आज, २१ जून रोजी भोकर येथील ग्रामीण रुग्णालयात आंतरराष्ट्रीय योग दिन साजरा करण्यात आला. जिल्हा शल्य चिकित्सक डॉ. संजय पेरके सर, अतिरिक्त जिल्हा शल्य चिकित्सक डॉ. अनुपमा शिंदे मॅडम आणि निवासी वैद्यकीय अधिकारी डॉ. राजाभाऊ बुट्टे सर यांच्या सूचनेनुसार, तसेच ग्रामीण रुग्णालय भोकरचे वैद्यकीय अधिक्षक डॉ. प्रताप चव्हाण सर यांच्या मार्गदर्शनाखाली हा कार्यक्रम आयोजित करण्यात आला होता. या कार्यक्रमात वैद्यकीय अधिकारी डॉ. मंगेश पवळे यांनी विविध योग प्रकारांची माहिती देत अभ्यासपूर्ण मार्गदर्शन केले. तालुका आरोग्य अधिकारी डॉ. संदेश जाधव सर यांनी योगाचे महत्त्व पटवून सांगितले. यावेळी भोकर ग्रामीण रुग्णालयाचे अधिकारी, कर्मचारी आणि नागरिकांची उपस्थिती होती. आयुष वैद्यकीय अधिकारी डॉ. विजयालक्ष्मी किणीकर यांनी कार्यक्रमाचे सूत्रसंचालन केले, तर डॉ. विनायक थोरवट यांनी आभार प्रदर्शन केले.

नांदेड जिल्ह्यातील नायगाव तालुक्यात असलेल्या शेलगाव ग्रामपंचायतीत आजही पाण्यासाठी तीव्र टंचाई असून, गावातील कोणत्याही नागरिकाला घरपोच पाणी मिळत नाही. महाराष्ट्र शासनातर्फे अनेक योजना उपलब्ध करून दिल्या जात असताना आणि गावात जलजीवन मिशनसारख्या योजनेचे काम झाले असतानाही, ही समस्या कायम आहे. पिण्याच्या पाण्यापासून दैनंदिन वापराच्या पाण्यापर्यंत प्रत्येक गोष्टीसाठी गावकऱ्यांना पाणी विकत घ्यावे लागते, ज्यामुळे त्यांची अवस्था स्वातंत्र्यपूर्व काळासारखी झाली आहे. गावात नळजोडणी झालेली असली तरी, या नळांना पाणीच येत नाही. एवढेच नाही तर, गावातील हातपंप किंवा सार्वजनिक बोअरवेलमध्येही पाणी उपलब्ध नाही. गावातील काही भागांमध्ये रस्ते खाली गेले असून नाले उंच झाल्याने पावसाळ्यात या रस्त्यांमध्ये पाणी साचून तळ्यासारखी स्थिती निर्माण होते. काही ठिकाणी नाल्यांची बिले उचलली गेली असली तरी, तिथे नाले बांधले गेलेले नाहीत. नामफलकावर दर्शवल्याप्रमाणे नाले जेवढ्या रस्त्यावर दाखवले आहेत, त्याच्या अर्ध्या भागातच काम झाले असून अर्धा भाग तसाच अपूर्ण आहे, असा भोंगळ कारभार या गावात दिसून येतो. ग्रामपंचायतीत कागदपत्रे काढणे असो किंवा इतर कामे असो, ग्रामस्थांना अनेक अडचणींचा सामना करावा लागतो. गावातील सरंपच महिन्यातून केवळ एक-दोन वेळा गावात येत असल्याने ग्रामस्थांच्या अनंत समस्या अधिकच वाढत आहेत.

नांदेड जिल्ह्यातील केमिस्ट संघटनेच्या निवडणुकीसाठीचे मतदान २८ जून रोजी होणार आहे. नांदेड जिल्हा केमिस्ट संघटनेच्या या निवडणुकीसाठीची मतदानाची प्रक्रिया २८ जूनला पूर्ण केली जाईल.

देगलूरमध्ये शिवसेना उद्धव बाळासाहेब ठाकरे पक्षाचे उपजिल्हाप्रमुख महेश पाटील यांनी पक्षाचे खासदार शिंदे गटात सामील झाल्याच्या पार्श्वभूमीवर तीव्र संताप व्यक्त केला आहे. त्यांनी थेट इशारा दिला की, "पिस्तूल असती तर गद्दार खासदारांना गोळ्या घातल्या असत्या. समोर आल्यावर पायातील जोडा काढून मारणार." खासदारांनी पक्षासोबत केलेल्या कथित दगाबाजीवर आपली तीव्र नाराजी व्यक्त करत पाटील यांनी हे वक्तव्य केले. त्यांच्या या संतप्त इशाऱ्यामुळे सध्या राजकीय वर्तुळात जोरदार चर्चा सुरू झाली आहे.

