पिंपरी येथील मोशी कचरा डेपोमध्ये कचऱ्याचा डोंगर इमारतीवर कोसळून झालेली दुर्घटना अत्यंत गंभीर असून, या संपूर्ण घटनेला पालिका प्रशासनच जबाबदार आहे. या असंवेदनशील प्रशासनातील जबाबदार अधिकाऱ्यांवर मनुष्यवधाचा गुन्हा दाखल करावा, अशी तीव्र मागणी राष्ट्रीय श्रमिक आघाडीचे कामगार नेते यशवंत भोसले यांनी केली आहे. आशिया खंडातील सर्वात श्रीमंत आणि ४० वर्षांपेक्षा जास्त प्रदीर्घ अनुभव असलेली महापालिका असूनही कचरा डेपो विभागात एवढी मोठी दुर्घटना घडणे हे अत्यंत दुर्दैवी असल्याचे भोसले यांनी म्हटले आहे. ढिगाऱ्याखाली दबलेल्या लोकांना शोधण्यासाठी पालिका प्रशासनाने शरीर शोधणारी यंत्रणा उपलब्ध करून ४८ तासांत शोधणे आवश्यक होते, मात्र ४ दिवस उलटूनही ढिगाऱ्याखालचे मृतदेह शोधण्यात पालिकेला अपयश आले आहे. कचऱ्याच्या डोंगराशेजारी इमारत व कॅन्टीन बांधण्याची परवानगी नेमकी कुणी आणि का दिली, असा संतप्त प्रश्न विचारत भोसले यांनी प्रशासनाच्या कारभाराचे वाभाडे काढले. इमारतीच्या तीन पट कचऱ्याचे डोंगर तयार होईपर्यंत प्रशासन काय करत होते, असा सवाल करत त्यांनी, सामान्य जनतेचे अनधिकृत बांधकाम तात्काळ पाडणारे प्रशासन स्वतः मात्र कचरा डेपोत अनधिकृतपणे कार्यालये उभी करून काम करत असल्याचा गंभीर आरोप केला. तळमजल्याची परवानगी असताना वरचे दोन मजले विनापरवाना बांधण्यामागे कंत्राटदारांचे खिसे भरण्याचा हेतू असल्याचा संशय त्यांनी व्यक्त केला. कामगारांच्या सुरक्षिततेबाबत बोलताना यशवंत भोसले यांनी सांगितले की, कामगारांना कोणतीही सुरक्षा दिली जात नाही आणि त्यांना केवळ १ लाखाचा विमा दिला जातो. वर्षातून एकदा तरी होणारी कामगारांची आरोग्य तपासणीही होताना दिसत नाही. कचऱ्याची विल्हेवाट लावण्यासाठी कोट्यवधी रुपये खर्चून उभारलेल्या वेस्टेज टू एनर्जी प्रकल्पातील मशिनरी वारंवार बंद राहत असल्यामुळेच कचऱ्याचे डोंगर उभे राहिले आहेत. या भ्रष्ट व उदासीन कारभारामुळेच ही दुर्घटना घडली असून कर्तव्यचुकार अधिकाऱ्यांना तात्काळ निलंबित करून त्यांच्यावर मनुष्यवधाचा गुन्हा दाखल करण्याची मागणी करण्यात आली आहे, जेणेकरून मस्तवाल झालेल्या अधिकारी व ठेकेदारांना जरब बसेल. भ्रष्ट प्रशासनाला पाठीशी घालणारे आणि मदत करणारे लोकप्रतिनिधी आयुष्यभराचे पाप घेऊन मरणार असल्याचा संताप व्यक्त करत, भोसले यांनी पालिका आयुक्त डॉ. विजयकुमार सूर्यवंशी यांच्यावर थेट निशाणा साधला. आयुक्त कंत्राटदारांना भेटायला वेळ देतात, मात्र कामगारांच्या व्यथा ऐकण्यासाठी कामगार नेत्यांना भेटायला त्यांच्याकडे वेळ नाही आणि ते पालिकेचे दालन सोडून ऑटो क्लस्टर येथे कार्यालय थाटतात, अशी मोठी खंत त्यांनी व्यक्त केली. गटारे तुंबली आहेत आणि पाऊस पडला आहे, तरीही लोकांना प्यायला पाणी नाही याकडेही पालिका जाणूनबुजून दुर्लक्ष करत असल्याचा आरोप करत त्यांनी, कंत्राटी कामगारांना १५ दिवसांच्या आत शासनाच्या सेवेत कायम करण्याचा निर्णय न घेतल्यास प्रशासनाला जाब विचारण्यासाठी महापालिकेच्या दारात भव्य आंदोलन करण्याचा इशारा दिला आहे.

