મીઠાપુર હોસ્પિટલ અને ટાટા કેમિકલ્સ મીઠાપુર દ્વારા એક નિશુલ્ક સેવા કેમ્પનું આયોજન કરવામાં આવ્યું છે. આ સેવા કેમ્પ તાજેતરમાં 05/07/2026 ના રોજ યોજાશે, જેમાં નિશુલ્ક સેવાઓ પૂરી પાડવામાં આવશે.

રાજકોટ જિલ્લાના ધોરાજીમાં સ્થાનિક મહિલાઓએ બિસ્માર રસ્તાઓની સમસ્યાને લઈને અનોખી રીતે વિરોધ પ્રદર્શન કર્યું હતું. ધોરાજી નગરપાલિકા વિસ્તારના વોર્ડ નંબર 9, બસ સ્ટેન્ડ સામેની ગલી અને પીપળીયા હનુમાન મંદિર નજીકના વિસ્તારમાં છેલ્લા છ-સાત વર્ષથી નગરપાલિકાનું 'જંગલ રાજ' ચાલી રહ્યું છે. સ્થાનિકો નગરપાલિકાના તમામ કરવેરા ભરવા છતાં, તેમનો વિસ્તાર આજ દિન સુધી પ્રાથમિક સુવિધાઓથી વંચિત રહ્યો છે. આ વિસ્તારના રસ્તાઓ અત્યંત ખખડધજ હાલતમાં છે, જે અંગે અનેક વખત રજૂઆતો કરવામાં આવી હોવા છતાં જવાબદાર તંત્ર દ્વારા કોઈ નક્કર કામગીરી કરવામાં આવી નથી. આના પરિણામે સ્થાનિક લોકોને, રાહદારીઓને, વાહનચાલકોને અને રહેવાસીઓને ભારે મુશ્કેલીઓનો સામનો કરવો પડી રહ્યો છે. આ જ સમસ્યાઓના પગલે મહિલાઓએ રોડ પર ઉતરીને પોતાની તકલીફો અને નગરપાલિકા તંત્ર પર રોષ ઠાલવ્યો હતો. મહિલાઓએ સૌ પ્રથમ થાળી-વેલણ વગાડીને વિરોધ પ્રદર્શન કર્યું હતું. આ ઉપરાંત, તાજેતરમાં પુરૂષોત્તમ માસ પૂર્વે મહિલાઓએ આખો મહિનો પૂજા-અર્ચના અને ધાર્મિક વિધિઓ કરી હતી. તે જ મહિલાઓએ આજે એકત્રિત થઈને ભગવાન પુરૂષોત્તમ અને બિસ્માર બની ગયેલા રોડ-રસ્તાઓની પૂજા-અર્ચના કરી હતી. તેમણે ભગવાન પુરૂષોત્તમને ધોરાજીના તંત્રને સદ્‌બુદ્ધિ પ્રદાન કરવા અને તેમના વિસ્તારના રસ્તાઓ તાત્કાલિક સુધારી આપવા માટે પ્રાર્થના કરી હતી. આમ, ધોરાજીના આ વિસ્તારમાં છેલ્લા ઘણા વર્ષોથી બિસ્માર રસ્તાઓ સુધારવામાં આવે તેવી તેમની સતત માંગણીને ઉજાગર કરવા માટે મહિલાઓ દ્વારા આ અનોખી રીતે વિરોધ પ્રદર્શન કરવામાં આવ્યું હતું.

જુનાગઢ લોકલ ક્રાઈમ બ્રાન્ચ (એલસીબી) એ કેશોદ તાલુકાના અગતરાય ગામે ગેરકાયદેસર રીતે ચાલી રહેલા વરલી મટકાના જુગારધામ પર સફળતાપૂર્વક દરોડો પાડ્યો હતો. આ કાર્યવાહીમાં મહેશભાઈ ઉર્ફે ભીખો જેન્તીભાઈ મારડીયા (ઉંમર 36 વર્ષ), રહે. બાગ વિસ્તાર, અગતરાય ગામ, ને જુગાર રમાડતા રંગેહાથ ઝડપી પાડવામાં આવ્યો હતો. પોલીસ દ્વારા જુગારના વ્યવહારમાં ઉપયોગમાં લેવાતી રોકડ રકમ સહિત કુલ ₹5,490 નો મુદ્દામાલ જપ્ત કરવામાં આવ્યો હતો. એલસીબીની ટીમે પેટ્રોલિંગ દરમિયાન મળેલી બાતમીના આધારે આ કાર્યવાહી હાથ ધરી હતી. આ મામલે પોલીસે આરોપી વિરુદ્ધ ગુજરાત જુગાર ધારાની સંબંધિત કલમો હેઠળ ગુનો નોંધી કાયદેસરની કાર્યવાહી શરૂ કરી છે. સમગ્ર કેસની વધુ તપાસ કેશોદ પોલીસ સ્ટેશનના હેડ કોન્સ્ટેબલ પ્રકાશભાઈ જીવાભાઈ ડાભી દ્વારા કરવામાં આવી રહી છે. ઉલ્લેખનીય છે કે, છેલ્લા કેટલાક સમયથી જુનાગઢ ક્રાઈમ બ્રાન્ચ દ્વારા કેશોદ પંથકમાં જુગાર અને પ્રોહિબિશન સંબંધિત ગુનાઓ સામે સઘન અભિયાન ચલાવવામાં આવી રહ્યું છે. આ સઘન કાર્યવાહીના પરિણામે ગેરકાયદેસર પ્રવૃત્તિઓ સાથે સંકળાયેલા તત્વોમાં ચિંતાનો માહોલ જોવા મળી રહ્યો છે. સ્થાનિકોમાં એવી ચર્ચા છે કે પોલીસની સતત કાર્યવાહીથી આવા અસામાજિક તત્વો સામે કાયદાનો સકંજો વધુ મજબૂત બન્યો છે, જેનાથી જુગારિયાઓમાં ફફડાટ વ્યાપી ગયો છે.

