લાખણી તાલુકાના લવાણા ગામમાં સમરસતાનું એક અનોખું આયોજન કરવામાં આવ્યું હતું. લવાણા ગામે 'સનાતન સમરસતાનો મહાયજ્ઞ' યોજાયો હતો, જેમાં રાજપૂત સમાજના હિન્દવાણી વિસ્તારના 21 ગામોના વાલ્મિકી સમાજ સાથે ભોજનનું આયોજન કરવામાં આવ્યું હતું. આ કાર્યક્રમથી લવાણા ગામ સામાજિક એકતાનું પ્રતીક બન્યું હતું. આ સામાજિક એકતાના મેળાવડામાં વાલ્મિકી સમાજના લોકોને દાનરૂપી ભોજન આપવામાં આવ્યું હતું. આ પ્રસંગે સંતો, મહંતો સહિત રાજકીય નેતાઓ પણ હાજર રહ્યા હતા. વિધાનસભા અધ્યક્ષ શંકર ચૌધરીની ઉપસ્થિતિમાં આ કાર્યક્રમ યોજાયો હતો.

માવસરી-બાખાસર રોડ ચેકપોસ્ટ પરથી કરવામાં આવેલી કાર્યવાહી દરમિયાન એક લક્ઝરી ગાડીમાંથી પોષડોડાનો મોટો જથ્થો જપ્ત કરવામાં આવ્યો છે. આ જપ્તીમાં લક્ઝરી વાહનમાંથી મોટી માત્રામાં પોષડોડાનો જથ્થો પકડવામાં આવ્યો હતો.

દિયોદર ખાતે શાળા સમય બાદ વસ્તી ગણતરીનું કામ કરાવવાના પરિપત્રનો સખત વિરોધ નોંધાવવામાં આવ્યો છે. આ વિરોધ સાથે દિયોદર મામલતદારને એક આવેદનપત્ર સુપરત કરવામાં આવ્યું હતું, જેમાં સ્પષ્ટપણે માંગ કરવામાં આવી હતી કે જનગણનાની કામગીરીને 'ઓન ડ્યુટી' ગણવામાં આવે.

કેબિનેટ મંત્રી અને વાવ થરાદ જિલ્લાના પ્રભારી મંત્રી ઋષિકેશ પટેલ જિલ્લાની મુલાકાતે છે. તેમની આ મુલાકાત દેશના વડાપ્રધાન નરેન્દ્ર મોદીના શાસનને 12 વર્ષ પૂરા થવાની ઉજવણીના ભાગરૂપે થઈ રહી છે. મંત્રી ઋષિકેશ પટેલ જિલ્લામાં વિકાસલક્ષી કામોનું નિરીક્ષણ કરી રહ્યા છે. તેમણે થરાદથી સીપુ ડેમ સુધીના પાઇપલાઇન પ્રોજેક્ટનું નિરીક્ષણ કર્યું હતું અને આશા વ્યક્ત કરી હતી કે આ પાણીની પાઇપલાઇન દ્વારા 125 થી વધુ તળાવ ભરાશે. ઋષિકેશ પટેલે જણાવ્યું હતું કે વિકાસલક્ષી કામોના નિરીક્ષણ દરમિયાન જો કોઈ ક્ષતિ જણાશે, તો તેને દૂર કરવામાં આવશે. તેઓ આજે જિલ્લાના વિવિધ વિસ્તારોની મુલાકાત લઈ રહ્યા છે.

વાવ - થરાદના પ્રભારી મંત્રીશ્રી ઋષિકેશભાઈ પટેલે થરાદ ખાતે મીડિયા સંવાદનું આયોજન કર્યું હતું. આ સંવાદમાં તેમણે વડાપ્રધાન નરેન્દ્રભાઈ મોદીના 12 વર્ષના શાસનકાળ દરમિયાનના 'વિશ્વાસ, વિકાસ અને જલ કલ્યાણ' પર ભાર મૂક્યો હતો. મંત્રીશ્રીએ જણાવ્યું કે, આ સમયગાળામાં અનેક યોજનાઓ અમલમાં મૂકવામાં આવી છે, જેનો લાભ છેવાડાના માનવી સુધી પહોંચ્યો છે. પ્રભારી મંત્રી દ્વારા વડાપ્રધાન નરેન્દ્રભાઈ મોદીની વિવિધ કલ્યાણકારી યોજનાઓ વિશે વિગતવાર માહિતી પૂરી પાડવામાં આવી હતી.

