திருச்சி மகாத்மா காந்தி அரசு மருத்துவமனை வளாகத்தில் உள்ள 108 ஆம்புலன்ஸ் அலுவலகத்தில் நாளை (ஜூன் 20) காலை 10 மணி முதல் பிற்பகல் 2 மணி வரை வேலைவாய்ப்பு முகாம் நடைபெற உள்ளது. தமிழ்நாட்டில் ஜி.வி.கே மற்றும் எம்.ஆர்.ஐ கிரீன் ஹெல்த் சர்வீஸ் நிறுவனங்களால் இயக்கப்படும் 108 ஆம்புலன்ஸ்களில் காலியாக உள்ள அவசரகால மருத்துவ உதவியாளர்கள் மற்றும் ஆம்புலன்ஸ் ஓட்டுநர்கள் பணியிடங்களை நிரப்பும் நோக்கில் இந்த முகாம் நடத்தப்படுகிறது.

திருச்சி மாவட்டம் மணப்பாறையை அடுத்த கீழபொய்கை பட்டி அருகே உள்ள பொய்கை மலையில் அமைந்துள்ள மாயவதார பெருமாள் கோவிலில் இன்று மதியம் உச்சி கால பூஜை நடைபெற்றது. இந்த பூஜையின்போது, சிறப்பு வழிபாடுகளும் அபிஷேகங்களும் நடத்தப்பட்டன. அதனைத் தொடர்ந்து, அறுசுவை அன்னதானம் வழங்கப்பட்டது. இந்த நிகழ்வில், இப்பகுதியைச் சேர்ந்த பெருமாள் சேவை குழுவினர், தளுகை கமிட்டியினர் மற்றும் ஏராளமான பக்த பெருமக்கள் கலந்துகொண்டனர்.

முக்கண்ணாமலைப்பட்டியில் அன்னவாசல் காவல்துறையினர் நடை ரோந்துப் பணியிலும், விழிப்புணர்வுப் பணியிலும் ஈடுபட்டனர்.

கரூர் மாவட்டம், குளித்தலை அருகே உள்ள வயலூர் கிராமத்தில் இன்று ஸ்ரீ காளியம்மன் கோவில் திருவிழா நடைபெற்றது. இந்த திருவிழாவை முன்னிட்டு, பக்தர்கள் குளித்தலை கடம்பந்துறை ஆற்றில் புனித நீராடினர். தொடர்ந்து, அவர்கள் தீர்த்தக்குடம் மற்றும் பால்குடம் ஏந்தி, மங்கள மேளதாளங்கள் முழங்க முக்கிய வீதிகள் வழியாக வயலூர் ஸ்ரீ காளியம்மன் கோவிலை நோக்கி ஊர்வலமாகச் சென்றனர்.

திருச்சி ஸ்ரீரங்கம் பகுதியில், மாநகராட்சிக்கு அருகிலுள்ள பொதுப்பாதைகளில் கட்-அவுட்கள் மற்றும் பேனர்கள் வைக்கப்பட்டு, பொதுமக்களுக்கு பெரும் இடையூறை ஏற்படுத்தி வருவதாக புகார் எழுந்துள்ளது. குறிப்பாக, மல்டர் பாலம் அருகில் மற்றும் மாநகராட்சி குடிநீர் வசதிக்கு அருகிலுள்ள பொதுப் பாதைகளில் இந்த பேனர்கள் வைக்கப்பட்டுள்ளன. இவை பொதுமக்களின் நடமாட்டத்திற்கு சிரமத்தை உண்டாக்குகிறது. மாநகராட்சித் துறை மிக அருகிலேயே இருக்கும் நிலையிலும், இதுபோன்ற ஆக்கிரமிப்புகள் பொதுமக்களுக்கு இடையூறை ஏற்படுத்துகின்றன. எனவே, பொதுமக்களுக்கு சிரமத்தை ஏற்படுத்தும் இந்த பேனர்களை உடனடியாக அகற்ற வேண்டும் என்று கோரிக்கை விடுக்கப்பட்டுள்ளது.

சிங்கம்புணரி அருகே முறையூரில் அமைந்துள்ள 800 ஆண்டுகள் பழமையான ஸ்ரீ மீனாட்சி சொக்கநாதர் திருக்கோவிலின் ஆனி திருமஞ்சன பெருவிழா இன்று (ஜூன் 20) கொடியேற்றத்துடன் விமர்சையாக தொடங்கியது. இந்த விழாவின் தொடக்கமாக, ரிஷப கொடியுடன் ஊர்வலம் மற்றும் சிறப்பு பூஜைகள் விமர்சையாக நடைபெற்றன. சிவகங்கை தேவஸ்தானம் மற்றும் பொதுமக்கள் இணைந்து இந்த பெருவிழாவை ஏற்பாடு செய்துள்ளனர். விழாவின் முக்கிய நிகழ்வுகளாக, ஜூன் 27 அன்று திருக்கல்யாணம் மற்றும் ஜூன் 28 அன்று திருத்தேரோட்டம் நடைபெற உள்ளது.

திண்டுக்கல் நாடாளுமன்ற உறுப்பினர் தொகுதி மேம்பாட்டு நிதியின் கீழ், சித்தையன் கோட்டை பேரூராட்சிக்குட்பட்ட நரசிங்கபுரத்தில் ரூபாய் 35 லட்சம் மதிப்பீட்டில் கட்டி முடிக்கப்பட்ட 60 ஆயிரம் லிட்டர் கொள்ளளவு கொண்ட புதிய மேல்நிலை நீர்த்தேக்க தொட்டி மக்கள் பயன்பாட்டிற்காக திறக்கப்பட்டது. மார்க்சிஸ்ட் கம்யூனிஸ்ட் கட்சி திண்டுக்கல் நாடாளுமன்ற உறுப்பினர் ஆர். சச்சிதானந்தம் மற்றும் திமுக முன்னாள் அமைச்சரும் ஆத்தூர் சட்டமன்ற உறுப்பினருமாகிய ஐ. பெரியசாமி ஆகியோர் இந்த நீர்த்தேக்க தொட்டியை திறந்து வைத்தனர். இந்நிகழ்ச்சியில், பேரூராட்சி தலைவர் போதும் பொண்ணு முரளி, வார்டு உறுப்பினர்கள், பேரூராட்சி செயல் அலுவலர் ஜெயமாலு மற்றும் அலுவலக பணியாளர்கள், திமுக மற்றும் மார்க்சிஸ்ட் கம்யூனிஸ்ட் கட்சியைச் சேர்ந்த மாவட்ட, ஒன்றிய, கிளை பொறுப்பாளர்கள் மற்றும் தொண்டர்கள், அரசு ஒப்பந்ததாரர் மற்றும் ஏராளமான பொதுமக்கள் என பலரும் கலந்துகொண்டனர்.

ஒட்டன்சத்திரம் திண்டுக்கல் சாலையின் ஓரத்தில், பாதயாத்திரை செல்லும் பயணிகளுக்காக அமைக்கப்பட்ட நடைபாதையில், ஒரு தனியார் உணவகம் புரோட்டா ஸ்டால், டீக்கடை ஸ்டால், மற்றும் அமர்ந்து உணவு உண்ணும் இருக்கைகள் போன்றவற்றை அமைத்து ஆக்கிரமிப்பு செய்துள்ளது. இந்த ஆக்கிரமிப்பால், குறிப்பாக பங்குனி உத்திரம் மற்றும் தைப்பூசத்திற்கு பாதயாத்திரை செல்லும் பயணிகள் விபத்தில் சிக்கும் ஆபத்து உள்ளதாக அச்சம் தெரிவிக்கப்பட்டுள்ளது. இந்த விவகாரத்தில் நகராட்சி நிர்வாகம் உரிய நடவடிக்கை எடுக்கவில்லை எனக் குற்றம் சாட்டியுள்ள ஒட்டன்சத்திரம் நகர மக்கள், ஆக்கிரமிப்புகளை உடனடியாக அகற்ற கோரி ஒட்டன்சத்திரம் நகராட்சிக்கு வலியுறுத்தியுள்ளனர். மேலும், ஆக்கிரமிப்புகளை அகற்றாமல் ஒட்டன்சத்திரம் நகராட்சி தூங்குகிறதா என பொதுமக்கள் நேரடியாக கேள்வி எழுப்பியுள்ளனர்.

புதுக்கோட்டை மாவட்டம் அன்னவாசல் அரசு மருத்துவமனையில், 12வது சர்வதேச யோகா தினத்தை முன்னிட்டு ஒரு சிறப்பு யோகா மற்றும் இயற்கை மருத்துவ நிகழ்ச்சி நடத்தப்பட்டது. மருத்துவமனை தலைமை மருத்துவர் மகேஸ்வரி தலைமையில் நடைபெற்ற இந்த நிகழ்ச்சியில், யோகா மற்றும் இயற்கை மருத்துவ நிபுணர் பிரியங்கா பங்கேற்றார். டாக்டர் பிரியங்கா, யோகாசனப் பயிற்சி நினைவுத்திறனை மேம்படுத்தும், மனதை உற்சாகமாக வைத்திருக்க உதவும், கவனச்சிதறல் ஏற்படாது, உடல் ஆரோக்கியமாக இருக்க உதவும் என பல்வேறு கருத்துக்களைத் தெரிவித்தார். அவர் மூச்சுப் பயிற்சி உள்ளிட்ட பல்வேறு யோகாசனப் பயிற்சிகளை செய்து காட்டி, சிகிச்சை முறைகள் குறித்து மக்களுக்கு விழிப்புணர்வு ஏற்படுத்தினார். மேலும், நோய்களுக்குத் தகுந்த உணவு முறைகள், அக்குபஞ்சர் மற்றும் அரோமா தெரபி பற்றியும், உடம்பில் எதிர்ப்பு சக்தியை மேம்படுத்தும் பல வகையான மூலிகை பொடிகள் வழங்கப்படும் எனவும் விளக்கமளித்தார். இந்த நிகழ்ச்சியில் மருத்துவர்கள், மருத்துவப் பணியாளர்கள், பொதுமக்கள் உள்ளிட்ட பலர் கலந்துகொண்டனர்.