ఆక్లాండ్‌లో నిర్వహించిన కమ్యూనిటీ కార్యక్రమంలో మరువలేని వాతావరణం నెలకొంది.

జగిత్యాల నియోజకవర్గంలో వివిధ కారణాలతో ఆసుపత్రిలో చికిత్స పొంది, వైద్య ఖర్చుల నిమిత్తం సీఎం సహాయ నిధి సాయం కోసం ఉమ్మడి కరీంనగర్ జిల్లా స్థానిక సంస్థల ఎమ్మెల్సీ ఎల్ రమణకు బాధితులు దరఖాస్తు చేసుకున్నారు. ఈ దరఖాస్తులపై సానుకూలంగా స్పందించిన ఎమ్మెల్సీ ఎల్ రమణ, సీఎం సహాయ నిధి నుండి మొత్తం 9 మంది లబ్ధిదారులకు ఆర్థిక సహాయం మంజూరు చేయించారు. దీనికి సంబంధించి మంజూరైన రూ. 1 లక్షల 50 వేల విలువ గల చెక్కులను శనివారం సాయంత్రం 6:30 గంటల ప్రాంతంలో జగిత్యాల జిల్లా కేంద్రంలోని తన క్యాంపు కార్యాలయంలో ఎమ్మెల్సీ ఎల్ రమణ లబ్ధిదారులకు అందజేశారు. ఈ చెక్కుల పంపిణీ కార్యక్రమంలో జగిత్యాల పట్టణ కౌన్సిలర్లు కోరుకంటి రాము, తోట హరీష్, మాజీ జడ్పీటీసీ కొలుముల రమణ, రాయికల్ మండలం ప్రధాన కార్యదర్శి కొండపల్కల రత్నాకర్ రావు పాల్గొన్నారు. వీరితో పాటు వొళ్ళాల గంగాధర్, గంగిపెల్లి వేణుమాధవ్, పెండేం గంగాధర్, చిరంజీవి, నందు నాయక్ తదితరులు ఈ కార్యక్రమంలో భాగస్వామ్యమయ్యారు.

రాజన్న సిరిసిల్ల జిల్లా కేంద్రంలో నిర్వహించిన విలేకరుల సమావేశంలో మాల మహానాడు అండ్ రాక్స్ నేషనల్ ప్రెసిడెంట్ డాక్టర్ ఆర్ ఎస్ రత్నాకర్ మాట్లాడారు. ఎస్సీ వర్గీకరణ పేరుతో దళితులపై దేశవ్యాప్తంగా రాజకీయ కుట్ర జరుగుతోందని ఆయన ఆరోపించారు. ఎస్సీ వర్గీకరణకు వ్యతిరేకంగా పార్లమెంట్‌లో చట్టం చేసేంత వరకు నిరంతరం శాంతియుత పోరాటం కొనసాగుతుందని ఆయన స్పష్టం చేశారు. మొట్టమొదటిసారిగా హర్యానా, పంజాబ్‌లలో కాంగ్రెస్ పార్టీ ప్రభుత్వం శాంపిల్‌గా ఎస్సీ వర్గీకరణకు బీజం వేస్తే, ప్రధాని మోడీ దానిని దేశవ్యాప్తం చేశారని రత్నాకర్ విమర్శించారు. ఎస్సీ రిజర్వేషన్ వల్ల వందలో ఒకరిద్దరికే ప్రయోజనం జరుగుతోందని, అది కూడా అధికారిక లెక్క కాదని అన్నారు. సమన్యాయం, సామాజిక న్యాయం పేరుతో దేశవ్యాప్తంగా ఎస్సీ జాబితాలో ఉన్న 1108 ఎస్సీ కులాలకు ప్రధాని మోడీ, అలాగే రెండు తెలుగు రాష్ట్రాల ముఖ్యమంత్రులు ఈ రిజర్వేషన్లను ఎలా పంచుతారో తెలపాలని ఆయన డిమాండ్ చేశారు. ఇది దళితుల ఐక్యతపై జరుగుతున్న కుట్ర కాదా అని ఆయన ప్రశ్నించారు. రెండు తెలుగు రాష్ట్రాల్లో మాల సామాజిక వర్గాన్ని టార్గెట్ చేస్తూ తొక్కుతుంటే మాల ప్రజాప్రతినిధులు నోరు మెదపకపోవడం అన్యాయమని రత్నాకర్ అన్నారు. మాలలు రాజకీయ పార్టీలకు విశ్వాసంగా ఉంటున్నారే తప్ప, తమ జాతి పట్ల విశ్వాసంగా లేరనే విషయాన్ని గమనించాలని ఆయన హితవు పలికారు.

