సంగారెడ్డి జిల్లాలో వరి ధాన్యం కొనుగోళ్లను వేగవంతం చేసి, రైతులకు ఎటువంటి ఇబ్బందులు లేకుండా వారం రోజుల్లో ఈ ప్రక్రియను పూర్తి చేయాలని మంత్రి దామోదర రాజనర్సింహ అధికారులను ఆదేశించారు. అకాల వర్షాల నేపథ్యంలో ధాన్యం తడవకుండా తగిన జాగ్రత్తలు తీసుకోవాలని, కొనుగోలు చేసిన ధాన్యాన్ని వెంటనే మిల్లులకు తరలించాలని ఆయన సూచించారు. ప్రభుత్వం చివరి ధాన్యం గింజ వరకు కొనుగోలు చేస్తుందని మంత్రి ఈ సందర్భంగా స్పష్టం చేశారు.

ఆంధ్రప్రదేశ్ రాష్ట్రంలో దేవాదాయ ధర్మాదాయ శాఖ నడుస్తోందా లేక కొందరి అవినీతి సామ్రాజ్యంగా మారిందా అని వైఎస్సార్ కాంగ్రెస్ పార్టీ నాయకుడు కామరాజ్ హరీష్ కుమార్ తీవ్రంగా ప్రశ్నించారు. శనివారం విడుదల చేసిన ఒక ప్రకటనలో ఆయన, రాష్ట్రంలో దేవాదాయ శాఖకు అసలు మంత్రి ఉన్నారా లేదా అని అనుమానం వ్యక్తం చేస్తూ, ఒకవేళ ఉంటే ఆయన కేవలం ఒక "కీలుబొమ్మ" లాగే వ్యవహరిస్తున్నారని ఆరోపించారు. గత 16 నెలల కాలంలో ఈ శాఖలో జరుగుతున్న అవినీతి, అక్రమాలు సామాన్య ప్రజలను దిగ్భ్రాంతికి గురిచేస్తున్నాయని ఆయన పేర్కొన్నారు. దేవుడి సొమ్మును, భూములను రక్షించాల్సిన అధికారులే భక్షకులుగా మారారని ఆరోపణలు చేస్తూ, గత 16 నెలల కాలంలోనే వందల ఎకరాల దేవాదాయ భూములకు నిబంధనలకు విరుద్ధంగా ఎన్‌ఓసిలు ఇచ్చిన ఘోర కలియుగాన్ని చూస్తున్నామని హరీష్ కుమార్ అన్నారు. ప్రస్తుత దేవాదాయ శాఖ కమిషనర్ రామచంద్ర మోహన్ రానున్న రోజుల్లో మరికొన్ని వేల ఎకరాల దేవుడి భూములకు ఎన్‌ఓసిలు ఇవ్వడానికి సిద్ధంగా ఉన్నట్లు స్పష్టంగా కనిపిస్తోందని ఆయన ఆరోపించారు. నిబంధనలకు విరుద్ధంగా ఒకే వ్యక్తి కమిషనర్‌గా, ఏడీసీ-1గా, ఏడీసీ-2గా మూడు ఉన్నత పదవులను అనుభవిస్తూ దేవాదాయ శాఖను పూర్తిగా భ్రష్టు పట్టించారని ఆయన మండిపడ్డారు. కూటమి ప్రభుత్వం అధికారంలోకి వచ్చినప్పటి నుంచి రాష్ట్రంలోని ఆలయాల్లో దేవుళ్లకు జరగాల్సిన కైంకర్యాల్లో తీవ్ర లోపాలు జరుగుతున్నాయని, ఎన్నో చోట్ల దేవుడి విగ్రహాలను ధ్వంసం చేసినా ప్రభుత్వానికి చలనం లేదని హరీష్ కుమార్ విమర్శించారు. భక్తులకు పెట్టే అన్నదానాల్లో సైతం నాణ్యత లోపించి, అవినీతి రాజ్యమేలుతోందని ఆయన అన్నారు. వయసులో పెద్దవారు, దేవుడిపై ఎంతో భక్తి శ్రద్ధలు కలిగిన మంత్రిని చూస్తే జాలేస్తోందని, దేవాదాయ శాఖకు సంబంధించిన ఏ కార్యక్రమంలో చూసినా కమిషనర్ రామచంద్ర మోహనే కనిపిస్తున్నారని, మంత్రి ఉనికి ఎక్కడా కనిపించడం లేదని భక్తులు ముక్కున వేలేసుకుంటున్నారని ఆయన తెలిపారు. గత 16 నెలల కాలంలో దేవాదాయ శాఖలో జరిగిన భూముల ఎన్‌ఓసిలు, ఉద్యోగాల ప్రమోషన్లపై రాష్ట్ర ప్రభుత్వం వెంటనే ఒక ఉన్నత స్థాయి విచారణ కమిటీని నియమించాలని కామరాజ్ హరీష్ కుమార్ డిమాండ్ చేశారు. రానున్న గోదావరి పుష్కరాలు, కృష్ణా నది పుష్కరాల పర్యవేక్షణకు తక్షణమే దేవాదాయ శాఖ తరపున ఒక సమర్థుడైన ఐఏఎస్ అధికారిని కమిషనర్‌గా నియమించాలని, గతంలో చంద్రబాబు నాయుడు ముఖ్యమంత్రిగా ఉన్నప్పుడు జరిగిన గోదావరి పుష్కరాల్లో జరిగిన చేదు అనుభవాలను గుర్తుచేశారు. ప్రస్తుత కమిషనర్ రామచంద్ర మోహన్‌పై తక్షణమే న్యాయపరమైన విచారణ జరిపించాలని ఆయన డిమాండ్ చేశారు. ఒకవేళ రాష్ట్ర ప్రభుత్వం ఈ అవినీతిపై స్పందించకపోతే, దేవుడిని నమ్మే ఒక సాధారణ భక్తుడిగా హైకోర్టును ఆశ్రయించి అయినా సరే న్యాయపరమైన విచారణ జరిగేలా చూస్తామని హెచ్చరించారు. దేవుడి సొమ్మును దోచుకుంటున్న వారిపై విచారణ జరిపించేంత వరకు తమ పోరాటం ఆగదని ఆయన స్పష్టం చేశారు.

