హైదరాబాద్‌లోని గండిపేటలో భూకబ్జాలకు పాల్పడిన వారిలో వినుకొండ మాజీ ఎమ్మెల్యే గొల్ల బ్రహ్మనాయుడు ఉన్నారని ఆరోపిస్తూ, ఎమ్మెల్యే నక్కెన మల్లికార్జునరావు ఆయనపై తీవ్ర విమర్శలు చేశారు. భూకబ్జాలకు పాల్పడ్డ వారిపై అక్రమ కేసులు పెట్టడం తప్పేమీ కాదని, దీనిపై ఆంధ్ర నాయకులు ఏం చేస్తారని మల్లికార్జునరావు సూటిగా ప్రశ్నించారు. జిడిసివిబి ఛైర్మన్ అయిన నక్కెన మల్లికార్జునరావు ఈ వ్యాఖ్యలతో బ్రహ్మనాయుడిపై విరుచుకుపడ్డారు.

పాలనాడు జిల్లాలోని సత్తెనపల్లి రంగా కాలనీలో 22 ఏళ్ల గౌస్ అనే యువకుడు తన స్నేహితుడి ఇంట్లో ఉరివేసుకుని ఆత్మహత్యకు పాల్పడ్డాడు. ఒక కేసు విషయంలో పోలీసులు గౌస్‌ను స్టేషన్‌కు పిలవడంతో అతను భయపడి ఈ దారుణానికి ఒడిగట్టినట్లు సమాచారం. ఘటనకు ముందు, ఒక హెడ్ కానిస్టేబుల్ గౌస్‌కు ఫోన్ చేసి, వెంటనే ఇంటికి వెళ్లి స్టేషన్‌కు రావాలని హుకుం జారీ చేసినట్లు తెలుస్తోంది. పోలీసుల పిలుపుతో తీవ్ర భయానికి గురైన గౌస్ ఆత్మహత్యకు పాల్పడ్డాడు. ఆత్మహత్యకు ముందు గౌస్ తన స్నేహితుడు మహేష్‌కు ఇన్‌స్టాగ్రామ్ ద్వారా సందేశం పంపాడు. పోలీసులు స్టేషన్‌కు రమ్మని ఫోన్ చేశారని అందులో పేర్కొన్నాడు. ఆ తర్వాత, "బార్గవ్ వాళ్ల ఇంట్లో ఉరివేసుకుంటున్న మహేష్ సారి రా" అంటూ మరో సందేశం పంపి ప్రాణాలు తీసుకున్నాడు. ఈ ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.

పల్నాడు జిల్లాలోని వినుకొండ పట్టణంలో గత నెల 21న వేక్షితా జ్యూయలర్స్ లో జరిగిన దొంగతనం కేసును పోలీసులు ఛేదించారు. ఈ చోరీకి పాల్పడిన అంతర్ రాష్ట్ర దొంగను అరెస్టు చేసిన పోలీసులు, అతని వద్ద నుంచి సుమారు 27 లక్షల రూపాయల విలువైన వెండి, బంగారు వస్తువులతో పాటు ఒక బుల్లెట్ వాహనం, ఒక ఆటోను స్వాధీనం చేసుకున్నారు. నరసరావుపేట డిఎస్పి హనుమంతరావు తెలిపిన వివరాల ప్రకారం, ఈ నిందితుడిపై రాష్ట్ర వ్యాప్తంగా సుమారు 25 దొంగతనం కేసులు నమోదై ఉన్నాయి.

