తిమ్మాజిపేట ఎంపీడీవో శ్రీమతి లక్ష్మీదేవి పదవీ విరమణ సందర్భంగా శనివారం మండల పరిషత్ కార్యాలయంలో వీడ్కోలు, సన్మాన కార్యక్రమం వైభవంగా నిర్వహించారు. ఈ సందర్భంగా సహచర అధికారులు, ప్రజాప్రతినిధులు విధి నిర్వహణలో ఆమె చూపిన చొరవను, మండల ప్రగతికి చేసిన సేవలను స్మరించుకున్నారు. ఉద్యోగ విరమణ ప్రతి ఒక్కరి జీవితంలో భాగమేనని, అయితే సేవానిరతితో పనిచేసిన వారే గుర్తింపు పొందుతారని వక్తలు శ్లాఘించారు. అనంతరం, మండల అధికారులు లక్ష్మీదేవిని ఘనంగా సత్కరించారు. ఈ వీడ్కోలు సన్మాన మహోత్సవంలో జిల్లా అధికారులు, మండల స్థాయి అధికారులు, ప్రజాప్రతినిధులు, సిబ్బంది పెద్ద సంఖ్యలో పాల్గొని ఆమెకు భావోద్వేగ భరితంగా వీడ్కోలు పలికారు.

వనపర్తి జిల్లా పోలీసు కార్యాలయం కంట్రోల్ రూమ్ ఎస్సైగా విధులు నిర్వర్తించిన సుబ్బరాజు 37 సంవత్సరాల విశిష్ట సేవలు అందించిన తర్వాత పదవీ విరమణ పొందారు. ప్రజాసేవను పరమావధిగా, క్రమశిక్షణను జీవిత సూత్రంగా భావించి, పోలీసు శాఖలో క్రమశిక్షణ, నిజాయితీ, విధి నిబద్ధతకు చిరునామాగా ఆయన నిలిచారని జిల్లా ఎస్పీ సునీత రెడ్డి పేర్కొన్నారు. జిల్లా పోలీసు కార్యాలయంలో నిర్వహించిన పదవీ విరమణ సన్మాన కార్యక్రమంలో అదనపు ఎస్పీ రాజేష్ మీనాతో కలిసి ఎస్పీ సుబ్బరాజును, ఆయన సతీమణిని పూలమాలలు, శాలువాలతో సత్కరించి ఘనంగా వీడ్కోలు పలికారు. ఈ సందర్భంగా జ్ఞాపికను అందజేసి ఆయన విశిష్ట సేవలను కొనియాడారు. ఎస్పీ సునీత రెడ్డి మాట్లాడుతూ, కానిస్టేబుల్ స్థాయి నుంచి ఎస్సై స్థాయికి ఎదిగిన సుబ్బరాజు ప్రయాణం యువ పోలీసులకు స్ఫూర్తిదాయకం అన్నారు. పోలీసు ఉద్యోగం కేవలం ఉపాధి కాదని, అది సమాజ భద్రత కోసం చేసే త్యాగయాత్ర అని, అలాంటి యాత్రను 37 సంవత్సరాలపాటు అత్యంత నిజాయితీతో, నిబద్ధతతో కొనసాగించిన అధికారి సుబ్బరాజు అని ఆమె ప్రశంసించారు. 1989లో ఉమ్మడి మహబూబ్‌నగర్ జిల్లా పోలీసు శాఖలో కానిస్టేబుల్‌గా సేవలు ప్రారంభించిన ఆయన కృషి, పట్టుదల, క్రమశిక్షణతో అంచెలంచెలుగా ఎదిగి సబ్ ఇన్‌స్పెక్టర్ హోదాను అందుకోవడం ప్రతి పోలీసు సిబ్బందికి ఆదర్శమని తెలిపారు. మహబూబ్‌నగర్, నాగర్ కర్నూల్, గద్వాల, వనపర్తి వంటి ప్రాంతాల్లో, నక్సల్స్ ప్రభావిత ప్రాంతాల్లో సైతం ధైర్యసాహసాలతో సేవలందించి, తన సర్వీసు కాలమంతా ఎటువంటి ప్రతికూల వ్యాఖ్యలు లేకుండా విధులు నిర్వర్తించడం ఆయన నిష్కళంక సేవలకు నిదర్శనమని ఎస్పీ కొనియాడారు. ఆయన చూపిన విధి నిబద్ధత, ప్రజల పట్ల మానవీయ దృక్పథం, సహోద్యోగులతో స్నేహపూర్వక వైఖరి యువతరం పోలీసులకు మార్గదర్శకంగా నిలుస్తాయని అన్నారు. పదవీ విరమణ ప్రతి ఉద్యోగి జీవితంలో ఒక కొత్త అధ్యాయమని, ఉద్యోగ బాధ్యతల నుంచి విముక్తి పొందిన అనంతరం కుటుంబ సభ్యులతో ఆనందంగా గడుపుతూ ఆరోగ్యాన్ని కాపాడుకోవాలని ఎస్పీ సునీత రెడ్డి ఆకాంక్షించారు. ప్రభుత్వం అందించే జీపీఎఫ్, ఇన్సూరెన్స్, ఇతర పదవీ విరమణ ప్రయోజనాలను సక్రమంగా వినియోగించుకోవాలని సూచించారు. అంతేకాకుండా, పదవీ విరమణ అనంతరం అందాల్సిన అన్ని ఆర్థిక ప్రయోజనాలు, బకాయిలు త్వరితగతిన అందేలా చర్యలు తీసుకోవాలని సంబంధిత అధికారులను ఆదేశించారు. ఈ కార్యక్రమంలో వనపర్తి డీఎస్పీ గిరిబాబు, డీసీఆర్‌బీ డీఎస్పీ బాలాజీనాయక్, వనపర్తి సీఐ సుగంధ రత్నం, కొత్తకోట సీఐ రాంబాబు, ఆత్మకూరు సీఐ శివకుమార్, రిజర్వ్ ఇన్‌స్పెక్టర్ అప్పలనాయుడు, ఇతర అధికారులు, సుబ్బరాజు కుటుంబ సభ్యులు, పోలీసు సిబ్బంది పాల్గొన్నారు.

