పెద్దపల్లి జిల్లా రామగుండంలోని మూతపడిన బి- పవర్ హౌస్ విద్యుత్ ప్లాంట్‌ను త్వరలో డిస్మెటల్ చేయనున్నారు. ఎనర్జీ స్పెషల్ చీఫ్ సెక్రటరీ నవీన్ మిట్టల్, జెన్కో ట్రాన్స్ కో సీఎండి హరీష్ రెడ్డి అధికారులతో కలిసి ఈ ప్లాంట్‌ను పరిశీలించారు. ఈ పర్యటనలో, వారు ప్రస్తుత విద్యుత్ ప్లాంట్ స్థితిగతులను గురించి స్థానిక అధికారులతో చర్చించారు. నూతనంగా నిర్మించబోయే విద్యుత్ ప్లాంట్ నిర్మాణం కోసం సంబంధించిన వనరులపైనా స్థానిక అధికారులతో ప్రస్తావించారు. త్వరలోనే డిస్మెటల్ పనులు చేపట్టడం జరుగుతుందని నవీన్ మిట్టల్ పేర్కొన్నారు. ఈ సందర్భంగా, ప్లాంట్‌కు సంబంధించిన అధికారులు ఆయనను ఆత్మీయంగా సన్మానించారు.

కరీంనగర్ పీఎంజే జ్యువెలరీ షోరూంలో మే 3న జరిగిన సంచలన సాయుధ దోపిడీ కేసును ఛేదించి, కీలక నిందితులను అరెస్ట్ చేసిన కరీంనగర్ పోలీస్ కమిషనర్ గౌష్ ఆలంను ఎంఐఎం నాయకులు మంగళవారం ఆయన కార్యాలయంలో ఘనంగా సన్మానించారు. ఎంఐఎం కరీంనగర్ అధ్యక్షుడు సయ్యద్ గులాం అహ్మద్ హుస్సేన్ ఆధ్వర్యంలో ఎంఐఎం కార్పొరేటర్లు, నాయకులు మర్యాద పూర్వకంగా కలిసి, పూల బోకేను అందించి, శాలువాతో సన్మానం చేశారు. ఈ సందర్భంగా గులాం అహ్మద్ హుస్సేన్ మాట్లాడుతూ, ఈ కేసును అత్యంత ప్రతిష్టాత్మకంగా తీసుకుని, దేశంలోని వివిధ రాష్ట్రాల్లో పెద్ద పెద్ద దోపిడీలు చేసి పోలీసుల నుంచి తప్పించుకు తిరుగుతున్న కరుడుగట్టిన ముఖ్య నిందితుడితో పాటు మరో ఇద్దరు అంతర్రాష్ట్ర నిందితులను కమిషనర్ గౌష్ ఆలం అత్యాధునిక సాంకేతిక పరిజ్ఞానంతో, మెరుగైన నెట్‌వర్క్‌తో చాకచక్యంగా పట్టుకున్నారని ప్రశంసించారు. నిందితుల నుంచి కీలకమైన ఆధారాలు, ఆయుధాలను స్వాధీనం చేసుకున్నారని తెలిపారు. ఆయన సేవలు విమర్శకుల నోళ్లు మూయించి, 'తెలంగాణ పోలీస్ బెటర్ పోలీస్' అని నిరూపించడమే కాకుండా, కరీంనగర్ పేరును దేశం గర్వించే స్థాయిలో నిలబెట్టాయని అన్నారు. నేరస్థులకు పాలిట సింహస్వప్నంలా మారి, నేర రహిత సమాజం కోసం అహర్నిశలు కృషి చేస్తూ ప్రభుత్వానికి మంచి పేరు తీసుకొస్తున్న ఇలాంటి నిజాయితీగల అధికారి కరీంనగర్‌లో సేవలు అందించడం జిల్లా ప్రజల అదృష్టమని గులాం అహ్మద్ హుస్సేన్ పేర్కొన్నారు. ఈ కార్యక్రమంలో ఎంఐఎం జాయింట్ సెక్రటరీ సయ్యద్ మొయిజుద్దీన్ ఖాద్రి, కో కార్పొరేటర్ సయ్యద్ ఇబ్రహీం, కార్పొరేటర్ మాజిద్ హుస్సేన్, మాజీ కార్పొరేటర్లు ఆరిఫ్ అహ్మద్, అహ్మద్ మొహియుద్దీన్ బాబుజానీ, లింగంపల్లి శ్రీను, కంటేస్టీడ్ కార్పొరేటర్లు సురేశ్, వాజిద్ అలీఖాన్, అబ్దుల్ గఫ్ఫార్, అబ్దుల్లా ఆసిమ్, నాయకులు ఫసియుద్దీన్ ఖాలీద్, ఎంఏ సలీం, ఖమరొద్దీన్ షబ్బీర్, అబ్దుల్లా ఖాన్, మేరాజ్, ఇలియాజ్, అల్మాస్ హంజ, యునూస్ తదితరులు పాల్గొన్నారు.