విద్య, ఐటీ, ఎలక్ట్రానిక్స్, ఆర్జీజీ శాఖల మంత్రి నారా లోకేష్ శుక్రవారం సచివాలయంలోని ఆర్టీజీఎస్ కమాండ్ కంట్రోల్ సెంటర్‌లో ఆర్టీజీఎస్‌పై సమీక్ష నిర్వహించారు. ఈ సందర్భంగా, ‘మనమిత్ర వాట్సాప్ గవర్నెన్స్’ వినియోగంపై ప్రజల్లో మరింత అవగాహన కల్పించేందుకు అధికారులు చర్యలు చేపట్టాలని మంత్రి ఆదేశించారు. నెల రోజుల పాటు ప్రత్యేక కార్యక్రమాలు నిర్వహించి, ప్రభుత్వ సేవలను సులభంగా ఎలా పొందవచ్చో ప్రజలకు వివరించాలని ఆయన సూచించారు. సమావేశంలో ఆర్టీజీఎస్ లక్ష్యాలు, ప్రాజెక్టుల ప్రగతిపై ఆ శాఖ కార్యదర్శి కాటంనేని భాస్కర్ పవర్ పాయింట్ ప్రజెంటేషన్ ద్వారా వివరించారు. ప్రభుత్వ శాఖల సమాచారాన్ని క్రోడీకరించేందుకు చేపట్టిన 'డేటాలేక్' పనులు జులై నాటికి పూర్తికావాలని మంత్రి లోకేష్ ఆదేశించారు. కుల, ఆదాయ ధృవీకరణ పత్రాల మంజూరులో అడ్డంకులు తొలగించాలని, రేషన్ కార్డుల విభజన, కుటుంబ సభ్యుల పేర్ల చేర్పు-తొలగింపు ప్రక్రియను మరింత సులభతరం చేయాలని ఆయన సూచించారు. 'సంజీవని' కార్యక్రమాన్ని కూడా డేటాలేక్‌తో అనుసంధానించాలని, పాఠశాలల్లో డ్రాప్ అవుట్‌లను డేటాలేక్ ద్వారా విశ్లేషించి తగ్గించడానికి మార్గాలను అన్వేషించాలని మంత్రి కోరారు. అలాగే, విద్యారంగంలో సమగ్ర సమాచారాన్ని ట్రాక్ చేస్తున్నామని, అన్ని శాఖల సమాచారం డేటాలేక్ ద్వారా అనుసంధానం కావాలని ఆయన సూచించారు. సర్టిఫికెట్ల వెరిఫికేషన్‌కు సంబంధించి, విద్యార్థులు, అభ్యర్థులకు విద్యా-క్రీడా సంస్థలు ఇచ్చే సర్టిఫికెట్లన్నీ అభ్యర్థి ఆధార్ నంబర్ ఆధారంగా పారదర్శకంగా పరిశీలించేలా చర్యలు తీసుకోవాలని మంత్రి ఆదేశించారు. ఆధార్ నంబర్ నమోదు చేయగానే ఆ సర్టిఫికెట్లు ఏ సంస్థ, ఎప్పుడు, ఎవరు జారీ చేశారనే వివరాలు రియల్ టైమ్‌లో తెలిసేలా 'డిజి వెరిఫై'ని పకడ్బందీగా తీర్చిదిద్దాలని సూచించారు. రాబోయే వేలాది పోస్టుల నోటిఫికేషన్లకు లక్షల సంఖ్యలో అభ్యర్థులు దరఖాస్తు చేసుకుంటారని, వారి సర్టిఫికెట్లను పొందుపరచడంలో ఇబ్బందులు లేకుండా డిజి వెరిఫైని సమర్థవంతంగా వినియోగించుకోవాలని ఆదేశించారు. రాష్ట్రంపై 'ఎల్‌నినో' ప్రభావంపైనా