விருதுநகர் மாவட்டத்தில், சாத்தூர்-விருதுநகர் சாலையை இணைக்கும் இரயில்வே இருப்புப் பாதை (எல்.சி எண்: 407, இரயில்வே கி.மீ: 541/200-300) பராமரிப்புப் பணிகளுக்காக இன்று (23.06.2026) ஒரு நாள் மட்டும் மூடப்படும் என இரயில்வே நிர்வாகம் அறிவித்துள்ளது. காலை 10.00 மணி முதல் மாலை 06.00 மணி வரை இந்த வழித்தடத்தில் பராமரிப்புப் பணிகள் மேற்கொள்ளப்பட உள்ளன. தென்னக இரயில்வே நிர்வாகத்தின் இந்த அறிவிப்பின்படி, பொதுமக்கள் அனைவரும் மேற்கண்ட மூடப்பட்ட வழிகளைத் தவிர்த்து, மாற்று வழிகளைப் பயன்படுத்திக் கொள்ளுமாறு கேட்டுக் கொள்ளப்பட்டுள்ளனர்.

விருதுநகர் மாவட்டம் சாத்தூர் அருகே உள்ள சமத்துவபுரம் கிராமத்தில், தமிழக முதல்வர் விஜய் பிறந்தநாளை முன்னிட்டு சிறப்பு பொதுநல மருத்துவ முகாம் நடைபெற்றது. இந்த முகாமை தமிழக வெற்றி கழகத்தின் விருதுநகர் மத்திய மாவட்டம் சார்பில் ஏற்பாடு செய்திருந்தது. இந்த மருத்துவ முகாமிற்கு விருதுநகர் மத்திய மாவட்ட செயலாளர் சின்னப்பர் தலைமை தாங்கினார். சாத்தூர் தெற்கு ஒன்றிய செயலாளர் தங்கமுனியராஜா ஏற்பாட்டில் நடைபெற்ற இம்முகாமில், பல்வேறு நோய்களுக்கான சிறப்பு மருத்துவர்கள் பங்கேற்று பொதுமக்களுக்கு மருத்துவ சேவைகளை வழங்கினர். அத்துடன், தேவையான மருந்துகளும் வழங்கப்பட்டன. சமத்துவபுரம், முள்ளிச்செவல், பெருமாள்பட்டி உள்ளிட்ட பல கிராமங்களைச் சேர்ந்த ஏராளமான பொதுமக்கள் இம்முகாமில் கலந்து கொண்டு மருத்துவ உதவிகளைப் பெற்றனர். மருத்துவக் குழுவினர் அளித்த தகவலின்படி, 300க்கும் மேற்பட்ட பயனாளிகள் இந்த முகாமில் கலந்துகொண்டு பயனடைந்துள்ளனர்.

தூத்துக்குடி மாவட்டம் கோவில்பட்டி பசுவந்தனை சாலையில் காரும் சாலையோர ஓடைக்குள் கவிழ்ந்து விபத்துக்குள்ளானது. இந்த விபத்தில் காரில் பயணித்த இருவர் அதிர்ஷ்டவசமாக உயிர் தப்பினர். கோவில்பட்டி பசுவந்தனை சாலையைச் சேர்ந்த மகாராஜன், மார்க்கெட்டில் கடை நடத்தி வருபவர். இவர் மதுரையில் டைல்ஸ் வாங்குவதற்காக புதுக் கிராமத்தைச் சேர்ந்த தனது நண்பர் ஒருவருடன் காரில் இலுப்பையூரணி ரெயில்வே சுரங்க பாலம் வழியாக மெயின் ரோட்டிற்கு சென்று கொண்டிருந்தார். அப்போது கார் திடீரென கட்டுப்பாட்டை இழந்து, அருகில் இருந்த சாலையோர ஓடைக்குள் கவிழ்ந்து விபத்துக்குள்ளானது. இந்த விபத்தில் மகாராஜனும் அவரது நண்பரும் எவ்வித காயங்களுமின்றி உயிர் தப்பியது குறிப்பிடத்தக்கது. இந்த விபத்து குறித்து கோவில்பட்டி கிழக்கு காவல் நிலைய போலீசார் வழக்கு பதிவு செய்து விசாரணை நடத்தி வருகின்றனர்.

