छत्रपती संभाजी नगर जिल्ह्यातील सिल्लोड तालुक्यातील म्हसला खुर्द येथे एका ३२ वर्षीय तरुणाने गळफास घेऊन आत्महत्या केली आहे. याप्रकरणी सिल्लोड ग्रामीण पोलीस ठाण्यात घटनेची नोंद करण्यात आली आहे।

छत्रपती संभाजीनगरचे विभागीय आयुक्त जी. श्रीकांत यांनी भारत निवडणूक आयोगाच्या विशेष सखोल पुनरीक्षण (एसआयआर) कार्यक्रमांतर्गत जिल्ह्यातील कामाचा सविस्तर आढावा घेतला आहे. मतदार यादी अत्यंत अचूक, अद्ययावत आणि त्रुटीमुक्त करण्यासाठी प्रत्येक टप्प्यावरील काम ठरवून दिलेल्या वेळेतच पूर्ण करावे, तसेच मतदान केंद्रस्तरीय अधिकारी (बीएलओ) यांच्या कामाचे नियमित परीक्षण करावे, अशा कडक सूचना त्यांनी दिल्या आहेत. विभागीय आयुक्त कार्यालयात झालेल्या या आढावा बैठकीला जिल्हाधिकारी विनय गौडा, अतिरिक्त आयुक्त तथा अतिरिक्त जिल्हा निवडणूक अधिकारी रणजीत पाटील, सह आयुक्त मंजुषा मिसकर, उप जिल्हा निवडणूक अधिकारी सविता चौधर आणि तहसिलदार के. के. भदाने यांच्यासह सर्व संबंधित मतदार नोंदणी अधिकारी उपस्थित होते. बैठकीत विधानसभा मतदारसंघनिहाय कामाचा आढावा घेत बीएलओ अधिकाऱ्यांच्या कामकाजाबाबत सविस्तर मार्गदर्शक सूचना देण्यात आल्या. यामध्ये प्रामुख्याने घरोघरी जाऊन प्रत्येक मतदाराची प्रत्यक्ष पडताळणी करणे, गणना फॉर्म काळजीपूर्वक भरणे, कागदपत्रांची तपासणी करणे आणि प्रलंबित अर्ज तातडीने निकाली काढणे या बाबींचा समावेश आहे. कोणताही पात्र मतदार यादीतून सुटणार नाही याची दक्षता घेण्याचे सांगत अपात्र मतदारांची नावे नियमानुसार वेळेत वगळण्याचे निर्देश विभागीय आयुक्तांनी दिले आहेत. या कामात नागरिकांनीही बीएलओ अधिकाऱ्यांना आवश्यक कागदपत्रे देऊन सहकार्य करावे, असे आवाहन यावेळी करण्यात आले असून जिल्हाधिकारी विनय गौडा यांनी सादरीकरणाद्वारे जिल्ह्यातील एसआयआर कार्यक्रमाच्या प्रगतीची माहिती सादर केली.

आषाढी एकादशीनिमित्त पंढरपूरकडे प्रस्थान केलेल्या संतश्रेष्ठ ज्ञानेश्वर महाराजांच्या पालखी सोहळ्यात पालकमंत्री संजय शिरसाठ यांनी सहपरिवार सहभागी होत दर्शन घेतले. सोलापूर जिल्ह्यातील खुडूस फाटा येथे त्यांनी ज्ञानेश्वर महाराजांच्या पालखीचे मनोभावे दर्शन घेतले. यावेळी त्यांनी वारकऱ्यांशी संवाद साधत पालखी सोहळ्याचे दर्शन घेतले. तसेच विठ्ठल-रुक्मिणी चरणी प्रार्थना करत राज्यात भरपूर पाऊस पडावा, शेतकऱ्यांच्या शेतात भरघोस पीक यावे आणि सर्वांच्या जीवनात सुख-समृद्धी नांदावी, अशी प्रार्थना केली. आषाढी वारीच्या भक्तिमय वातावरणातील त्यांच्या या सहभागाची सध्या सर्वत्र चर्चा होत आहे.