మాసబ్ ట్యాంక్‌లో హత్యకు గురైన న్యాయవాది ఖాజా మొయినుద్దీన్ కుటుంబాన్ని కేటీఆర్, ఆర్ఎస్ ప్రవీణ్ కుమార్, తలసాని శ్రీనివాస్ యాదవ్ సహా పలువురు బీఆర్ఎస్ నాయకులు పరామర్శించారు.

కేశంపేట మండలంలో శనివారం ఉదయం నుండి బలమైన ఈదురు గాలులు వీస్తున్నాయి. ఈ గాలుల వేగం పెరగడంతో ప్రజలు తీవ్ర ఇబ్బందులను ఎదుర్కొంటున్నారు. పలుచోట్ల చెట్ల కొమ్మలు బలంగా ఊగిపోతున్నాయి, అలాగే వాతావరణంలో ఒక్కసారిగా మార్పు రావడంతో చల్లదనం పెరిగింది. రహదారులపై ప్రయాణించే వాహనదారులు అప్రమత్తంగా ఉండాల్సిన పరిస్థితి నెలకొంది. రైతులు తమ పంటలను, వ్యవసాయ సామగ్రిని రక్షించుకునేందుకు తగిన జాగ్రత్తలు తీసుకుంటున్నారు. ఈ బలమైన గాలుల కారణంగా విద్యుత్ సరఫరాకు అంతరాయం కలిగే అవకాశం ఉందని అధికారులు హెచ్చరించారు. ప్రజలు అవసరం లేకుండా బయటకు వెళ్లకుండా జాగ్రత్తలు పాటించాలని, గాలుల దాటికి అప్రమత్తంగా ఉండాలని అధికారులు సూచనలు జారీ చేశారు.