தேனி மாவட்டம், ஆண்டிபட்டி ஒன்றியத்திற்குட்பட்ட ரெங்கசமுத்திரம் கிராமத்தில், கிராம மக்களின் பயன்பாட்டிற்காக சில ஆண்டுகளுக்கு முன்பு அரசு சமுதாயக் கூட கட்டிடம் கட்டப்பட்டது. ஆனால், இந்த கட்டிடத்தை ஊராட்சி நிர்வாகம் முறையாகப் பராமரிக்காத காரணத்தால், தற்போது சமுதாயக் கூடத்தின் மேற்கூரைகள் பெயர்ந்து, கான்கிரீட் கம்பிகள் வெளியே தெரியும் அளவிற்கு கடுமையாகச் சேதமடைந்துள்ளது. இதனால், இந்தக் கட்டிடத்தை உடனடியாகச் சரிசெய்து, மீண்டும் கிராம மக்களின் பயன்பாட்டிற்குக் கொண்டுவர வேண்டும் என்று பொதுமக்கள் கோரிக்கை விடுத்துள்ளனர்.

தேனி மாவட்டம் கம்பம் அருகே உள்ள காமயகவுண்டன்பட்டி பகுதியைச் சேர்ந்த ராணுவ வீரர் லென்ஸ் நாயக் மீனாட்சி சுந்தரம், காஷ்மீரில் தீவிரவாதிகளுடன் நடைபெற்ற போரில் வீர தீரத்துடன் சண்டையிட்டார். வாய் பகுதியில் துப்பாக்கி குண்டுகள் பாய்ந்து பலத்த காயம் ஏற்பட்ட போதிலும், அவர் காயத்தைப் பொருட்படுத்தாமல் போரிட்டு 5 தீவிரவாதிகளை சுட்டுக் கொன்று தனது சக வீரர்களைக் காப்பாற்றினார். அவரது இந்த வீர தீர செயலைப் பாராட்டி, இந்திய நாட்டின் உயரிய விருதான 'கீர்த்தி சக்கரா' விருதை இந்திய குடியரசுத் தலைவர் திரௌபதி முர்மு அவருக்கு வழங்கினார். இந்த உயரிய விருதைப் பெற்றதைத் தொடர்ந்து, தனது சொந்த மாவட்டமான தேனி மாவட்டத்திற்கு வருகை தந்த ராணுவ வீரர் மீனாட்சி சுந்தரத்திற்கு ஊர் பொதுமக்கள் உற்சாக வரவேற்பு மற்றும் பாராட்டு விழாக்களை நடத்தி வருகின்றனர். இதன் ஒரு பகுதியாக, தேனி மாவட்டம் கோட்டூர் அருகே உள்ள தர்மாபுரி கிராமத்தில், முன்னாள் படை வீரர் நல சங்கம் மற்றும் தர்மாபுரி ஊர் பொதுமக்கள் சார்பில் ராணுவ வீரருக்கு ஒரு உற்சாகமான வரவேற்பு அளிக்கப்பட்டது. இந்த வரவேற்பு விழாவில், தேவராட்டம், ஒயிலாட்டம் உள்ளிட்ட பாரம்பரிய நடனங்களை ஆடிய ஊர் பொதுமக்கள், ராணுவ வீரர் மீனாட்சி சுந்தரத்திற்கு மாலை அணிவித்து வரவேற்றனர். முன்னாள் ராணுவ வீரர்களும், ஊர் பொதுமக்களும் இணைந்து, வீர தீர செயலுக்காக நாட்டின் உயரிய விருதான 'கீர்த்தி சக்கரா' விருது பெற்ற அவருக்கு தங்களது வாழ்த்துக்களைத் தெரிவித்தனர்.