తెలంగాణలో కాంగ్రెస్ ప్రభుత్వం వచ్చిన తర్వాత ఆటో డ్రైవర్ల బతుకులు ఆగమైపోయాయని ఆటో యూనియన్ ప్రతినిధులు తీవ్ర ఆవేదన వ్యక్తం చేశారు. ప్రభుత్వ ఉచిత బస్సు పథకం కారణంగా ఆటో డ్రైవర్ల జీవనోపాధి పూర్తిగా దెబ్బతిందని, కుటుంబాలను పోషించలేక డ్రైవర్లు ఆత్మహత్యలకు పాల్పడుతున్నారని మండిపడ్డారు. ఈ నేపథ్యంలో ప్రభుత్వ కళ్లు తెరిపించేందుకు ఆగస్టు నెలలో పెద్ద ఎత్తున ఆటోలు బంద్ చేసి, సమ్మెకు దిగాలని వారు తీర్మానించారు. హైదరాబాద్‌లోని తెలంగాణ భవన్‌లో రాష్ట్రంలోని 33 జిల్లాల ఆటో డ్రైవర్ల అధ్యక్ష, కార్యదర్శులతో రాష్ట్ర కార్యవర్గ సమావేశం నిర్వహించారు. ఈ సమావేశంలో పాల్గొన్న కరీంనగర్ ఆటో కార్మిక సంక్షేమ సంఘం యూనియన్ అధ్యక్షులు బొమ్మిడి శ్రీనివాస్ రెడ్డి ఆటో డ్రైవర్ల సమస్యలపై మాట్లాడారు. రాష్ట్ర ప్రభుత్వం తక్షణమే స్పందించి ప్రతి ఆటో డ్రైవర్‌కు 12 వేల రూపాయల ఆర్థిక సహాయం అందించాలని మరియు ఆటో డ్రైవర్ల కోసం ఒక ప్రత్యేక సంక్షేమ బోర్డును ఏర్పాటు చేయాలని డిమాండ్ చేశారు. దీంతో పాటు, ఉపాధి కోల్పోయి ఆత్మహత్యలు చేసుకున్న ఆటోడ్రైవర్ల కుటుంబాలకు 20 లక్షల రూపాయల చొప్పున ఆర్థిక సహాయం అందించాలని స్పష్టం చేశారు. అలాగే ఆర్టీవో ఆఫీసులో వాహనాల ఫిట్నెస్ పైన రేడియం వేస్తూ చేస్తున్న కాంట్రాక్టును తక్షణమే రద్దు చేయాలని డిమాండ్ చేస్తూ, ఆగస్టు నెలలో ఆటో డ్రైవర్లందరూ ఏకమై సమ్మెలో పాల్గొనాలని పిలుపునిచ్చారు.

కరీంనగర్ నియోజకవర్గ పరిధిలోని చర్ల బూత్కూరు గ్రామంలో ప్రత్యేక ఇంటెన్సివ్ రివిజన్ ఓటరు ప్రక్రియకు సంబంధించిన సహాయ కేంద్రాన్ని ప్రారంభించారు. మాజీ మంత్రి, కరీంనగర్ శాసనసభ్యుడు గంగుల కమలాకర్ పిలుపు మేరకు బూత్ ఇన్‌ఛార్జులు పెండ్యాల శ్యాంసుందర్ రెడ్డి, సుంకిశాల సంపత్ రావు ఈ కేంద్రాన్ని ప్రారంభించి, పరిశీలించారు. ఈ సందర్భంగా వారు మాట్లాడుతూ.. ఓటు హక్కు నమోదు ప్రక్రియకు సంబంధించి ఎలాంటి సమస్యలు ఉన్నా ఈ సహాయ కేంద్రంలో సంప్రదించి నివృత్తి చేసుకోవాలని కోరారు. ప్రతి ఒక్కరూ తమ ఓటు హక్కును వినియోగించుకునే విధంగా తప్పనిసరిగా ఓటు నమోదు చేసుకోవాలని పిలుపునిచ్చారు. ఈ కార్యక్రమంలో ఉప సర్పంచ్ మధుకర్, మాజీ ఎంపీటీసీ బుర్ర తిరుపతి గౌడ్, వార్డ్ మెంబర్ తప్పెట్ల నరేష్‌తో పాటు బీఎల్ఏలు, బీఎల్ఓలు పాల్గొన్నారు.