తెలంగాణలో కాంగ్రెస్ పార్టీ ఆధ్వర్యంలో 17 పార్లమెంట్ నియోజకవర్గాలకు చెందిన జిల్లా అధ్యక్షులు, పార్లమెంట్ సభ్యులు, ప్రజాప్రతినిధులు, ఎమ్మెల్యేలు మరియు పార్టీ ముఖ్య నాయకులతో కలిసి ఎస్‌ఐఆర్ (స్పెషల్ ఇంటెన్సివ్ రివిజన్) ప్రక్రియపై గాంధీ భవన్‌లో ఒక విస్తృత స్థాయి అవగాహన సమావేశం నిర్వహించారు. ఈ సమావేశంలో భువనగిరి ఎంపీ శ్రీ చామల కిరణ్ కుమార్ రెడ్డి గారు పాల్గొన్నారు. పశ్చిమ బెంగాల్ మరియు బీహార్ రాష్ట్రాలలో ఎన్నికల కమిషన్ బీజేపీ ప్రభావంతో ఎస్‌ఐఆర్ విధానాన్ని ఎలా అమలు చేసిందో, ఆ ప్రక్రియ వల్ల అక్కడి ప్రజాస్వామ్య వ్యవస్థపై ఎలాంటి ప్రతికూల ప్రభావం పడిందో తాము స్పష్టంగా గమనించామని నాయకులు పేర్కొన్నారు. తెలంగాణలో అలాంటి పరిస్థితి పునరావృతం కాకుండా ముందస్తు జాగ్రత్త చర్యలు తీసుకోవాలని ఈ సమావేశంలో నిర్ణయం తీసుకున్నారు. హైదరాబాద్‌లోని గాంధీ భవన్‌లో జరిగిన ఈ సమావేశంలో ఎస్‌ఐఆర్ ప్రక్రియ ఎలా ఉంటుంది, ఎన్నికల కమిషన్ విధానాలు ఏమిటి, ఓటరు జాబితా సవరణలకు అవసరమైన పత్రాలు ఏవి, వాటిని సమయానికి ఎలా సమర్పించాలి, అలాగే బూత్ స్థాయి ఏజెంట్లు (బీఎల్‌ఏలు) నిర్వహించాల్సిన బాధ్యతలు, వారి పాత్ర వంటి అంశాలపై సమగ్రంగా చర్చించారు.

కాస్త ఈ రోడ్డు కూడా వేసి పుణ్యం కట్టుకోండి మహాప్రభో..! తిమ్మాపురం గ్రామస్తుల ఆవేదన నంద్యాల జిల్లా మహానంది : కాస్త మా వీధి రోడ్డు కూడా వేసి పుణ్యం కట్టుకోండి మహాప్రభో అంటూ గ్రామస్తులు వేడుకుంటున్నారు. శనివారం మహానంది మండలంలో తెల్లవారుజామున కురిసిన వర్షానికి మండల కేంద్రమైన తిమ్మాపురం గ్రామంలో పెద్దమ్మ అరుగు వీధి రోడ్డు జలమయమైంది. చినుకు చిటుక్కుమంటే చాలు రోడ్డంతా వర్షపు నీరు నిలిచిపోయి కాలనీవాసులు తిరగడానికి కూడా లేని పరిస్థితి, గ్రామంలో అన్ని సిసి రోడ్లు అయితే వేశారు. కానీ మా కాలనీ రోడ్డు తరుగు అవడంతో వర్షపు నీరు చేరి తీవ్ర ఇబ్బందులకు గురవుతున్నామని కాలనీవాసులు ఆవేదన వ్యక్తం చేస్తున్నారు. ఇప్పటికైనా అధికారులు స్పందించి రోడ్డు వేసి పుణ్యం కట్టుకోవాలని గ్రామస్తులు కోరుతున్నారు.

