અમદાવાદ જિલ્લાના ધંધુકા રોજકા રોડ પર એક ગાડીમાં આગ લાગવાની ઘટના બની હતી, જેના કારણે સમગ્ર વિસ્તારમાં અફરાતફરીનો માહોલ સર્જાયો હતો. આ ઘટનામાં ગાડીના ચાલકનો આબાદ બચાવ થયો હતો.

અમદાવાદ જિલ્લાના ધંધુકામાં આવનાર મોહરમ પૂર્વે પોલીસ દ્વારા ફ્રૂટ પેટ્રોલિંગ હાથ ધરવામાં આવ્યું હતું. ધંધુકાના DY SP અને PI સહિતના પોલીસ કાફલાએ વિવિધ વિસ્તારોમાં ફ્રૂટ પેટ્રોલિંગ કર્યું હતું. આ દરમિયાન, પોલીસે જુદા જુદા વિસ્તારોમાં બાઝ નજર રાખી હતી અને સંવેદનશીલ વિસ્તારોની પણ મુલાકાત લીધી હતી, જેના પરિણામે મોહરમ પૂર્વે ધંધુકામાં ચુસ્ત પોલીસ બંદોબસ્ત ગોઠવવામાં આવ્યો છે.

બોટાદ જિલ્લાના રાણપુર તાલુકા હેઠળ આવતા સુંદરિયાણા ગામમાં દર વર્ષે વરસાદના કારણે પાણી ભરાઈ જવાની ગંભીર સમસ્યા અંગે તાલુકા પંચાયતમાં વિશેષ ફરિયાદ નોંધાવવામાં આવી છે. ગ્રામજનોએ જણાવ્યું છે કે ગામના વોર્ડ નંબર ૭, દેવીપૂજક વાસમાં દર વર્ષે થોડોક પણ વરસાદ પડે તો પણ પાણી ભરાઈ જાય છે, જેના કારણે લોકોને ભારે મુશ્કેલીનો સામનો કરવો પડે છે. આ કાયમી સમસ્યાના નિરાકરણ માટે તલાટી સાહેબ, સરપંચ સાહેબ અને તાલુકા માન્ય શ્રી સાહેબને હાથ જોડીને વિનંતી કરવામાં આવી છે કે તેઓ આ બાબતે વિશેષ ધ્યાન આપીને યોગ્ય કાર્યવાહી કરે.

ધોળકા ખાતે આવેલી મનસુરી એમ.આઈ. કુપ્પીવાલા ગર્લ્સ હાઈસ્કૂલમાં કન્યા કેળવણી મહોત્સવ અને શાળા પ્રવેશોત્સવનું આયોજન કરવામાં આવ્યું હતું.

આણંદ જિલ્લાના તારાપુર ખાતે આગામી મોહરમ એટલે કે તાજીયાના પર્વને ધ્યાનમાં રાખીને કાયદો અને વ્યવસ્થાની સ્થિતિ જાળવી રાખવા માટે પોલીસે મુખ્ય માર્ગો પર ફ્લેગમાર્ચનું આયોજન કર્યું હતું. જિલ્લા પોલીસ વડાની સૂચનાથી અને જિલ્લા પોલીસ અધિક્ષક તેમજ નાયબ પોલીસ અધિક્ષક ખંભાતના સીધા માર્ગદર્શન હેઠળ, તારાપુર પોલીસ સ્ટેશનના પીઆઈ અને પીએસઆઈની અધ્યક્ષતામાં પોલીસ જવાનો અને સ્ટાફ દ્વારા સમગ્ર વિસ્તારમાં આ ફ્લેગમાર્ચ યોજવામાં આવી હતી. રાજ્યના વિવિધ શહેરો અને સંવેદનશીલ વિસ્તારોમાં શાંતિ અને સુરક્ષાનો અહેસાસ કરાવવા માટે પોલીસ વિભાગ સંપૂર્ણપણે સજ્જ બન્યો છે. આ ફ્લેગમાર્ચ તારાપુરના મુખ્ય રસ્તાઓ અને રૂટીંગ વિસ્તારોમાંથી પસાર થઈ હતી, જેનો મુખ્ય ઉદ્દેશ્ય નાગરિકોમાં સુરક્ષાની ભાવના મજબૂત કરવી તથા આગામી તહેવાર દરમિયાન શાંતિ, એકતા અને ભાઈચારો જળવાઈ રહે તે સુનિશ્ચિત કરવાનો હતો. પોલીસના આ કડક વલણ અને ફૂટ પેટ્રોલિંગની કામગીરીને સ્થાનિક વેપારીઓ અને નાગરિકોએ પણ બિરદાવી હતી, અને તંત્રને પૂરતો સહકાર આપવાની ખાતરી આપી હતી.

