परळी वैजनाथ येथे नगरपालिकेच्या कारभारात हुकूमशाहीचे वर्चस्व वाढत असल्याचा आरोप करत माजी नगराध्यक्ष दीपक देशमुख यांनी पत्रकार गृहनिर्माण संस्थेसाठी आरक्षित जागेवर नमो उद्यान उभारण्याच्या हालचालींवर तीव्र नाराजी व्यक्त केली आहे. नंदागौळ रोड परिसरातील या जागेची प्रशासनाला आठवण करून देण्यासाठी प्रतिकात्मक उद्घाटन सोहळ्याचे आयोजन करण्यात आले होते. यावेळी देशमुख यांनी गंभीर आरोप करत म्हटले की, परळीचे विद्यमान नगराध्यक्ष पद्मश्री बाजीराव धर्माधिकारी यांची संबंधित जागेजवळ शेती असून, नमो उद्यान उभारल्यास परिसरातील जमिनींचे भाव वाढतील आणि त्याचा थेट फायदा काही मोजक्या व्यक्तींना होऊ शकतो. याच उद्देशातून पत्रकार गृहनिर्माण संस्थेसाठी राखीव असलेली सुमारे ६० गुंठे जागा नमो उद्यान प्रकल्पात समाविष्ट करण्याचा प्रयत्न होत आहे. देशमुख यांनी आठवण करून दिली की, सुमारे पंधरा वर्षांपूर्वी तत्कालीन विरोधी पक्षनेते तथा विद्यमान आमदार धनंजय मुंडे यांच्या हस्ते सर्व्हे क्रमांक ४२२ मधील याच जागेचे पत्रकार गृहनिर्माण संस्थेसाठी भूमिपूजन करण्यात आले होते. मात्र आता त्याच जागेवर नमो उद्यानाचा प्रस्ताव पुढे आल्याने 'जागा एकच, फलक मात्र वेगवेगळे' अशी परिस्थिती निर्माण झाल्याची टीका त्यांनी केली. नगरपालिकेच्या मालकीच्या या जागेचा यापूर्वी डम्पिंग ग्राउंड, घनकचऱ्यापासून खत निर्मिती प्रकल्प, अग्निशामक दलाचा तळ, न. प. कर्मचारी निवासस्थान, सुशिक्षित बेकार सप्तशृंगी संस्थेला, ऑक्सिजन पार्क अशा विविध योजनांसाठी वापर करण्याचे प्रस्ताव आले होते. या प्रतिकात्मक सोहळ्यात ज्येष्ठ पत्रकार बालासाहेब कडबाने, प्रकाश सूर्यकर, आत्मलिंग शेटे, धीरज जंगले, बाबा शेख, धनंजय अरबुने, संतोष जुजगर, प्रल्हाद कडुकटले, बालाजी ढगे, सुकेशनी नाईकवाडे, संजीब रॉय, संदीप मस्के, बालाजी जगतकर, गौतम आगळे, पद्माकर भंडारे, नितीन चव्हाण यांच्यासह अनेक पत्रकार उपस्थित होते. दिवंगत पत्रकार प्रेमनाथ कदम, प्रशांत जोशी, दिलीप बदर आणि सतीश बियाणी यांच्यासह ज्या पत्रकारांनी या भूमिपूजनाचे साक्षीदार होते, त्यांच्या स्मृतींचा सन्मान राखण्यासाठी तरी ही जागा पत्रकारांनाच देण्यात यावी, अशी भावनिक मागणी यावेळी करण्यात आली. दीपक देशमुख यांनी जोपर्यंत पत्रकार गृहनिर्माण संस्था नियोजित जागेवर प्रत्यक्षात उभी राहत नाही, तोपर्यंत हा संघर्ष सुरूच राहील असा निर्धार व्यक्त केला. लवकरच ते परळीतील पत्रकार गृहनिर्माण संस्थेचे कार्यकारी मंडळ, पत्रकार, संपादक आणि सर्वपक्षीय पदाधिकाऱ्यांचे शिष्टमंडळ घेऊन मुंबईत मुख्यमंत्री, उपमुख्यमंत्री, गृहनिर्माण मंत्री आणि खासदार बजरंग सोनवणे यांची भेट घेणार असल्याचे त्यांनी जाहीर केले. कार्यक्रमाला काही पत्रकार अनुपस्थित राहिल्याबाबत देशमुख यांनी गंभीर आरोप करत म्हटले की, यात सहभागी झाल्यास जाहिराती बंद केल्या जातील किंवा भविष्यात अडचणी निर्माण केल्या जातील, असा दबाव काही पत्रकारांवर टाकण्यात आला. पत्रकारांना अशा पद्धतीने गप्प बसविण्याचा प्रयत्न लोकशाहीसाठी घातक असल्याचेही त्यांनी नमूद केले. अलीकडेच मराठा भवनासाठी दिलेल्या जागेवरून श्री दत्त देवस्थान ट्रस्टने आक्षेप घेतल्याने निर्माण झालेल्या वादाचा उल्लेख करत देशमुख यांनी नगरपालिकेच्या जमीन वाटप प्रक्रियेवर प्रश्नचिन्ह उपस्थित केले. नोंदणी क्रमांक AF-22856 असलेल्या पत्रकार गृहनिर्माण संस्थेसाठी सर्व्हे क्रमांक ४२२ मधील ६० गुंठे जागा कायम राखावी, तिचा विकास करावा आणि पत्रकारांना दिलेले आश्वासन पूर्ण करावे, अशी मागणी या प्रतिकात्मक उद्घाटन सोहळ्यातून करण्यात आली. हा प्रश्न आता नवे राजकीय व सामाजिक परिमाण घेत असून, येत्या काळात हा विषय अधिक गाजण्याची चिन्हे आहेत.

M. p. gitte

परळी, बीड, महाराष्ट्र•

6 hrs ago