యాదాద్రి భువనగిరి జిల్లాలోని మోత్కూరు మున్సిపాలిటీకి నూతన కమిషనర్‌గా గోల్కొండ నరసయ్యను నియమిస్తూ రాష్ట్ర ప్రభుత్వం ఉత్తర్వులు జారీ చేసింది. ప్రస్తుతం మోత్కూరు మున్సిపాలిటీ కమిషనర్‌గా విధులు నిర్వహిస్తున్న కే. సతీష్ కుమార్‌ను హుజూర్‌నగర్ మున్సిపాలిటీకి బదిలీ చేసిన నేపథ్యంలో, ఆయన స్థానంలో నరసయ్యను నియమించారు. నూతన కమిషనర్‌గా నియమితులైన గోల్కొండ నరసయ్య గతంలో యాదగిరిగుట్ట మున్సిపాలిటీలో మేనేజర్‌గా పనిచేశారు. అనంతరం ఆయన డిప్యుటేషన్‌పై నారాయణఖేడ్ మున్సిపాలిటీ కమిషనర్‌గా నియమితులై, ప్రస్తుతం అక్కడ బాధ్యతలు నిర్వర్తిస్తున్నారు. అధికార వర్గాలు తెలిపిన వివరాల ప్రకారం, గోల్కొండ నరసయ్య త్వరలోనే మోత్కూరు మున్సిపాలిటీ కమిషనర్‌గా బాధ్యతలు స్వీకరించనున్నారు.

తెలంగాణలో కాంగ్రెస్ పార్టీ ఆధ్వర్యంలో 17 పార్లమెంట్ నియోజకవర్గాలకు చెందిన జిల్లా అధ్యక్షులు, పార్లమెంట్ సభ్యులు, ప్రజాప్రతినిధులు, ఎమ్మెల్యేలు మరియు పార్టీ ముఖ్య నాయకులతో కలిసి ఎస్‌ఐఆర్ (స్పెషల్ ఇంటెన్సివ్ రివిజన్) ప్రక్రియపై గాంధీ భవన్‌లో ఒక విస్తృత స్థాయి అవగాహన సమావేశం నిర్వహించారు. ఈ సమావేశంలో భువనగిరి ఎంపీ శ్రీ చామల కిరణ్ కుమార్ రెడ్డి గారు పాల్గొన్నారు. పశ్చిమ బెంగాల్ మరియు బీహార్ రాష్ట్రాలలో ఎన్నికల కమిషన్ బీజేపీ ప్రభావంతో ఎస్‌ఐఆర్ విధానాన్ని ఎలా అమలు చేసిందో, ఆ ప్రక్రియ వల్ల అక్కడి ప్రజాస్వామ్య వ్యవస్థపై ఎలాంటి ప్రతికూల ప్రభావం పడిందో తాము స్పష్టంగా గమనించామని నాయకులు పేర్కొన్నారు. తెలంగాణలో అలాంటి పరిస్థితి పునరావృతం కాకుండా ముందస్తు జాగ్రత్త చర్యలు తీసుకోవాలని ఈ సమావేశంలో నిర్ణయం తీసుకున్నారు. హైదరాబాద్‌లోని గాంధీ భవన్‌లో జరిగిన ఈ సమావేశంలో ఎస్‌ఐఆర్ ప్రక్రియ ఎలా ఉంటుంది, ఎన్నికల కమిషన్ విధానాలు ఏమిటి, ఓటరు జాబితా సవరణలకు అవసరమైన పత్రాలు ఏవి, వాటిని సమయానికి ఎలా సమర్పించాలి, అలాగే బూత్ స్థాయి ఏజెంట్లు (బీఎల్‌ఏలు) నిర్వహించాల్సిన బాధ్యతలు, వారి పాత్ర వంటి అంశాలపై సమగ్రంగా చర్చించారు.