మంత్రి నారా లోకేష్ సమీక్షించారు. ఎల్‌నినో ప్రభావంతో ఎదురయ్యే వర్షాభావ పరిస్థితులను జలవనరుల శాఖ, వ్యవసాయ శాఖ, ఇతర శాఖలన్నీ సమన్వయంతో, ప్రణాళికాబద్ధంగా ఎదుర్కోవాలని సూచించారు. నీటి వృథాను అరికట్టి, తక్కువ నీటితో ఎక్కువ పంటలు పండించే దిశగా రైతులను ప్రోత్సహించాలన్నారు. జలాశయాల్లో నీటి లభ్యత, భూగర్భజల మట్టాలు ఆర్టీజీఎస్‌లోని 'అవేర్' విభాగం ద్వారా రియల్ టైమ్‌లో ఎప్పటికప్పుడు తెలుసుకుని కార్యాచరణ చేపట్టాలని, రాయలసీమలో నీటి ఎద్దడి లేకుండా పటిష్టమైన చర్యలు తీసుకోవాలని ఆదేశించారు. యూరియా సరఫరాపైనా మంత్రి ఆరా తీశారు. వర్షాభావ పరిస్థితుల నేపథ్యంలో జల విద్యుత్ ఉత్పత్తి తగ్గడంతో ఎదురయ్యే సమస్యలను అధిగమించేందుకు ప్రణాళికాబద్ధంగా పనిచేయాలని మంత్రి సూచించారు. జలాశయాల్లో నీటి మట్టాలు, పెరుగుతున్న విద్యుత్తు వినియోగం, భూగర్భ జలాల సమాచారాన్ని క్రోడీకరించి ఆర్టీజీఎస్‌లోని అవేర్ విభాగం విశ్లేషించి అధికారులకు ఎప్పటికప్పుడు సమాచారం అందజేయాలని ఆదేశించారు. విద్యుత్తు సరఫరాకు ఎక్కడా ఎలాంటి అంతరాయం లేకుండా పటిష్ట చర్యలు తీసుకోవాలని మంత్రి లోకేష్ ఆదేశించారు. ఈ సమీక్షా సమావేశంలో సీసీఎల్ఏ ప్రత్యేక ప్రధాన కార్యదర్శి జయలక్ష్మి, ఆర్టీజీఎస్ సీఈవో ప్రఖర్ జైన్, సంయుక్త కార్యదర్శి మాలిక గార్గ్, ఆర్టీఐహెచ్ సీఈవో ధాత్రి రెడ్డి, ఫైబర్‌నెట్ ఎండీ గీతాంజలి శర్మ, సివిల్ సప్లైస్ కమిషనర్ కన్నబాబు, ఉన్నత విద్యాశాఖ కమిషనర్ నారాయణ భరత్ గుప్త, పాఠశాల విద్యా శాఖ డైరెక్టర్ తమీమ్ అన్సారియా, వ్యవసాయ శాఖ డైరెక్టర్ మన్జీర్ జిలానీ పాల్గొన్నారు.

గుంటూరులో అంతర్జాతీయ మాదకద్రవ్యాల వ్యతిరేక దినోత్సవాన్ని పురస్కరించుకుని, విద్యార్థులు మత్తుపదార్థాలకు వ్యతిరేకంగా కదం తొక్కారు. ఈ సందర్భంగా, మత్తుపదార్థాలు కేవలం సేవించే వ్యక్తిని బానిసగా మార్చడమే కాకుండా, వారిని నమ్ముకున్న వారి జీవితాలను కూడా రోడ్డున పడేస్తాయని విద్యార్థులు స్పష్టం చేశారు. డ్రగ్స్ రహిత సమాజ నిర్మాణానికి ప్రతి ఒక్కరూ అవగాహన కలిగి ఉండి, అందుకు పాటుపడాలని వారు పిలుపునిచ్చారు.