CITU - పవర్లూమ్ వర్కర్స్ యూనియన్ రాష్ట్ర అధ్యక్షులు మూశం రమేష్ మంగళవారం రాజన్న సిరిసిల్ల జిల్లాలోని బి.వై. నగర్‌లో గల అమృత్ లాల్ శుక్ల కార్మిక భవన్ సిఐటియు జిల్లా కార్యాలయంలో పత్రికా సమావేశం ఏర్పాటు చేశారు. ఈ సందర్భంగా మూశం రమేష్‌తో పాటు జిల్లా అధ్యక్షులు కోడం రమణ మాట్లాడుతూ, పవర్లూమ్ వస్త్ర పరిశ్రమ, అనుబంధ పరిశ్రమలలో పనిచేస్తున్న అర్హులైన కార్మికులందరికీ చేనేత జౌళి శాఖ గుర్తింపు కార్డులు తక్షణమే ఇవ్వాలని డిమాండ్ చేశారు. చేనేత పెన్షన్‌కు దరఖాస్తు చేసుకోవాలంటే గుర్తింపు కార్డు తప్పనిసరి అని, అయితే చాలామంది కార్మికులకు ఈ కార్డులు లేకపోవడం వల్ల అర్హులై ఉన్నా కూడా పెన్షన్ కోసం దరఖాస్తు చేసుకోలేక నష్టపోతున్నారని వారు ఆవేదన వ్యక్తం చేశారు. అర్హులైన కార్మికులందరికీ చేనేత జౌళి శాఖ గుర్తింపు కార్డులు ఇవ్వాలని సంబంధిత అధికారులకు, ప్రజాప్రతినిధులకు అనేకసార్లు విన్నవించినప్పటికీ, వారు నిర్లక్ష్యంగా వ్యవహరిస్తున్నారని యూనియన్ నాయకులు ఆరోపించారు. దీంతో CITU ఆధ్వర్యంలో అర్హులైన కార్మికులందరికీ చేనేత జౌళి శాఖ గుర్తింపు కార్డులు ఇవ్వాలని పోరాటం ప్రారంభించామని నాయకులు తెలిపారు. ఇందులో భాగంగా, జూన్ 24 నుండి జూన్ 30 వరకు సిరిసిల్ల పట్టణంలోని బి.వై. నగర్‌లో గల CITU జిల్లా కార్యాలయంలో అర్హులైన కార్మికులందరితో దరఖాస్తులు నమోదు చేసుకుంటారని పేర్కొన్నారు. అనంతరం, జూలై 1న దరఖాస్తుదారులందరితో కలిసి చేనేత జౌళి శాఖ కార్యాలయం ముందు పెద్ద ఎత్తున ధర్నా కార్యక్రమం నిర్వహించనున్నట్లు