দুলীয়াজানৰ জনসাধাৰণৰ বাবে এক ইতিবাচক খবৰ আহিছে, যিটোৱে অঞ্চলজুৰি আনন্দৰ সৃষ্টি কৰিছে। দেওবাৰে দুলীয়াজানৰ মাধপপুৰত নিৰ্মাণ কৰা নাহৰকটীয়া আৰু দুলীয়াজানক সংযোগ কৰা উৰণীয়া সেতুখন মুকলি কৰা হ'ব। এই গুৰুত্বপূৰ্ণ উৰণীয়া সেতুখন মন্ত্ৰী ৰামেশ্বৰ তেলীয়ে ৰাজ্যসভাৰ সাংসদ তেৰছ গোৱালাৰ উপস্থিতিত আনুষ্ঠানিকভাৱে উদ্বোধন কৰিব।

আজি কলাগুৰু বিষ্ণুপ্ৰসাদ ৰাভাৰ পৱিত্ৰ স্মৃতিত ৰাভা দিৱস পালন কৰা হৈছে। ৰাজ্যৰ বিভিন্ন প্ৰান্তৰ লগতে চৰাইদেউ জিলাতো কলাগুৰুৰ স্মৃতি দিৱস আয়োজন কৰা হৈছে। চৰাইদেউ জিলাৰ সোণাৰি শিক্ষা খণ্ডৰ অন্তৰ্গত নিজখালৈঘোগুৰা উচ্চ মাধ্যমিক বিদ্যালয়ত দিনজোৰা কাৰ্যসূচীৰে এই ৰাভা দিৱস উদযাপন কৰা হয়। এই অনুষ্ঠানত মাহমৰা সম জিলাৰ আয়ুক্ত ডিলচেংফা বৰুৱাই অংশগ্ৰহণ কৰে।

কলাগুৰু বিষ্ণু ৰাভা দিৱস উপলক্ষে মাকুমত এক বিশেষ কাৰ্যসূচী ৰূপায়ণ কৰা হয়, য'ত ১৮ জন শিশুৱে একেলগে গিটাৰ বজাই কলাগুৰুক স্মৰণ কৰে। মাকুমৰ সংগীত প্ৰশিক্ষক নৱ কুমাৰ বৰুৱাৰ বিশেষ উদ্যোগত উইনি এফ এক্স ষ্টুডিঅ'ত এই শ্ৰদ্ধাঞ্জলি অনুষ্ঠান আয়োজন কৰা হৈছিল। এই অনুষ্ঠানত শিশুসকলে কলাগুৰু বিষ্ণু ৰাভাৰ সৃষ্টি 'নাহৰ ফুলে নুশুৱাই' শীৰ্ষক গীতটি গিটাৰ বজাই পৰিৱেশন কৰিছিল।

