేసి ఫౌండేషన్ మేనేజర్ పి. లక్ష్మీ ప్రసన్న మాట్లాడుతూ, ప్రతి ఒక్కరూ డ్రగ్స్, గంజాయి వంటి మత్తు పదార్థాలకు దూరంగా ఉంటూ సమాజంలో ఆదర్శవంతమైన పౌరులుగా జీవించాలని కోరారు. ఈ కార్యక్రమంలో చైల్డ్ రైట్స్ అడ్వకేసి స్వచ్ఛంద సంస్థ వాలంటీర్లు, మహిళలు, ప్రొహిబిషన్ అండ్ ఎక్సైజ్ సిబ్బందితో పాటు పలువురు పాల్గొన్నారు.

అనపర్తి ఎమ్మెల్యే నల్లమిల్లి రామకృష్ణారెడ్డి రాహుల్ గాంధీ, వైఎస్ జగన్‌లపై తీవ్ర విమర్శలు చేశారు. ఓటమి భయంతోనే వారు SIR (Special Intensive Revision of Electoral Rolls) కార్యక్రమంపై కువిమర్శలు చేస్తున్నారని, వారికి అవగాహన లేదని మండిపడ్డారు. మచిలీపట్నంలో జరిగిన బీజేపీ బీఎల్ఏల సమావేశంలో పాల్గొన్న ఆయన ఈ వ్యాఖ్యలు చేశారు. SIR కార్యక్రమం యొక్క ముఖ్య ఉద్దేశం దొంగ ఓట్లను తొలగించి, అర్హులైన ప్రతి ఒక్కరికీ ఓటు హక్కు కల్పించడమేనని రామకృష్ణారెడ్డి వివరించారు. కేంద్ర ఎన్నికల సంఘం ఈ కార్యక్రమాన్ని అత్యంత పారదర్శకంగా నిర్వహిస్తోందని పేర్కొన్నారు. ఈ కార్యక్రమంలో బీఎల్ఏలు చురుగ్గా పాల్గొనాలని ఆయన పిలుపునిచ్చారు. రాహుల్ గాంధీ, జగన్ వంటి వారు అవగాహన లేకుండా బీజేపీపై విమర్శలు చేస్తున్నారని ఎమ్మెల్యే రామకృష్ణారెడ్డి ఆరోపించారు. తిరుపతి ఉప ఎన్నికల్లో జగన్ ఏ విధంగా అక్రమాలకు పాల్పడ్డారో అందరూ చూశారని గుర్తుచేశారు. శాసనమండలి ఎన్నికల్లోనూ వైసీపీ పక్క రాష్ట్రాల ఓటర్లతో దొంగ ఓట్లు వేయించుకుందని ఆయన దుయ్యబట్టారు. ఇటువంటి అక్రమాలకు అడ్డుకట్ట వేసేందుకే కేంద్ర ఎన్నికల సంఘం SIR కార్యక్రమాన్ని చేపట్టిందని స్పష్టం చేశారు. కాంగ్రెస్ పార్టీని నడిపించలేని పరిస్థితిలో రాహుల్ గాంధీ ఉన్నారని కూడా ఎమ్మెల్యే రామకృష్ణారెడ్డి వ్యాఖ్యానించారు.

సాధారణంగా మనం కొనే బంగారం మూలం గురించి పెద్దగా ఆలోచించం. అయితే, ఇప్పుడు ఆంధ్రప్రదేశ్ నేలలో పుట్టిన బంగారం కూడా ఆ జాబితాలో చేరనుంది. జొన్నగిరి గోల్డ్ ప్రాజెక్టు విజయవంతం కావడంతో రాష్ట్ర ఖనిజ సంపద ప్రపంచ దృష్టిని ఆకర్షిస్తోంది. ఒకప్పుడు కేవలం అవకాశంగా కనిపించిన గని, ప్రస్తుతం వాస్తవంగా బంగారాన్ని అందిస్తోంది. ఈ జొన్నగిరి ప్రాజెక్టు వెనుక ఎన్నో ఏళ్ల అన్వేషణ, శాస్త్రీయ పరిశోధనలు, భారీ పెట్టుబడులు, అత్యాధునిక సాంకేతికత ఉన్నాయి. భూమిలోని ఖనిజాన్ని వెలికితీయడం నుంచి శుద్ధి చేసి బంగారు బిస్కెట్‌గా మార్చే వరకు ప్రతి దశ అత్యంత కచ్చితత్వంతో సాగుతుంది. ఆ ప్రక్రియ ఫలితమే ఇప్పుడు మార్కెట్లోకి అడుగుపెట్టిన తొలి ఏపీ బంగారం. ఈ బంగారం విలువ కేవలం దాని ధరలో మాత్రమే లేదు. వేల మందికి ఉపాధి అవకాశాలు, స్థానిక ప్రాంతాల అభివృద్ధి, రవాణా, అనుబంధ పరిశ్రమల విస్తరణ, ప్రభుత్వానికి రాయల్టీలు, పెట్టుబడిదారుల్లో విశ్వాసం వంటి అనేక రూపాల్లో ఇది రాష్ట్ర ఆర్థిక వ్యవస్థకు బలం చేకూర్చనుంది. ఒక గని చుట్టూ కొత్త ఆర్థిక చైతన్యం రూపుదిద్దుకోబోతోంది. ఇప్పటి వరకు “ఆంధ్రప్రదేశ్ అంటే వ్యవసాయం, సముద్ర సంపద” అనే గుర్తింపు ఉండేది. ఇకపై “బంగారం ఉత్పత్తి చేసే రాష్ట్రం” అనే మరో ప్రత్యేకత కూడా దీనికి తోడుకానుంది. జొన్నగిరి నుంచి వచ్చిన ఈ తొలి బంగారు బిస్కెట్లు కేవలం బంగారు ముక్కలు కాదు, రాష్ట్ర భవిష్యత్తుపై కొత్త ఆశలు, కొత్త అవకాశాలకు ప్రతీకగా నిలుస్తున్నాయి.

జుట్టు రాలడం సమస్యకు గ్యారెంటీ మందు ఉంది.