મધ્ય ગુજરાત માટે યોજાયેલી વાઇબ્રન્ટ ગુજરાત રિજનલ કોન્ફરન્સ (VGRC) ના સંદર્ભમાં, વડોદરા સ્થિત કોનમેટ હેવી ઈન્ડસ્ટ્રીઝ પ્રાઈવેટ લિમિટેડ (CHIPL) ભારતની અગ્રણી બાંધકામ સાધનોના ઉત્પાદકોમાંની એક તરીકે ઉભરી આવી છે. આ કંપની 25 કરતાં વધુ દેશોમાં પોતાની વૈશ્વિક હાજરી ધરાવે છે અને અદ્યતન કોંક્રિટ સાધનો જેવા કે બેચિંગ પ્લાન્ટ્સ, પેવિંગ મશીન્સ, ટ્રાન્ઝિટ મિક્સર્સ, સેલ્ફ-લોડિંગ મિક્સર્સ અને કોંક્રિટ પમ્પ્સની ડિઝાઇન, વિકાસ અને ઉત્પાદન માટે વૈશ્વિક સ્તરે જાણીતી છે. કોનમેટના સાધનોએ વિશ્વના અનેક પ્રતિષ્ઠિત પ્રોજેક્ટ્સમાં પોતાનું યોગદાન આપ્યું છે, જેમાં સ્ટેચ્યુ ઓફ યુનિટી, સુરત ડાયમંડ બુર્સ અને બુલેટ ટ્રેન પ્રોજેક્ટનો સમાવેશ થાય છે. આજે, આ કંપની ભારતની સતત વિકસતી મેન્યુફેક્ચરિંગ ક્ષમતાના એક ગૌરવપૂર્ણ ઉદાહરણ તરીકે ઊભી છે.

આણંદ શહેરમાં આવેલા ગુજરાતી ચોક વિસ્તારમાં સ્વચ્છતાના નિયમોનું ઉલ્લંઘન કરવા બદલ વિવિધ એકમોને દંડ ફટકારવામાં આવ્યો છે.

બોરસદ ટાઉન પોલીસે દારૂની હેરાફેરી કરતા બે શખ્સોને ઝડપી પાડ્યા છે. આ શખ્સો ગાડીની સીટ નીચે ગુપ્તખાનું બનાવીને દારૂની હેરાફેરી કરતા હતા, જે દરમિયાન પોલીસ કાર્યવાહીમાં તેઓ પકડાઈ ગયા હતા. પોલીસે તેમની પાસેથી કુલ ₹5.53 લાખનો મુદ્દામાલ કબજે કર્યો છે.

અમદાવાદ જિલ્લાના વિરમગામમાં ગાંજાના જથ્થા સાથે એક વૃદ્ધ શખ્સની ધરપકડ કરવામાં આવી છે. આ વૃદ્ધ શખ્સ પાસેથી ગાંજાનો જથ્થો મળી આવતા, તેની સામે નાર્કોટિક ડ્રગ્સ એન્ડ સાયકોટ્રોપિક સબસ્ટન્સિસ (NDPS) એક્ટ હેઠળ ગુનો નોંધી કાયદેસરની કાર્યવાહી શરૂ કરવામાં આવી છે.

વધતા જતા મેડિકલ ખર્ચના કારણે ગરીબ અને મધ્યમ વર્ગ માટે સારી તબીબી સેવા મેળવવી મુશ્કેલ બની ગઈ છે. આ સ્થિતિમાં, અમદાવાદ રંગરેજ જમાઅત વેલફેર કમિટીએ માનવતાની ફરજ નિભાવવા માટે એક સરાહનીય પહેલ કરી છે. કમિટી અને અમદાવાદ મલ્ટિસ્પેશિયાલિટી હોસ્પિટલના સહયોગથી અમદાવાદના બેરલ માર્કેટ વિસ્તારમાં એક ભવ્ય 'મેગા ફ્રી હેલ્થ ચેક-અપ કેમ્પ'નું આયોજન કરવામાં આવ્યું હતું, જેણે સેંકડો લોકોને રાહત આપીને સમાજ સેવાનું નવું ઉદાહરણ પૂરું પાડ્યું છે. અમદાવાદના બેરલ માર્કેટમાં આવેલી અલહબીબ સોસાયટી, પ્લોટ નંબર 5-8, એટલે કે રંગરેજ જમાઅત હોલ, રવિવારની સવારથી જ એક મિની હોસ્પિટલમાં પરિવર્તિત થઈ ગયો હતો. આ ફ્રી મેડિકલ કેમ્પમાં અમદાવાદ મલ્ટિસ્પેશિયાલિટી હોસ્પિટલના સિનિયર અને નિષ્ણાત ડોકટરોની ટીમે પોતાની સેવાઓ પૂરી પાડી હતી. શિબિરમાં આવેલા સેંકડો નાગરિકોની ઈસીજી, બ્લડ પ્રેશર, સુગર સહિત અનેક ગંભીર બીમારીઓની મફત તપાસ કરવામાં આવી હતી અને તેમને ઉચ્ચ ગુણવત્તાવાળી દવાઓ પણ બિલકુલ મફત વહેંચવામાં આવી હતી. આ સમગ્ર મહા-આયોજનને સફળ બનાવવા અને વ્યવસ્થા જાળવી રાખવા માટે કમિટીની સંપૂર્ણ કોર-ટીમ જમીન પર હાજર રહી હતી. કાર્યક્રમમાં મુખ્યત્વે સંસ્થાના ચેરમેન હાજી ઇકબાલ સાહેબ, સેક્રેટરી મોહમ્મદ ચાંદખા જી, જોઈન્ટ સેક્રેટરી હાજી ઉસ્માન સાહેબ, સામાજિક કાર્યકર્તા અનીશ ખાન પઠાણ જી અને માઈનોરિટી ચેરમેન પપ્પુ ભાઈ ઉપસ્થિત રહ્યા હતા. આ તમામ મહાનુભાવો સાથે કમિટીના દરેક સભ્યએ સુનિશ્ચિત કર્યું કે કેમ્પમાં આવતા કોઈ પણ વૃદ્ધ, મહિલા કે બાળકને તકલીફનો સામનો ન કરવો પડે. આ સફળ મેડિકલ કેમ્પ પછી રંગરેજ જમાઅત વેલફેર કમિટીએ વિસ્તારની જનતાને વધુ એક મોટી ભેટ આપવાની જાહેરાત કરી છે. કમિટીના ચેરમેન હાજી ઇકબાલ અને સેક્રેટરી મોહમ્મદ ચાંદખાએ સ્પષ્ટ કર્યું છે કે આ તો ફક્ત શરૂઆત છે. આવનારા દિવસોમાં આ જ રંગરેજ જમાઅત હોલમાં કેન્દ્ર અને રાજ્ય સરકારની તમામ જનકલ્યાણકારી યોજનાઓ, જેવી કે આયુષ્માન ભારત, શ્રમિક કાર્ડ અને પેન્શન યોજનાઓનો સીધો લાભ અપાવવા માટે એક વધુ 'મહા-કેમ્પ'નું આયોજન કરવામાં આવશે, જેથી ગરીબોને કાર્યાલયોના ધક્કા ખાધા વિના તેમનો હક મળી શકે. જનતાના હિતમાં ઉઠાવવામાં આવેલા આ પગલા માટે સંપૂર્ણ રંગરેજ જમાઅત વેલફેર કમિટી અને હોસ્પિટલની ટીમ અભિનંદનને પાત્ર છે.