ગાંધીનગર ખાતે વિશ્વ આંજણાધામ સંચાલિત ગુજરાતના વિવિધ તાલુકાઓના સંયોજકોની એક મહત્ત્વપૂર્ણ બેઠક ચૌધરી સમાજના ભામાશા મણીભાઈ ચૌધરીની ઉપસ્થિતિમાં યોજાઈ હતી. ગાંધીનગરના જમયિતપુરા ખાતે પંદર વિઘા જમીનમાં નવનિર્મિત થનારા વિશ્વ આંજણાધામના સંદર્ભમાં આ બેઠક યોજાઈ હતી, જેમાં ચૌધરી સમાજના શિક્ષણ, આરોગ્ય અને કરોડોના ખર્ચે બનનારા આ ધામ વિશે વિસ્તૃત માહિતી આપવામાં આવી હતી. આ બેઠક દરમિયાન, મહામંત્રી નાંનજીભાઈ ચૌધરીએ જણાવ્યું કે વિશ્વ આંજણાધામના પ્રમુખ શ્રી મણીભાઈ ચૌધરીએ ચૌધરી સમાજના આવનારા સમયની ચિંતા કરીને એક મોટા શિક્ષણ અને આરોગ્યના વિઝન સાથે આ પહેલ કરી છે. આ વિઝન છેવાડાના ચૌધરી સમાજના લોકો સુધી પહોંચે, અને સમાજની દીકરીઓ તથા દીકરાઓને સારા વાતાવરણમાં શિક્ષણ મળી રહે અને તેઓ આગળ વધે તેવા હેતુથી આ વિશ્વ આંજણાધામ તૈયાર કરવામાં આવશે. વધુમાં, મહામંત્રી અમિતભાઈ ચૌધરીએ સ્પષ્ટ કર્યું કે સમાજના તેજસ્વી વિદ્યાર્થીઓ જેઓ ગ્રામ્ય વિસ્તારોમાં રહે છે અને આર્થિક સ્થિતિ ઓછી ધરાવે છે, તેમને પણ વિશ્વ આંજણાધામ ખાતે શિક્ષણ આપીને આગળ વધવા માટે પ્રોત્સાહિત કરવામાં આવશે. વિશ્વ આંજણા ધામના ખજાનચી રમેશભાઈ ચૌધરીએ પણ છેવાડાના સમાજના વિદ્યાર્થીઓને આંજણા ધામ ખાતે શિક્ષણ આપવા, તથા શિક્ષણ, માર્ગદર્શન, સંસ્કાર, આરોગ્ય અને રમતગમત માટે સર્વાંગી વિકાસ કરીને સમાજને મજબૂત બનાવવાના સંકલ્પનો પુનરોચ્ચાર કર્યો હતો. બેઠકમાં હાજર ચૌધરી સમાજના વક્તાઓએ જણાવ્યું કે સમાજના યુવા કાર્યકર્તાઓ શિક્ષણ સાથે સમાજ સેવા માટે મજબૂત ઇમારતના નિર્માણમાં દાયકાઓ સુધી યોગદાન આપશે. આ બેઠક દરમિયાન આવેલા સંયોજકોને નવનિર્મિત થનારા વિશ્વ આંજણાધામના બાંધકામ, તેના વિવિધ પ્રકારના વિભાગો સહિત સમગ્ર નિર્માણ વિશે વિસ્તૃત માહિતી આપવામાં આવી હતી. આ મહત્ત્વપૂર્ણ બેઠકમાં આંજણાધામના પ્રમુખ શ્રી મણીભાઈ ચૌધરી, મહામંત્રી શ્રી અમિતભાઈ ચૌધરી, સેક્રેટરી શ્રી નાંનજીભાઈ ચૌધરી, ખજાનચી શ્રી રમેશભાઈ ચૌધરી, કોષાધ્યક્ષ શ્રી આર. ડી. ચૌધરી, સંયુક્ત રજીસ્ટ્રાર શ્રી સુનિલભાઈ ચૌધરી, શ્રી એસ. આર. ચૌધરી અને શ્રી મનીષભાઈ ચૌધરી સહિતના અગ્રણીઓ ઉપસ્થિત રહીને લોકોને માહિતગાર કર્યા હતા.

ભાભરમાં પવિત્ર અધિક માસ નિમિત્તે શ્રી સંકટ મોચન હનુમાનજી મંદિર અને ગાડલિયા ગૌસેવા ટ્રસ્ટના લાભાર્થે શ્રીમદ્ ભગવદ્ સપ્તાહનું આયોજન કરવામાં આવ્યું છે. આ કથામાં મોટી સંખ્યામાં ભક્તો રસપાન કરવા આવી રહ્યા છે, જ્યારે દાતાઓ પણ દાન આપીને આ ધર્મકાર્યમાં સહભાગી બની રહ્યા છે.