சிங்கம்புணரியில் நேற்று இரவு பலத்த காற்றுடன் கூடிய கனமழை பெய்தது. 24.60 மி.மீ. அளவு பதிவான இந்த மழையால் நகரம் முழுவதும் மழைநீர் பெருக்கெடுத்தது. இதனால் விவசாயிகள் மிகுந்த மகிழ்ச்சி அடைந்து, விவசாயப் பணிகளை உடனடியாகத் தொடங்க முடிவு செய்தனர். இதே பலத்த காற்றில், அரசு ஆண்கள் மேல்நிலைப்பள்ளியின் தெற்கு சுற்றுச்சுவர் மீது சுமார் 50 ஆண்டுகள் பழமையான ஒரு ஆலமரம் சாய்ந்து விழுந்தது. அதிர்ஷ்டவசமாக, இந்த சம்பவத்தில் பள்ளிச் சுவருக்கு எந்தப் பாதிப்பும் ஏற்படவில்லை. இருப்பினும், சாய்ந்த மரத்தை உடனடியாக அங்கிருந்து அகற்ற வேண்டும் என பள்ளி ஆசிரியர்களும் பெற்றோர்களும் கோரிக்கை விடுத்துள்ளனர்.

தேனி பங்களாமேட்டில், தமிழக முதல்வர் அளித்த தேர்தல் வாக்குறுதியான கூட்டுறவு பயிர்க் கடன்களை முழுமையாக ரத்து செய்யக் கோரி, தேனி மாவட்ட தமிழக விவசாயிகள் பாதுகாப்பு சங்கம் சார்பில் காலவரையற்ற உண்ணாவிரதம் மற்றும் தொடர் காத்திருப்புப் போராட்டம் நடைபெற்று வருகிறது. தேனி மாவட்டம் முழுவதிலும் இருந்து 50க்கும் மேற்பட்ட பல்வேறு விவசாயிகள் சங்கங்களின் நிர்வாகிகள் இந்தப் போராட்டத்தில் பங்கேற்றுள்ளனர். இந்தப் போராட்டத்தில், இன்று தமிழக முதல்வர் விஜய் பிறந்தநாளை முன்னிட்டு அவருக்கு கேக் வெட்டி வாழ்த்து தெரிவித்து இனிப்புகளை வழங்கினர். தொடர்ந்து, தமிழக வெற்றிக் கழகத்தின் சின்னமான விசில்களை ஊதி முதல்வரின் கவனத்தை ஈர்த்த விவசாயிகள், பின்னர் அந்த விசில்களை சாலையில் தூக்கி எறிந்தனர். மேலும், தலையில் துண்டால் முக்காடு போட்டு மண் சட்டியில் யாசகம் கேட்டும், உடலில் சாட்டையால் அடித்தும் தங்கள் எதிர்ப்பை வித்தியாசமான முறையில் பதிவு செய்தனர். பயிர்க்கடனை முழுமையாக ரத்து செய்ய வேண்டும் என்றும், பயிர்க்கடனை ரத்து செய்யும் அரசின் வாக்குறுதியை நிறைவேற்ற வேண்டும் என்றும் கோரிக்கை முழக்கங்கள் எழுப்பப்பட்டன.

தூத்துக்குடி மாவட்டம், கோவில்பட்டியில் கூட்டுறவு வங்கிகளில் விவசாயிகள் பெற்ற பயிர் கடனை முழுமையாகத் தள்ளுபடி செய்ய வலியுறுத்தி விவசாயிகள் ஆர்ப்பாட்டத்தில் ஈடுபட்டனர். தமிழக விவசாயிகள் பாதுகாப்பு சங்கம் சார்பில் இந்த ஆர்ப்பாட்டம் நடைபெற்றது. தென்னக மானாவாரி விவசாயிகள் சங்கத் தலைவர் பிரேம்குமார் தலைமை வகித்த இந்த ஆர்ப்பாட்டத்தில், அவர் கோரிக்கைகள் குறித்து விளக்கினார். முன்னதாக, பயிர் கடனை முழுமையாக ரத்து செய்யக் கோரி தமிழக விவசாயிகள் பாதுகாப்பு சங்கம் சார்பில் உண்ணாவிரதப் போராட்டம் நடத்தப்படும் என அறிவிக்கப்பட்டிருந்தது. ஆனால், காவல்துறை அனுமதி மறுத்ததால், கோவில்பட்டி பயணியர் விடுதி முன்பு இந்த ஆர்ப்பாட்டம் நடத்தப்பட்டது. இதில் திரளான விவசாயிகள் கலந்துகொண்டு தங்கள் கோரிக்கையை வலியுறுத்தி கோஷமிட்டனர்.

