நாகப்பட்டினம் மாவட்டம் கீழ்வேளூர் சட்டமன்ற தொகுதியில் 'WE THE LEADER' அமைப்பின் தலைவர் அண்ணாமலை சார்பில், பொள்ளாச்சியில் நடைபெறும் போதையில்லா தமிழக விழிப்புணர்வு மாநாட்டிற்கு திருக்குவளையைச் சேர்ந்த தன்னார்வலர் ஆறு.திருமால்வளவன் தலைமையில் 100-க்கும் மேற்பட்டோர் சென்றுள்ளனர். கீழ்வேளூர் சட்டமன்ற தொகுதி 'WE THE LEADER' சார்பில் இந்த மாநாட்டில் பங்கேற்பதற்காக இவர்கள் அனைவரும் பொள்ளாச்சிக்கு பயணம் மேற்கொண்டுள்ளனர்.

நாகை மாவட்டம் கீழ்வேளூர் அருகே கீழக்கண்ணாப்பூரில் அமைந்துள்ள பழமை வாய்ந்த ஸ்ரீ வெற்றி விநாயகர், ஸ்ரீ பர்வத வர்த்தினி உடனுறை ஸ்ரீ பசுபதீஸ்வரர் கோயிலில் 14 ஆண்டுகளுக்குப் பிறகு மஹா கும்பாபிஷேக விழா வெகு விமர்சையாக நடைபெற்றது. இந்த விழா கடந்த ஜூலை 10ஆம் தேதி கணபதி ஹோமத்துடன் தொடங்கியது. அதனைத் தொடர்ந்து, இரண்டு கால யாக பூஜைகள் சிறப்பாக நடத்தப்பட்டு, மகா பூர்ணாஹூதி நிகழ்ச்சியும் நடைபெற்றது. இதனைத் தொடர்ந்து, சிவவாத்தியங்கள் மற்றும் மேளதாளங்கள் முழங்க, யாகசாலையில் இருந்து புனித நீர் கொண்ட கலசங்கள் ஊர்வலமாக கொண்டு செல்லப்பட்டன. கோபுர கலசங்களில் புனித நீர் ஊற்றப்பட்டு மஹா கும்பாபிஷேகம் நடைபெற்ற பின், பக்தர்கள் மீது புனித நீர் தெளிக்கப்பட்டது. பின்னர் மூலவர் அம்பாள் உள்ளிட்ட பரிவார தெய்வங்களுக்கு அபிஷேகம் செய்யப்பட்டு மகாதீபாரதனை காண்பிக்கப்பட்டது. இந்த விழாவில் சுற்றுவட்டார பகுதிகளைச் சேர்ந்த திரளான பக்தர்கள் கலந்து கொண்டு சாமி தரிசனம் செய்தனர். மேலும், விழாவில் கலந்து கொண்ட பக்தர்களுக்கு அன்னதானம் மற்றும் நீர் மோர் வழங்கப்பட்டது.