ગુજરાત સરકારના શિક્ષણ વિભાગ દ્વારા સરકારી શાળાઓમાં શિક્ષણનું સ્તર સુધારવા અને ૧૦૦% નામાંકન સુનિશ્ચિત કરવાના આશય સાથે આયોજિત 'શાળા પ્રવેશોત્સવ'ની આ વર્ષે પણ ઉત્સાહભેર ઉજવણી કરવામાં આવી. આ અંતર્ગત, સાણંદ તાલુકાના ઝોલાપુર, લીલાપુર અને મેલાસણા ગામની પ્રાથમિક અને માધ્યમિક શાળાઓમાં નવીન શૈક્ષણિક સત્રના પ્રારંભે એક ઉત્સવ જેવો માહોલ જોવા મળ્યો હતો. શાળા પરિસરને રંગબેરંગી ફુગ્ગાઓ, આસોપાલવના તોરણ અને આકર્ષક રંગોળીઓથી સજાવવામાં આવ્યું હતું. પ્રથમ વખત શાળાના પગથિયાં ચડી રહેલા ભૂલકાઓ અને માધ્યમિક શાળામાં પ્રવેશ મેળવતા વિદ્યાર્થીઓનું શાળાના આચાર્ય, શિક્ષકો અને ગ્રામજનો દ્વારા કુમકુમ તિલક અને પુષ્પગુચ્છ આપીને ભાવભીનું સ્વાગત કરવામાં આવ્યું. આ પ્રસંગે, પ્રવેશ મેળવનાર તમામ ગણવેશધારી બાળકોને આમંત્રિત મહાનુભાવોના હસ્તે શૈક્ષણિક કીટ અને પાઠ્યપુસ્તકોનું વિતરણ કરવામાં આવ્યું હતું.

સુરત જિલ્લાના કામરેજ તાલુકામાં એક 108 એમ્બ્યુલન્સ અકસ્માતનો શિકાર બની છે. કામરેજના પરબ ગામના વલણ ફળિયા ખાતે દર્દીને હોસ્પિટલ લઈ જઈ રહેલી આ એમ્બ્યુલન્સ વલણ ગામ નજીક બેકાબૂ બની ગઈ હતી. ચાલકે સ્ટિયરિંગ પરનો કાબૂ ગુમાવતા એમ્બ્યુલન્સ એક પતરાના શેડમાં ઘૂસી ગઈ હતી. આ ઘટનામાં એમ્બ્યુલન્સમાં સવાર દર્દી તેમજ તેમની સાથે હાજર પરિવારજનોના જીવ તાળવે ચોંટી ગયા હતા. જોકે, ઘટનાસ્થળે હાજર સ્ટાફે સમયસૂચકતા વાપરીને દર્દીને હેમખેમ એમ્બ્યુલન્સમાંથી નીચે ઉતાર્યા હતા. સદભાગ્યે, આ અકસ્માતમાં કોઈ મોટી જાનહાનિ ન થતા સૌ કોઈએ રાહતનો શ્વાસ લીધો હતો. સમગ્ર અકસ્માતની આ ઘટનાના સીસીટીવી ફૂટેજ પણ સામે આવ્યા છે.