ధరూరు మండలంలోని నారదగడ్డ చెన్న బసవేశ్వర స్వామి దేవస్థానానికి చెందిన ఆలయ భూమిని గతంలో లీజుకు తీసుకున్న వ్యక్తుల నుండి విడిపించి, ఆ భూమిని దేవస్థాన సేవకులకు వ్యవసాయం చేసుకోవడానికి అందజేయాలని నాగర్ దొడ్డి గ్రామ ప్రజలు తీవ్రంగా వేడుకుంటున్నారు. దేవాలయ భూమిని తక్షణమే కాపాడాలని, ప్రస్తుత పరిస్థితిలో దానిని అలాగే వదిలేస్తే పూర్తిగా కబ్జా అయ్యే ప్రమాదం ఉందని గ్రామ ప్రజలు ఆందోళన వ్యక్తం చేస్తున్నారు.

కేశంపేట మండలంలో శనివారం ఉదయం నుండి బలమైన ఈదురు గాలులు వీస్తున్నాయి. ఈ గాలుల వేగం పెరగడంతో ప్రజలు తీవ్ర ఇబ్బందులను ఎదుర్కొంటున్నారు. పలుచోట్ల చెట్ల కొమ్మలు బలంగా ఊగిపోతున్నాయి, అలాగే వాతావరణంలో ఒక్కసారిగా మార్పు రావడంతో చల్లదనం పెరిగింది. రహదారులపై ప్రయాణించే వాహనదారులు అప్రమత్తంగా ఉండాల్సిన పరిస్థితి నెలకొంది. రైతులు తమ పంటలను, వ్యవసాయ సామగ్రిని రక్షించుకునేందుకు తగిన జాగ్రత్తలు తీసుకుంటున్నారు. ఈ బలమైన గాలుల కారణంగా విద్యుత్ సరఫరాకు అంతరాయం కలిగే అవకాశం ఉందని అధికారులు హెచ్చరించారు. ప్రజలు అవసరం లేకుండా బయటకు వెళ్లకుండా జాగ్రత్తలు పాటించాలని, గాలుల దాటికి అప్రమత్తంగా ఉండాలని అధికారులు సూచనలు జారీ చేశారు.

