ବାଘ ଛାଲର ଚୋରା ଚାଲାଣ ବେଳେ ଅମଳାଭାଟା ଚର୍ଚ୍ଚର ପାଷ୍ଟରଙ୍କୁ ଗିରଫ କରାଯାଇଛି। ଚୋରା ଚାଲାଣ ସମୟରେ ପାଷ୍ଟରଙ୍କ ନିକଟରୁ ବାଘ ଛାଲ ଜବତ ହୋଇଛି।

ନବରଙ୍ଗପୁର ଜିଲ୍ଲାର ତେନ୍ତୁଳୀଖୁଣ୍ଟି ବ୍ଲକ ଅନ୍ତର୍ଗତ ମଞ୍ଚାଗାଁ ପଞ୍ଚାୟତରେ ନୂତନ ବର୍ଦ୍ଧିତ ଭତା ₹୩୦୦୦ ପାଇବା ଆଶାରେ ପଞ୍ଚାୟତ କାର୍ଯ୍ୟାଳୟରେ ହିତାଧିକାରୀମାନଙ୍କ ପ୍ରବଳ ଭିଡ଼ ଦେଖିବାକୁ ମିଳିଛି। ତେବେ, ଏମାନେ ଗତ ତିନିରୁ ଚାରି ମାସ ହେଲା ଭତା ପାଇନଥିବା ଅଭିଯୋଗ କରିଛନ୍ତି। ହିତାଧିକାରୀମାନଙ୍କ କହିବାନୁଯାୟୀ, ପଞ୍ଚାୟତ ଅଧିକାରୀମାନେ ସେମାନଙ୍କୁ ଭତା ଦେବା ପାଇଁ ଡାକିଥିଲେ, କିନ୍ତୁ ସେମାନେ ଆସିଲା ବେଳକୁ ଭତା ଦିଆଯାଇ ନଥିଲା। ଏହି କାରଣରୁ ଦୂର ଦୁରାନ୍ତରୁ ଆସିଥିବା ବୃଦ୍ଧବୃଦ୍ଧାମାନେ ତୀବ୍ର ଅସନ୍ତୋଷ ପ୍ରକାଶ କରିବା ସହ ପାଟିତୁଣ୍ଡ କରିଥିଲେ। ମାସ ମାସ ଧରି ଭତା ନମିଳିବାରୁ ସେମାନଙ୍କ ହାତ ଖାଲି ହୋଇପଡିଛି ଏବଂ ଗୁଜୁରାଣ ମେଣ୍ଟେଇବା କଷ୍ଟକର ହୋଇପଡିଥିବା ସେମାନେ କହିଛନ୍ତି।

କୋଟପାଡ଼ର ଜଣେ ଜମିଦାର ଯନ୍ତ୍ରୀଙ୍କ ନାମରେ ବିପୁଳ ସମ୍ପତ୍ତି ରହିଥିବା ସୂଚନା ମିଳିଛି। ତାଙ୍କ ନାମରେ 32ଟି ପ୍ଲଟ, 2ଟି ଫାର୍ମ ହାଉସ୍, ପୁଳା ପୁଳା ଟଙ୍କା ଏବଂ ସୁନା ଗହଣା ଥିବା ଜଣାପଡ଼ିଛି।

କଳାହାଣ୍ଡି ଜିଲ୍ଲାର କୋକସରା ବ୍ଲକ ଅନ୍ତର୍ଗତ ଚିକିଲି ଗ୍ରାମରେ ଏକ ଭାଲୁ ପଶିଥିବା ସୂଚନା ମିଳିଛି। ଏହି ଖବର ପାଇ ପୋଲିସ ଏବଂ ବନ ବିଭାଗର କର୍ମଚାରୀମାନେ ଚିକିଲି ଗ୍ରାମରେ ପହଞ୍ଚିଛନ୍ତି। ବର୍ତ୍ତମାନ ସେମାନେ ଭାଲୁ ଉପରେ ତୀକ୍ଷ୍ଣ ନଜର ରଖିଛନ୍ତି।