தமிழகத்தில் அரசியல் கட்சி நிர்வாகிகள் யாரும் அரசுப் பள்ளிகளுக்குள் நுழைந்து ஆய்வு செய்யக்கூடாது என்ற பள்ளிக்கல்வித்துறை அமைச்சர் ராஜமோகனின் கடுமையான உத்தரவை மீறி, திருவிடைமருதூர் அருகே தமிழக வெற்றிக்கழக நிர்வாகிகள் அரசுப் பள்ளிக்குள் புகுந்து ஆய்வு நடத்தியுள்ளனர். தஞ்சாவூர் மாவட்டம் திருவிடைமருதூர் அருகே உள்ள திருமலைராஜபுரம் ஊராட்சி அரசு ஆதிதிராவிடர் நல உயர்நிலைப் பள்ளியில் இச்சம்பவம் நடந்துள்ளது. இப்பள்ளியில் உள்ள கழிவறைகள் பழுதடைந்து, மாணவர்கள் பயன்படுத்த முடியாத அவல நிலையில் இருப்பது குறித்து ஊடகங்களில் செய்தி வெளியானது. இதையடுத்து, தமிழக வெற்றிக்கழகத்தின் திருவிடைமருதூர் மத்திய கிழக்கு ஒன்றிய செயலாளர் ரத்னவேல் தலைமையில் அக்கட்சியின் நிர்வாகிகள் அங்கு நேரில் சென்று பழுதடைந்த கழிவறைகளை ஆய்வு செய்தனர். மேலும், திருவிடைமருதூர் துணை வட்டார வளர்ச்சி அலுவலரை (BDO) உடனடியாக பள்ளிக்கு வரவழைத்து, கழிவறைகளை உடனடியாகச் சீரமைக்க வேண்டும் என உத்தரவு போடும் பாணியில் அறிவுறுத்தல்களை வழங்கியுள்ளனர். அரசுப் பள்ளிக்குள் நுழைந்து ஆய்வு நடத்தியது மட்டுமின்றி, தாங்கள் ஆய்வு செய்த புகைப்படங்களை தவெக நிர்வாகிகள் தங்களது வாட்ஸ்அப் குழுக்களிலும் பகிர்ந்துள்ளனர். அமைச்சரின் தடையையும் மீறி தவெக நிர்வாகிகள் அரசுப் பள்ளியில் ஆய்வு மேற்கொண்ட இச்சம்பவம், அரசுத்துறை அதிகாரிகளிடையே அதிர்ச்சியை ஏற்படுத்தியதோடு அரசியல் வட்டாரத்திலும் பெரும் பரபரப்பை ஏற்படுத்தியுள்ளது.

தஞ்சாவூர் மாவட்டம் திருவையாறு பகுதியில் குளத்தை தூர்வார வேண்டும் என்ற கோரிக்கை எழுந்துள்ளது. அத்துடன், அங்கு வளர்ந்துள்ள வேலிக் கருவை மரங்களை வெட்ட வேண்டும் என்றும் வலியுறுத்தப்பட்டுள்ளது.

புதுக்கோட்டை மாவட்டம் திருமயத்தில் புதிதாக திறக்கப்பட்ட கண்ணன் மல்டி ஸ்பெஷாலிட்டி மருத்துவமனை சார்பில் மாபெரும் இலவச மருத்துவ முகாம் நடைபெற்றது. இந்த முகாமில் தீவிர சிகிச்சை மற்றும் சர்க்கரை நோய் சிறப்பு மருத்துவர் கண்ணன், இதயம் மற்றும் சர்க்கரை நோய் சிறப்பு மருத்துவர் மகேந்திரன் ஆகியோர் கலந்து கொண்டு பொதுமக்களுக்கு மருத்துவப் பரிசோதனைகளை மேற்கொண்டனர். இந்த முகாமில் ரத்த அழுத்தம், சர்க்கரை நோய், பொது மருத்துவம் மற்றும் இதயம் சம்பந்தப்பட்ட நோய்களுக்கான பரிசோதனைகள் செய்யப்பட்டன. மேலும், பரிசோதனை செய்யப்பட்ட நபர்களுக்கு இலவசமாக இசிஜி எடுக்கப்பட்டு, 10 நாட்களுக்கு இலவசமாக மருந்து மாத்திரைகளும் வழங்கப்பட்டன. இதில் சுற்றுவட்டாரப் பகுதிகளைச் சேர்ந்த 300-க்கும் மேற்பட்ட பொதுமக்கள் கலந்து கொண்டு தங்களது உடலைப் பரிசோதனை செய்து கொண்டனர்.