उदगीर शहरातील नांदेड नाका परिसरात म्हशी आणि ट्रॅक्टर ट्रॉली चोरून त्यांची विक्री करणाऱ्या एका संशयित व्यक्तीला नागरिकांच्या सतर्कतेमुळे पकडण्यात आले आहे. नागरिकांनी त्याला ताब्यात घेऊन पोलिसांच्या स्वाधीन केल्याने परिसरात एकच खळबळ उडाली. मिळालेल्या माहितीनुसार, या संशयितावर यापूर्वीही म्हशी आणि ट्रॅक्टर चोरून विकल्याचा संशय होता. काही नागरिकांना तो नांदेड नाका परिसरात फिरत असल्याची माहिती मिळताच, त्यांनी त्याच्यावर बारीक लक्ष ठेवले. त्याच्या हालचाली संशयास्पद वाटल्याने नागरिकांनी त्वरीत त्याला पकडले आणि घटनेची माहिती पोलिसांना दिली. माहिती मिळताच पोलिसांनी घटनास्थळी धाव घेतली आणि संशयिताला ताब्यात घेऊन पुढील चौकशीसाठी पोलीस ठाण्यात नेले. पोलिसांनी या प्रकरणातील चोरीच्या इतर घटनांशी त्याचा संबंध आणि त्याच्या साथीदारांचा सहभाग आहे का, याबाबत सखोल तपास सुरू केला आहे. नागरिकांनी दाखवलेल्या या सतर्कतेचे सर्वत्र कौतुक होत आहे. परिसरातील नागरिकांनी प्रतिक्रिया दिली की, गुन्हेगारांना पकडण्यासाठी नागरिक आणि पोलिसांनी समन्वयाने काम केल्यास गुन्हेगारीला आळा घालता येतो. सध्या, "नागरिकांच्या जागरूकतेमुळे चोरीच्या घटनांमागील संशयित पोलिसांच्या ताब्यात; पुढील तपास सुरू" अशी चर्चा संपूर्ण शहरात सुरू आहे.

Post by Nandkumar Motiram Totewad

गेल्या तीन दिवसांपासून धुमाकूळ घालत असलेल्या दराटीच्या माकडाला अखेर जेरबंद करण्यात आले आहे. वन विभागाला हे यश मिळाले असून, त्यांच्या अथक प्रयत्नांनंतर माकडाला पकडण्यात आले.