ଜୟପୁର ଟାଉନ ପୋଲିସ ଏକ ବଡ଼ ସଫଳତା ହାସଲ କରି ଲକ୍ଷାଧିକ ଟଙ୍କା ଜବତ କରିଛି।

କଳାହାଣ୍ଡି ଜିଲ୍ଲାର କୋକସରା ବ୍ଲକ ଅନ୍ତର୍ଗତ ଚିକିଲି ଗ୍ରାମକୁ ଶନିବାର ଦିନ ଖାଦ୍ୟ ଅନ୍ୱେଷଣରେ ଦୁଇଟି ଜଙ୍ଗଲୀ ଭାଲୁ ପଶି ଆସିଥିଲେ। ଗ୍ରାମ ମଧ୍ୟରେ ଭାଲୁ ଦୁଇଟିକୁ ଦେଖି ଚିକିଲି ଗ୍ରାମବାସୀ ଭୟଭୀତ ହୋଇପଡ଼ିଥିଲେ। ଏହି ଘଟଣା ନେଇ ଗ୍ରାମବାସୀ ବନ ବିଭାଗକୁ ଖବର ଦେବା ପରେ, ଦକ୍ଷିଣ ବନ ଖଣ୍ଡ ଅଧୀନରେ ଥିବା କୋକସରା ଫରେଷ୍ଟ ସେକ୍ସନର ଫରେଷ୍ଟର ରଶ୍ମି ରଞ୍ଜିତା ନାଏକ ନିଜ ଟିମ୍ ସହ ଚିକିଲି ଗ୍ରାମରେ ପହଞ୍ଚି ପୋଲିସକୁ ମଧ୍ୟ ସୂଚନା ଦେଇଥିଲେ। ଦୀର୍ଘ ସମୟ ଧରି ବନ ବିଭାଗ କର୍ମଚାରୀ ଓ ଗ୍ରାମବାସୀଙ୍କ ଅକ୍ଲାନ୍ତ ପରିଶ୍ରମ ପରେ, ଦିନ ୧୧ଟା ୩୦ ମିନିଟ୍ ସମୟରେ ଭାଲୁ ଦୁଇଟିକୁ ଜନବସତିରୁ ବାହାରକୁ ଘଉଡ଼ାଇ ଦିଆଯାଇଥିଲା। ଏହି ଦୁଇଟି ଜଙ୍ଗଲୀ ଭାଲୁଙ୍କୁ ଜନବସତିରୁ ହଟାଇବା ପାଇଁ ବନ ବିଭାଗ କର୍ମଚାରୀଙ୍କୁ ନାକେଦମ୍ ହେବାକୁ ପଡ଼ିଥିଲା। ବନ ବିଭାଗ କର୍ମଚାରୀମାନେ ବର୍ତ୍ତମାନ ଚିକିଲି ଗ୍ରାମରେ ଡେରା ପକାଇ ଭାଲୁ ଉପରେ ନଜର ରଖିଛନ୍ତି। ତେବେ, ଭାଲୁ ପୁଣିଥରେ ଜନବସତି ମୁହାଁ ହେବାର ଆଶଙ୍କାକୁ ଏଡ଼ାଇ ଦିଆଯାଇପାରିବ ନାହିଁ।