વડાપ્રધાન નરેન્દ્રભાઈ મોદીના નેતૃત્વમાં કેન્દ્ર સરકારના સફળ ૧૨ વર્ષ પૂર્ણ થવાના શુભ અવસરે, "૧૨ વર્ષ વિકાસના, વિશ્વાસના અને જનકલ્યાણના" અભિયાન હેઠળ વાવ-થરાદ જિલ્લા વહીવટી તંત્ર દ્વારા ૮ જૂનથી ૨૧ જૂન, ૨૦૨૬ દરમિયાન વિવિધ જનકલ્યાણલક્ષી કાર્યક્રમોનું આયોજન કરવામાં આવ્યું છે. આ કાર્યક્રમના ભાગરૂપે, વાવ-થરાદ જિલ્લાના પ્રભારી મંત્રી ઋષિકેશભાઈ પટેલની ઉપસ્થિતિમાં થરાદ તાલુકાના લુણાવા ખાતેથી "પ્રગતિપથ યાત્રા"નો પ્રારંભ કરવામાં આવ્યો હતો. આ યાત્રા દરમિયાન જિલ્લાના વિવિધ વિકાસકાર્યો, જાહેર સુવિધાઓ અને માળખાગત પ્રોજેક્ટોની મુલાકાત લેવામાં આવશે. જેમાં મલુપુર સ્થિત ભારતમાલા માર્ગ, થરાદ સ્થિત સિવિલ હોસ્પિટલ અને આઇકોનિક રોડ, વાવ સ્થિત પાવરગ્રિડ પ્લાન્ટ તેમજ નડાબેટ પ્રવાસન સ્થળનો સમાવેશ થાય છે. આ મુલાકાતોમાં આધુનિક સુવિધાઓ, માળખાગત વિકાસ અને જનહિતલક્ષી કામગીરીઓની સમીક્ષા કરાશે, સાથે જ છેલ્લા ૧૨ વર્ષમાં કેન્દ્ર સરકાર દ્વારા અમલમાં મુકાયેલી વિવિધ કલ્યાણકારી યોજનાઓ અને જિલ્લામાં થયેલા વિકાસ કાર્યોની માહિતી પણ રજૂ કરવામાં આવી હતી. આ પ્રસંગે મંત્રી ઋષિકેશભાઈ પટેલે જણાવ્યું હતું કે, વડાપ્રધાન નરેન્દ્રભાઈ મોદીના નેતૃત્વ હેઠળ દેશે સર્વાંગી વિકાસની નવી દિશા પ્રાપ્ત કરી છે. પાણી, સિંચાઈ, શિક્ષણ, આરોગ્ય, કૃષિ, માર્ગ વ્યવસ્થા અને ગરીબ કલ્યાણ જેવા ક્ષેત્રોમાં ઐતિહાસિક કામગીરી થઈ છે. તેમણે ખાસ ઉલ્લેખ કર્યો કે ૨૦૨૧ દરમિયાન પાણી અને સિંચાઈ ક્ષેત્ર માટે અંદાજે ₹૨૫ હજાર કરોડની જોગવાઈ કરવામાં આવી હતી, જેના પરિણામે તળાવો ભરવા, પાઈપલાઈન નેટવર્ક વિસ્તૃત કરવા અને ખેડૂતોને પૂરતું પાણી ઉપલબ્ધ કરાવવાના કાર્યોને વેગ મળ્યો છે. મંત્રીશ્રીએ ઉમેર્યું કે, વાવ-થરાદ જેવા પાણીની સમસ્યાથી પીડાતા વિસ્તારોને પાણીદાર બનાવવાનું કાર્ય વડાપ્રધાનના દ્રઢ સંકલ્પથી આજે શક્ય બન્યું છે, જેનાથી કૃષિ ઉત્પાદન અને ખેડૂતોની આવકમાં નોંધપાત્ર વધારો થયો છે. મંત્રીશ્રીએ વધુમાં જણાવ્યું કે, કેન્દ્ર સરકારની વિવિધ યોજનાઓના લાભો છેવાડાના વ્યક્તિ સુધી પહોંચે તે માટે પારદર્શક અને અસરકારક અમલીકરણ કરવામાં આવ્યું છે. પ્રાકૃતિક ખેતીને પ્રોત્સાહન, મહિલાઓના સશક્તિકરણ, યુવાનોને રોજગારીની તકો, ગરીબોને આવાસ, નિઃશુલ્ક આરોગ્ય સેવાઓ અને ગુણવત્તાયુક્ત શિક્ષણ જેવી અનેક પહેલોથી સમાજના દરેક વર્ગના જીવનમાં સકારાત્મક પરિવર્તન આવ્યું છે. તેમણે વડાપ્રધાનના વિકસિત ભારત-૨૦૪૭ના વિઝનને આત્મનિર્ભર, સમૃદ્ધ, સુરક્ષિત અને સર્વસમાવેશી ભારતના નિર્માણ સાથે જોડ્યું, ભારપૂર્વક જણાવ્યું કે કેન્દ્ર સરકાર દેશની સુરક્ષા મજબૂત કરવા, વૈશ્વિક સ્તરે ભારતની પ્રતિષ્ઠા વધારવા અને સામાન્ય નાગરિકના જીવનધોરણમાં સુધારો લાવવા માટે સતત કાર્યરત છે. પ્રગતિપથ યાત્રાની સાથે થરાદ સ્થિત ગાયત્રી વિદ્યાલય ખાતે કેન્દ્ર સરકારની છેલ્લા ૧૨ વર્ષની સિદ્ધિઓને ઉજાગર કરતી ત્રણ દિવસીય પ્રદર્શનીનું પણ આયોજન કરવામાં આવ્યું છે. આ પ્રદર્શનીમાં વિવિધ વિકાસકાર્યો, જનકલ્યાણકારી યોજનાઓ અને દેશના સર્વાંગી વિકાસને દર્શાવતા માહિતીપ્રદ પ્રદર્શન ગોઠવવામાં આવ્યા છે, જેથી નાગરિકો સરકારની વિકાસયાત્રા અને જનહિતલક્ષી કામગીરીઓ વિશે વિસ્તૃત માહિતી મેળવી શકશે. આ અવસરે રાજ્યસભાના સાંસદ બાબુભાઈ દેસાઈ, જિલ્લા પંચાયત પ્રમુખ રત્નીબેન પરમાર, પૂર્વ સાંસદ પરબતભાઈ પટેલ, જિલ્લા અગ્રણી નરેશજી ઠાકોર, કરશનભાઈ પટેલ સહિતના મહાનુભાવો અને અધિકારીઓ ઉપસ્થિત રહ્યા હતા.