આણંદ જિલ્લાના પેટલાદમાં 100મી ઐતિહાસિક રથયાત્રાનું આયોજન કરવામાં આવ્યું હતું.

વડોદરા શહેરના ઐતિહાસિક અને હેરિટેજ મહત્વ ધરાવતા માંડવી હેરિટેજ સંબંધિત વિવિધ મુદ્દાઓ અંગે માહિતી મેળવવા માટે, વિઠ્ઠલ મંદિરના પૂજારી શ્રી હરિ ઓમ વ્યાસ મહારાજ દ્વારા આજે, સોમવાર, 22-06-2026 ના રોજ વડોદરા મહાનગરપાલિકાની મુખ્ય કચેરી, ખંડેરાવ માર્કેટ ખાતે માહિતીના અધિકાર અધિનિયમ (RTI) હેઠળ અરજી કરવામાં આવી છે.

આજ ભારતના દરિયાઈ ક્ષેત્ર માટે અત્યંત ગર્વનો દિવસ છે, જ્યાં INS દુનાગિરી, INS સંશોધક અને INS અગ્રેનું કમિશનિંગ કરવામાં આવ્યું. આ મહત્વપૂર્ણ કમિશનિંગ દેશની સતત વધતી જતી નૌકા ક્ષમતાઓ તેમજ આત્મનિર્ભર ભારતની શક્તિ અને પ્રગતિને સ્પષ્ટપણે પ્રતિબિંબિત કરે છે.

આણંદ જિલ્લાના તારાપુર તાલુકાના ચાંગડા ગામની સીમમાં આવેલા એક ગોડાઉનમાં ભીષણ આગ ફાટી નીકળી હતી, જેમાં એક ખેડૂતને લાખો રૂપિયાનું મોટું નુકસાન થયું છે. સ્થાનિક સૂત્રો દ્વારા મળતી માહિતી અનુસાર, ચાંગડા ગામના સીમ વિસ્તારમાં આવેલા ચતુરભાઈ શિવાભાઈ વાટલિયાના ગોડાઉનમાં અગમ્ય કારણોસર અચાનક આગ લાગી હતી. આ આગે એટલું વિકરાળ સ્વરૂપ ધારણ કરી લીધું હતું કે ગોડાઉનમાં પાર્ક કરેલા બે ટ્રેક્ટરના ટ્રેલર, ઘાસના ગંઠા બાંધવાનું એક બેલર મશીન અને એક ઓલા (Ola) ઇલેક્ટ્રિક બાઇક તેની લપેટમાં આવી ગયા હતા. આ અકસ્માતમાં ખેડૂતના વાહનો અને મશીનરી સંપૂર્ણપણે બળીને ખાખ થઈ ગયા હતા, જેના કારણે તેમને લાખો રૂપિયાનું ભારે નુકસાન વેઠવાનો વારો આવ્યો છે. જોકે, સદનસીબે આ ભયાનક આગમાં કોઈ જાનહાનિના સમાચાર નથી, જે એક મોટી રાહતની વાત છે. ઘટનાની જાણ થતાં જ ખંભાત અને સોજીત્રા ફાયર બ્રિગેડની ટીમો તાત્કાલિક સ્થળ પર પહોંચી ગઈ હતી અને ભારે જહેમત બાદ આગ પર કાબૂ મેળવવામાં આવ્યો હતો. આ ખાસ રિપોર્ટ ભાવેશ આંજણાપટેલ અને પપ્પુભાઇ પફવાળા દ્વારા તારાપુરથી આપવામાં આવ્યો છે.