ప్రకటించారు. రాజన్న సిరిసిల్ల జిల్లాలోని పవర్లూమ్ వస్త్ర పరిశ్రమ, అనుబంధ పరిశ్రమలలో పనిచేస్తున్న, చేనేత జౌళి శాఖ గుర్తింపు కార్డులు లేని కార్మికులందరూ జూన్ 30 లోపు దరఖాస్తులు నమోదు చేసుకుని, జూలై 1న జరగబోయే ధర్నా కార్యక్రమంలో పాల్గొనాలని CITU పిలుపునిచ్చింది. దరఖాస్తు చేసుకునే కార్మికులు ఆధార్ కార్డు జిరాక్స్, రెండు ఫోటోలు, పనిచేస్తున్న యజమాని వివరాలతో రావాలని సూచించారు. ఈ కార్యక్రమంలో CITU జిల్లా అధ్యక్షులు ఎగమంటి ఎల్లారెడ్డి, జిల్లా నాయకులు అన్నల్డాస్ గణేష్, సందుపట్ల పోచమల్లు తదితరులు పాల్గొన్నారు. అర్హులైన వారందరికీ చేనేత జౌళి శాఖ గుర్తింపు కార్డులు ఇవ్వాలని, జూన్ 30 వరకు దరఖాస్తుల నమోదు కార్యక్రమం కొనసాగుతుందని, జూలై 1న చేనేత జౌళి శాఖ కార్యాలయం ముందు ధర్నా జరుగుతుందని యూనియన్ పునరుద్ఘాటించింది.

రాజన్న సిరిసిల్ల జిల్లా బోయినపల్లి మండలం జగ్గారావు పల్లిలో గ్రామస్థులు పోచమ్మ బోనాలను అత్యంత వైభవంగా నిర్వహించారు. ఈ వేడుకలో మహిళలు ఉపవాసంతో తమ తలపై బోనం ఎత్తుకొని, డప్పు చప్పుళ్ల మధ్య, బైండ్ల పూజారుల విన్యాసాల నడుమ ఊరేగింపుగా పోచమ్మ ఆలయానికి చేరుకున్నారు. అక్కడ వారు నైవేద్యం సమర్పించి, తమ మొక్కులను చెల్లించుకున్నారు. ఈ సందర్భంగా సర్పంచ్ మధు మాట్లాడుతూ, గ్రామానికి సమృద్ధిగా వర్షాలు కురిసి సుభిక్షంగా ఉండాలని, పాడిపంటలు, గ్రామస్తులు బాగుండాలని పోచమ్మ తల్లిని వేడుకున్నట్లు తెలిపారు. పోచమ్మ బోనాల నిర్వహణకు సహకరించిన గ్రామస్థులందరికీ ఆయన ధన్యవాదాలు తెలియజేశారు.