తెలంగాణలో ఎండలు మండిపోతూ భూగర్భ జలాలు అడుగంటుతున్నప్పటికీ, నకిరేకల్ నియోజకవర్గంలో వేలాది క్యూసెక్కుల మూసీ నీరు కాలువల గుండా వృథాగా పోతోంది. 'సూపర్ ఎలినో' ప్రభావంతో తెలంగాణలో తీవ్ర వర్షాభావ పరిస్థితులు ఏర్పడే ప్రమాదం ఉందని ప్రభుత్వాలే స్వయంగా హెచ్చరిస్తున్న ఇలాంటి గడ్డు కాలంలో ప్రతి నీటి చుక్కను ప్రాణప్రదంగా కాపాడుకోవాల్సిన ఆవశ్యకత ఉన్నా, కళ్లముందే భారీగా నీరు పారుతోంది. గ్రామాల్లో మూసీ బెల్ట్ కింద వరి కోతలు ఎప్పుడో పూర్తయ్యాయి, పొలాలన్నీ ఖాళీగా దర్శనమిస్తున్నాయి. పంటలకు నీటి అవసరం లేకపోయినప్పటికీ, కాలువలకు నీటి సరఫరాను నిలిపివేయడంలో అధికారులు నిర్లక్ష్యం వహిస్తున్నారని ఆరోపణలు వెల్లువెత్తుతున్నాయి. సాధారణంగా వరి కోతలు ముగిసిన వెంటనే కాలువల గేట్లు మూసివేసి, నీటిని మూసీ ప్రాజెక్ట్‌లోనే నిల్వ ఉంచాలి. కానీ, ఇక్కడ పరిస్థితి దీనికి విరుద్ధంగా ఉంది: పొలాల్లో పంట లేకపోయినా, కాలువల్లో నీరు ఉధృతంగా ప్రవహిస్తూ వృథాగా పోతోంది. నియోజకవర్గంలోని పలు గ్రామాల్లో కాలువల గుండా నీరు వృథాగా పోతున్నా, వాటిని అడ్డుకునే నాథుడే కరువయ్యాడు. ఈ వృథా కారణంగా డ్యామ్‌లో నీటి మట్టం పడిపోవడమే కాకుండా, రాబోయే వానకాలంలో తీవ్ర నీటి కొరత ఏర్పడే ప్రమాదం పొంచి ఉంది. వాతావరణ శాఖ హెచ్చరికల ప్రకారం రాబోయే కాలం మరింత కఠినంగా ఉండనుందని, ఇప్పుడు నీటిని పొదుపు చేయకపోతే వచ్చే వానకాలంలో రైతాంగానికి సాగునీరు అందక పంటలు ఎండిపోయే ప్రమాదం ఉందని హెచ్చరిస్తున్నారు. అంతేకాకుండా, పశుపక్షాదులకు తాగడానికి చుక్క నీరు దొరకని పరిస్థితి, గ్రామీణ ప్రాంతాల్లో తీవ్ర తాగునీటి ఎద్దడి తలెత్తుతాయని నిపుణులు ఆందోళన వ్యక్తం చేస్తున్నారు. ఈ తీవ్రమైన సమస్యపై స్థానిక నకిరేకల్ నియోజకవర్గ ఎమ్మెల్యే కానీ, ఇతర ప్రజాప్రతినిధులు కానీ కనీసం దృష్టి సారించడం లేదని, ప్రజల సమస్యలను, భవిష్యత్తు ముప్పును గుర్తించాల్సిన నాయకులు ఉదాసీనంగా వ్యవహరించడంపై స్థానిక రైతులు తీవ్ర ఆగ్రహం వ్యక్తం చేస్తున్నారు. నీటి పారుదల శాఖ అధికారులు సైతం కార్యాలయాలకే పరిమితమవ్వడం వల్ల ఈ వృథా అప్రతిహతంగా కొనసాగుతోందని విమర్శలు వస్తున్నాయి. ఈ పరిస్థితిపై స్థానిక ఎమ్మెల్యే, ఇరిగేషన్ అధికారులు తక్షణమే స్పందించాలని, వెంటనే కాలువలకు నీటి విడుదలను నిలిపివేసి, మూసీ డ్యామ్‌లో నీటిని నిల్వ చేయాలని మేధావులు, రైతులు డిమాండ్ చేస్తున్నారు. భవిష్యత్తును దృష్టిలో ఉంచుకుని నీటి సంరక్షణ చర్యలు చేపట్టకపోతే, రాబోయే రోజుల్లో నకిరేకల్ ప్రాంతం తీవ్ర నీటి క్షామంలో కొట్టుమిట్టాడక తప్పదని వారు హెచ్చరిస్తున్నారు. 'ఇప్పుడు వృథా చేసే ప్రతి నీటి చుక్క.. రేపు మన కన్నీటి చుక్క కాకముందే కళ్లు తెరవండి!' అంటూ వారు తీవ్ర హెచ్చరిక చేశారు.

