ప్రముఖ గాయని ఎస్. జానకి అంత్యక్రియలు ఈ రోజు సాయంత్రం 5 గంటలకు మైసూర్ లో జరగనున్నాయని ఆమె కుటుంబ సభ్యులు తెలిపారు. నిన్న కన్నుమూసిన ఆమె పార్థివాదేహాన్ని ప్రజల సందర్శనార్థం ఈ రోజు ఉదయం 8 గంటల నుండి సాయంత్రం 4 గంటల వరకు మహారాజ కాలేజీ గ్రౌండ్స్ లో ఉంచుతారు. అనంతరం, సాయంత్రం 5 గంటలకు కాణియర హుండీ గ్రామంలోని ఫామ్ హౌస్ లో ప్రభుత్వ లాంఛనాలతో జానకి అంత్యక్రియలు నిర్వహిస్తారు.

రాజంపేట మండలం తలమడ్ల గ్రామానికి చెందిన శ్రీకాంత్ ఇటీవల లండన్ లో మృతి చెందగా, ఆయన మృతదేహం శనివారం తన సొంత గ్రామానికి చేరుకుంది. ఉన్నత చదువుల కోసం లండన్ వెళ్లిన శ్రీకాంత్, అక్కడ ఒక వేడుక జరిగిన మరుసటి రోజే మరణించాడు. శనివారం సొంతూరుకు చేరుకున్న శ్రీకాంత్ మృతదేహాన్ని చూసి కుటుంబ సభ్యులు, గ్రామస్తులు కంటతడి పెట్టారు. శ్రీకాంత్ మరణం ఎంతో బాధాకరమని ఆవేదన వ్యక్తం చేయడంతో గ్రామంలో తీవ్ర విషాద ఛాయలు అలుముకున్నాయి.

తెలంగాణలో రేవంత్ రెడ్డికి మాజీ మంత్రి హరీష్ రావు గారు గట్టిగా కౌంటర్ ఇచ్చారు. నీకు రక్తమే కావాలనుకుంటే, రైతుల కోసం మా రక్తాన్ని కూడా ధారపోస్తామంటూ హరీష్ రావు గారు స్పష్టం చేశారు.

రాజన్న సిరిసిల్ల జిల్లా వేములవాడ రూరల్ మండలం హనుమాజీపేట గ్రామంలో జరిగిన బీఆర్ఎస్ పార్టీ కార్యకర్తల సమావేశంలో బీఆర్ఎస్ పార్టీ నియోజకవర్గ ఇంచార్జి చల్మెడ లక్ష్మీ నరసింహారావు కాంగ్రెస్ ప్రభుత్వంపై తీవ్రస్థాయిలో ధ్వజమెత్తారు. అవగాహన లోపంతోనే రైతులను కాంగ్రెస్ ప్రభుత్వం మోసం చేస్తోందని, రైతులకు సాగునీరు అందించడంలో రేవంత్ సర్కార్ పూర్తిగా విఫలమైందని మండిపడ్డారు. నీళ్లు అడిగే తమ బీఆర్ఎస్ నేతలపై కక్ష పెంచుకొని, రేవంత్ రెడ్డి రైతాంగాన్ని ఇబ్బందులపాలు చేస్తున్నారని ఆగ్రహం వ్యక్తం చేశారు. బీఆర్ఎస్ వర్కింగ్ ప్రెసిడెంట్ కేటీఆర్, మాజీ మంత్రి హరీష్ రావులపై రేవంత్ రెడ్డి అనవసరమైన మాటలు మాట్లాడి తన హోదాను మర్చిపోయారని చల్మెడ విమర్శించారు. రైతులకు సాగునీరు ఎప్పుడు అందిస్తారని నిన్నటి ప్రెస్ మీట్ లో ఒక విలేఖరి ప్రశ్నించగా, కేటీఆర్, హరీష్ రావుల రక్తంతో పంటను తడుపుతానని సీఎం సమాధానం ఇవ్వడం ఏమిటని ప్రశ్నించారు. కన్నేపల్లి పంప్ హౌస్ నుంచి రైతులకు నీళ్లు ఇవ్వాలని అడిగితే, మమ్మల్ని కోసి మా రక్తం పంటలపై చల్లుతానని అనడం ఒక ముఖ్యమంత్రి భాషనేనా అంటూ నిలదీశారు. ఇకనైనా రైతులపై కక్ష సాధింపు చర్యలు మానుకొని, సాగునీరు అందించాలని ఆయన డిమాండ్ చేశారు.

