திருப்பத்தூர் மாவட்டம், நாட்றம்பள்ளி பகுதியில் இன்று (மே 31) ஜோலார்பேட்டை சட்டமன்ற உறுப்பினர் அலுவலகம் திறப்பு விழா நடைபெற்றது. அதிமுக முன்னாள் அமைச்சரும், ஜோலார்பேட்டை தொகுதி சட்டமன்ற உறுப்பினருமான கே.சி. வீரமணி ரிப்பன் வெட்டி இந்த அலுவலகத்தைத் திறந்து வைத்தார். திறப்பு விழாவைத் தொடர்ந்து, அலுவலகத்தைப் பார்வையிட்ட அவர், சட்டமன்ற உறுப்பினர் இருக்கையில் அமர்ந்து பொதுமக்கள் நலன் சார்ந்த பணிகளைத் தொடங்கி வைத்தார். இதையடுத்து, நிகழ்ச்சியில் கலந்துகொண்ட கட்சியினர் மற்றும் நிர்வாகிகள் கே.சி. வீரமணிக்கு மாலை அணிவித்தும், சால்வை போர்த்தியும் வாழ்த்துகளைத் தெரிவித்தனர். இந்த விழாவில் அஇஅதிமுக நிர்வாகிகள் பலரும் பங்கேற்றனர்.

ராணிப்பேட்டை மாவட்டம், ரத்தினகிரி அருள்மிகு பாலமுருகன் ஆலயத்தில், பரப வருடம் வைகாசி பதினாறாம் நாளை முன்னிட்டு விசாக தேர் வீதி உலா திருவிழா வெகு விமர்சையாக நடைபெற்றது. தமிழக கூட்டுறவுத் துறை அமைச்சர் காந்தியராஜ் மற்றும் வெளிநாடு வாழ் தமிழர் நலத்துறை அமைச்சர் கே.தென்னரசு ஆகியோர் இதில் பங்கேற்று, தேர் வீதி உலா நிகழ்ச்சியை வடம் பிடித்து இழுத்து தொடங்கி வைத்தனர். இந்தத் திருவிழா கடந்த 21ஆம் தேதி பிரம்மோற்சவ பூர்வ பூஜையுடன் தொடங்கியது. இன்று ஒன்பதாம் நாளாக யாக கலச பூஜை, உத்ஸவ மூர்த்தி அபிஷேகம், விசேஷ அலங்காரம், குஹாஸ்த்திர தேவர் புறப்பாடு, நவசந்தி பூஜை, உத்ஸவ சோடஷ உபாசார பூஜை, யாகரக்ஷை சமர்பித்தல் போன்ற பூஜைகள் நடைபெற்றன. இதனைத் தொடர்ந்து ரதோரோஹாணம் புறப்பாடும் திருவீதி உலாவும் சிறப்பாக நடந்தேறின. அமைச்சர்கள் காந்தியராஜ் மற்றும் கே.தென்னரசு ஆகியோர் ஆலயத்தில் முருகப்பெருமானை தரிசித்துவிட்டு, பின்னர் தேர் திருவிழாவை வடம் பிடித்து இழுத்து தொடங்கி வைத்தனர். திரளான பக்தர்கள் இந்த நிகழ்ச்சியில் கலந்துகொண்டு, "அரோகரா அரோகரா" என பக்தி கோஷங்களை எழுப்பி, தேரை வடம் பிடித்து இழுத்துச் சென்றனர். தேர் திருவிழாவை முன்னிட்டு, ஏராளமான காவல் துறையினர், தீயணைப்புத் துறையினர் மற்றும் மருத்துவக் குழுவினர் பாதுகாப்பு மற்றும் முன்னெச்சரிக்கை பணிகளில் ஈடுபடுத்தப்பட்டிருந்தனர்.

தர்மபுரி மாவட்டத்தில் கடந்த சில நாட்களாக மாலை மற்றும் இரவு நேரங்களில் மழை பெய்து வரும் நிலையில், சனிக்கிழமை அன்று காலை முதல் கடும் வெப்பம் நிலவியது. பின்னர், மாலை நேரத்தில் பாலக்கோடு, கடமடை, நாகதாசம்பட்டி, பாப்பாரப்பட்டி, பி.அக்ரஹாரம் உள்ளிட்ட பல பகுதிகளில் கனமழை கொட்டித் தீர்த்தது. அதேபோல், நல்லம்பள்ளி, தொப்பூர், அரூர், பாப்பிரெட்டிப்பட்டி மற்றும் மொரப்பூர் போன்ற பிற பகுதிகளிலும் மிதமான மழை பதிவாகியுள்ளது. இந்த மழையின் காரணமாக, பாதுகாப்பு கருதி தர்மபுரி மாவட்டத்தின் பல்வேறு இடங்களில் மின்நிறுத்தம் அமல்படுத்தப்பட்டுள்ளது. இந்த மின்நிறுத்தம் தற்போது வரை தொடர்வதாக குறிப்பிடப்பட்டுள்ளது.

