కొమరం భీం ఆసిఫాబాద్ జిల్లాలో ప్రతి సోమవారం నిర్వహించే ప్రజావాణి కార్యక్రమంలో ప్రజల నుండి స్వీకరించిన దరఖాస్తులను నిర్ణీత గడువులోగా తప్పనిసరిగా పరిష్కరించాలని అదనపు కలెక్టర్ (రెవెన్యూ) ఎమ్. డేవిడ్ అధికారులను ఆదేశించారు. ఈ ఆదేశాలు శుక్రవారం కలెక్టరేట్ సమావేశ మందిరంలో ప్రజావాణి దరఖాస్తుల నమోదు, పరిశీలన, గణక యంత్ర నమోదు మరియు శిక్షణపై నిర్వహించిన సమీక్షా సమావేశంలో ఇవ్వబడ్డాయి. జిల్లా, విభాగ, మండల స్థాయిల్లో వచ్చే దరఖాస్తులను సంబంధిత శాఖల అధికారులు క్షుణ్ణంగా పరిశీలించి, బాధితులకు అర్థమయ్యే రీతిలో సత్వరమే సమాధానం ఇవ్వాలని అదనపు కలెక్టర్ స్పష్టం చేశారు. ప్రజావాణి కార్యక్రమానికి అన్ని శాఖల అధికారులు తప్పనిసరిగా హాజరు కావాలని ఆయన హెచ్చరించారు. దరఖాస్తుల నమోదు ప్రక్రియ మరియు పురోగతిని సాంకేతిక సమర్పణ ద్వారా సమావేశంలో వివరించారు. ఈ సమావేశంలో జిల్లా అధికారులు, తహసీల్దార్లు, మండల అభివృద్ధి అధికారులు, విభాగ సహాయకులు, గణక యంత్ర నిర్వాహకులు మరియు కలెక్టరేట్ సిబ్బంది పాల్గొన్నారు.

11 hrs ago

Krishna

ఆసిఫాబాద్, కుమురం భీమ్ ఆసిఫాబాద్, తెలంగాణ•

11 hrs ago

తెలంగాణలో రేవంత్ సర్కార్ పగ్గాలు చేపట్టి రెండున్నర సంవత్సరాలు దాటుతున్నా, ఇచ్చిన హామీలను అమలు చేయడంలో నిర్లక్ష్యం వహిస్తోందని రైతు జేఏసీ అధ్యక్షులు పోలాడి రామారావు డిమాండ్ చేశారు. కరీంనగర్‌లో ప్రజా సంఘాల నాయకులతో కలిసి శుక్రవారం మీడియా సమావేశంలో ఆయన మాట్లాడుతూ, ప్రభుత్వం తక్షణమే హామీలను అమలు చేయాలని స్పష్టం చేశారు. రైతులకు అన్ని పంటలకు ₹500 బోనస్ ఇస్తామని మాట తప్పిందని, రైతు కూలీలకు ₹12,000, కౌలు రైతులకు ₹15,000 ఇస్తామన్న డబ్బుల ఊసే లేదని రామారావు ఆరోపించారు. రుణమాఫీని అరకొరగా చేసి వదిలేసిందని, ఇప్పటికే రెండు విడతల భరోసా నిధులను ఎగ్గొట్టిన సర్కార్, యాసంగి సీజన్ ముగిసినా కంటి తుడుపుగా కేవలం రెండు ఎకరాలకు మాత్రమే భరోసా డబ్బులు ఇచ్చి, 80 శాతం నిధులను విడుదల చేయక చేతులెత్తేసిందని ఆయన పేర్కొన్నారు. ఖరీఫ్ సీజన్ మొదలై రైతులు ముమ్మరంగా సాగు పనులు చేస్తుండగా, ఖరీఫ్ రైతు భరోసా నిధుల విడుదలపై ఎలాంటి ప్రకటన చేయకపోవడంతో అన్నదాతల్లో ఆందోళన మొదలైందని తెలిపారు. ధాన్యం కొనుగోళ్లలో కొనుగోలు కేంద్రాల్లో 40 రోజులు జాప్యం చేసి రైతులను తీవ్ర ఇబ్బందులకు గురి చేసి, ప్రైవేట్ దళారులకు మేలు చేసిందని విమర్శించారు. తరుగు, రవాణా పేరుతో రైతుల నుంచి ₹1,200 కోట్ల రూపాయలను నిలువు దోపిడీ చేసిందని ఆరోపించారు. ఎరువుల పంపిణీలో యాప్ పేరుతో రైతులను దగా చేస్తోందని, విద్యుత్ పంపిణీ రంగాన్ని ప్రైవేట్ పరం చేయడానికి రంగం సిద్ధం చేస్తోందని పోలాడి రామారావు అన్నారు. రెవెన్యూ రంగంలో జవాబుదారీతనం లేకపోవడం వల్ల సామాన్యులు ఇక్కట్ల పాలవుతున్నారని ఆవేదన వ్యక్తం చేశారు. రైతుల సహకార సంఘాల్లో నామినేషన్ పద్ధతి దారుణమని, రైతుల నీటి వినియోగదారుల వ్యవస్థను మూలన పడేశారని ఆయన పేర్కొన్నారు. నిరుద్యోగులకు ఇచ్చిన హామీల అమలుపై కనీస దృష్టి పెట్టకుండా మూలన పడేశారని కూడా విమర్శించారు. తమ డిమాండ్ల సాధనకు కరీంనగర్‌లో తలపెట్టిన రైతు సమర భేరిని విజయవంతం చేయాలని పోలాడి రామారావు పిలుపునిచ్చారు. త్వరలో లక్షలాది మందితో పార్టీలకు అతీతంగా నిర్వహించే రాష్ట్ర స్థాయి రైతు మహాగర్జన సమర భేరి సభ ద్వారా ప్రభుత్వం యొక్క నిర్లక్ష్యాన్ని ఎండగట్టి ప్రశ్నిస్తామని, డిమాండ్లను ముందుంచి ప్రభుత్వంపై సమర రణ భేరి గర్జన మోగించి కళ్ళు తెరిపిస్తామని ఆయన స్పష్టం చేశారు. ప్రభుత్వం ఎన్ని అడ్డంకులు సృష్టించినా వెనక్కి తగ్గేదే లేదని, ఇచ్చిన హామీలను అమలు చేసే వరకు తెలంగాణ ఉద్యమ తరహాలో ప్రభుత్వాన్ని గుక్క తిప్పుకోకుండా ఉద్యమిస్తామని రామారావు పునరుద్ఘాటించారు. ఈ కార్యక్రమంలో కరివేద సుధాకర్ రెడ్డి, కొత్తకొండ రవీందర్ రావు, అండెం రమణారెడ్డి, విక్రమసింహా రావు, సంపత్ రెడ్డి, జిల్లా అంజయ్య తదితర ప్రజా సంఘాల నాయకులు పాల్గొన్నారు.

శాతవాహన కరీంనగర్

కరీంనగర్ రూరల్, కరీంనగర్, తెలంగాణ•

13 hrs ago