जालना शहर काँग्रेस कमिटीचे जिल्हाध्यक्ष डॉ. विशाल धानुरे आणि सय्यद करीम बिल्डर यांच्या पुढाकाराने खासदार डॉ. कल्याण काळे यांच्या वाढदिवसानिमित्त जालन्यात फळवाटप आणि वृक्षरोपण कार्यक्रम संपन्न झाला आहे.

जालन्यामध्ये अनुसूचित जातीच्या आरक्षणाचे अ, ब, क, ड उपवर्गीकरण रद्द करण्यात यावे आणि एससी समाजाला २० टक्के आरक्षण लागू करण्यात यावे, या प्रमुख मागण्यांसाठी आंबेडकरी समाजाच्या वतीने भव्य संघर्ष मोर्चा काढण्यात आला. रिमझिम पाऊस सुरू असतानाही जिल्हाभरातून आंबेडकरी चळवळीतील नागरिक आणि विशेषतः महिला मोठ्या संख्येने या मोर्चात सहभागी झाल्या होत्या. मस्तगड येथील डॉ. बाबासाहेब आंबेडकर स्मारकापासून सुरू झालेला हा मोर्चा गांधीचमन, शनिमंदिर, उड्डाणपूल, नूतन वसाहत, अंबड चौफुली मार्गे जिल्हाधिकारी कार्यालयावर धडकला. यावेळी आंदोलकांनी सरकारच्या विरोधात जोरदार घोषणाबाजी केली. सुप्रीम कोर्टाने अनुसूचित जातीच्या आरक्षणातील उपवर्गीकरणाचा निर्णय हा संबंधित राज्यांवर ऐच्छिक ठेवला आहे. मात्र, राज्यातील अनेक जिल्ह्यांमध्ये या निर्णयाच्या विरोधात आंबेडकरी समाजाच्या वतीने मोर्चे आणि आंदोलने सुरू असतानाही सरकारने जनतेच्या भावनेचा आदर केला नाही, तर आंबेडकरी जनता सरकारचा माज उतरवल्याशिवाय राहणार नाही, असा इशारा आंदोलकांकडून देण्यात आला. आनंदराज आंबेडकर यांनी सरकारला थेट इशारा देत म्हटले की, 'महाराष्ट्रात जबरदस्तीने उपवर्गीकरण करण्याचा निर्णय फडणवीस सरकार घेत असेल, तर त्याची किंमत फडणवीसांना मोजावी लागेल. सरकारने जनतेच्या भावनांचा आदर केला नाही, तर त्यांना सत्तेतून पायउतार व्हायला वेळ लागणार नाही.' दरम्यान, दिल्लीतील जंतरमंतरवर सुरू असलेल्या विद्यार्थ्यांच्या आंदोलनाला आपला पूर्ण पाठिंबा जाहीर करत, या प्रकरणी जबाबदार मंत्र्यांनी तात्काळ राजीनामा द्यावा, अशी मागणीही आनंदराज आंबेडकर यांनी केली आहे.

जालना मुस्लिम फेडरेशनच्या वतीने जिल्हाधिकारी आणि निवडणूक अधिकाऱ्यांना एसआयआरची मुदत वाढवण्यासाठी निवेदन देण्यात आले आहे. या निवेदनाद्वारे एसआयआरची मुदत वाढवून मिळण्याची मागणी करण्यात आली आहे।

औरंगाबाद येथे भाजपा शहराध्यक्ष उत्तम मामा ढोके यांनी आमदार सुहास शिरसाट यांचा भव्य नागरी सत्कार केला असून, यावेळी त्यांची लाडू तुला देखील करण्यात आली आहे.

दिल्लीतील जंतर-मंतर येथे आंदोलन करणाऱ्या विद्यार्थ्यांवर झालेल्या कथित मारहाणीच्या निषेधार्थ वंचित बहुजन आघाडीने महाराष्ट्र बंदची हाक दिली आहे. जंतर-मंतरवरील विद्यार्थ्यांवरील या कारवाईचा तीव्र निषेध नोंदवत दोषींवर कठोर कारवाई करण्यात यावी, अशी मागणी याद्वारे करण्यात आली आहे. या बंदच्या पार्श्वभूमीवर, वंचित बहुजन आघाडीने राज्यभरातील आपल्या सर्व कार्यकर्त्यांना अत्यंत शांततापूर्ण पद्धतीने बंदमध्ये सहभागी होण्याचे आवाहन केले आहे.

