సూర్యాపేటలో జరుగుతున్న అండర్ గ్రౌండ్ డ్రైనేజీ పనుల ఆలస్యంపై జిల్లా కలెక్టర్ తేజస్ నందలాల్ పవార్ తీవ్ర ఆగ్రహం వ్యక్తం చేశారు. సూపర్డెంట్ ఇంజనీర్, కమిషనర్, ఎగ్జిక్యూటివ్ ఇంజనీర్లతో జరిగిన సమావేశంలో ఆయన పనుల పురోగతిని సమీక్షించారు. కేఎన్ఆర్ కన్స్ట్రక్షన్ లిమిటెడ్ పని తీరుపై కలెక్టర్ తన అసంతృప్తిని స్పష్టం చేశారు, పనుల ఆలస్యానికి గల కారణాలపై నిలదీశారు. పనుల జాప్యం వల్ల ప్రజలు, వాహనదారులు తీవ్ర ఇబ్బందులు ఎదుర్కొంటున్నారని, అంతేకాకుండా సరఫరాకు కూడా అంతరాయం ఏర్పడుతుందని కలెక్టర్ పేర్కొన్నారు. ఈ పనులను త్వరితగతిన పూర్తి చేయాలని, అధికారులందరూ సమన్వయంతో పనిచేయాలని ఆయన ఆదేశించారు.

కూసుమంచి మండల కేంద్రంలోని చారిత్రక శ్రీ గణపేశ్వరాలయ (శివాలయం) అభివృద్ధి పనులకు ఆదివారం మంత్రి పొంగులేటి శ్రీనివాసరెడ్డి మరియు ఖమ్మం ఎంపీ రామసహాయం రఘురామిరెడ్డి శంకుస్థాపన చేశారు. రూ.3 కోట్ల 30 లక్షల 50 వేల నిధులతో చేపట్టనున్న ఈ పనులు ఆలయ పూర్వ వైభవాన్ని పెంపొందించేలా, భక్తులకు సకల వసతులు కల్పించేలా ఆధునికీకరణ పనులు పూర్తి చేస్తామని ఈ సందర్భంగా వారు పేర్కొన్నారు.

ఖమ్మం నగరంలోని రెడ్ హిల్స్‌లో గత 40 రోజుల క్రితం రోడ్డు ప్రమాదంలో మరణించిన దివంగత మాజీ కాంగ్రెస్ పార్టీ పట్టణ అధ్యక్షుడు, టీపీసీసీ సభ్యుడు మహమ్మద్ జావేద్ సంతాప సభను ఘనంగా నిర్వహించారు. ఈ కార్యక్రమానికి టీపీసీసీ అధ్యక్షులు బొమ్మ మహేష్ కుమార్ గౌడ్, కాంగ్రెస్ పార్టీ వ్యవహారాల ఇన్చార్జి మీనాక్షి నటరాజన్, రాష్ట్ర మంత్రులు పొంగులేటి శ్రీనివాసరెడ్డి, తుమ్మల నాగేశ్వరరావు, అజహరుద్దీన్ హాజరయ్యారు. ఈ సందర్భంగా టీపీసీసీ అధ్యక్షులు మహేష్ కుమార్ గౌడ్ మాట్లాడుతూ, వ్యక్తులు పార్టీలకు రుణపడి ఉండటం సహజమని, అయితే కాంగ్రెస్ పార్టీ నిఖార్సైన కార్యకర్త దివంగత జావేద్‌కు రుణపడి ఉందని పేర్కొన్నారు. సన్మాన సభ జరపాల్సిన చోటున సంతాప సభ జరపడం చాలా బాధాకరమైన విషయం అని ఆయన అన్నారు. అనంతరం మంత్రులు, టీపీసీసీ అధ్యక్షులు, పార్టీ వ్యవహారాల ఇన్చార్జి మీనాక్షి నటరాజన్ లు జావేద్ చిత్రపటానికి పూలమాలలు వేసి నివాళులు అర్పించారు. జావేద్ పెద్ద కుమార్తె తన తండ్రి అడుగుజాడల్లో నడుస్తానని, తన తండ్రికి ఇస్తానన్న పదవిని తనకు ఇవ్వాలని విజ్ఞప్తి చేశారు. వారి ఆశయాలను ముందుకు తీసుకెళ్లడం అంటే రాజకీయాల్లో ఉంటేనే సాధ్యమవుతుందని ఆమె అన్నారు. దీంతో జావేద్ కుటుంబానికి అన్ని విధాలా తోడుంటామని, ఆయన కుటుంబ సభ్యులు ఏదైతే ఆశిస్తున్నారో దానిపై ముఖ్యమంత్రితో చర్చించి ఖచ్చితంగా న్యాయం జరిగేలా చేస్తామని నేతలు భరోసా ఇచ్చారు. ఈ కార్యక్రమానికి జావేద్ అభిమానులు, కార్యకర్తలు భారీ సంఖ్యలో తరలివచ్చారు.

