महाराष्ट्रातील गंगाखेड (परभणी) तालुक्यातील आशा कार्यकर्त्यांना गेल्या तीन महिन्यांपासून मानधन मिळालेले नाही. यामुळे आरोग्य सेवा कशी द्यावी असा प्रश्न त्यांच्यासमोर उभा राहिला असून त्यांचे जीवनमान अवघड झाले आहे. महाराष्ट्र शासनाने या गंभीर समस्येकडे लक्ष देऊन तातडीने मानधन अदा करण्याची मागणी होत आहे.

न्यूज मराठी 24x7 लाईव्ह टीव्ही चॅनलवर परभणी जिल्ह्याच्या महत्त्वपूर्ण घडामोडी पाहण्याची सुविधा उपलब्ध आहे.

लाला ब्रदर्स बिल्डर अँड डेव्हलपर्सने परभणी जिल्ह्यात 'साई सेवा नगरी प्लॉटिंग' प्रकल्पाचा शुभारंभ केला आहे. या नव्या प्रकल्पामुळे स्थानिक नागरिकांना भूखंड खरेदीची अनोखी संधी उपलब्ध झाली आहे.

कॉक्रोच जानता पार्टीने आपली पहिली मागणी मांडली असून, त्यांनी केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी केली आहे.

नांदेडच्या सांगवी येथील प्रसिद्ध श्री श्याम मंदिरात पवित्र 'पुरुषोत्तम मास'चे औचित्य साधून २४ तासांच्या अखंड नामजप कार्यक्रमाचे आयोजन करण्यात आले आहे. रविवार, २४ मे २०२६ रोजी सकाळी ६:०० वाजता भक्तीमय वातावरणात या विधीला सुरुवात झाली असून, तो सोमवार, २५ मे २०२६ रोजी सकाळी ६:०० वाजेपर्यंत सलग २४ तास चालणार आहे. या कार्यक्रमात 'अखंड ॐ श्री श्याम देवाय नमः' या मंत्राचा महाजप केला जात आहे. 'कलियुग केवल नाम अधारा, सुमिर सुमिर नर उतरही पारा' या वचनानुसार कलियुगात नामस्मरणाचे महत्त्व भक्तांना पटवून देण्यात येत आहे. नांदेड शहर आणि परिसरातील शेकडो भाविकांनी दर्शनासाठी आणि जपामध्ये सहभागी होण्यासाठी मंदिरात गर्दी केली आहे, ज्यामुळे हा सोहळा आकर्षणाचे केंद्र बनला आहे. मंदिर समितीने या अखंड नामजपामध्ये सहभागी होण्यासाठी तसेच श्रमसेवा देण्यासाठी भाविकांना जाहीर आवाहन केले आहे. इच्छुक भक्त ९९७०७९५१११, ८२७५३१२२३३, ८५५२०६३००६ किंवा ९८८१११४१०६ या क्रमांकांवर संपर्क साधून आपली नाव नोंदणी करू शकतात. तसेच, कोणत्याही श्याम भक्ताला सेवा करण्याची इच्छा असल्यास, तो कितीही वेळ बसून सेवा देऊ शकतो, असेही आयोजकांनी सांगितले आहे. हे शुभ कार्य श्री हरीश मोदी, निलेश अग्रवाल, किशन अग्रवाल, गणेश गट्टानी अर्धापूर आणि सर्व श्याम भक्तांनी संकल्पित केले आहे. मंदिर प्रशासनाने भक्तांना या पवित्र सोहळ्याचा लाभ घेऊन पुण्य पदरी पाडण्याचे आवाहन केले आहे.

आरसीसी कोचिंग क्लासचे संचालक शिवराज मोटेगावकर यांनी पुण्यातील हवेली तालुक्यातील वारजे भागात ५१ गुंठे जमीन घेतल्याचे उघड झाले आहे. ही जागा मोक्याच्या ठिकाणी असून तिचे बाजारमूल्यही जास्त आहे. या व्यवहारातून मोटेगावकरांकडे एवढी 'माया' कुठून आली, असा प्रश्न उपस्थित केला जात आहे. ही जमीन 'राजर्षी शाहु महाराज बहुउद्देशीय सामाजिक विकास, महाराष्ट्र, लातूर' या सामाजिक संस्थेच्या नावाने विकत घेण्यात आली आहे. धक्कादायक बाब म्हणजे, या जागेच्या फलकावर मोटेगावकरांचे नाव काळ्या रंगाने झाकल्याचेही समोर आले आहे. याच भागात मोटेगावकरांचे आणखी दोन प्लॉट असल्याचेही नमूद करण्यात आले आहे. याच भागात असलेल्या महापालिकेचा रस्ताही शिवराज मोटेगावकरांना आपल्या ताब्यात घ्यायचा होता, असे स्थानिक नागरिकांनी सांगितले आहे. त्यांनी दोन्ही प्लॉटमधील हा महापालिकेचा रस्ता हडपण्याचा प्रयत्न केला. मात्र, येथील नागरिकांनी आंदोलन करून त्यांचा हा डाव हाणून पाडला आणि सामाजिक भान असलेल्या नागरिकांमुळे हा रस्ता वाचल्याचे म्हटले जात आहे. कोट्यवधी रुपयांची ही जमीन घेण्यासाठी आलेला पैसा मोटेगावकरांनी कोचिंग क्लासेसच्या माध्यमातून कमावला, की तो पेपर फुटीतून मिळाला, असा सवाल विचारला जात आहे.