બનાસકાંઠાના દિયોદરમાં આરામ ગૃહ પાસે સમાધાન માટે આવેલા પતિ સહિત ત્રણ વ્યક્તિ પર પાંચ ઈસમોએ હુમલો કર્યો હતો, જેમાં ત્રણ લોકોને ગંભીર ઈજાઓ પહોંચી હતી. આ મામલે દિયોદર પોલીસ મથકે લેખિત ફરિયાદ આપ્યાના ચાર દિવસ વિત્યા છતાં પોલીસે કોઈ કાર્યવાહી ન કરતા ભોગ બનનાર પરિવારે ન્યાયની માંગ કરી છે. જાણવા મળતી વિગત મુજબ, દિયોદર તાલુકાના લીલાધર ગામના નરેશ ઈશ્વરભાઈ દેવીપૂજકની પત્ની છેલ્લા ત્રણ મહિનાથી રિસામણે પિયરમાં હતી. તેમને તેડવા નરેશભાઈ તેમના મોટાભાઈ તથા એક કુટુંબીને સાથે લઈને દિયોદર આરામ ગૃહ પાસે સમાધાન માટે આવ્યા હતા. સમાધાન દરમિયાન બોલાચાલી થતા અમુક ઈસમોએ સમાધાનનું મનદુઃખ રાખી અચાનક હુમલો કર્યો હતો. આ હુમલામાં ભરત ઈશ્વરભાઈ દેવીપૂજક, જુમીબેન કાનજીભાઈ દેવીપૂજક અને મંજુબેન ઈશ્વરભાઈ દેવીપૂજક (બે મહિલા અને એક પુરુષ)ને માથાના ભાગે ગંભીર ઈજાઓ પહોંચી હતી, જેના કારણે તેમને તાત્કાલિક સારવાર અર્થે હોસ્પિટલ ખસેડવામાં આવ્યા હતા. આ સમગ્ર મામલે ફરિયાદી નરેશ ઈશ્વરભાઈ દેવીપૂજકે દિયોદર પોલીસ મથકે પાંચાભાઈ રેવાભાઈ દેવીપૂજક, ભંભાભાઈ રાયચંદભાઈ દેવીપૂજક, વાલાભાઈ સગથાભાઈ દેવીપૂજક, રમીબેન પાંચાભાઈ દેવીપૂજક અને કરશનભાઈ દેવીપૂજક વિરુદ્ધ લેખિત ફરિયાદ આપી છે. જોકે, ફરિયાદી પરિવારના જણાવ્યા મુજબ, લેખિત અરજી આપ્યાને ચાર દિવસ જેટલો સમય વીતી ગયો હોવા છતાં પોલીસ દ્વારા આરોપીઓ સામે કોઈ કાયદેસરની કાર્યવાહી કરવામાં આવી નથી. ઈજાગ્રસ્તો હજુ પણ સારવાર હેઠળ છે અને આરોપીઓ ખુલ્લેઆમ ફરી રહ્યા હોવાથી પરિવારમાં ભયનો માહોલ છે. પરિવારે પોલીસ તંત્ર પાસે તાત્કાલિક તપાસ કરી આરોપીઓની ધરપકડ કરીને ન્યાય આપવાની માંગ કરી છે.