వరంగల్ నగరంలోని హెడ్ పోస్టాఫీస్ ఎదుట మంగళవారం ఎంసీపీఐ(యూ) ఆధ్వర్యంలో ఒక నిరసన కార్యక్రమం నిర్వహించారు. హైదరాబాద్‌లోని అమెరికా కాన్సులేట్ కార్యాలయానికి వెళ్లే ప్రధాన రహదారికి అమెరికా అధ్యక్షుడు డొనాల్డ్ ట్రంప్ పేరు పెట్టాలన్న ప్రతిపాదనను ప్రభుత్వం వెంటనే విరమించుకోవాలని ఈ నిరసనలో పార్టీ నాయకులు గట్టిగా డిమాండ్ చేశారు. ఈ సందర్భంగా ఎంసీపీఐ(యూ) జిల్లా కార్యదర్శి పెద్దారపు రమేశ్ మాట్లాడుతూ, దేశంలోని ప్రజలు అనేక సమస్యలతో ఇబ్బందులు పడుతున్న సమయంలో రహదారులకు విదేశీ నాయకుల పేర్లు పెట్టడంపై ప్రభుత్వాలు దృష్టి సారించడం సమంజసం కాదని అన్నారు. పెరుగుతున్న నిత్యావసర వస్తువుల ధరలు, నిరుద్యోగం, రైతులు ఎదుర్కొంటున్న వ్యవసాయ సంక్షోభం, సామాన్య ప్రజల ఆర్థిక ఇబ్బందుల పరిష్కారంపై ప్రభుత్వాలు దృష్టి పెట్టాలని ఆయన కోరారు. ప్రజలకు నేరుగా ఉపయోగపడే అభివృద్ధి కార్యక్రమాలు, సంక్షేమ చర్యలను చేపట్టాల్సిన అవసరం ఉందని రమేశ్ నొక్కి చెప్పారు. ప్రజా సమస్యలను పక్కనబెట్టి ఇటువంటి ప్రతిపాదనలకు ప్రాధాన్యం ఇవ్వడం సరికాదని ఆయన విమర్శించారు. ట్రంప్ పేరు పెట్టాలన్న ప్రతిపాదనను ప్రభుత్వం ఉపసంహరించుకోవాలని, ప్రజల ఆకాంక్షలకు అనుగుణంగా నిర్ణయాలు తీసుకోవాలని ఎంసీపీఐ(యూ) నేతలు డిమాండ్ చేశారు. ఈ నిరసన కార్యక్రమంలో పార్టీ నాయకులు, కార్యకర్తలు పాల్గొని నినాదాలు చేస్తూ తమ నిరసనను వ్యక్తం చేశారు.

జగిత్యాల జిల్లా కేంద్రంలో జూన్ 23న ప్రైవేట్, కార్పొరేట్ పాఠశాలల్లో అధిక ఫీజుల దోపిడీని అరికట్టాలని, అలాగే ప్రభుత్వ పాఠశాలల్లో మౌలిక వసతులను కల్పించాలని డిమాండ్ చేస్తూ అఖిల భారతీయ విద్యార్థి పరిషత్ (ఏబీవీపీ) ఆధ్వర్యంలో నిర్వహించిన ప్రభుత్వ, ప్రైవేటు పాఠశాలల బంద్ విజయవంతమైంది. ఈ సందర్భంగా ఏబీవీపీ స్టేట్ వర్కింగ్ కమిటీ మెంబర్ మల్యాల రాకేష్, నగర కార్యదర్శి రాపక నిఖిల్ మాట్లాడుతూ, ప్రైవేట్, కార్పొరేట్ స్కూళ్ళలో జరుగుతున్న విచ్చలవిడి ఫీజుల దోపిడీని వెంటనే నిలిపివేయాలని డిమాండ్ చేశారు. ఫీజుల నియంత్రణకు సంబంధించిన చట్టాన్ని తీసుకురావాలని వారు ప్రభుత్వాన్ని కోరారు.

వరంగల్ జిల్లాలోని అశోక్ నగర్‌లో ఒక ఎన్జీవో ఆధ్వర్యంలో గౌడ్ లబ్ధిదారులకు మల్టీ ట్రీ క్లైంబింగ్ యంత్రాలను పంపిణీ చేశారు. తాటి చెట్లు ఎక్కే సమయంలో జరిగే ప్రమాదాలను తగ్గించడం, పనిని సులభతరం చేయడం, కార్మికుల భద్రతను పెంపొందించడం ఈ కార్యక్రమం యొక్క ప్రధాన ఉద్దేశ్యమని నిర్వాహకులు వెల్లడించారు. ఈ పంపిణీ కార్యక్రమంలో ఎస్ఆర్డీ నరేశ్, వీఎస్ఎస్ సభ్యులు, ఎన్జీవో ప్రతినిధులు మరియు అటవీశాఖ సిబ్బంది పాల్గొన్నారు. ఈ సందర్భంగా లబ్ధిదారులు మాట్లాడుతూ, మల్టీ ట్రీ క్లైంబింగ్ యంత్రాలు తమ పనిని మరింత సురక్షితంగా మరియు సులభంగా నిర్వహించడానికి సహాయపడతాయని, అలాగే తమ ఉపాధికి ఎంతో తోడ్పాటును అందిస్తాయని హర్షం వ్యక్తం చేశారు.