जालन्यात अनुसूचित जातीच्या आरक्षणाचे अ, ब, क, ड उपवर्गीकरण रद्द करावे आणि एससी समाजाला २० टक्के आरक्षण लागू करावे, या प्रमुख मागण्यांसाठी आंबेडकरी समाजाच्या वतीने भव्य संघर्ष मोर्चा काढण्यात आला. रिमझिम पाऊस सुरू असतानाही जिल्हाभरातून आंबेडकरी चळवळीतील नागरिक आणि महिला मोठ्या संख्येने या मोर्चात सहभागी झाले होते. मस्तगड येथील डॉ. बाबासाहेब आंबेडकर स्मारकापासून सुरू झालेला हा मोर्चा गांधीचमन, शनिमंदिर, उड्डाणपूल, नूतन वसाहत आणि अंबड चौफुली मार्गे थेट जिल्हाधिकारी कार्यालयावर धडकला. या आंदोलनादरम्यान सरकारच्या विरोधात जोरदार घोषणाबाजी करण्यात आली. सुप्रीम कोर्टाने अनुसूचित जातीच्या आरक्षणातील उपवर्गीकरणाचा निर्णय संबंधित राज्यांवर ऐच्छिक ठेवला आहे. मात्र, या उपवर्गीकरणाच्या विरोधात राज्यातील अनेक जिल्ह्यांमध्ये आंबेडकरी समाजाचे मोर्चे सुरू असतानाही सरकार जनतेच्या भावनांचा आदर करत नसल्याचा संताप व्यक्त करण्यात आला. 'महाराष्ट्रात जबरदस्तीने उपवर्गीकरण करण्याचा निर्णय फडणवीस सरकार घेत असेल, तर त्याची किंमत फडणवीसांना मोजावी लागेल. सरकारने जनतेच्या भावनांचा आदर केला नाही, तर सत्तेतून पायउतार व्हायला वेळ लागणार नाही,' असा थेट इशारा आनंदराज आंबेडकर यांनी दिला. तसेच, सरकारने आदर केला नाही तर आंबेडकरी जनता सरकारचा माज उतरवल्याशिवाय राहणार नाही, असा इशाराही यावेळी देण्यात आला. दरम्यान, दिल्लीतील जंतरमंतरवर सुरू असलेल्या विद्यार्थ्यांच्या आंदोलनाला आनंदराज आंबेडकर यांनी आपला पूर्ण पाठिंबा जाहीर केला असून, या प्रकरणी जबाबदार असलेल्या मंत्र्यांनी तात्काळ आपल्या पदाचा राजीनामा द्यावा, अशी मागणीही त्यांनी केली आहे.

नीट पेपर फुटीचे प्रकरण ताजे असतानाच आता नीट परीक्षेच्या निकालावरून बीडमधील सोहम गवते या विद्यार्थ्याने गंभीर आक्षेप घेतला आहे. उत्तरपत्रिकेनुसार त्याला ५२२ गुण मिळणे अपेक्षित असताना, प्रत्यक्ष स्कोअरकार्डमध्ये केवळ ९५ गुण दाखवण्यात आल्याचा दावा सोहमने केला आहे. नीट परीक्षेचा निकालच नीट नसल्याने संतापलेल्या या तरुणाने अखेर मुंबई उच्च न्यायालयाच्या औरंगाबाद खंडपीठात याचिका दाखल केली आहे. या प्रकरणी सोहमने एनटीएकडे सात वेळा ई-मेल पाठवून आणि वारंवार फोनद्वारे तक्रार केली, मात्र त्याला कोणताही प्रतिसाद देण्यात आला नाही. अखेर कोणतीही दाद न मिळाल्याने त्याने औरंगाबाद खंडपीठाचे दार ठोठावले आहे. या प्रकरणी याचिकाकर्त्याचे वकील ॲड. महेंद्र गंडले यांनी आपली प्रतिक्रिया दिली आहे.