नांदेड परिक्षेत्राचे पोलीस उपमहानिरीक्षक शहाजी उमाप यांच्या 'नियमीत योगा ही आरोग्यासाठी संजीवनी आहे' या आवाहनासह, नांदेड शहरात २१ जून २०२६ रोजी १२ वा आंतरराष्ट्रीय योग दिन मोठ्या उत्साहात साजरा करण्यात आला. याप्रसंगी जिल्हाधिकारी राहुल कर्डिले यांनी 'करो योग रहो निरोग' असा संदेश देत सर्वांना शुभेच्छा दिल्या. हा सोहळा पोलीस कवायत मैदान, वजिराबाद, नांदेड येथे सकाळी ७ वाजता आयोजित करण्यात आला होता. भारत सरकारच्या आयुष मंत्रालयाच्या निर्देशानुसार, पंतप्रधान महोदयांनी २०१४ च्या राष्ट्रीय महासभेत २१ जून हा दिवस दरवर्षी आंतरराष्ट्रीय योग दिन म्हणून साजरा करण्याचा ऐतिहासिक निर्णय घेतला होता. योग हा भारतीय संस्कृती वारसाचा अविभाज्य घटक असल्याने, जगभरात योगासनाची परंपरा स्वीकारणे ही आपल्या देशासाठी अभिमानाची बाब आहे, असे या कार्यक्रमात अधोरेखित करण्यात आले. या १२ व्या आंतरराष्ट्रीय योग दिनाचे आयोजन आयुष मंत्रालय, भारत सरकार, महाराष्ट्र शासन, क्रीडा व युवक सेवा संचालनालय पुणे, जिल्हा प्रशासन नांदेड, जिल्हा क्रीडा अधिकारी कार्यालय नांदेड, शिक्षण विभाग, जिल्हा परिषद नांदेड, जिल्हा पोलिस अधीक्षक कार्यालय, युवा अधिकारी माय भारत, लोकमत समूह सखी मंच, योग विद्या धाम, पतंजली योग समिती, आर्ट ऑफ लिव्हिंग, जिल्हा योग संघटना नांदेड, योग विद्येचा प्रसार करणाऱ्या स्थानिक संस्थांचे प्रतिनिधी आणि विविध खेळ संघटना यांच्या संयुक्त विद्यमाने करण्यात आले होते. कार्यक्रमास नांदेड वाघाळा शहर महानगरपालिकेचे आयुक्त महेशकुमार डोईफोडे, सहायक जिल्हाधिकारी तथा प्रकल्प अधिकारी डॉ. बी. सरवणन, पोलीस उपअधीक्षक श्रीमती अश्विनी जगताप, युवा अधिकारी श्रीमती अस्नी कनकटे, उपमुख्य कार्यकारी अधिकारी राजकुमार मुक्कावार, माध्यमिक शिक्षणाधिकारी माधव सलगर, सहा. आयुक्त शिवानंद मिनगीरे, लोकमत वृत्त संपादक राजेश निस्ताने, लोकमत उप सरव्यवस्थापक रमेश तावडे, जिल्हा क्रीडा अधिकारी जयकुमार टेंभरे आणि उपशिक्षणाधिकारी रामचंद्र पाचंगे यांसह अनेक मान्यवर उपस्थित होते, ज्यांचे पुष्पगुच्छ देऊन स्वागत करण्यात आले. कार्यक्रमादरम्यान पतंजली योग समिती, योग विद्या धाम आणि आर्ट ऑफ लिव्हिंग यांच्या वतीने आयुष मंत्रालयाच्या प्रोटोकॉलनुसार राम शिवपनोर, श्रीमती महानंद माळगे, नागोराव पोलादवार, विठ्ठल तुम्मोड, श्रीमती सारिता जोशी, शिवा बिरकले आणि डॉ. प्रियंका गंगातिरे यांनी उपस्थितांना योगासनाचे धडे दिले. याप्रसंगी पंढरीनाथ कंठेवाड, महारुद्र माळगे, डॉ. सायन्ना मठठमवार, श्रीमती कविता आष्टुरकर, ॲड. मणिकुमारी बत्तूला (डांगे) व स्नेहल कोळणुरकर आदींनी योगसाधकांच्या कृतींमधील सुधारणा करण्याचे काम केले. श्रीमती सपना भागवत यांनी सूत्रसंचालन केले, तर राज्य क्रीडा मार्गदर्शक तथा कार्यासन बालाजी शिरसीकर यांनी आभारप्रदर्शन केले. जिल्ह्याच्या ऑक्सफर्ड द ग्लोबल स्कुल, ऑक्सफर्ड द इंग्लिश मेडीय स्कुल, गुरुकुल इंग्लिश मे.स्कुल, पिनॅकल इंटरनॅशनल स्कुल, नेहरु इंग्लिश स्कुल, केंब्रिज हायस्कुल, इंदिरा इंटरनॅशनल स्कुल यासह विविध शाळा/संस्थांचे विद्यार्थी, क्रीडा संघटनांचे खेळाडू मुले-मुली व पदाधिकारी, महाराष्ट्र महिला पोलीस संघ, नांदेड जिल्हा स्काऊट्स व गाईड्स, विविध शासकीय कार्यालयाचे अधिकारी/कर्मचारी, पोलीस अधिकारी/कर्मचारी, नांदेड जिल्हा योग संघटना आणि योगप्रेमींनी या योग दिन कार्यक्रमात उत्स्फूर्तपणे सहभाग नोंदवला.

परभणी जिल्ह्यातील मानवत तालुक्यातील यशवाडी येथे एक दुर्दैवी घटना समोर आली आहे. यशवाडी येथील मारुती मंदिराच्या सभामंडपाचा काही भाग कोसळल्याची प्राथमिक माहिती समोर येत आहे. या दुर्घटनेमुळे अनेक भाविक ढिगाऱ्याखाली अडकले असल्याची भीती व्यक्त केली जात आहे. घटनेची माहिती मिळताच बचावकार्य युद्धपातळीवर सुरू करण्यात आले आहे. प्रशासन, पोलीस आणि आपत्ती व्यवस्थापन पथके तातडीने घटनास्थळी दाखल झाली असून, ढिगाऱ्याखाली अडकलेल्या भाविकांना बाहेर काढण्यासाठी शर्थीचे प्रयत्न करत आहेत. सध्या या घटनेबाबत अधिकृत माहितीची प्रतीक्षा आहे. या दुर्घटनेतील बाधित नागरिकांना लवकरात लवकर मदत मिळो व सर्वजण सुरक्षित राहोत, अशी प्रार्थना केली जात आहे.