రాష్ట్ర మంత్రి అడ్లూరి లక్ష్మణ్ కుమార్ రైతన్నలకు సన్న రకం వరి ధాన్యం సాగు చేసి, ప్రభుత్వం అందించే ప్రోత్సాహకం బోనస్‌ను పొందాలని సూచించారు. జగిత్యాల జిల్లా పర్యటనలో భాగంగా గొల్లపల్లి మండలం ఇబ్రహీంనగర్ రైతువేదికలో జిల్లా కలెక్టర్ సత్యప్రసాద్‌తో కలిసి విత్తన మేళాను ప్రారంభించిన మంత్రి, ధర్మారం విత్తన మేళాను కూడా పరిశీలించి రైతులకు తగు సూచనలు చేశారు. రైతులు అధికారులు సూచించే ఏడు రకాల విత్తనాలను సాగు చేయాలని మంత్రి లక్ష్మణ్ కుమార్ కోరారు. దొడ్డు రకం ధాన్యం సాగు చేస్తే కేంద్రం కొర్రీలు పెట్టి పూర్తిస్థాయిలో కొనుగోలు చేయకపోవడం వల్ల రైతులు ఇబ్బందులు పడుతున్నారని ఆయన తెలిపారు. పంట పండించి నష్టపోవడం కంటే మార్కెట్లో డిమాండ్ ఉన్న పంటలను సాగుచేసి ఆర్థికంగా లాభం పొందాలని అన్నదాతలను కోరారు. కాంగ్రెస్ ప్రభుత్వం రైతు సంక్షేమం కోసం కృషి చేస్తుందని, రెండు లక్షల రుణమాఫీ చేయడంతో పాటు పెట్టుబడి సహాయం రైతు భరోసా అందిస్తుందని మంత్రి లక్ష్మణ్ కుమార్ భరోసా ఇచ్చారు. ఖరీఫ్ సీజన్‌కు సంబంధించిన పెట్టుబడి సహాయం ఈ నెల 30న విడుదల చేయనున్నట్లు ఆయన ప్రకటించారు. గొల్లపల్లి మండలం శ్రీరాములపల్లి గ్రామంలో 70 లక్షల రూపాయలతో ప్రమాదకరంగా ఉన్న కరెంట్ వైర్లను తొలగించినట్లు మంత్రి వివరించారు. గ్రామంలో ఐకేపీ సెంటర్ తో పాటు గ్రౌండ్ ప్రతిపాదనలు వచ్చాయని, మిగిలిన సీసీ రోడ్లు, సంఘ భవనాలను కూడా పూర్తి చేస్తామని మంత్రి తెలిపారు.