தர்மபுரி சட்டமன்ற உறுப்பினர் சௌமியா அன்புமணி, தர்மபுரி பேருந்து நிலையத்தில் ஆய்வு மேற்கொண்டார். இந்த ஆய்வுக்குப் பிறகு, தர்மபுரியில் பத்திரிகையாளர் சந்திப்பு நடைபெற்றது. இந்த நிகழ்வின்போது, முன்னாள் சட்டமன்ற உறுப்பினர் எஸ். பி. வெங்கடேஸ்வரன் மற்றும் கட்சி நிர்வாகிகள் உடன் இருந்தனர்.

நாமக்கல் மாவட்டத்தில் புதிய ஆட்சியாளராக நியமிக்கப்பட்ட மதுபாலன் ஐஏஎஸ் அவர்கள் இன்று, மே 31 ஆம் தேதி ஞாயிற்றுக்கிழமை மதியம் தனது பதவியை மாவட்ட ஆட்சியர் அலுவலகத்தில் பொறுப்பேற்றார். பதவி ஏற்புக்குப் பின்னர், அவர் பத்திரிகையாளர்களுக்கு ஒரு சிறப்புப் பேட்டி அளித்துள்ளார்.

சென்னை மாநகராட்சிக்குட்பட்ட பகுதிகளில் நீண்டகாலமாகவே நிலவி வரும் மழைநீர் தேங்கும் பிரச்சினைக்கு நிரந்தரத் தீர்வு காணும் நோக்கில், மழைநீர் வடிகால் அமைக்கும் பணிகள் தற்போது தீவிரமாக மேற்கொள்ளப்பட்டு வருகின்றன. இதன் ஒரு பகுதியாக, மேற்கு மாம்பலம் ஏரிக்கரை தெருவில் வடிகால் கட்டும் பணிகள் விறுவிறுப்பாக முன்னெடுக்கப்பட்டு வருகின்றன. எனினும், பருவமழை தொடங்குவதற்கு முன்னதாகவே இந்த வடிகால் பணிகளை முழுமையாக முடித்து, மக்களின் பயன்பாட்டிற்குக் கொண்டு வருவார்களா என அப்பகுதி பொதுமக்கள் எதிர்பார்ப்புடன் கேள்வி எழுப்பியுள்ளனர்.

நடிகரும் நண்பருமான அஜித் குமார், முதலமைச்சருக்கு ஆறுதல் தெரிவித்திருக்கிறார். அதேசமயம், நடிகை திரிஷாவும் நடிகர் அஜித் குமாருக்கு தனது ஆறுதலைத் தெரிவித்துள்ளார்.

ராணிப்பேட்டை மாவட்டத்தில் அமைந்துள்ள தமிழகத்தின் பிரசித்தி பெற்றதும், 108 திவ்ய தேசங்களில் ஒன்றுமான சோளிங்கர் லட்சுமி நரசிம்ம சுவாமி திருக்கோயிலில் வைகாசி தங்க கருட சேவை வெகு விமரிசையாக நடைபெற்றது. இதில் ஏராளமான பக்தர்கள் கலந்துகொண்டு சுவாமி தரிசனம் செய்தனர். இந்த சேவையை முன்னிட்டு, உற்சவர் பக்தோசிதப் பெருமாள் சுவாமிக்கு பல்வேறு வகையான நறுமணப் பொருட்களைக் கொண்டு சிறப்பு அபிஷேகம் செய்யப்பட்டது. தொடர்ந்து பட்டு வஸ்திரங்கள், தங்க ஆபரணங்கள் மற்றும் பல வண்ண மலர்களைக் கொண்டு சிறப்பு அலங்காரம் செய்யப்பட்டார். பின்னர், மங்கள வாத்தியங்கள் முழங்க மகாதீப ஆராதனைகள் நடைபெற்றன. சிறப்பு அலங்காரம் செய்யப்பட்ட தங்க கருட வாகனத்தில் பக்தோசிதப் பெருமாள் எழுந்தருளி பக்தர்களுக்குக் காட்சி அளித்தார். மங்கள வாத்தியங்கள் முழங்க, நான்கு மாட வீதிகளிலும் சுவாமி உலா வந்து பக்தர்களுக்கு அருள் பாலித்தார். வீடுகள்தோறும் பக்தர்கள் சுவாமிக்கு கற்பூர ஆரத்தி காண்பித்து வழிபட்டனர்.