ৰাজ্যৰ অন্য প্ৰান্তৰ লগতে অখিল ভাৰতীয় বিদ্যাৰ্থী পৰিষদৰ (এবিভিপি) সোণাৰি নগৰ শাখাৰ উদ্যোগত আজি সোণাৰিত বিষ্ণু ৰাভা দিৱস পালন কৰা হয়। এই উপলক্ষে চলিত বৰ্ষৰ হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত সুখ্যাতিৰে উত্তীৰ্ণ হোৱা কৃতী ছাত্ৰ-ছাত্ৰীসকলক এক বিশেষ অনুষ্ঠানত সম্বৰ্ধনা জনোৱা হয়। অনুষ্ঠানত সোণাৰি সমষ্টিৰ বিধায়ক ধৰ্মেশ্বৰ কোঁৱৰে মুখ্য অতিথি হিচাপে উপস্থিত থাকি কৃতী শিক্ষাৰ্থীসকলক সম্বৰ্ধনা জ্ঞাপন কৰে আৰু তেওঁলোকৰ শৈক্ষিক সাফল্যৰ বাবে শুভেচ্ছা ও অভিনন্দন জনায়। ভাষণ প্ৰসংগত তেওঁ কয় যে শিক্ষা হৈছে জাতি গঠনৰ মূল ভেটি, আৰু আজিৰ এই মেধাৱী শিক্ষাৰ্থীসকলেই আগন্তুক দিনত সমাজ তথা দেশৰ উন্নয়নৰ চালিকাশক্তি হিচাপে আত্মপ্ৰকাশ কৰিব। বিধায়কে লগতে উল্লেখ কৰে যে সমাজ আৰু দেশৰ কল্যাণৰ বাবে শিক্ষাৰ্থীসকলে বিষ্ণু ৰাভাৰ আদৰ্শৰে নিজৰ প্ৰতিভা আৰু দক্ষতাক সঠিকভাৱে আগবঢ়াই নিয়া উচিত। এই অনুষ্ঠানত অখিল ভাৰতীয় বিদ্যাৰ্থী পৰিষদৰ যোৰহাট বিভাগৰ সাংগঠনিক সম্পাদক জিতু মনি কলিতা, চৰাইদেউ জিলাৰ বিদ্যালয়সমূহৰ পৰিদৰ্শক পলাশ কাকতি, সোণাৰি পৌৰসভাৰ পৌৰপতি তিলক চন্দ্ৰ নেওগ, সমাজকৰ্মী অনুপ সিং ৰাজপুৰোহিত, মনি গগৈ, জুৰি দেৱী ফুকন, বিদ্যালয়ৰ সহ-পৰিদৰ্শক দেৱজিৎ গগৈ, সমাজকৰ্মী প্ৰশান্ত শৰ্মা, ধ্ৰুব শৰ্মাৰ লগতে বহু শিক্ষক-শিক্ষয়িত্ৰী, অভিভাৱক আৰু অসংখ্য ছাত্ৰ-ছাত্ৰী উপস্থিত থাকে। তেজস্বিনী মহিলা স্বেচ্ছাসেৱী সংগঠনৰ দ্বাৰা বিষ্ণু প্ৰসাদ ৰাভাৰ গীত পৰিৱেশনেৰে অনুষ্ঠানটো শুভাৰম্ভ কৰা হয়, আৰু কেইবাগৰাকীও ন-পুৰণি কণ্ঠশিল্পীয়ে বিষ্ণু প্ৰসাদ ৰাভাৰ সংগীত পৰিৱেশন কৰি সমগ্ৰ অনুষ্ঠানটো জীপাল কৰি তোলে। বিধায়ক কোঁৱৰে অনুষ্ঠানৰ সফল আয়োজনৰ বাবে এবিভিপিৰ সোণাৰি নগৰ শাখাক ধন্যবাদ জ্ঞাপন কৰাৰ লগতে সকলো শিক্ষাৰ্থীৰ উজ্জ্বল ভৱিষ্যৎ, সুস্বাস্থ্য আৰু সৰ্বাঙ্গীণ সফলতা কামনা কৰে।

আজি দিন দুপৰতে মাৰ্ঘেৰিটা নগৰৰ ভিনিয়াৰ মিল চৌহদৰ ভিতৰত বাঘে বিচৰণ কৰাক লৈ তীব্ৰ চাঞ্চল্য সৃষ্টি হৈছে। বনৰাজ হিচাপে জনাজাত বাঘটোৱে এটা ছাগলী মাৰি তাতোকৈ অধিক চাঞ্চল্যৰ সৃষ্টি কৰিছিল আৰু পিছত উধাও হয়। স্থানীয় লোকে প্ৰত্যক্ষ কৰা এই বাঘটোৱে এটা ছাগলী মাৰিছিল। স্থানীয় ৰাইজে চিঞৰ-বাখৰ কৰাত বনৰজা জংঘলৰ মাজত সোমাই পৰে। উল্লেখযোগ্য যে, মাৰ্ঘেৰিটা স্থিত ডেৰশ বছৰ পুৰণি A'R & T Company ভিনিয়াৰ মিল দীৰ্ঘদিন ধৰি বন্ধ হৈ থকাৰ ফলত ইয়াৰ চৌহদত ডাঙৰ ডাঙৰ হাবি-জংঘলৰ সৃষ্টি হৈছে। মাৰ্ঘেৰিটা নগৰৰ জনবসতিপূৰ্ণ এলেকাত বাঘ ওলোৱাক লৈ স্থানীয় লোকে গভীৰ আশ্চৰ্য প্ৰকাশ কৰিছে। এই ঘটনাৰ খবৰ পোৱাৰ পিছতে ডিগবৈ সংমণ্ডলৰ অন্তৰ্গত মাৰ্ঘেৰিটা পূৱ আঞ্চলিক বন বিষয়া কাৰ্যালয়ৰ বন কৰ্মী দল আৰু মাৰ্ঘেৰিটা আৰক্ষী ঘটনাস্থলীত উপস্থিত হয়। এই ঘটনাই সমগ্ৰ অঞ্চলটোত ব্যাপক চাঞ্চল্যৰ সৃষ্টি কৰিছে।