திருச்சி மாவட்டம் மணப்பாறையை அடுத்த ராஜிவ் நகரில் அமைந்துள்ள மீனாட்சி சுந்தரேஸ்வரர் திருக்கோயிலில் பிரதோஷ வழிபாடு மிகச் சிறப்பாக நடைபெற்றது. இந்த வழிபாட்டின் போது நத்திகேஸ்வரருக்கு பால், தயிர், இளநீர், திருமஞ்சனப் பொடி உள்ளிட்ட 16 வகையான சிறப்பு அபிஷேகங்கள் செய்யப்பட்டன. இக்கோயிலில் கடந்த மாதம் கும்பாபிஷேக விழா நடைபெற்ற நிலையில், அதனைத் தொடர்ந்து நேற்று முதல் பிரதோஷ விழா நடைபெற்றது. இதனைத் தொடர்ந்து மீனாட்சி சுந்தரேஸ்வரரின் உலா நடைபெற்றதோடு, சிறப்பு அலங்காரத்துடன் தீபாராதனை காட்டப்பட்டது. இந்த வழிபாட்டில் திரளான பக்தர்கள் கலந்து கொண்டு சுவாமி தரிசனம் செய்தனர்.

திருச்சி மாவட்டம் தொட்டியம் வட்டம் காட்டுப்பட்டியில் அமைந்துள்ள ஸ்ரீ மதுர காளியம்மன் கோவில் திருவிழா இன்றுடன் தொடங்குவதையொட்டி சிறப்பு பூஜைகள் நடத்தப்பட்டன. இவ்விழாவையொட்டி, மூலவர் மதுரகாளியம்மன், விநாயகர், முருகன் மற்றும் கருப்பண்ணசாமி உள்ளிட்ட பரிவார தெய்வங்களுக்குச் சிறப்பு அபிஷேகங்களும் ஆராதனைகளும் செய்யப்பட்டன. இந்தத் திருவிழா பூஜையில் காட்டுப்புத்தூர், காந்திநகர், கணபதிபாளையம், சீதப்பட்டி மற்றும் தவிட்டுப்பாளையம் உள்ளிட்ட சுற்றுவட்டாரப் பகுதிகளைச் சேர்ந்த ஏராளமான பொதுமக்களும் பக்தர்களும் திரளாகக் கலந்துகொண்டு சாமி தரிசனம் செய்தனர்.

'வீ த லீடர்ஸ்' அமைப்பின் சார்பில், 'போதையில்லா தமிழகம்' விழிப்புணர்வு மாநாடு பொள்ளாச்சி அருகே ஆச்சிப்பட்டியில் இன்று மாலை நடைபெற உள்ளது. இம்மாநாட்டில் அமைப்பின் தலைவர் அண்ணாமலை பங்கேற்று சிறப்புரையாற்ற உள்ளார். இந்த மாநாட்டில் அவர் வெளியிட உள்ள முக்கிய அறிவிப்புகள் குறித்து அவரது ஆதரவாளர்கள் மட்டுமின்றி, பல்வேறு அரசியல் கட்சிகளும் மிகுந்த ஆவலுடன் எதிர்பார்த்துக் காத்துக் கொண்டிருக்கின்றன. இந்நிலையில், பொள்ளாச்சியில் நடைபெறும் இந்த மாநாட்டில் பங்கேற்பதற்காகத் திருச்சி மாவட்டம் மணப்பாறை பகுதியில் இருந்து ஏராளமான 'வீ த லீடர்ஸ்' அமைப்பின் உறுப்பினர்கள் பொள்ளாச்சி நோக்கித் தங்களது பயணத்தைத் தொடங்கியுள்ளனர்.

சமயபுரம் மாரியம்மன் கோயில் கார் பார்க்கிங் பகுதியில் பக்தர்களுக்கும் பொதுமக்களுக்கும் மிகச் சிறந்த முறையில் அன்னதானம் வழங்கப்பட்டுள்ளது. அங்கு வந்திருந்த மக்களுக்கு இந்த அன்னதான உணவு சிறப்பான முறையில் விநியோகம் செய்யப்பட்டதற்கு நன்றியும் வணக்கமும் தெரிவிக்கப்பட்டுள்ளது.