నాగర్‌కర్నూల్ మండలం కుమ్మెర గ్రామంలోని మండల ప్రజా పరిషత్ పాఠశాలలో, గద్వాల జిల్లాకు చెందిన వాత్సవులు రమేష్–అనురాధ దంపతులు తమ దాతృత్వాన్ని ప్రదర్శించారు. వారు పాఠశాల విద్యార్థుల కోసం స్కూల్ బ్యాగులు, పలకలు, నోట్‌బుక్స్, షూస్ వంటి 50 వేలు విలువచేసే విద్యా సామగ్రిని అందజేశారు. ఈ కార్యక్రమానికి ముఖ్య అతిథిగా హాజరైన నాగర్‌కర్నూల్ ఎంఈఓ కురుమయ్య చేతుల మీదుగా పాఠశాలలో చదువుతున్న 80 మంది పేద విద్యార్థులకు ఈ విద్యా సామగ్రిని పంపిణీ చేశారు. ఈ సందర్భంగా ఎంఈఓ కురుమయ్య మాట్లాడుతూ, విద్యార్థుల భవిష్యత్తు కోసం దాతలు ముందుకు వచ్చి సహాయం చేయడం అభినందనీయమన్నారు. విద్యార్థులు ఇలాంటి అవకాశాలను సద్వినియోగం చేసుకుని విద్యలో రాణించి జీవితంలో ఉన్నత స్థానాలకు చేరుకోవడంతో పాటు సమాజానికి, గ్రామానికి మంచి పేరు తీసుకురావాలని సూచించారు. ఈ కార్యక్రమంలో పాఠశాల ప్రధానోపాధ్యాయుడు వెంకటస్వామి, ఉపాధ్యాయులు శివ ప్రసాద్, అమరేందర్ రెడ్డి, ఎండి లతీఫ్, సత్యనారాయణతో పాటు గ్రామస్తులు కూడా పాల్గొన్నారు.