தேங்காய்க்கு உரிய விலை நிர்ணயம் செய்து தமிழக அரசே நேரடியாக கொள்முதல் செய்ய வலியுறுத்தி, தமிழ்நாடு தென்னை விவசாயிகள் சங்கம் சார்பில் தேனி மாவட்ட ஆட்சியர் அலுவலகம் முன்பு கண்டன ஆர்ப்பாட்டம் நடைபெற்றது. விவசாயிகள் தங்கள் எதிர்ப்பை தெரிவிக்கும் விதமாக சாலையில் தேங்காய்களை உடைத்தனர். விவசாயிகள் விளைவிக்கும் தேங்காய்க்கு உரிய விலை கிடைக்காததால் தங்களது வாழ்வாதாரம் பாதிக்கப்பட்டு வருவதாக கூறி அவர்கள் ஆர்ப்பாட்டத்தில் ஈடுபட்டனர். உரித்த தேங்காய் ஒரு கிலோவுக்கு 60 ரூபாயும், உரிக்காத தேங்காய் ஒரு கிலோவுக்கு 30 ரூபாயும், கொப்பரை ஒரு கிலோவுக்கு 180 ரூபாயும் தமிழக அரசு நிரந்தர விலை நிர்ணயம் செய்ய வேண்டும் என விவசாயிகள் கோரிக்கை விடுத்தனர். மேலும், விளைவிக்கப்பட்ட தேங்காயை அரசே நேரடியாக கொள்முதல் செய்ய வேண்டும் என்றும் அவர்கள் வலியுறுத்தினர். இந்த கண்டன ஆர்ப்பாட்டத்தில் 50க்கும் மேற்பட்ட தென்னை விவசாயிகள் கலந்துகொண்டு தங்களது கோரிக்கைகளை முன்வைத்து எதிர்ப்புகளை தெரிவித்தனர்.

ஓட்டப்பிடாரம் அருகே உள்ள புதியம்புத்தூர் ஸ்ரீ குலசேகர வள்ளி அம்பாள் உடனுறை குலசேகர நாதர் திருக்கோவிலில், திருமஞ்சனத்தை முன்னிட்டு இன்று இரவு ஆனந்த நடராஜர் மற்றும் சிவகாமி அம்பாளுக்கு சிறப்பு அபிஷேகம் நடைபெற்றது. இந்த சிறப்பு அபிஷேகம் பால், மஞ்சள், இளநீர், சந்தனம், தேன், பஞ்சாமிர்தம், திரவிய பொடி, விபூதி, பன்னீர், பழச்சாறு உள்ளிட்ட 18 வகையான பொருட்களால் செய்யப்பட்டது. அபிஷேகத்தைத் தொடர்ந்து, ஆனந்த நடராஜர் மற்றும் சிவகாமி அம்பாள் பட்டு வஸ்திரம், வண்ண பூக்கள், ஆபரணங்கள் கொண்டு அலங்கரிக்கப்பட்டு, சிறப்பு அர்ச்சனைகள் மற்றும் மகா தீபராதனை நிகழ்ச்சியும் நடத்தப்பட்டது. இந்த வழிபாட்டு நிகழ்ச்சியில் ஏராளமான பக்தர்கள் கலந்துகொண்டு, தேவாராம் மற்றும் திருவாசகம் பாடல்களைப் பாடி இறைவனை வழிபட்டனர்.