సిద్దిపేట జిల్లా బెజ్జంకి మండల పరిధిలోని తోటపల్లి రిజర్వాయర్‌లో ఇథనాల్ ఫ్యాక్టరీ నుంచి విడుదలవుతున్న వ్యర్థాలు కలవడం వల్ల చేప పిల్లలు మృతి చెందుతున్నాయని బీఆర్‌ఎస్ పార్టీ మాజీ మండల అధ్యక్షుడు పాకాల మహిపాల్రెడ్డి ఆవేదన వ్యక్తం చేశారు. వ్యవసాయానికి, మత్స్యకారుల జీవనాధారానికి ఎంతో కీలకమైన తోటపల్లి రిజర్వాయర్ను కాలుష్యానికి గురిచేయడం సరికాదని ఆయన శనివారం అన్నారు. కలుషితమైన ఈ నీటిని పంటలకు ఉపయోగించడం వల్ల భూముల సారవంతం తగ్గే ప్రమాదం ఉందని, అలాగే పశువుల ఆరోగ్యంపై ప్రతికూల ప్రభావం పడే అవకాశం ఉందని ఆయన ఆందోళన వ్యక్తం చేశారు. ప్రభుత్వం వెంటనే ఈ ఘటనపై సమగ్ర విచారణ జరిపి, రిజర్వాయర్లోకి వ్యర్థ జలాలు చేరకుండా కఠిన చర్యలు తీసుకోవాలని డిమాండ్ చేశారు. బాధితులైన రైతులు, మత్స్యకారులకు జరిగిన నష్టాన్ని అంచనా వేసి తగిన పరిహారం అందించాలన్నారు. ప్రజా సమస్యలపై నిరసనగా బెజ్జంకి తహశీల్దార్ కార్యాలయం ఎదుట నిర్వహించే ధర్నా కార్యక్రమాన్ని విజయవంతం చేయాలని ఈ సందర్భంగా ఆయన పిలుపునిచ్చారు. ఈ కార్యక్రమంలో బెజ్జంకి సర్పంచ్ బొల్లం శ్రీధర్, నాయకులు లింగాల లక్ష్మణ్, ఉప సర్పంచ్ దుమాల మహేష్, వంగల నరేష్, వార్డు సభ్యులు తిప్పరపు మహేష్, పొట్లపెల్లి శివ, రామంచ పర్శరాములు తదితరులు పాల్గొన్నారు.

వడ్లను లారీల కొద్దీ యథేచ్ఛగా అక్రమంగా అమ్ముకుంటున్నా అధికారులు, కాంగ్రెస్ ప్రభుత్వం ఏమీ పట్టించుకోకపోవడంపై తీవ్ర ఆగ్రహం వ్యక్తమవుతోంది. ధాన్యపు కొనుగోలు కేంద్రాలు ముగిసి నెల రోజులు గడుస్తున్నా, వరి ధాన్యం ఎక్కడికి తరలిపోతుందనే అంశంపై ఎటువంటి నిఘా లేకపోవడంపై ప్రశ్నలు వెల్లువెత్తుతున్నాయి. చెక్ పోస్టులలో కనీస తనిఖీలు కూడా నిర్వహించకపోవడం అధికారుల అండదండలతోనే ఈ అక్రమాలు జరుగుతున్నాయనడానికి నిదర్శనమని ఆరోపిస్తున్నారు. ఈ వరి ధాన్యం కుంభకోణానికి బాధ్యత వహిస్తూ ప్రభుత్వ విప్ ఆది శ్రీనివాస్, సిరిసిల్ల ఎమ్మెల్యే కేటీఆర్ తమ పదవులకు తక్షణమే రాజీనామా చేయాలని డిమాండ్ చేస్తున్నారు. ఇంత జరుగుతున్నా రైస్ మిల్లర్లపై ఎలాంటి చర్యలు తీసుకోకపోవడం వెనుక పెద్ద కుట్ర దాగి ఉందని, రైస్ మిల్లర్లు, అధికారులు, బడా నేతలు కుమ్మక్కై ప్రజాధనాన్ని యథేచ్ఛగా లూటీ చేస్తున్నారని ఆగ్రహం వ్యక్తమవుతోంది. లారీల కొద్దీ వడ్లను అక్రమంగా అమ్ముకుంటుంటే అధికారులు, కాంగ్రెస్ ప్రభుత్వం గుడ్డి గుర్రాల పండ్లు తోముతున్నారా అని ఘాటుగా ప్రశ్నిస్తున్నారు.

న్యూజిలాండ్‌లో పీఎం మోదీ పట్ల వ్యక్తమైన ఆప్యాయత, ఆత్మీయత మరియు గౌరవం నేడు భారతదేశ గుర్తింపు కేవలం దాని శక్తితోనే కాకుండా, దాని విశ్వసనీయమైన నాయకత్వం వల్ల కూడా ఏర్పడుతోందనడానికి స్పష్టమైన నిదర్శనంగా నిలిచింది. నాయకత్వంపై నమ్మకం ఉన్నప్పుడు, సంబంధాలు కేవలం అధికారికంగా కాకుండా ఎంతో ఆత్మీయమైనవిగా మారుతాయని ఈ పరిణామం స్పష్టం చేస్తోంది.