नांदेड जिल्ह्यात गुन्हेगारीला आळा घालण्यासाठी सुरू असलेल्या “ऑपरेशन क्रॅकडाऊन” मोहिमेअंतर्गत, स्थानिक गुन्हे शाखेने एक मोठी कारवाई करत तब्बल १४ लाख ४ हजार ३०० रुपये किमतीचा अवैध शस्त्रसाठा जप्त केला आहे. या कारवाईत ४७० तलवारी, २०९ खंजर-चाकू आणि २४ फायटर-पंच असे एकूण ७०३ घातक शस्त्रे हस्तगत करण्यात आली. पोलिसांनी दिलेल्या माहितीनुसार, पोलीस अधीक्षक अबिनाश कुमार यांनी जिल्ह्यातील अवैध शस्त्र विक्रेत्यांविरोधात कठोर कारवाई करण्याचे आदेश दिले होते, ज्यानुसार स्थानिक गुन्हे शाखेचे पोलीस निरीक्षक अतुल भोसले यांच्या मार्गदर्शनाखाली एक विशेष पथक कार्यरत होते. २२ मे रोजी पेट्रोलिंग करत असताना पोउपनि मिलींद सोनकांबळे आणि त्यांच्या पथकाला देना बँक ते सचखंड गुरुद्वारा रोडवरील ३०० सालाना शॉपिंग प्लाझा येथील दुकान क्रमांक ०८ मध्ये अवैधरित्या तलवारी व घातक शस्त्रांची विक्री सुरू असल्याची गोपनीय माहिती मिळाली. या माहितीच्या आधारे उपविभागीय पोलीस अधिकारी किरण भोंडवे यांच्या उपस्थितीत दुकानावर छापा टाकण्यात आला. मात्र, पोलिसांची चाहूल लागताच दुकान मालक रणजितसिंघ रामसिंघ सरदार (रा. नंदीग्राम सोसायटी, नांदेड) हा घटनास्थळावरून फरार झाला. दुकानाची झडती घेतली असता, १२ लाख ३१ हजार रुपयांच्या ४७० तलवारी, १ लाख ७० हजार ९०० रुपयांचे २०९ खंजर-चाकू आणि २४ हजार रुपयांचे २४ फायटर-पंच असा एकूण १४ लाख ४ हजार ३०० रुपयांचा मुद्देमाल मोठ्या प्रमाणात आढळून आला आणि तो जप्त करण्यात आला. या प्रकरणी वजीराबाद पोलीस ठाण्यात गुन्हा क्रमांक २३८/२०२६ अन्वये भारतीय हत्यार कायद्यानुसार कलम ४/२५, ७/२५ अंतर्गत गुन्हा दाखल करण्यात आला आहे. जप्त केलेला मुद्देमाल वजीराबाद पोलीस ठाण्याच्या ताब्यात देण्यात आला असून, फरार आरोपीच्या शोधासाठी विशेष पथके रवाना करण्यात आली आहेत. दरम्यान, स्थानिक गुन्हे शाखेकडून सातत्याने सुरू असलेल्या या धडक कारवायांमुळे अवैध शस्त्र विक्रेते आणि गुन्हेगारांचे धाबे दणाणले असल्याची चर्चा शहरात सुरू आहे. या धाडसी कारवाईबद्दल पोलीस अधीक्षकांनी पथकाचे कौतुक केले आहे.

NEET पेपरफुटी प्रकरणात नाव समोर आलेल्या मोटेगावकर यांचा एक जुना व्हिडिओ सध्या सोशल मीडियावर मोठ्या प्रमाणात व्हायरल होत आहे. या व्हिडिओमध्ये मोटेगावकर विद्यार्थ्यांना शिकवताना दिलेली काही विचित्र उदाहरणे सध्या चर्चेचा विषय ठरली आहेत. सोशल मीडियावर व्हायरल होत असलेल्या दाव्यानुसार, मोटेगावकर विद्यार्थ्यांशी संवाद साधताना "पिझ्झा आणि वडा-पाव हे कुत्र्याचे आहार आहेत" तसेच "पाणीपुरी खाणारे भिकारी असतात" अशा प्रकारची वादग्रस्त टिप्पणी करताना दिसत आहेत. या वक्तव्यांमुळे अनेकांनी आश्चर्य व्यक्त केले असून, काही पालक आणि विद्यार्थ्यांनी यावर नाराजी दर्शवली आहे. आधीच NEET पेपरफुटी प्रकरणामुळे चर्चेत असलेल्या मोटेगावकर यांच्या या जुन्या व्हिडिओमुळे आता नव्या वादाला तोंड फुटले आहे. सोशल मीडियावर अनेकांनी त्यांच्या शिकवण्याच्या पद्धतीवर प्रश्नचिन्ह उपस्थित केले असून, विद्यार्थ्यांना प्रेरणा देण्याऐवजी अशा प्रकारची उदाहरणे देणे योग्य आहे का, असा सवालही विचारला जात आहे. या व्हिडिओवर सोशल मीडियामध्ये मोठ्या प्रमाणात प्रतिक्रिया उमटताना दिसत आहेत; अनेकांनी उपरोधिकपणे, "आणि खरंच असे असेल तर लातूरकरांनी आता पिझ्झा, वडा-पाव आणि पाणीपुरी खाऊ नये," अशा प्रतिक्रिया देत टोलेबाजी केली आहे. दरम्यान, या व्हिडिओची सत्यता आणि तो नेमका कधीचा आहे याबाबत अद्याप अधिकृत पुष्टी झालेली नाही. तसेच, संबंधित व्यक्तीकडूनही या व्हायरल व्हिडिओवरील अधिकृत प्रतिक्रिया अद्याप समोर आलेली नाही.

महाराष्ट्राच्या बातम्या आता 'न्यूज मराठी'वर 24x7 लाईव्ह पाहण्याची सुविधा उपलब्ध आहे.