మనోహరాబాద్ మండలం రంగాయపల్లి సమీపంలోని ఎంఎస్ అగర్వాల్ పరిశ్రమను మూసివేయాలని డిమాండ్ చేస్తూ గజ్వేల్ బీఆర్ఎస్ ఇన్‌చార్జి బూరుపల్లి ప్రతాప్‌రెడ్డి ఆధ్వర్యంలో ఆదివారం ఒక్కరోజు నిరాహార దీక్ష నిర్వహించనున్నారు. రంగాయపల్లి గ్రామపంచాయతీ ఆవరణలో జరగనున్న ఈ దీక్షకు గ్రామస్తులు, బీఆర్ఎస్ నాయకులు, కార్యకర్తలు భారీగా తరలివచ్చే అవకాశం ఉండటంతో గ్రామంలో తీవ్ర రాజకీయ వాతావరణం నెలకొంది. ఈ పరిశ్రమ వల్ల స్థానికులు ఎదుర్కొంటున్న పలు సమస్యలను ఈ నిరాహార దీక్ష ద్వారా ప్రభుత్వ దృష్టికి తీసుకెళ్లడమే తమ లక్ష్యమని నిర్వాహకులు స్పష్టం చేశారు. ఈ కార్యక్రమం నేపథ్యంలో రంగాయపల్లిలో ఉద్రిక్త వాతావరణం నెలకొనగా, ఎలాంటి అవాంఛనీయ ఘటనలు చోటుచేసుకోకుండా పోలీసులు ముందస్తుగా భారీ బందోబస్తు ఏర్పాటు చేశారు. శాంతిభద్రతలకు ఎలాంటి విఘాతం కలగకుండా పరిస్థితిని పోలీసులు నిరంతరం పర్యవేక్షిస్తున్నారు.

కామారెడ్డి జిల్లా బోధన్ బెల్లాల గ్రామంలోని ఇందిరమ్మ కాలనీలో బెల్ట్ షాపులకు వ్యతిరేకంగా వికలాంగుల జాతీయ అధ్యక్షురాలు సూర్యవంశం సుజాత పోరాటం చేపట్టారు. గ్రామంలో పర్యటించిన ఆమెతో స్థానిక మహిళలు తమ ఆవేదనను పంచుకున్నారు. తమ ఊరిలో బెల్ట్ షాపులు అస్సలు ఉండకూడదని వారు సుజాతకు స్పష్టం చేశారు. ఉదయం 6 గంటల నుంచే ఇక్కడ ప్రజలు మద్యానికి బానిసవుతున్నారని, యువత గంజాయి, ఇతర మత్తు పదార్థాల బారిన పడుతున్నారని మహిళలు ఆరోపించారు. కిరాణా షాపుల పేర్లు చెప్పుకుంటూ అక్రమంగా మద్యం అమ్ముతున్నారని, యువకులు ఎక్కడబడితే అక్కడ తాగుతూ తిరుగుతుండటంతో దొంగతనాలు పెరిగిపోయి ఆడవాళ్లకు రక్షణ లేకుండా పోయిందని ఆందోళన వ్యక్తం చేశారు. ఈ చిన్న గ్రామంలో ఉన్న దాదాపు 8 బెల్ట్ షాపులపై కఠిన చర్యలు తీసుకోవాలని ఎక్సైజ్ అధికారుల దృష్టికి తీసుకెళ్లారు. అధికారులు వెంటనే స్పందించి ఈ బెల్ట్ షాపులను తొలగించేలా తగిన చర్యలు తీసుకోవాలని గ్రామస్తులు డిమాండ్ చేస్తున్నారు.