Domay kawoi fish🐠 farming and fry"l kharidne se comment karo Domay kawoi fish 🐠 farming and fry"l kharidne se comment karo please

দুলীয়াজানৰ ৫ গৰাকী খেলুৱৈয়ে চলিত মাহৰ ১২, ১৩ আৰু ১৪ তাৰিখে অনুষ্ঠিত ৰাষ্ট্ৰীয় পাঞ্জা প্ৰতিযোগিতাত সোন আৰু ৰূপৰ পদক অৰ্জন কৰিছে। এই সফলতাই দুলীয়াজানৰ লগতে সমগ্ৰ অসমলৈ গৌৰৱ কঢ়িয়াই আনিছে।

বানপানী আৰু প্ৰাকৃতিক দুৰ্যোগৰ ফলত নষ্ট হোৱা কঠীয়াৰ বাবে ক্ষতিগ্ৰস্ত কৃষকসকলক সহায় কৰাৰ লগতে পুনৰ খেতি আৰম্ভ কৰিবলৈ উৎসাহিত কৰাৰ উদ্দেশ্যৰে আজি সোণাৰি সমষ্টিৰ ২নং ধুনীয়াপথাৰ গাঁৱত এক “কঠীয়া সিঁচা পৰ্ব” সফলভাৱে অনুষ্ঠিত হয়। এই কাৰ্যসূচীত সোণাৰি সমষ্টিৰ বিধায়ক ধৰ্মেশ্বৰ কোঁৱৰ উপস্থিত থাকি বানাক্ৰান্ত কৃষকসকলৰ সৈতে মত-বিনিময় কৰে। সাপেখাটী মণ্ডলৰ বিষয়ববীয়াসকলে আয়োজন কৰা এই কাৰ্যসূচীত বিধায়ক কোঁৱৰে কৃষি খণ্ডৰ উন্নয়ন আৰু কৃষকৰ স্বাৱলম্বিতা নিশ্চিত কৰাৰ ক্ষেত্ৰত চৰকাৰৰ বিভিন্ন পদক্ষেপসমূহৰ বিষয়ে আলোকপাত কৰে। তেওঁ স্পষ্টভাৱে কয় যে বানপানীত ক্ষতিগ্ৰস্ত কৃষকসকলক পুনৰ উৎপাদনমুখী কৰি তোলাৰ বাবে এইধৰণৰ পদক্ষেপ অত্যন্ত গুৰুত্বপূৰ্ণ। কাৰ্যসূচীৰ জৰিয়তে কৃষকসকলক প্ৰয়োজনীয় কঠীয়া আৰু কৃষিকাৰ্য সম্পৰ্কীয় সহায় আগবঢ়োৱা হয়, যাৰ ফলত তেওঁলোকে পুনৰ খেতি আৰম্ভ কৰাৰ সুযোগ পাব আৰু কৃষি উৎপাদন বৃদ্ধিত সহায় হ’ব বুলি আশা প্ৰকাশ কৰা হৈছে। বিধায়ক ধৰ্মেশ্বৰ কোঁৱৰে কৃষকসকলৰ কল্যাণক অগ্ৰাধিকাৰ দি আগন্তুক দিনতো কৃষি উন্নয়নৰ বাবে বিভিন্ন পদক্ষেপ গ্ৰহণ অব্যাহত থাকিব বুলি উল্লেখ কৰে। তেওঁ মত প্ৰকাশ কৰে যে এই “কঠীয়া সিঁচা পৰ্ব”ই ক্ষতিগ্ৰস্ত কৃষকসকলৰ মাজত নতুন আশাৰ সঞ্চাৰ কৰাৰ লগতে কৃষিভিত্তিক অৰ্থনীতি অধিক শক্তিশালী কৰাৰ ক্ষেত্ৰতো ইতিবাচক প্ৰভাৱ পেলাব।