વંથલી તાલુકાના થાણાપીપળી પ્રાથમિક આરોગ્ય કેન્દ્ર ખાતે એક સફળ રક્તદાન શિબિરનું આયોજન કરવામાં આવ્યું હતું. આ શિબિરમાં પ્રાથમિક આરોગ્ય કેન્દ્ર હેઠળ આવતા તમામ ગામોના ગ્રામજનોમાં સવારથી જ ભારે ઉત્સાહ જોવા મળ્યો હતો અને મોટી સંખ્યામાં લોકોએ હાજરી આપીને રક્તદાન કર્યું હતું. પ્રાથમિક આરોગ્ય કેન્દ્ર થાણાપીપળી દ્વારા "રક્તદાન કરીને આપણું વ્યક્તિત્વ મહાન બનાવીએ" ના સૂત્ર સાથે આ રક્તદાન કેમ્પ યોજાયો હતો. આ શિબિરમાં યુવાનો, સમાજના આગેવાનો અને વિવિધ ગામોના ગ્રામજનોએ ઉત્સાહપૂર્વક ભાગ લીધો હતો. મેડિકલ ઓફિસર ડૉ. આશિષ સામળાએ જણાવ્યું હતું કે, આ રક્તદાન કેમ્પનું આયોજન માનનીય ડી.ડી.ઓ. સાહેબ, જિલ્લા મુખ્ય આરોગ્ય અધિકારી તથા તાલુકા હેલ્થ ઓફિસર, વંથલીના માર્ગદર્શન હેઠળ કરવામાં આવ્યું હતું. તેમણે રક્તદાનના મહત્વ અંગે માહિતી આપી લોકોને નિયમિત રક્તદાન કરવા અપીલ કરી હતી. રક્તદાનને મહાદાન ગણવામાં આવે છે, જે જરૂરિયાતમંદ દર્દીઓના જીવન બચાવવામાં મહત્વપૂર્ણ યોગદાન આપે છે. આ શિબિર દ્વારા સમાજમાં રક્તદાન પ્રત્યે જાગૃતિ ફેલાવવાનો પણ મહત્વપૂર્ણ સંદેશ આપવામાં આવ્યો હતો.

મોરબી જિલ્લાના જેતપર ગામમાં ખેડૂતોએ અદાણી કંપની સામે ખેતરોમાં વીજલાઇન નાખવાના કામ દરમિયાન નુકસાન પહોંચાડવા બદલ ફરિયાદ નોંધાવવા માટે પોલીસ આઉટપોસ્ટ પહોંચ્યા હતા. પોલીસ સ્ટેશને કોઈ જવાબદાર અધિકારી હાજર ન હોવાથી ખેડૂત બહેનોએ પોલીસ પરિસરમાં રામધૂન બોલાવીને પોતાનો વિરોધ નોંધાવ્યો હતો. પ્રાપ્ત વિગતો અનુસાર, અદાણી કંપની દ્વારા વીજલાઇનની કામગીરી દરમિયાન ખેડૂતોના ખેતરોને નુકસાન પહોંચાડવામાં આવ્યું છે. ખેડૂતોનો આરોપ છે કે કંપની મંજૂરી વિના પણ ખેતરોમાં દાદાગીરીપૂર્વક કામ કરી રહી છે. આ મામલે અરજીઓ આપવા છતાં તેમની ફરિયાદો સ્વીકારવામાં આવતી નથી, જેના કારણે તેમને અન્યાય થઈ રહ્યો છે. ખેડૂતોએ જણાવ્યું કે જેતપર ગામની આઉટપોસ્ટ પર ભાગ્યે જ કોઈ પોલીસ અધિકારી હાજર રહે છે. ગામમાં અવારનવાર ઘટનાઓ બનતી હોવા છતાં, FIR નોંધાવવા માટે સ્થાનિકોને મોરબી સુધી ધક્કા ખાવા પડે છે. આઉટપોસ્ટ હોવા છતાં કોઈ ફરજ પર ન હોવાથી તંત્રની કામગીરી સામે ભારે આક્રોશ વ્યાપ્યો છે. ખેતરોને થયેલા નુકસાનની ફરિયાદ સાંભળવા કોઈ હાજર ન હોવા અને તંત્ર દ્વારા યોગ્ય કાર્યવાહી ન થતા, વિરોધના ભાગરૂપે મહિલા ખેડૂતોએ આઉટપોસ્ટ પર રામધૂન શરૂ કરી હતી.