సిద్దిపేట జిల్లా ములుగు మండల పరిధిలోని మాసాన్‌పల్లి గ్రామంలో శ్రీ పెద్దమ్మ తల్లి విగ్రహ ప్రతిష్టా మహోత్సవం శనివారం కన్నులపండువగా జరిగింది. గ్రామ ముదిరాజ్ సంఘం ఆధ్వర్యంలో నిర్వహించిన ఈ ఉత్సవాల్లో భాగంగా పెద్దమ్మ తల్లి కల్యాణాన్ని అంగరంగ వైభవంగా జరిపించారు. ఈ సందర్భంగా గ్రామ మహిళలు భక్తిశ్రద్ధలతో అమ్మవారికి ఒడిబియ్యం పోసి, మంగళహారతులతో బోనాలు సమర్పించారు. మాసాన్‌పల్లితో పాటు చుట్టుపక్కల గ్రామాల నుంచి భక్తులు, ప్రజలు పెద్ద ఎత్తున తరలివచ్చి అమ్మవారిని దర్శించుకోవడంతో ఆలయ ప్రాంగణం భక్తుల జయజయధ్వానాలు, పూజలతో ఆధ్యాత్మిక శోభను సంతరించుకుంది. కల్యాణం అనంతరం భక్తులందరికీ కమిటీ సభ్యులు భారీగా అన్నప్రసాద వితరణ చేశారు. ఈ సందర్భంగా గ్రామ ముదిరాజ్ సంఘం ప్రతినిధులు మాట్లాడుతూ, పెద్దమ్మ తల్లి దయతో గ్రామంలో వర్షాలు సమృద్ధిగా కురిసి, పంటలు బాగా పండాలని, ప్రజలంతా ఆయురారోగ్యాలతో వర్ధిల్లాలని అమ్మవారిని వేడుకున్నట్లు తెలిపారు. ఈ ఉత్సవాలు ఇంత ఘనంగా జరగడానికి ధన, వస్తు రూపేణా సహకరించిన దాతలకు, రాత్రింబవళ్లు కష్టపడిన గ్రామ యువకులకు వారు ప్రత్యేక కృతజ్ఞతలు తెలియజేశారు. ఈ కార్యక్రమంలో గ్రామ ముదిరాజ్ కులస్థులు, మహిళలు, యువకులు మరియు చిన్నారులు పెద్ద సంఖ్యలో పాల్గొని ఉత్సవాన్ని విజయవంతం చేశారు.

సిద్దిపేట జిల్లా బెజ్జంకి గ్రామ అభివృద్ధిపై కాంగ్రెస్ నాయకులు చేస్తున్న ఆరోపణలను ఉపసర్పంచ్ ధూమాల మహేష్ తీవ్రంగా ఖండించారు. బీఆర్ఎస్ పార్టీతో పాటు గ్రామ సర్పంచ్‌పై ఎలాంటి ఆధారాలు లేకుండా విమర్శలు చేయడం ఏమాత్రం సరికాదని ఆయన స్పష్టం చేశారు. ఒకవేళ కాంగ్రెస్ నాయకుల ఆరోపణలకు తగిన ఆధారాలు ఉంటే, వాటిని ప్రజల ముందు ఉంచాలని ఆయన సవాల్ విసిరారు. నిరాధారమైన ఆరోపణలు చేయడం కాంగ్రెస్ పార్టీకి తగదని ఆయన హితవు పలికారు. రాజకీయాలకు అతీతంగా ప్రతి ఒక్కరూ గ్రామాభివృద్ధికి సహకరించాలని, ప్రజలను తప్పుదోవ పట్టించే వ్యాఖ్యలు చేయడం మానుకోవాలని ఈ సందర్భంగా ధూమాల మహేష్ సూచించారు. ఈ కార్యక్రమంలో ప్యాక్స్ వైస్ చైర్మన్ బండి వేణు, లింగాల వెంకటేష్, దొంతరవేణి శ్రీనివాస్ తదితరులు పాల్గొన్నారు.

తెలంగాణలో కరువు వస్తున్న నేపథ్యంలో పంటలకు, రైతులకు నీళ్ళు ఎలా అని ఒక జర్నలిస్ట్ అడిగిన ప్రశ్నకు సీఎం రేవంత్ రెడ్డి వివాదాస్పద సమాధానం ఇచ్చారు. ఏముంది వాళ్ళను కోసి పంటల మీద రక్తం చల్లితే అదే పండుతుంది అంటూ సీఎం రేవంత్ రెడ్డి బదులిచ్చారు.