మత్తు పదార్థాలు సేవించడం వల్ల భవిష్యత్తు అంధకారమవుతుందని, కుటుంబాలు చిన్నాభిన్నం అవుతాయని ప్రొహిబిషన్ అండ్ ఎక్సైజ్ సీఐ ఆర్. దివాకర్ హెచ్చరించారు. శుక్రవారం రేపల్లె పట్టణంలో చైల్డ్ రైట్స్ అడ్వకేసి ఫౌండేషన్ ఆధ్వర్యంలో మాదక ద్రవ్యాలపై నిర్వహించిన ర్యాలీలో ఆయన ఈ విషయాలు తెలిపారు. ఈ సందర్భంగా సీఐ దివాకర్ మాట్లాడుతూ, ప్రతి ఒక్కరూ తమ కుటుంబాలను ఉన్నత స్థితిలో ఉంచుకునేలా ప్రణాళికలు సిద్ధం చేసుకోవాలని సూచించారు. గ్రామాలలో, పట్టణాలలో మత్తు పదార్థాలకు బానిసలై కుటుంబాలకు దూరమైన వ్యక్తులను తాము ఎంతోమందిని చూస్తున్నామని పేర్కొన్నారు. అలాంటి వాటికి తావివ్వకుండా, మంచి ఆరోగ్యం, మంచి జీవితం, మంచి కుటుంబం కోసం మత్తు పదార్థాలకు దూరంగా ఉండాలని ఆయన ప్రజలకు హితవు పలికారు. గ్రామాలలో ఎవరైనా మాదక ద్రవ్యాలను విక్రయించినా లేదా సేవించినా హెల్ప్‌లైన్ నెంబర్ 1922కు లేదా వాట్సాప్ నెంబర్ 897781972కు సమాచారం అందించాలని, సమాచారం అందించిన వారి వివరాలను గోప్యంగా ఉంచుతామని ఆయన స్పష్టం చేశారు. చైల్డ్ రైట్స్ అడ్వకేసి ఫౌండేషన్ మేనేజర్ పి. లక్ష్మీ ప్రసన్న మాట్లాడుతూ, ప్రతి ఒక్కరూ డ్రగ్స్, గంజాయి వంటి మత్తు పదార్థాలకు దూరంగా ఉంటూ సమాజంలో ఆదర్శవంతమైన పౌరులుగా జీవించాలని కోరారు. ఈ కార్యక్రమంలో చైల్డ్ రైట్స్ అడ్వకేసి స్వచ్ఛంద సంస్థ వాలంటీర్లు, మహిళలు, ప్రొహిబిషన్ అండ్ ఎక్సైజ్ సిబ్బందితో పాటు పలువురు పాల్గొన్నారు.

వరంగల్ నగరంలోని కాశీబుగ్గ ప్రాంతంలో ప్రజల ఆరోగ్యాన్ని ప్రమాదంలోకి నెడుతూ, అత్యంత అపరిశుభ్ర వాతావరణంలో అక్రమంగా పచ్చడి తయారీ, నిల్వలను నిర్వహిస్తున్నారనే విశ్వసనీయ సమాచారం మేరకు టాస్క్ ఫోర్స్ పోలీసులు మెరుపు దాడి నిర్వహించారు. ఈ దాడిలో ఒకరిని అరెస్టు చేయగా, దాదాపు రూ.2.25 లక్షల విలువైన కల్తీ నిల్వలను స్వాధీనం చేసుకున్నారు. ఇంతేజార్‌గంజ్ పోలీస్ స్టేషన్ పరిధిలోని కాశీబుగ్గ సాయి వీధిలో ఉన్న ఓ నివాస గృహంలో జరిపిన తనిఖీల్లో, పెద్ద ఎత్తున కుళ్లిపోయిన పచ్చడి ముడిసరుకులు, ఆహార పదార్థాలు నిల్వ ఉంచినట్లు గుర్తించారు. విచారణలో భాగంగా, వీటిని చిన్న ప్యాకెట్లలో ప్యాకింగ్ చేసి స్థానిక కిరాణా దుకాణాలు మరియు ఇతర చిన్న వ్యాపార కేంద్రాలకు సరఫరా చేస్తున్నట్లు తేలింది. ఈ అక్రమ కార్యకలాపాల్లో కాశీబుగ్గ నివాసి అరికెల శ్రీనివాస్ (51)ను అదుపులోకి తీసుకున్నారు. దాడిలో 750 కిలోల టమోటా, 900 కిలోల మామిడి, 200 కిలోల నిమ్మకాయలు, 100 కిలోల ఉసిరికాయలు, 150 కిలోల అల్లం-వెల్లుల్లి పేస్ట్‌తో కూడిన మొత్తం రూ.2,25,000 విలువైన కుళ్లిపోయిన, కల్తీ ఆహార నిల్వలను స్వాధీనం చేసుకున్నారు. పట్టుబడిన నిందితుడిని, స్వాధీనం చేసుకున్న సరుకును తదుపరి చట్టపరమైన చర్యల కోసం ఇంతేజార్‌గంజ్ పోలీస్ స్టేషన్‌కు అప్పగించినట్లు అధికారులు వెల్లడించారు. ఈ దాడిని ఏసీపీ టాస్క్ ఫోర్స్ ఎ. మధుసూదన్ పర్యవేక్షణలో ఇన్‌స్పెక్టర్ బండారి రాజు, ఆర్‌ఎస్‌ఐ ఓ. భాను ప్రకాష్ మరియు టాస్క్ ఫోర్స్ సిబ్బంది నిర్వహించారు. ప్రజలు బ్రాండ్ లేని లేదా అనుమానాస్పద ఆహార పదార్థాలు, పచ్చళ్లను కొనుగోలు చేసేటప్పుడు అప్రమత్తంగా ఉండాలని టాస్క్ ఫోర్స్ అధికారులు సూచించారు. అటువంటి అక్రమ నిల్వ కేంద్రాలు లేదా కల్తీ ఆహార పదార్థాల విక్రయాలపై సమాచారం ఉంటే వెంటనే పోలీసులకు తెలియజేయాలని వారు కోరారు.

కడప జిల్లా పులివెందుల నియోజకవర్గం లింగాల మండలంలో జరిగిన చిన్నారి నిత్విక దారుణ హత్యకు సంఘీభావం తెలుపుతూ నరసరావుపేట పట్టణంలో శుక్రవారం రాత్రి కొవ్వొత్తుల ర్యాలీ నిర్వహించారు. నరసరావుపేట పట్టణ విశ్వబ్రాహ్మణ సంఘం ఆధ్వర్యంలో ఈ ర్యాలీ స్థానిక శివుడు బొమ్మ సెంటర్ నుండి మల్లమ్మ సెంటర్ మీదుగా గడియార స్తంభం వరకు సాగింది. ఈ సందర్భంగా, చిన్నారి నిత్విక హత్యకు కారకులైన వారిని కఠినంగా శిక్షించాలని డిమాండ్ చేస్తూ నినాదాలు చేశారు. ఈ కార్యక్రమంలో పట్టణ అధ్యక్షులు చింతలచెరువు గురునాథాచారి, ఉపాధ్యక్షుడు గుత్తికొండ భాస్కరాచారి, ప్రధాన కార్యదర్శి అమ్మనబ్రోలు మల్లికార్జునాచారి, సంఘం పురోహితుడు భీమవరపు బాలబ్రహ్మ చారి, ప్రసాద్ తో పాటు పలువురు కార్యవర్గ సభ్యులు పాల్గొన్నారు.

పల్నాడు జిల్లాలో జరిగిన ఒక ఘోర రోడ్డు ప్రమాదంలో నలుగురు వ్యక్తులు అక్కడికక్కడే దుర్మరణం పాలయ్యారు. మాచర్ల నగరవనం వద్ద నిలిపి ఉన్న లారీని వేగంగా దూసుకొచ్చిన తుఫాను వాహనం ఢీకొట్టడంతో ఈ ఘటన చోటుచేసుకుంది. ఈ ప్రమాదంలో మరో నలుగురికి గాయాలయ్యాయి, వారిని వెంటనే ఆసుపత్రికి తరలించారు. మృతి చెందిన వారు హైదరాబాద్ వాసులుగా గుర్తించారు.