ପାନୀୟ ଜଳ ସମସ୍ୟାର ସ୍ଥାୟୀ ସମାଧାନ ଦାବିରେ ବିଶ୍ଵନାଥପୁର-ଲାଞ୍ଜିଗଡ଼ ରାସ୍ତାର ନଙ୍ଗଲ ବେଡା ଠାରେ ସ୍ଥାନୀୟ ବାସିନ୍ଦା ବ୍ୟାପକ ରାସ୍ତା ରୋକ କରିଛନ୍ତି। ଦୀର୍ଘ ଦିନ ଧରି ପାଣି ଟୋପେ ପାଇଁ ଅସୁବିଧା ଭୋଗୁଥିବା ଅଞ୍ଚଳବାସୀ ଶେଷରେ ବାଧ୍ୟ ହୋଇ ରାଜପଥକୁ ଓହ୍ଲାଇଥିଲେ। ଏହି ରାସ୍ତା ଅବରୋଧ ଯୋଗୁଁ ବ୍ୟସ୍ତବହୁଳ ମାର୍ଗରେ ଗାଡ଼ି ମୋଟର ଚଳାଚଳ ସମ୍ପୂର୍ଣ୍ଣ ବାଧାପ୍ରାପ୍ତ ହେବା ସହ ରାସ୍ତାର ଉଭୟ ପାର୍ଶ୍ୱରେ ଅନେକ ଯାନବାହନ ଅଟକି ରହିଥିଲା। ଘଟଣା ସମ୍ପର୍କରେ ସୂଚନା ପାଇ ଲାଞ୍ଜିଗଡ଼ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ଶାନ୍ତ କରିବା ସହ ଆଇନ ଶୃଙ୍ଖଳା ପରିସ୍ଥିତି ଉପରେ ନଜର ରଖିଥିଲେ। ଏହା ସହିତ ଜଳ ଯୋଗାଣ ବିଭାଗର ଯନ୍ତ୍ରୀ ଦଶମନ୍ତ ମାଝୀ ମଧ୍ୟ ଘଟଣାସ୍ଥଳରେ ପହଞ୍ଚି ସମସ୍ୟାର ଶୀଘ୍ର ସମାଧାନ ପାଇଁ ପ୍ରତିଶ୍ରୁତି ଦେବା ସହ ବୁଝାସୁଝା କରିଥିଲେ। ତେବେ ସମସ୍ୟାର ସ୍ଥାୟୀ ପ୍ରତିକାର ନହେବା ପର୍ଯ୍ୟନ୍ତ ଆନ୍ଦୋଳନରୁ ହଟିବେ ନାହିଁ ବୋଲି ଜନସାଧାରଣ ଜିଦ ଧରିଥିଲେ। ପରେ ପ୍ରଶାସନର ଆଶ୍ୱାସନା ପରେ ରାସ୍ତା ଅବରୋଧ ହଟାଇ ଦିଆଯାଇଥିବା ସୂଚନା ମିଳିଛି।

ଭାଗୀରଥି ୟୁନିଭରସିଟି ଫର ଆଡଭାନ୍ସଡ ଲର୍ନିଂ ର ବକ୍ତା ବିରେନ୍ଦ୍ର ଦେବତା ସନାତନ ଚେତନାର ମୁଖ୍ୟ ତିନି ଦଣ୍ଡଧାରୀ – ମହାଶିବ, ମହାବିଷ୍ଣୁ ଏବଂ ମହାବୁଦ୍ଧଙ୍କ ମହାତତ୍ତ୍ୱ ଓ ମହାଚେତନାକୁ ଜାଗ୍ରତ କରିବା ଉପରେ ଗୁରୁତ୍ୱାରୋପ କରିଛନ୍ତି। ତାଙ୍କ ମତରେ, ଏହାଦ୍ୱାରା ଏକ ସମୃଦ୍ଧ ଏବଂ ବିକଶିତ ରାଜ୍ୟ ଗଠନ ହୋଇପାରିବ, ଯାହା ସମାଜର ସମସ୍ତ ବର୍ଗକୁ ସୁଖମୟ ସଂସାରର ମହାପ୍ରସାଦ ପ୍ରାପ୍ତ କରିବାକୁ ସକ୍ଷମ କରିବ। ସେ ଏହି ଗୁରୁତ୍ୱପୂର୍ଣ୍ଣ ବିଷୟ ଉପରେ ରାଜ୍ୟର ସମସ୍ତ ଶ୍ରୋତାଙ୍କୁ ଗଭୀର ଚିନ୍ତନ କରିବାକୁ ନିବେଦନ କରିଛନ୍ତି। ସେ ଆହୁରି ମଧ୍ୟ ପ୍ରସ୍ତାବ ଦେଇଛନ୍ତି ଯେ, ଜୁନ୍ ୨୧, ସେପ୍ଟେମ୍ବର ୨୧ ଏବଂ ଡିସେମ୍ବର ୨୧, ଯାହା ବିଭିନ୍ନ ଭାବରେ ଯୋଗ ଦିବସ ଭାବରେ ପାଳିତ ହୁଏ, ସେହି ଦିନମାନଙ୍କରେ ଏହି ବିଷୟର ଚେତନାକୁ ସମ୍ପୂର୍ଣ୍ଣ ଆୟାମ ଦିଆଯାଉ। ଏହି ଆଶା ଏବଂ ନମ୍ର ଭାବନା ସହିତ, ସେ ଅନୁରୋଧ କରିଛନ୍ତି ଯେ ସମସ୍ତ ଶିବ ମନ୍ଦିର କିଛି ଘଣ୍ଟା ପାଇଁ ହେଲେ ମଧ୍ୟ ଯୋଗ କେନ୍ଦ୍ରରେ ପରିଣତ ହେଉ।

