नाशिकरोड येथील आनंद बाजार परिसरातील एका नामांकित कापड दुकानात घुसून एका व्यापाऱ्याला आणि त्यांच्या मुलाला जीवे ठार मारण्याची धमकी देत दरमहा खंडणी मागितल्याप्रकरणी एका सराईत गुंडावर नाशिकरोड पोलीस ठाण्यात गुन्हा दाखल करण्यात आला आहे. अर्जुन पवार ऊर्फ गुड्डी (वय ४०, रा. देवळाली गाव, नाशिकरोड) असे या संशयित आरोपीचे नाव असून, त्याच्या या कृत्यामुळे स्थानिक व्यापारी वर्गात तीव्र संताप आणि भीतीचे वातावरण पसरले आहे. या प्रकरणी कापड व्यावसायिक पृथ्वीराज रूपचंद चंदनानी (वय ६१, रा. म्हसोबा मंदिर जवळ, नाशिकरोड) यांनी फिर्याद दिली आहे. त्यांची मशिद रोडवरील आनंद बाजार येथे 'विराज एक्सक्लुझिव्ह मेन्स वेअर' नावाचे कपड्यांचे दुकान आहे. १८ जून रोजी दुपारी ३:५० वाजेच्या सुमारास चंदनानी आणि त्यांचा लहान मुलगा अमित हे दुकानात उपस्थित असताना ही घटना घडली. संशयित आरोपी गुड्डी दुकानात शिरला आणि थेट कॅश काउंटरवर हात-पाय आपटत दहशत निर्माण करण्याचा प्रयत्न केला. त्याने चंदनानींना 'नवीन कपडे द्या, तसेच गल्ल्यात जेवढे पैसे आहेत तेवढे काढून द्या, नाहीतर तुम्हाला जिवंत सोडणार नाही. आता दर महिन्याला मला ₹१,००० हप्ता द्यावा लागेल, नाहीतर इथे धंदा करू देणार नाही,' अशी धमकी दिली. तसेच, अत्यंत हीन दर्जाची शिवीगाळ करण्यास सुरुवात केली. आरोपीच्या या अरेरावीला न जुमानता अमित चंदनानी यांनी 'मी पोलिसांना फोन करतो' असे ठणकावून सांगितले. याचा राग आल्याने आरोपी गुड्डी दुकानाच्या बाहेर आला. त्याने त्याच्या मोटारसायकलला बांधलेला लोखंडी टिकाव हातात घेतला आणि चंदनानी पिता-पुत्राच्या अंगावर धावून गेला. 'तुमचे दुकान फोडून टाकीन आणि तुम्हाला जिवंत मारून टाकीन,' अशी उघड धमकी देत तो घटनास्थळावरून पसार झाला. या अचानक घडलेल्या प्रकारामुळे चंदनानी कुटुंब कमालीचे घाबरले होते, मात्र त्यांचे मित्र सनी बच्छाव यांनी त्यांना धीर दिल्यानंतर त्यांनी नाशिकरोड पोलीस ठाणे गाठून रीतसर तक्रार नोंदवली. नाशिकरोड पोलिसांनी गुन्हा दाखल केला असून, रेल्वे स्टेशन पोलीस चौकीचे पोलीस हवालदार गायकवाड या प्रकरणाचा पुढील तपास करत आहेत. या घटनेमुळे पुन्हा एकदा व्यापाऱ्यांच्या सुरक्षेचा प्रश्न ऐरणीवर आला असून, पोलिसांनी अशा खंडणीखोरांचा कायमचा बंदोबस्त करावा, अशी मागणी स्थानिक व्यावसायिकांकडून होत आहे.

Anil GUNJAL

नाशिक, नाशिक, महाराष्ट्र•

5 hrs ago

नाशिकरोड येथील आनंद बाजार परिसरातील एका नामांकित कापड दुकानात घुसून एका व्यापाऱ्याला आणि त्यांच्या मुलाला जीवे ठार मारण्याची धमकी देत दरमहा खंडणी मागितल्याप्रकरणी एका सराईत गुंडावर नाशिकरोड पोलीस ठाण्यात गुन्हा दाखल करण्यात आला आहे. अर्जुन पवार ऊर्फ गुड्डी (वय ४०, रा. देवळाली गाव, नाशिकरोड) असे या संशयित आरोपीचे नाव असून, त्याच्या या कृत्यामुळे स्थानिक व्यापारी वर्गात तीव्र संताप आणि भीतीचे वातावरण पसरले आहे. या प्रकरणी कापड व्यावसायिक पृथ्वीराज रूपचंद चंदनानी (वय ६१, रा. म्हसोबा मंदिर जवळ, नाशिकरोड) यांनी फिर्याद दिली आहे. त्यांची मशिद रोडवरील आनंद बाजार येथे 'विराज एक्सक्लुझिव्ह मेन्स वेअर' नावाचे कपड्यांचे दुकान आहे. १८ जून रोजी दुपारी ३:५० वाजेच्या सुमारास चंदनानी आणि त्यांचा लहान मुलगा अमित हे दुकानात उपस्थित असताना ही घटना घडली. संशयित आरोपी गुड्डी दुकानात शिरला आणि थेट कॅश काउंटरवर हात-पाय आपटत दहशत निर्माण करण्याचा प्रयत्न केला. त्याने चंदनानींना 'नवीन कपडे द्या, तसेच गल्ल्यात जेवढे पैसे आहेत तेवढे काढून द्या, नाहीतर तुम्हाला जिवंत सोडणार नाही. आता दर महिन्याला मला ₹१,००० हप्ता द्यावा लागेल, नाहीतर इथे धंदा करू देणार नाही,' अशी धमकी दिली. तसेच, अत्यंत हीन दर्जाची शिवीगाळ करण्यास सुरुवात केली. आरोपीच्या या अरेरावीला न जुमानता अमित चंदनानी यांनी 'मी पोलिसांना फोन करतो' असे ठणकावून सांगितले. याचा राग आल्याने आरोपी गुड्डी दुकानाच्या बाहेर आला. त्याने त्याच्या मोटारसायकलला बांधलेला लोखंडी टिकाव हातात घेतला आणि चंदनानी पिता-पुत्राच्या अंगावर धावून गेला. 'तुमचे दुकान फोडून टाकीन आणि तुम्हाला जिवंत मारून टाकीन,' अशी उघड धमकी देत तो घटनास्थळावरून पसार झाला. या अचानक घडलेल्या प्रकारामुळे चंदनानी कुटुंब कमालीचे घाबरले होते, मात्र त्यांचे मित्र सनी बच्छाव यांनी त्यांना धीर दिल्यानंतर त्यांनी नाशिकरोड पोलीस ठाणे गाठून रीतसर तक्रार नोंदवली. नाशिकरोड पोलिसांनी गुन्हा दाखल केला असून, रेल्वे स्टेशन पोलीस चौकीचे पोलीस हवालदार गायकवाड या प्रकरणाचा पुढील तपास करत आहेत. या घटनेमुळे पुन्हा एकदा व्यापाऱ्यांच्या सुरक्षेचा प्रश्न ऐरणीवर आला असून, पोलिसांनी अशा खंडणीखोरांचा कायमचा बंदोबस्त करावा, अशी मागणी स्थानिक व्यावसायिकांकडून होत आहे.