2 hrs ago

NAVADEEP

Nagarkurnool, Telangana•

2 hrs ago

నంద్యాల జిల్లాలోని నందికొట్కూరు మున్సిపాలిటీ 'పేరు గొప్ప ఊరు దిబ్బ' అన్న చందంగా ఉందని, గత 13 ఏళ్లుగా పాలకులు అభివృద్ధి చేయడంలో పూర్తిగా విఫలమయ్యారని సీపీఐ(ఎంఎల్) లిబరేషన్ పార్టీ జిల్లా కార్యదర్శి పిక్కిలి.వెంకటేశ్వర్లు తీవ్రంగా విమర్శించారు. నిలిసికారిపేట, శేషశనారెడ్డినగర్, గాంధీనగర్, వాల్మీకినగర్, వడ్డెపేట వంటి పలు కాలనీలలో ఐదు రోజులపాటు పాదయాత్ర నిర్వహించిన అనంతరం, సోమవారం నాడు నందికొట్కూరు మున్సిపల్ కార్యాలయం ఎదుట సీపీఐ(ఎంఎల్) లిబరేషన్ పార్టీ ఆధ్వర్యంలో ధర్నా చేపట్టారు. అనంతరం, మున్సిపల్ కమిషనర్ జి.వెంకటరామిరెడ్డికి సమస్యలతో కూడిన వినతిపత్రాన్ని సమర్పించారు. ఈ సందర్భంగా పిక్కిలి.వెంకటేశ్వర్లు మాట్లాడుతూ, నిలిసికారిపేటలో మంచినీరు, సీసీ రోడ్లు, డ్రైనేజీ సౌకర్యాలు లేక వర్షాకాలంలో మురికి కుంటలు ఏర్పడుతున్నాయని, వాటిలో పందులు విచ్చలవిడిగా తిరుగుతున్నాయని ఆవేదన వ్యక్తం చేశారు. అక్కడి పేద ప్రజలకు రేషన్ కార్డులు, ఆధార్ కార్డులు కూడా లేని పరిస్థితి ఉందని, భర్త చనిపోయిన ఒంటరి మహిళలకు, వృద్ధులకు పింఛన్లు అందడం లేదని తెలిపారు. అదేవిధంగా, శేషశనారెడ్డి నగర్, గాంధీనగర్, వాల్మీకి నగర్, వడ్డెపేట వంటి కాలనీలలో డ్రైనేజీ కాలువలు లేకపోవడం వల్ల నీరు రోడ్లపై నిలిచి ఇళ్లలోకి చేరే ప్రమాదం ఉందని, దుర్గంధం వెదజల్లి కాలుష్య వాతావరణం ఏర్పడి అంటువ్యాధులైన మలేరియా, డెంగ్యూ, కలరా, టైఫాయిడ్ వంటి రోగాలు ప్రబలే ప్రమాదం ఉందని హెచ్చరించారు. ముఖ్యమంత్రి చంద్రబాబు నాయుడు రాష్ట్రంలో పేదలను లేకుండా చేస్తానని, బంగారు కుటుంబాలను తయారు చేస్తానని, 'బి-ఫారం' కార్యక్రమం గురించి గొప్పలు చెప్పడం తప్ప, నిజమైన చిత్తశుద్ధి ఉంటే మున్సిపాలిటీకి దగ్గర్లోనే కటిక దారిద్ర్యంలో ఉన్న పేదలను 'బి-ఫారం'లో చేర్చుకునే పరిస్థితి లేదని ఎద్దేవా చేశారు. నందికొట్కూరు పట్టణంలో ఎవరిని 'బంగారు కుటుంబాలు'గా గుర్తిస్తున్నారో అర్థం కావడం లేదని ప్రశ్నించారు. పెంచిన పన్నులను తగ్గించాలని కూడా నిరసన వ్యక్తం చేశారు. ఈ సమస్యల పరిష్కారానికై ఎమ్మెల్యే, ఎంపీ, మున్సిపల్ కమిషనర్, తాసిల్దారు, ఎక్స్చేంజ్ అధికారులు ఆ కాలనీ ప్రజలను దత్తత తీసుకోవాలని పిక్కిలి.వెంకటేశ్వర్లు డిమాండ్ చేశారు. తక్షణమే డ్రైనేజీ కాలువలకు నిధులు మంజూరు చేసి, వాటిని ఏర్పాటు చేయాలని, నిలిసికారి కాలనీ ప్రజలకు ప్రతి కుటుంబానికి 35 కేజీల బియ్యం కార్డులు, వృద్ధాప్య, వితంతు పెన్షన్లు మంజూరు చేయాలని కోరారు. వ్యక్తిగత మరుగుదొడ్ల నిర్మాణానికి ₹50 వేలు కేటాయించాలని, ఇల్లు లేని నిరుపేదలందరికీ రెండు సెంట్ల స్థలం, గృహ నిర్మాణానికి ₹5 లక్షలు మంజూరు చేయాలని డిమాండ్ చేశారు. పట్టణంలో మౌలిక వసతులను తక్షణమే కల్పించాలని, కనీసం మున్సిపాలిటీ ద్వారా మంచినీరు కూడా తాగలేని పరిస్థితి ఉందని ఆవేదన వ్యక్తం చేశారు. అలగనూరు రిజర్వాయర్ ద్వారా ₹127 కోట్ల ప్రాజెక్టును త్వరగా పూర్తి చేసి పట్టణ ప్రజలకు మంచినీరు అందించాలని డిమాండ్ చేశారు. ఈ సమస్యలను పరిష్కరించకపోతే మున్సిపల్ కార్యాలయాన్ని ముట్టడిస్తామని హెచ్చరించారు. ఈ కార్యక్రమంలో నందికొట్కూరు మండల కార్యదర్శి కాటేపోగు.సామన్నతో పాటు పలువురు తాలూకా, జిల్లా నాయకులు, మహిళా సంఘం నాయకురాళ్లు, కాలనీ ప్రజలు పాల్గొన్నారు.

Naga kanth

బండి ఆత్మకూరు, నంద్యాల, ఆంధ్రప్రదేశ్•

4 hrs ago