బండి సాహితి రెడ్డి చారిటబుల్ ట్రస్ట్ ఆధ్వర్యంలో ఈరోజు గుంటూరులో ఒక సేవా కార్యక్రమం నిర్వహించారు. ఈ కార్యక్రమంలో పారిశుద్ధ్య కార్మికులకు గ్లాసులు మరియు ప్లేట్లు పంపిణీ చేశారు. ikv ప్రసాద్ చేతుల మీదుగా ఈ పంపిణీ కార్యక్రమం చేపట్టబడింది. ఆపదలో ఉన్న వారికి చేయూతనందిస్తూ, కనీస అవసరాలు తీర్చుకోలేని వారికి ఆదుకుంటూ ఈ బండి సాహితి రెడ్డి చారిటబుల్ ట్రస్ట్ ఎన్నో సేవా కార్యక్రమాలను నిర్వహిస్తూ ముందుకు సాగుతోంది.

మహిళా శక్తి వారోత్సవాల సందర్భంగా హన్మకొండ జిల్లా దామెర మండలం ల్యాదేళ్ల గ్రామంలో పరకాల స్కిల్ డెవలప్‌మెంట్ అండ్ మినీ మ్యానుఫ్యాక్చరింగ్ హబ్‌ను ప్రారంభించారు. పరకాల ఎమ్మెల్యే రేవూరి ప్రకాశ్ రెడ్డి, వీ-హబ్ సీఈవో సీతా పల్లాచోళ్ల కలిసి ఈ కేంద్రాన్ని ప్రారంభించారు. ఈ సందర్భంగా ఎస్‌హెచ్‌జీ వీవో, వర్క్‌షెడ్, జీ ఎం డైరీ, సమావేశ మందిరం భవనాలకు శంకుస్థాపన కూడా చేశారు. ఈ కార్యక్రమాన్ని ఉద్దేశించి ఎమ్మెల్యే మాట్లాడుతూ, 'రుద్రమ' బ్రాండ్ తెలంగాణ మహిళల ఆర్థిక స్వావలంబనకు, ఆత్మగౌరవానికి ప్రతీకగా నిలుస్తుందని అన్నారు. నాణ్యమైన ఉత్పత్తులతో దేశవ్యాప్త గుర్తింపు తీసుకురావాలని మహిళలకు పిలుపునిచ్చారు. గ్రామీణ మహిళలకు నైపుణ్య శిక్షణతో పాటు ఉపాధి అవకాశాలు కల్పించడమే ఈ కేంద్రం ప్రధాన లక్ష్యమని ఆయన వివరించారు. రుద్రమ చరిత్ర స్ఫూర్తితో మహిళల శక్తిని ప్రతిబింబించేలా ఉత్పత్తులు తయారు చేయాలని సూచించడంతో పాటు, మార్కెటింగ్ సహకారం అందిస్తామని హామీ ఇచ్చారు. అంతేకాకుండా, పరకాల ఇందిరా మహిళ పాల ఉత్పత్తిదారుల సహకార సమాఖ్య లిమిటెడ్ ఏర్పాటు చేస్తున్నట్లు కూడా ఈ సందర్భంగా ప్రకటించారు.