ప్రతి భారతీయుడికి తప్పనిసరిగా తెలిసి ఉండాల్సిన ఒక శక్తివంతమైన చట్టపరమైన హక్కుగా E-FIRను ప్రముఖంగా పేర్కొంటున్నారు. దీని ద్వారా కేవలం ఒకే క్లిక్‌తో చట్టపరమైన చర్యలు ప్రారంభమవుతాయని స్పష్టం అవుతోంది, ఇది పౌరులకు గల గొప్ప అధికారం. E-FIR సౌలభ్యం కారణంగా, ఇప్పుడు ప్రజల ఫోనే డిజిటల్ పోలీస్ స్టేషన్‌గా మారగలదు. ఇది భారతీయ చట్టం పట్ల ప్రజలలో అవగాహన కల్పించి, డిజిటల్ ఇండియా లక్ష్యాలను బలోపేతం చేసే దిశగా ఒక ముఖ్యమైన అడుగు.

బీఆర్ఎస్ పార్టీ జనరల్ సెక్రటరీ ఆర్ఎస్ ప్రవీణ్ కుమార్, సీఎం రేవంత్ రెడ్డిపై ఘాటు వ్యాఖ్యలు చేస్తూ, కేసీఆర్ మంచి మనిషి కావడం వల్లే రేవంత్ రెడ్డి బయట స్వేచ్ఛగా తిరుగుతున్నారని అన్నారు. తాను పోలీస్ ఆఫీసర్‌గా ఉండి ఉంటే, రేవంత్ రెడ్డి చర్లపల్లి జైలులో ఉండేవాడని ప్రవీణ్ కుమార్ వ్యాఖ్యానించారు. పోక్సో నిందితుడిని తొమ్మిది రోజులు కాపాడిన ఉసురు ఊరికే పోదని ఆయన తీవ్రంగా ఆరోపించారు.

విజయవాడలోని కనకదుర్గ అమ్మవారి ఆలయంలో మెట్ల పూజ ప్రాంగణంలో కొండచిలువ కలకలం సృష్టించింది. వినాయకుడి గుడి పక్కన ఉన్న ప్రాంతంలో ఒక చెట్టుపై నుంచి ఉడతను తింటూ కిందపడిన భారీ కొండచిలువను చూసి భక్తులు ఒక్కసారిగా భయాందోళనలకు గురయ్యారు. ఈ సంఘటనతో కొంతసేపు మెట్ల మార్గంలో భక్తుల రాకపోకలకు అంతరాయం ఏర్పడింది. సమాచారం అందుకున్న ఆలయ సిబ్బంది కొండచిలువను తొలగించారు.

ఒడిశాలోని భువనేశ్వర్‌లో నిన్న రాత్రి ఓ లారీ డ్రైవర్ అరాచకం సృష్టించాడు. హైవేపై సైడ్ ఇచ్చే విషయంలో వివాదం తలెత్తడంతో, పలాసునీ బ్రిడ్జి వద్ద కారులో ఉన్న తండ్రి, కుమార్తెతో సహా ఒక కారును ఢీకొట్టి, ఆపై దాన్ని 500 మీటర్లకు పైగా లాక్కెళ్లాడు. ఈ ఘటనలో కారులో ఉన్న తండ్రి, కుమార్తె అదృష్టవశాత్తూ స్వల్ప గాయాలతో బయటపడగా, ఈ దృశ్యాన్ని చూసిన కారులో ఉన్నవారితో పాటు ఆ రోడ్డుపై ప్రయాణించే వారంతా భయాందోళనకు గురయ్యారు. సీసీ ఫుటేజ్ ఆధారంగా నిందితుడిని అరెస్ట్ చేశారు.