ప్రజా పాలన ప్రగతి ప్రణాళికలో భాగంగా, మహిళా సంక్షేమ వారోత్సవాల కింద సిరిసిల్లలోని జిల్లా సమీకృత కార్యాలయాల సముదాయంలో నిర్వహించిన మాక్ పార్లమెంట్ చూపరులను విశేషంగా ఆకట్టుకుంది. స్నేహ (సేఫ్టీ, న్యూట్రిషన్, ఎంపవర్ మెంట్ అండ్ హెల్త్ ఫర్ అడో లేస్సెంట్) సంఘాల సభ్యులు ఈ మాక్ పార్లమెంట్‌ను నిర్వహించారు. ఈ కార్యక్రమంలో జిల్లా కలెక్టర్ గరిమ అగ్రవాల్, ఎస్పీ మహేష్ బి గితే పాల్గొన్నారు. ఈ మాక్ పార్లమెంట్‌లో స్నేహ సంఘాల విద్యార్థులు అధికార, ప్రతిపక్ష పార్టీ సభ్యులుగా ఏర్పడి, స్పీకర్ సమక్షంలో పలు కీలక అంశాలపై చర్చించారు. బాల్య వివాహాల నిర్మూలన, బాలికల హక్కులు, విద్య, వివిధ సామాజిక అంశాలపై సుదీర్ఘంగా చర్చించి, అందరికీ ఆయా అంశాలపై అవగాహన కల్పించేలా చక్కగా వివరించారు. కార్యక్రమం ప్రారంభంలో జయ జయహే తెలంగాణ పాటను ఆలపించారు. అమ్మకు అక్షరమాల పథకం కింద చదువు నేర్చుకున్న వారిని ఈ సందర్భంగా సన్మానించారు. మాక్ పార్లమెంట్‌లో ఉత్తమ ప్రతిభ కనబరిచిన వారికి నగదు బహుమతితో పాటు షీల్డును అందజేసి అభినందనలు తెలియజేశారు.

నల్లబెల్లి మండలం నాగరాజుపల్లె గ్రామ పంచాయతీ పరిధిలోని పల్లె నర్సయ్యపల్లెలో నూతన అంగన్‌వాడీ భవన నిర్మాణానికి నర్సంపేట ఎమ్మెల్యే దొంతి మాధవరెడ్డి శంకుస్థాపన చేశారు. ఈ కార్యక్రమంలో గ్రామ సర్పంచ్ ఎరుకల లలిత రఘు, ఉప సర్పంచ్, పంచాయతీ కార్యదర్శి, వార్డు సభ్యులు, ప్రజాప్రతినిధులు, అధికారులు, గ్రామస్తులు పెద్ద సంఖ్యలో పాల్గొన్నారు. ఈ సందర్భంగా ఎమ్మెల్యే మాట్లాడుతూ, కొత్తగా నిర్మించనున్న ఈ భవనంతో చిన్నారులకు మెరుగైన సౌకర్యాలు అందనున్నాయని తెలిపారు.

మాసబ్ ట్యాంక్‌లో హత్యకు గురైన న్యాయవాది ఖాజా మొయినుద్దీన్ కుటుంబాన్ని కేటీఆర్, ఆర్ఎస్ ప్రవీణ్ కుమార్, తలసాని శ్రీనివాస్ యాదవ్ సహా పలువురు బీఆర్ఎస్ నాయకులు పరామర్శించారు.

వరంగల్ జిల్లాలోని వర్ధన్నపేట మండలం ఇల్లంద గ్రామంలో ఘోర అగ్నిప్రమాదం సంభవించింది. ఈ దుర్ఘటనలో ఒక రైతుకు చెందిన ఆయిల్ ఫామ్ తోట పూర్తిగా కాలిపోయింది. గుర్తు తెలియని వ్యక్తులు సమీప పొలంలో వరి కొయ్యలను తగలబెట్టడంతో ప్రారంభమైన మంటలు, పక్కనే ఉన్న తల్లక్కపెళ్లి లోకేష్‌కు చెందిన ఎనిమిది ఎకరాల ఆయిల్ ఫామ్ తోటకి వేగంగా వ్యాపించాయి. ఎండ తీవ్రత కారణంగా మంటలు మరింత విస్తరించి, తోట పూర్తిగా దగ్ధమైంది. ఈ ప్రమాదంలో సుమారు 400కు పైగా ఆయిల్ ఫామ్ మొక్కలు, డ్రిప్ ఇరిగేషన్ వ్యవస్థ ధ్వంసమయ్యాయి. రైతుకు దాదాపు ₹20 లక్షల మేర నష్టం వాటిల్లినట్లు అంచనా. నష్టపోయిన రైతును ప్రభుత్వం నష్టపరిహారం అందించి ఆదుకోవాలని బాధిత రైతు కోరుతున్నారు.