ఖమ్మంలో కమ్మ మహాజన సంఘం ఆధ్వర్యంలో శ్రీ నందమూరి తారక రామారావు 103వ జయంతి సందర్భంగా మెగా వైద్య శిబిరం మరియు మందుల పంపిణీ కార్యక్రమం నిర్వహించారు. ఈ కార్యక్రమానికి హాజరైన మంత్రి తుమ్మల, నందమూరి తారక రామారావు గారి జయంతిని పురస్కరించుకుని ఆయనను స్మరించుకుంటూ కమ్మ మహాజన సంఘం ఉచిత మెగా వైద్య శిబిరం మరియు మందుల పంపిణీ కార్యక్రమాన్ని ఏర్పాటు చేయడం అభినందనీయం అని పేర్కొన్నారు. ఈ కార్యక్రమాలతో పాటు, ఈ సంఘం ఆధ్వర్యంలో అనేక మంచి కార్యక్రమాలు, సేవలు చేసి ఖమ్మం ప్రజలందరికీ ఉపయోగపడాలని మంత్రి తుమ్మల ఆకాంక్షించారు.

ఈ రోజు ఉదయం నుంచే ఫలక్నుమా కాళీ మాత మందిరానికి భక్తులు భారీ సంఖ్యలో తరలివచ్చారు. తమ కోరికలను నెరవేర్చుకోవాలనే ఆకాంక్షతో భక్తులు ముడుపులు సమర్పిస్తూ ప్రత్యేక పూజలు నిర్వహించారు. ఎలాంటి అవాంఛనీయ ఘటనలు చోటు చేసుకోకుండా ఉండేందుకు ఆలయ యాజమాన్యం పటిష్టమైన ప్రత్యేక ఏర్పాట్లు చేసింది. భక్తుల సౌకర్యార్థం తాగునీరు, క్యూలైన్ నిర్వహణ వంటి అవసరమైన సదుపాయాలను కల్పించడంతో, పూజలు ఎటువంటి ఆటంకాలు లేకుండా సాఫీగా కొనసాగాయి.

తెలంగాణ రాష్ట్ర రెవెన్యూ శాఖ మంత్రి పొంగులేటి శ్రీనివాస్ రెడ్డి రేపు ఖమ్మం జిల్లాలోని పాలేరు నియోజకవర్గ పరిధిలోని కూసుమంచి, రూరల్ మండలాల్లో పర్యటించనున్నారు. ఈ పర్యటనలో భాగంగా ఆయన పలు అభివృద్ధి కార్యక్రమాలకు శంకుస్థాపన చేస్తారు. కుసుమంచి మండలంలోని గణపేశ్వర ఆలయంలో చేపట్టనున్న అభివృద్ధి పనులకు, అలాగే కొండాపురం నుంచి పొన్నెకల్లు వరకు నిర్మించనున్న బీటీ రోడ్డుకు శంకుస్థాపన శిలాఫలకాన్ని ఆవిష్కరించే కార్యక్రమంలో మంత్రి పాల్గొంటారు. ఈ సందర్భంగా మంత్రి పర్యటనను విజయవంతం చేయాలని కాంగ్రెస్ పార్టీ మండల అధ్యక్షులు పార్టీ శ్రేణులకు పిలుపునిచ్చారు. మంత్రి పర్యటనను విజయవంతం చేసేందుకు కాంగ్రెస్ పార్టీ జిల్లా నాయకులు, సర్పంచులు, మార్కెట్ కమిటీ చైర్మన్లు, వైస్ చైర్మన్లు, డైరెక్టర్లు, ఆత్మ కమిటీ డైరెక్టర్లు, కాంగ్రెస్ పార్టీ మండల స్థాయి నాయకులు, గ్రామస్థాయి, వార్డు సభ్యులు, కార్యకర్తలు, అభిమానులు పెద్ద సంఖ్యలో పాల్గొనాలని క్యాంపు కార్యాలయం ఇంచార్జ్ కోరారు.