তিনিচুকীয়া চিকিৎসা মহাবিদ্যালয় আৰু চিকিৎসালয় চৌহদৰ পৰা কঁপাৰ তাঁৰ চুৰিৰ অভিযোগত এজন যুৱকক আটক কৰা হৈছে। অভিযোগ অনুসৰি, শুকুৰবাৰে নিশা প্ৰায় ১০ বজাত চাৰুক আলি (২৪) নামৰ এজন মুছলমান সম্প্ৰদায়ৰ যুৱকে চিকিৎসা মহাবিদ্যালয়খনৰ পৰা কঁপাৰ তাঁৰ চুৰি কৰি লৈ যোৱাৰ সময়ত সন্দেহজনক অৱস্থাত ধৰা পৰে।

চৰাইদেউ জিলাৰ মাহমৰা জেলুকণি গাঁৱত এক শোকাবহ ঘটনা সংঘটিত হৈছে, য'ত পথ নিৰ্মাণৰ বাবে খন্দা এটা বৃহৎ গাঁতত পৰি মুকুল বণিক দাস নামৰ এটা চাৰি বছৰীয়া শিশুৱে কৰুণ মৃত্যুক সাৱটি লৈছে। এই ঘটনাটো ঘৰৰ সন্মুখত পথ নিৰ্মাণৰ বাবে ঠিকাদাৰে মাটি খান্দি নিয়াৰ ফলত সৃষ্টি হোৱা গাঁতটোত শিশুটি হঠাৎ পিছলি পৰাত সংঘটিত হয়। এই দুৰ্ভাগ্যজনক ঘটনাৰ পাছতে স্থানীয় ৰাইজ উত্তেজিত হৈ পৰে। ৰাইজে পথ নিৰ্মাণকাৰী ঠিকাদাৰক কঠোৰভাৱে জগৰীয়া কৰিছে, অভিযোগ অনুসৰি ঠিকাদাৰৰ দায়িত্বহীনতাৰ বাবেই পথৰ কাষত উন্মুক্ত গাঁতটো খন্দা হৈছিল, যাৰ ফলত শিশুটিৰ মৃত্যু হয়। ৰাইজে এই ঘটনাৰ বাবে ঠিকাদাৰৰ বিৰুদ্ধে বিহিত ব্যৱস্থা গ্ৰহণৰ দাবী জনাইছে। শিশুৰ মৃত্যুক কেন্দ্ৰ কৰি চৰাইদেউ জিলা আয়ুক্তৰ কাৰ্যালয়ৰ সন্মুখৰ পৰিৱেশ উত্তপ্ত হৈ পৰে। উত্তেজিত ৰাইজে আয়ুক্তৰ কাৰ্যালয়ৰ সন্মুখত ধৰ্ণা প্ৰদৰ্শন কৰি প্ৰতিবাদ সাব্যস্ত কৰে আৰু জিলা আয়ুক্তক এখন স্মাৰক পত্ৰ প্ৰদান কৰে, য'ত দায়িত্বহীন ঠিকাদাৰৰ বিৰুদ্ধে তৎকালীন ব্যৱস্থা গ্ৰহণৰ দাবী পুনৰ উত্থাপন কৰা হয়।