ప్రపంచ అత్యవసర వైద్య దినోత్సవం సందర్భంగా శనివారం హైదరాబాద్‌లోని నిమ్స్ ట్రామా బ్లాక్‌లో అగ్నిమాపక మాక్ డ్రిల్ నిర్వహించారు. హైదరాబాద్ అగ్నిమాపక శాఖ మార్గదర్శకత్వంలో చేపట్టిన ఈ విన్యాసంలో, అగ్నిప్రమాదం సంభవించినప్పుడు రోగులను సురక్షితంగా తరలించే విధానాలపై డమ్మీ పేషెంట్లతో సిబ్బందికి శిక్షణ, అవగాహన కల్పించారు. అత్యవసర పరిస్థితుల్లో సమన్వయంతో స్పందించే నైపుణ్యాలను పెంపొందించడమే ఈ కార్యక్రమ ప్రధాన లక్ష్యం కాగా, అగ్ని ప్రమాదం వస్తే ఎలా వ్యవహరించాలనే దానిపై నిమ్స్‌లో ప్రత్యక్ష అవగాహన కార్యక్రమం నిర్వహించబడింది.

మాసబ్ ట్యాంక్‌లో హత్యకు గురైన న్యాయవాది ఖాజా మొయినుద్దీన్ కుటుంబాన్ని కేటీఆర్, ఆర్ఎస్ ప్రవీణ్ కుమార్, తలసాని శ్రీనివాస్ యాదవ్ సహా పలువురు బీఆర్ఎస్ నాయకులు పరామర్శించారు.

99 రోజుల ప్రజాపాలన ప్రగతి ప్రణాళికలో భాగంగా, వికారాబాద్ కలెక్టరేట్ సమావేశ మందిరంలో శనివారం బాలల హక్కుల సదస్సు నిర్వహించారు. మహిళా వారసవల సందర్భంగా గ్రామీణ పేదరిక నిర్మూలన సంస్థ ఆధ్వర్యంలో బాలికలతో ఈ కార్యక్రమం జరిగింది. ఈ కార్యక్రమానికి ముఖ్య అతిథిగా విచ్చేసిన కలెక్టర్ దీపక్ తివారి మాట్లాడుతూ, విద్య ద్వారానే ఉన్నత శిఖరాలను అధిగమించవచ్చని, విద్యార్థులు తమ నైపుణ్యాన్ని మెరుగుపరచుకుంటూ ముందుకు వెళ్లాలని సూచించారు. సమాజంపై అవగాహన కలిగి ఉండాలని ఆయన తెలిపారు. బాల్య వివాహాలను అరికట్టేందుకు ప్రజల్లో అవగాహన కల్పించాలని కలెక్టర్ దీపక్ తివారి స్పష్టం చేశారు.

కాస్త ఈ రోడ్డు కూడా వేసి పుణ్యం కట్టుకోండి మహాప్రభో..! తిమ్మాపురం గ్రామస్తుల ఆవేదన నంద్యాల జిల్లా మహానంది : కాస్త మా వీధి రోడ్డు కూడా వేసి పుణ్యం కట్టుకోండి మహాప్రభో అంటూ గ్రామస్తులు వేడుకుంటున్నారు. శనివారం మహానంది మండలంలో తెల్లవారుజామున కురిసిన వర్షానికి మండల కేంద్రమైన తిమ్మాపురం గ్రామంలో పెద్దమ్మ అరుగు వీధి రోడ్డు జలమయమైంది. చినుకు చిటుక్కుమంటే చాలు రోడ్డంతా వర్షపు నీరు నిలిచిపోయి కాలనీవాసులు తిరగడానికి కూడా లేని పరిస్థితి, గ్రామంలో అన్ని సిసి రోడ్లు అయితే వేశారు. కానీ మా కాలనీ రోడ్డు తరుగు అవడంతో వర్షపు నీరు చేరి తీవ్ర ఇబ్బందులకు గురవుతున్నామని కాలనీవాసులు ఆవేదన వ్యక్తం చేస్తున్నారు. ఇప్పటికైనా అధికారులు స్పందించి రోడ్డు వేసి పుణ్యం కట్టుకోవాలని గ్రామస్తులు కోరుతున్నారు.

దాసరి నారాయణరావు సమాధి దుస్థితిపై వచ్చిన ఒక వీడియోను చూసి చలించిన హీరో మంచు మనోజ్, శనివారం ఉదయం తన బృందంతో కలిసి అక్కడికి చేరుకున్నారు. ఆయన ఐక్య ధైర్య సేన సమితి తరఫున సమాధి ప్రాంగణాన్ని స్వయంగా శుభ్రం చేశారు. మంచు మనోజ్ చేపట్టిన ఈ చర్యకు స్పందించిన గీతా ఆర్ట్స్ సంస్థ కూడా, శుభ్రత పనుల కోసం తమ సిబ్బందిని పంపించి సహకారం అందించింది. ఈ సందర్భంగా, సమాధి పరిసరాలను పరిశుభ్రంగా ఉంచాలని కోరారు.