କେନ୍ଦ୍ରାପଡ଼ା ଜିଲ୍ଲା ତିଖିରି ପଞ୍ଚାୟତର ମହିଳା ସରପଞ୍ଚଙ୍କ ପ୍ରତି ହୋଇଥିବା ଅନ୍ୟାୟ ଓ ଅତ୍ୟାଚାର ଘଟଣାକୁ ନେଇ ସାରା ରାଜ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଏହି କ୍ରମରେ ମାଲକାନଗିରି ଜିଲ୍ଲା ସରପଞ୍ଚ ସଂଘ ପକ୍ଷରୁ ଏକତ୍ରିତ ହୋଇ ଘଟଣାକୁ ଦୃଢ଼ ବିରୋଧ କରାଯାଇଛି। ସଂଘ ପକ୍ଷରୁ ମହାମହିମ ରାଜ୍ୟପାଳଙ୍କ ଉଦ୍ଦେଶ୍ୟରେ ମାଲକାନଗିରି ଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ସଂଘର କହିବା ଅନୁଯାୟୀ, ଜଣେ ମହିଳା ସରପଞ୍ଚ, ଯିଏ ଏକ ସାମ୍ବିଧାନିକ ପଦବୀରେ ଅଛନ୍ତି, ତାଙ୍କୁ ଯେଉଁଭଳି ଭାବେ ହଇରାଣ ହରକତ ଓ ମାନସିକ ନିର୍ଯାତନା ଦିଆଯାଇଛି, ତାହା ଅତ୍ୟନ୍ତ ଦୁଃଖଦାୟକ। ଏହାଦ୍ୱାରା ଜଣେ ଜନପ୍ରତିନିଧିଙ୍କ ମାନ-ମର୍ଯ୍ୟାଦା କ୍ଷୁଣ୍ଣ ହୋଇଛି ବୋଲି ସଂଘ ଅଭିଯୋଗ କରିଛି। ଏହି ଘଟଣାରେ ସମ୍ପୃକ୍ତ ସମସ୍ତ ଦୋଷୀଙ୍କୁ ତୁରନ୍ତ ଗିରଫ କରି କଠୋର ଦଣ୍ଡ ପ୍ରଦାନ କରିବାକୁ ସଂଘ ଦାବି କରିଛି। ଏହା ସହିତ ଯଦି କୌଣସି ବିଡିଓ କିମ୍ବା ଆଇଆଇସି (IIC) ଏହି ଘଟଣାରେ ସମ୍ପୃକ୍ତ ଥାଆନ୍ତି, ତେବେ ସେମାନଙ୍କ ବିରୋଧରେ ମଧ୍ୟ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରପଞ୍ଚ ସଂଘ ଦାବିପତ୍ରରେ ଉଲ୍ଲେଖ କରିଛି। ମାଲକାନଗିରି ଜିଲ୍ଲାର ସମସ୍ତ ସରପଞ୍ଚ ଏକ ସ୍ୱରରେ ଏହି ନିନ୍ଦନୀୟ ଘଟଣାର ପ୍ରତିବାଦ କରିଛନ୍ତି ଏବଂ ପୀଡ଼ିତାଙ୍କୁ ନ୍ୟାୟ ନମିଳିବା ପର୍ଯ୍ୟନ୍ତ ଏହି ଲଢ଼େଇ ଜାରି ରହିବ ବୋଲି ଚେତାବନୀ ଦେଇଛନ୍ତି।

ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ଠାରେ ରାଜ୍ୟ ସରକାରଙ୍କ ଦୁଇ ବର୍ଷ ପୂର୍ତ୍ତି ଅବସରରେ 'ବିକାଶ ର ଧାରା ଓଡିଶା ସାରା' କାର୍ଯ୍ୟକ୍ରମର ତୃତୀୟ ଦିବସ ସଫଳତାର ସହ ପାଳିତ ହୋଇଛି। ଏହି କାର୍ଯ୍ୟକ୍ରମ କୋଷାଗୁମୁଡ଼ାସ୍ଥିତ ପଞ୍ଚାୟତ ସମିତି କାର୍ଯ୍ୟାଳୟ ଏବଂ ବାଲେଙ୍ଗା ପଞ୍ଚାୟତ କାର୍ଯ୍ୟାଳୟ ଠାରେ ଅନୁଷ୍ଠିତ ହୋଇଥିଲା। ସରକାରଙ୍କ ଦୁଇ ବର୍ଷ ପୂର୍ତ୍ତି ଉପଲକ୍ଷେ ଆୟୋଜିତ ଏହି ସମ୍ମିଳନୀରେ ଗତ ଦୁଇ ବର୍ଷ ମଧ୍ୟରେ ଅଞ୍ଚଳରେ କାର୍ଯ୍ୟକାରୀ ହୋଇଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟର ବିସ୍ତୃତ ସମୀକ୍ଷା କରାଯାଇଥିଲା। ବିଶେଷ କରି ପାନୀୟଜଳ ଯୋଗାଣ, ଗ୍ରାମ୍ୟ ରାସ୍ତା ନିର୍ମାଣ ଏବଂ ଅନ୍ୟାନ୍ୟ ଜନକଲ୍ୟାଣ ପ୍ରକଳ୍ପର ଅଗ୍ରଗତି ଉପରେ ଆଲୋକପାତ କରାଯାଇଥିଲା। ଏହା ସହିତ ସ୍ଥାନୀୟ ଲୋକଙ୍କ ସମସ୍ୟାର ସମାଧାନ କରିବା ଏବଂ ଆଗାମୀ ଦିନ ପାଇଁ ନୂତନ ପ୍ରକଳ୍ପର ରୂପରେଖ ପ୍ରସ୍ତୁତ କରିବା ଉପରେ ଗୁରୁତ୍ୱ ଦିଆଯାଇଥିଲା। ବାଲେଙ୍ଗା ପଞ୍ଚାୟତ ଠାରେ ସାଂସଦ ପ୍ରତିନିଧି ସୁରେଶ ପାତ୍ର ଉପସ୍ଥିତ ଲୋକଙ୍କୁ ଚାଉଳ କାର୍ଡ ଏବଂ ଆବାସ ଘର ବଣ୍ଟନ କରିଥିଲେ। ଏହି କାର୍ଯ୍ୟକ୍ରମରେ ସ୍ଥାନୀୟ ସରପଞ୍ଚ ନୀଳଧର ଭତ୍ରା, ପିଇଓ ସତ୍ୟ ନାରାୟଣ, ଦୁର୍ଜନ ମିର୍ଗାନ, ଭୁବନେଶ୍ୱର ନାୟକ, ପଦ୍ମନ ନାୟକଙ୍କ ସମେତ ଅନେକ ସ୍ଥାନୀୟ ମାନ୍ୟଗଣ୍ୟ ବ୍ୟକ୍ତିବିଶେଷ, ସିଆରପି, ଏମ୍ବିକେ, ଏଏନଏମ୍, ଯୋଗାଣ ସହାୟକ ଏବଂ ଏସିଡିଓ ପ୍ରମୁଖ ଉପସ୍ଥିତ ଥିଲେ। ଶତାଧିକ ମହିଳା ଓ ପୁରୁଷ ଏହି କାର୍ଯ୍ୟକ୍ରମରେ ଭାଗ ନେଇଥିଲେ।