મોરબીના જેતપર ગામે વીજળી લાઇન પસાર થવાના મુદ્દે ચાલી રહેલા આંદોલનને હવે રાજકીય ચર્ચાઓનો માહોલ પણ મળ્યો છે, કારણ કે ખેડૂતોના સમર્થનમાં એક પછી એક રાજકીય પક્ષો સાથે જોડાયેલા વ્યક્તિઓ રાજીનામું આપી રહ્યા છે. આ જ ક્રમમાં, જેતપરના આગેવાન અને આમ આદમી પાર્ટીના જેતપર જિલ્લા પંચાયત સહ પ્રભારી ભાવેશ બોસિયાએ પક્ષના પ્રાથમિક સભ્યપદ સહિતના તમામ હોદ્દાઓ પરથી રાજીનામું આપ્યું છે. તેમણે મોરબી જિલ્લા પ્રમુખને સંબોધીને લેખિતમાં પોતાનો રાજીનામાનો પત્ર પાઠવ્યો છે. ભાવેશ બોસિયાએ પોતાના રાજીનામા પત્રમાં સ્પષ્ટ કર્યું છે કે તેમણે જેતપર ગામમાં ચાલી રહેલા ખેડૂતોના આંદોલનને ટેકો આપવા માટે સ્વેચ્છાએ પક્ષમાંથી મુક્ત થવાનો નિર્ણય કર્યો છે, કારણ કે તેમના માટે ખેડૂતોના પ્રશ્નોને પ્રાથમિકતા આપવી જરૂરી છે. તેમણે પક્ષમાં કામગીરી દરમિયાન મળેલા અનુભવ અને સાથી કાર્યકરો તેમજ પદાધિકારીઓ તરફથી મળેલા સહકાર બદલ આભાર વ્યક્ત કર્યો હતો. તેમણે જિલ્લા પ્રમુખને પોતાનું રાજીનામું તાત્કાલિક અસરથી સ્વીકારવાની વિનંતી પણ કરી છે. ભાવેશ બોસિયાના આ નિર્ણયને કારણે સ્થાનિક રાજકીય વર્તુળોમાં ગરમાગરમ ચર્ચા શરૂ થઈ ગઈ છે. ખેડૂતોના મુદ્દે લેવાયેલા આ પગલાને રાજકીય રીતે અત્યંત મહત્વપૂર્ણ માનવામાં આવી રહ્યું છે.

aava roje roj na latest news jova mate amari channel ma Banya raho ane amari channel ne like Ane subscribe kro

ધોરાજીમાં જલારામ અન્નદાન ટ્રસ્ટ દ્વારા ભૂખ્યા લોકોને ભોજનનું વિતરણ કરવામાં આવ્યું હતું. 'અન્નદાન મહાદાન'ના સૂત્ર સાથે નિશા બેન સોદરવા અને ગોપાલ ભાઇ સોદરવાએ આ સેવાકાર્યનું બીડું ઝડપ્યું છે. આ દંપતીએ ધોરાજીના વિવિધ વિસ્તારોમાં ગરીબ અને ભૂખ્યા લોકોનું પેટ ભર્યું હતું. તેમના આ અન્નદાન અને મહાદાનના કાર્ય માટે તેમજ જલારામ અન્નદાન ટ્રસ્ટને સો સો સલામ.

રાજકોટ જિલ્લાના જસદણ તાલુકાના રાજાવડલા ગામ નજીક એક એસટી બસ અકસ્માતનો ભોગ બની હતી. આ અકસ્માતમાં બસના સ્ટીયરિંગ પરથી કાબૂ ગુમાવતા બસ રોડ પરથી નીચે ઉતરી ગઈ હતી. બસમાં કુલ 22 મુસાફરો સવાર હતા, પરંતુ સદનસીબે આ ઘટનામાં કોઈ જાનહાની થઈ ન હતી અને તમામ મુસાફરો સુરક્ષિત રહ્યા હતા. અકસ્માતની જાણ થતાં જ સ્થાનિક લોકો અને વહીવટી તંત્ર ઘટનાસ્થળે પહોંચી ગયું હતું, અને હાલ અકસ્માતના ચોક્કસ કારણ અંગે વધુ તપાસ હાથ ધરવામાં આવી છે.