City Mirror News

Media house पिंपरी चिंचवड, पुणे, महाराष्ट्र•

3 hrs ago

पिंपरी येथील मोशी कचरा डेपोमध्ये कचऱ्याचा डोंगर इमारतीवर कोसळून झालेली दुर्घटना अत्यंत गंभीर असून, या संपूर्ण घटनेला पालिका प्रशासनच जबाबदार आहे. या असंवेदनशील प्रशासनातील जबाबदार अधिकाऱ्यांवर मनुष्यवधाचा गुन्हा दाखल करावा, अशी तीव्र मागणी राष्ट्रीय श्रमिक आघाडीचे कामगार नेते यशवंत भोसले यांनी केली आहे. आशिया खंडातील सर्वात श्रीमंत आणि ४० वर्षांपेक्षा जास्त प्रदीर्घ अनुभव असलेली महापालिका असूनही कचरा डेपो विभागात एवढी मोठी दुर्घटना घडणे हे अत्यंत दुर्दैवी असल्याचे भोसले यांनी म्हटले आहे. ढिगाऱ्याखाली दबलेल्या लोकांना शोधण्यासाठी पालिका प्रशासनाने शरीर शोधणारी यंत्रणा उपलब्ध करून ४८ तासांत शोधणे आवश्यक होते, मात्र ४ दिवस उलटूनही ढिगाऱ्याखालचे मृतदेह शोधण्यात पालिकेला अपयश आले आहे. कचऱ्याच्या डोंगराशेजारी इमारत व कॅन्टीन बांधण्याची परवानगी नेमकी कुणी आणि का दिली, असा संतप्त प्रश्न विचारत भोसले यांनी प्रशासनाच्या कारभाराचे वाभाडे काढले. इमारतीच्या तीन पट कचऱ्याचे डोंगर तयार होईपर्यंत प्रशासन काय करत होते, असा सवाल करत त्यांनी, सामान्य जनतेचे अनधिकृत बांधकाम तात्काळ पाडणारे प्रशासन स्वतः मात्र कचरा डेपोत अनधिकृतपणे कार्यालये उभी करून काम करत असल्याचा गंभीर आरोप केला. तळमजल्याची परवानगी असताना वरचे दोन मजले विनापरवाना बांधण्यामागे कंत्राटदारांचे खिसे भरण्याचा हेतू असल्याचा संशय त्यांनी व्यक्त केला. कामगारांच्या सुरक्षिततेबाबत बोलताना यशवंत भोसले यांनी सांगितले की, कामगारांना कोणतीही सुरक्षा दिली जात नाही आणि त्यांना केवळ १ लाखाचा विमा दिला जातो. वर्षातून एकदा तरी होणारी कामगारांची आरोग्य तपासणीही होताना दिसत नाही. कचऱ्याची विल्हेवाट लावण्यासाठी कोट्यवधी रुपये खर्चून उभारलेल्या वेस्टेज टू एनर्जी प्रकल्पातील मशिनरी वारंवार बंद राहत असल्यामुळेच कचऱ्याचे डोंगर उभे राहिले आहेत. या भ्रष्ट व उदासीन कारभारामुळेच ही दुर्घटना घडली असून कर्तव्यचुकार अधिकाऱ्यांना तात्काळ निलंबित करून त्यांच्यावर मनुष्यवधाचा गुन्हा दाखल करण्याची मागणी करण्यात आली आहे, जेणेकरून मस्तवाल झालेल्या अधिकारी व ठेकेदारांना जरब बसेल. भ्रष्ट प्रशासनाला पाठीशी घालणारे आणि मदत करणारे लोकप्रतिनिधी आयुष्यभराचे पाप घेऊन मरणार असल्याचा संताप व्यक्त करत, भोसले यांनी पालिका आयुक्त डॉ. विजयकुमार सूर्यवंशी यांच्यावर थेट निशाणा साधला. आयुक्त कंत्राटदारांना भेटायला वेळ देतात, मात्र कामगारांच्या व्यथा ऐकण्यासाठी कामगार नेत्यांना भेटायला त्यांच्याकडे वेळ नाही आणि ते पालिकेचे दालन सोडून ऑटो क्लस्टर येथे कार्यालय थाटतात, अशी मोठी खंत त्यांनी व्यक्त केली. गटारे तुंबली आहेत आणि पाऊस पडला आहे, तरीही लोकांना प्यायला पाणी नाही याकडेही पालिका जाणूनबुजून दुर्लक्ष करत असल्याचा आरोप करत त्यांनी, कंत्राटी कामगारांना १५ दिवसांच्या आत शासनाच्या सेवेत कायम करण्याचा निर्णय न घेतल्यास प्रशासनाला जाब विचारण्यासाठी महापालिकेच्या दारात भव्य आंदोलन करण्याचा इशारा दिला आहे.