నగరంలోని కాల్వొడ్డు సెంటర్‌లో కేబుల్ బ్రిడ్జి నిర్మాణంలో భాగంగా దివంగత మాజీ ప్రధాని రాజీవ్ గాంధీ విగ్రహాన్ని మున్సిపల్ అధికారులు తొలగించడం స్థానికంగా తీవ్ర ఉద్రిక్తతకు, రాజకీయ దుమారానికి దారితీసింది. అధికారుల ఈ చర్యను నిరసిస్తూ కాంగ్రెస్ పార్టీ సీనియర్ నాయకుడు, మాజీ రాజ్యసభ సభ్యుడు వి.హనుమంతురావు, మాజీ పీసీసీ అధ్యక్షుడు సంభాని చంద్రశేఖర్‌లతో కలిసి ఖమ్మంలో పెద్ద ఎత్తున నిరసన కార్యక్రమం చేపట్టారు. కలెక్టర్, మున్సిపల్ కమిషనర్ వచ్చి స్పష్టమైన హామీ ఇచ్చేంత వరకు నిరసన విరమించేది లేదని, అక్కడి నుండి కదిలేది లేదని వి.హనుమంతురావు భీష్మించుకు కూర్చున్నారు. కాంగ్రెస్ కార్యకర్తలు రాజీవ్ గాంధీ విగ్రహాన్ని ప్రాణప్రదంగా భావిస్తారని, అలాంటి విగ్రహాన్ని రాత్రికి రాత్రే తొలగించి, మళ్లీ ఎక్కడ పునఃప్రతిష్ఠిస్తారో చెప్పకుండా మున్సిపల్ కార్పొరేషన్ అధికారులు దాగుడుమూతలు ఆడుతున్నారని తీవ్ర ఆగ్రహం వ్యక్తం చేశారు. కోట్ల రూపాయలు ఖర్చు పెట్టి పరాయి పార్టీ నాయకుల విగ్రహాలను మెయిన్ సెంటర్లలో పెడుతున్న బడా కాంగ్రెస్ నాయకులకు, సొంత పార్టీ దైవ సమానుడైన రాజీవ్ గాంధీ విగ్రహాన్ని తొలగిస్తుంటే కండ్లు కనిపించడం లేదా అంటూ కాంగ్రెస్ పార్టీ కేడర్ మండిపడుతోంది. దివంగత మాజీ ప్రధాని రాజీవ్ గాంధీ విగ్రహం తొలగింపుతో నెలకొన్న ఈ పరిణామంతో తీవ్ర ఉద్రిక్త వాతావరణం నెలకొంది.

గుంటూరులో మాజీ మంత్రి అంబటి రాంబాబు సంచలన వ్యాఖ్యలు చేశారు. కూటమి ప్రభుత్వాన్ని కూకటివేళ్ళతో పెకిలించే వరకు ప్రజల తరపున పోరాటం చేస్తూనే ఉంటానని ఆయన స్పష్టం చేశారు. తాము నిర్వహించిన దగా DSC నిరసనలో గంజాయి బ్యాచ్ లేదని, అయితే తన ఇంటిపై దాడి చేసింది మాత్రం గంజాయి బ్యాచ్ అని ఆరోపించారు. DSCలో అవకతవకలు జరగకపోతే మంత్రి లోకేశ్ ఎందుకు ప్రెస్మీట్ పెట్టి సమాధానం చెప్పలేదని అంబటి రాంబాబు ప్రశ్నించారు. స్పోర్ట్స్ పరిజ్ఞానం లేకపోయినా స్పోర్ట్స్ కోటా ఉద్యోగాలను అమ్ముకున్నారని ఆయన తీవ్ర ఆరోపణలు చేశారు. లోకేశ్ తమ నిరసనపై నేరుగా స్పందించకుండా, ఒక IAS అధికారిని అడ్డుపెట్టుకొని అబద్ధాలు చెప్పించారని విమర్శించారు. కల్తీ లడ్డూ అంశంలో ప్రభుత్వం సిట్ వేసినప్పుడు, DSCలో జరిగిన అవకతవకలపై ఎందుకు సిట్ వేయలేకపోయిందని నిలదీశారు. ఎన్ని కేసులు పెట్టినా తాను భయపడేది లేదని, ఎన్ని కేసులు పెడితే అంత ఉత్సాహంగా, ఊపందుకుంటానని మాజీ మంత్రి అంబటి రాంబాబు గట్టిగా స్పష్టం చేశారు.