కరీంనగర్ నగరంలోని కోతిరాంపూర్ నివాసి, ఆటో డ్రైవర్ భూక్యా లాలు కుమార్తె వెన్నెల వివాహం ఈ నెల 25న జరగనున్న సందర్భంగా, బీఆర్‌ఎస్ పార్టీ సీనియర్ నాయకులు నరదాసు వసంతరావు నేడు వారికి రూ. 5016 ఆర్థిక సహాయం అందించారు. గత నెలలో ఆటో యూనియన్ ప్రమాణ స్వీకారోత్సవం సందర్భంగా ఆటో కార్మికుల ఆడపిల్లల వివాహాలకు రూ. 5000 ఆర్థిక సహాయం అందిస్తానని వసంతరావు ప్రకటించిన విషయం తెలిసిందే. ఈ క్రమంలో, కోతిరాంపూర్ కు చెందిన భూక్యా సత్తమ్మ, లాలు దంపతుల కుమార్తె వివాహం నిశ్చయమైనట్లు తెలుసుకున్న వసంతరావు, వారి ఇంటికి వెళ్లి మేనమామగా ఈ మొత్తాన్ని అందించడం సంతోషంగా ఉందని తెలిపారు. కరీంనగర్ నగరానికి చెందిన ఏ ఆటో కార్మికుల కుమార్తె వివాహం చేసినా, తనను సంప్రదించి రూ. 5016 ఆర్థిక సహాయాన్ని పొందవచ్చని వసంతరావు ఈ సందర్భంగా విజ్ఞప్తి చేశారు. తెలంగాణ తొలి ముఖ్యమంత్రి కేసీఆర్ కల్యాణలక్ష్మి పథకాన్ని ఆదర్శంగా తీసుకొని ఈ కార్యక్రమాన్ని చేపడుతున్నట్లు ఆయన పేర్కొన్నారు. నరదాసు వసంతరావు చేసిన ఈ సహాయానికి కరీంనగర్ ఆటో కార్మిక సంక్షేమ సంఘం అధ్యక్షులు బొమ్మిడి శ్రీనివాస్ రెడ్డి హృదయపూర్వక కృతజ్ఞతలు తెలిపారు. ఈ కార్యక్రమంలో నరదాసు వసంతరావుతో పాటు గ్రంథాలయ సంస్థ మాజీ చైర్మన్ పొన్నం అనిల్ కుమార్ గౌడ్, ఆటో యూనియన్ అధ్యక్షులు బొమ్మిడి శ్రీనివాస్ రెడ్డి, బీఆర్‌ఎస్ పార్టీ సీనియర్ నాయకులు అఫ్రోజ్ ఖాన్, ఆరే రవి, ఆటో యూనియన్ ప్రధాన కార్యదర్శి బండారు సంపత్ పటేల్, ఉపాధ్యక్షులు ఇరవేని కుమార్, కుక్కట్ల సంపత్, కోశాధికారి చిట్టిమల్ల నాగభూషణం, ఈసీ మెంబర్స్ కూర్మచలం వేణుమాధవ్, బొంగోని శ్రీనివాస్ గౌడ్ తదితరులు పాల్గొన్నారు.

రాజన్న సిరిసిల్ల జిల్లా గంభీరావుపేట మండలంలో గుర్తుతెలియని దుండగులు రైతులకు భారీ నష్టం కలిగించారు. అర్ధరాత్రి వేళ గంభీరావుపేట మండల కేంద్రంలోని సింగసముద్రం పెద్ద కాలువ ఆయకట్టు పరిధిలో ఉన్న పంట పొలాల నుండి ఏకకాలంలో 11 బోరు మోటార్ల కేబుళ్లను దొంగిలించడంతో రైతులు తీవ్ర ఆందోళన చెందుతున్నారు. నారు పోసి సాగు పనులు ప్రారంభించిన కీలక సమయంలో ఈ కేబుళ్ల చోరీ జరగడంతో తమకు తీవ్ర నష్టం వాటిల్లిందని రైతులు ఆవేదన వ్యక్తం చేస్తున్నారు. ఘటనపై సమాచారం అందుకున్న ఎస్సై శ్రీకాంత్, పోలీసు సిబ్బందితో కలిసి వెంటనే ఘటనా స్థలాన్ని పరిశీలించారు. దొంగలు కేబుల్ వైర్లను లాక్కెళ్లిన ఆనవాళ్లను గుర్తించినట్లు పోలీసులు తెలిపారు. బాధిత రైతులు పోలీస్ స్టేషన్‌లో ఫిర్యాదు చేయగా, పోలీసులు కేసు నమోదు చేసి దర్యాప్తు చేపట్టినట్లు పేర్కొన్నారు.