தர்மபுரி மாவட்டம் பாலக்கோட்டைச் சேர்ந்த பொன்முடி என்பவர், பாலக்கோடு அரசு போக்குவரத்து பணிமனையில் கடந்த 19 ஆண்டுகளாக ஓட்டுநராகப் பணியாற்றி வருகிறார். கடந்த மாதம், இவர் தவெக வெற்றியைக் கொண்டாடும் விதமாக சக ஊழியர்களுக்கு இனிப்பு வழங்கியுள்ளார். போக்குவரத்து பணிமனைகள் இன்னமும் திமுக தொழிற்சங்கத்தின் கட்டுப்பாட்டில் இயங்கி வருவதால், பொன்முடியின் இந்தச் செயல் திமுக தொழிற்சங்க நிர்வாகிகளுக்கு கடும் ஆத்திரத்தை ஏற்படுத்தியுள்ளது. இதன் விளைவாக, பொன்முடியை பழிவாங்கும் நோக்குடன், அவரை திடீரென 125 கிலோமீட்டர் தொலைவில் உள்ள சேலம் மாவட்டம் அஸ்தம்பட்டி கிளைக்கு இடமாற்றம் செய்யப்பட்டுள்ளார். எந்தத் தவறும் செய்யாத தன்னை ஏன் இவ்வளவு தூரம் ஒரு மண்டலத்திலிருந்து மற்றொரு மண்டலத்திற்கு மாற்றியுள்ளீர்கள் என்று பொன்முடி நிர்வாகத்திடம் கேட்டுள்ளார். தனக்கு நான்கு பெண் பிள்ளைகளும், உடல்நிலை சரியில்லாத மனைவியும் இருப்பதால், தினமும் சேலம் சென்று வர முடியாது என்றும் அவர் விளக்கமளித்துள்ளார். பொன்முடிக்கு உரிய விளக்கம் அளிக்காத நிர்வாகம், பேருந்தை இயக்கும்போது ப்ளூடூத் அதிக சத்தமாக பயன்படுத்தியதாக பொய்யான குற்றச்சாட்டை அவர் மீது சுமத்தி, பழிவாங்கும் நோக்கிலேயே இந்த இடமாற்றத்தை செய்துள்ளதாகத் தெரிகிறது. இந்த பழிவாங்கும் நடவடிக்கையைக் கண்டித்தும், இடமாற்ற உத்தரவை திரும்பப் பெறக் கோரியும், பொன்முடி தனது குடும்பத்துடன் தர்மபுரி மண்டல போக்குவரத்து அலுவலகம் முன்பு தர்னாவில் ஈடுபட்டுள்ளார். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

நாமக்கல் மாவட்டம் திருச்செங்கோட்டில் உள்ள அர்த்தநாரீஸ்வரர் திருக்கோயில் தேர் திருவிழாவின்போது, இன்று மே 31 காலை 10:30 மணியளவில் ஏற்பட்ட விபத்தில் ஹர்ஷவர்தன் (18) என்ற இளைஞர் உயிரிழந்தார். தேரின் சக்கரத்திற்கும் அருகில் இருந்த சுவற்றிக்கும் இடையே எதிர்பாராதவிதமாக சிக்கிக்கொண்டதால் பலத்த காயமடைந்த அவர், மருத்துவமனையில் சிகிச்சை பலனின்றி உயிர் நீத்தார். இதே விபத்தில் சஷ்டிகன் (19) என்ற மற்றொரு இளைஞருக்கு சிறப்பு சிகிச்சை அளிக்கப்பட்டு வருகிறது. இந்த துயர சம்பவத்தைத் தொடர்ந்து, உயிரிழந்த ஹர்ஷவர்தனின் குடும்பத்திற்கு முதலமைச்சரின் பொது நிவாரண நிதியிலிருந்து 5 லட்சம் ரூபாய் வழங்க முதல்வர் உத்தரவிட்டுள்ளார். இச்சம்பவம் அப்பகுதி மக்கள் மத்தியில் பெரும் சோகத்தை ஏற்படுத்தியுள்ளது.