రాజన్న సిరిసిల్ల జిల్లా రుద్రంగి మండల కేంద్రంలో వర్షాలు సమృద్ధిగా కురవాలనే నమ్మకంతో గ్రామస్తులు ఒక వింత ఆచారాన్ని ఘనంగా నిర్వహించారు. గ్రామంలో దరిద్ర దేవతగా భావించే "జెట్టక్క"ను గ్రామం నుంచి తరిమికొడితే, లక్ష్మీదేవి ప్రవేశించి సమృద్ధిగా వర్షాలు కురుస్తాయని ఇక్కడి ప్రజల నమ్మకం. ఈ విశ్వాసంతో ఆదివారం నాడు గ్రామంలోని అన్ని కుల సంఘాల సభ్యులు, పెద్దలు, మహిళలు, యువకులు కలిసి జెట్టక్కను గ్రామం వెలుపలికి సాగనంపే కార్యక్రమం చేపట్టారు. గ్రామ సర్పంచ్ గండి నారాయణ, మార్కెట్ కమిటీ చైర్మన్ చెలుకల తిరుపతి మాట్లాడుతూ.. వర్షాకాలం ప్రారంభమై చాలాకాలం గడిచినా ఆశించిన స్థాయిలో వర్షాలు కురవకపోవడంతో ఈ సంప్రదాయ కార్యక్రమాన్ని నిర్వహిస్తున్నట్లు తెలిపారు. గ్రామంలోని అశుభాన్ని సూచించే జెట్టక్కను బయటకు పంపితే, లక్ష్మీదేవి వచ్చి ఐశ్వర్యంతో పాటు సమృద్ధిగా వర్షాలు కురిపిస్తుందని పెద్దల నుంచి వస్తున్న నమ్మకమని వారు వివరించారు. ఈ సందర్భంగా ప్రజలు తమ ఇళ్లలోని పాత బట్టలు, చీపురు కట్టలు, చాటలు, పనికిరాని వస్తువులను ట్రాక్టర్లలో వేసి డప్పుల మోతలు, నృత్యాల మధ్య భారీ ఊరేగింపుగా గ్రామ శివారుకు తీసుకెళ్లి పడేశారు. జెట్టక్క వెళ్లిపోయి, లక్ష్మీదేవి ప్రవేశించి చెరువులు నిండాలని, రైతుల పాడిపంటలు పుష్కలంగా పండాలని గ్రామస్థులు కోరుకున్నారు. అవసరమైతే వర్షాల కోసం కప్పతల్లి ఆట, వరుణ యాగం వంటి ఇతర సంప్రదాయాలను కూడా నిర్వహిస్తామని పేర్కొన్నారు. శాస్త్రీయ ఆధారాలు లేకపోయినా, ఈ ఆచారం రుద్రంగి ప్రజల సామూహిక ఐక్యతకు, సంస్కృతికి ప్రతీకగా నిలుస్తోంది.

కరీంనగర్‌లో ఇస్కాన్ ఆధ్వర్యంలో ఈనెల 16వ తేదీన నిర్వహించబోయే శ్రీ జగన్నాథ రథయాత్ర మహోత్సవ కార్యక్రమానికి హాజరుకావాలని మాజీమంత్రి, కరీంనగర్ శాసనసభ్యులు గంగుల కమలాకర్‌ను కమిటీ ప్రతినిధులు ఆహ్వానించారు. ఎమ్మెల్యే గంగుల నివాసంలో జరిగిన ఈ కార్యక్రమంలో, ఆయన చేతుల మీదుగా ఈ ఉత్సవానికి సంబంధించిన పోస్టర్‌ను ఆవిష్కరించారు. ఈ కార్యక్రమంలో ఎమ్మెల్యే గంగుల వెంట నగర బిఆర్ఎస్ అధ్యక్షులు చల్ల హరి శంకర్, మాజీ మేయర్ సర్ధార్ రవీందర్ సింగ్, కార్పొరేటర్ గుగ్గిళ్ళ జయశ్రీ శ్రీనివాస్, వైద్యులు రాజ భాస్కర్ రెడ్డి, ఎస్ ఆర్ కళాశాల మాజీ ప్రిన్సిపాల్ బుర్ర మధుసూదన్ రెడ్డి, రమేష్ రెడ్డి, అనంతరెడ్డి తదితరులు పాల్గొన్నారు.