दिंडोरी-सुरगाणा परिसरात भूकंपाच्या सौम्य हालचाली; घाबरू नका, परिस्थितीवर २४x७ लक्ष नाशिक : प्रतिनिधी राष्ट्रीय भूकंप विज्ञान केंद्र (NCS) आणि पृथ्वी विज्ञान मंत्रालयाच्या प्राथमिक अहवालानुसार, नाशिक जिल्ह्यातील दिंडोरी तालुक्याच्या परिसरात २५ जुलैपासून भूकंपाच्या सौम्य हालचाली नोंदविण्यात आल्या आहेत. सुरगाणा आणि दिंडोरी तालुक्यांमध्ये नागरिकांना काही धक्के जाणवल्याची माहिती समोर आली आहे. २९ जुलै रोजी सायंकाळी ६ वाजेपर्यंत एकूण नऊ भूकंपांची नोंद झाली असून त्यांची तीव्रता रिक्टर स्केलवर २.८ ते ३.९ इतकी होती. यापैकी सात धक्के ३.० किंवा त्यापेक्षा अधिक तीव्रतेचे होते. सर्वाधिक तीव्रतेचा ३.९ रिश्टर स्केलचा धक्का २८ जुलै रोजी दुपारी ३.२७ वाजता नोंदविण्यात आला. तज्ज्ञांच्या माहितीनुसार, ही घटना 'भूकंप समूह' (Earthquake Swarm) या प्रकारातील असून, कमी कालावधीत अनेक सौम्य धक्के जाणवतात; मात्र त्यामध्ये एक मोठा मुख्य भूकंप असतोच असे नाही. या धक्क्यांची खोली सुमारे १० किलोमीटर किंवा त्यापेक्षा कमी असल्याने जमिनीखालून गडगडाटासारखा आवाजही ऐकू येऊ शकतो. भारतीय मानक ब्युरोच्या (BIS) भूकंप विभागणी नकाशानुसार नाशिक जिल्हा भूकंप क्षेत्र-३ (Seismic Zone III) मध्ये येतो. सन १९०० ते २०२६ या कालावधीत या भागात ५.० रिश्टर स्केलपेक्षा मोठा भूकंप नोंदविण्यात आलेला नाही. या कालावधीतील सर्वाधिक तीव्रतेचा भूकंप २६ फेब्रुवारी १९८६ रोजी ४.३ रिश्टर स्केलचा होता. भूकंपाचे नेमके ठिकाण, वेळ आणि तीव्रता याचा अचूक अंदाज सध्याच्या तंत्रज्ञानाद्वारे वर्तविणे शक्य नसल्याचे NCS ने स्पष्ट केले आहे. नाशिक वेधशाळेसह महाराष्ट्रातील सर्व भूकंप निरीक्षण केंद्रे या हालचालींवर २४ तास लक्ष ठेवून असून नागरिकांनी अफवांवर विश्वास न ठेवता अधिकृत माहितीलाच प्राधान्य द्यावे, असे आवाहन करण्यात आले आहे. तसेच संभाव्य हानी टाळण्यासाठी इमारती भारतीय मानक ब्युरोच्या निकषांनुसार बांधणे आवश्यक असल्याचेही अहवालात नमूद करण्यात आले आहे.

Anil GUNJAL

नाशिक, नाशिक, महाराष्ट्र•

19 hrs ago

दिंडोरी-सुरगाणा परिसरात भूकंपाच्या सौम्य हालचाली; घाबरू नका, परिस्थितीवर २४x७ लक्ष नाशिक : प्रतिनिधी राष्ट्रीय भूकंप विज्ञान केंद्र (NCS) आणि पृथ्वी विज्ञान मंत्रालयाच्या प्राथमिक अहवालानुसार, नाशिक जिल्ह्यातील दिंडोरी तालुक्याच्या परिसरात २५ जुलैपासून भूकंपाच्या सौम्य हालचाली नोंदविण्यात आल्या आहेत. सुरगाणा आणि दिंडोरी तालुक्यांमध्ये नागरिकांना काही धक्के जाणवल्याची माहिती समोर आली आहे. २९ जुलै रोजी सायंकाळी ६ वाजेपर्यंत एकूण नऊ भूकंपांची नोंद झाली असून त्यांची तीव्रता रिक्टर स्केलवर २.८ ते ३.९ इतकी होती. यापैकी सात धक्के ३.० किंवा त्यापेक्षा अधिक तीव्रतेचे होते. सर्वाधिक तीव्रतेचा ३.९ रिश्टर स्केलचा धक्का २८ जुलै रोजी दुपारी ३.२७ वाजता नोंदविण्यात आला. तज्ज्ञांच्या माहितीनुसार, ही घटना 'भूकंप समूह' (Earthquake Swarm) या प्रकारातील असून, कमी कालावधीत अनेक सौम्य धक्के जाणवतात; मात्र त्यामध्ये एक मोठा मुख्य भूकंप असतोच असे नाही. या धक्क्यांची खोली सुमारे

१० किलोमीटर किंवा त्यापेक्षा कमी असल्याने जमिनीखालून गडगडाटासारखा आवाजही ऐकू येऊ शकतो. भारतीय मानक ब्युरोच्या (BIS) भूकंप विभागणी नकाशानुसार नाशिक जिल्हा भूकंप क्षेत्र-३ (Seismic Zone III) मध्ये येतो. सन १९०० ते २०२६ या कालावधीत या भागात ५.० रिश्टर स्केलपेक्षा मोठा भूकंप नोंदविण्यात आलेला नाही. या कालावधीतील सर्वाधिक तीव्रतेचा भूकंप २६ फेब्रुवारी १९८६ रोजी ४.३ रिश्टर स्केलचा होता. भूकंपाचे नेमके ठिकाण, वेळ आणि तीव्रता याचा अचूक अंदाज सध्याच्या तंत्रज्ञानाद्वारे वर्तविणे शक्य नसल्याचे NCS ने स्पष्ट केले आहे. नाशिक वेधशाळेसह महाराष्ट्रातील सर्व भूकंप निरीक्षण केंद्रे या हालचालींवर २४ तास लक्ष ठेवून असून नागरिकांनी अफवांवर विश्वास न ठेवता अधिकृत माहितीलाच प्राधान्य द्यावे, असे आवाहन करण्यात आले आहे. तसेच संभाव्य हानी टाळण्यासाठी इमारती भारतीय मानक ब्युरोच्या निकषांनुसार बांधणे आवश्यक असल्याचेही अहवालात नमूद करण्यात आले आहे.