கிருஷ்ணகிரி மோகன் ராவ் காலனியைச் சேர்ந்த 14 வயதான மாற்றுத்திறனாளி சிறுவன் லோகேஷ், தனது தந்தை மற்றும் தாயை இழந்த நிலையில் சித்தி செல்லக்கிளியின் பராமரிப்பில் வசித்து வந்துள்ளார். லோகேஷைக் காப்பகத்தில் சேர்க்குமாறு மாவட்ட ஆட்சியருக்குக் கடிதம் எழுதி வைத்துவிட்டு, சித்தி செல்லக்கிளி சிறுவனை வீட்டில் பூட்டிவிட்டுச் சென்றார். இந்தச் சூழலை அறிந்த அருகில் வசிப்பவரான கோவிந்தம்மாள், பூட்டப்பட்டிருந்த சிறுவனை மீட்டு உணவளித்தார். இந்தத் தகவல் கிடைத்ததும் மாவட்ட ஆட்சியர், மாவட்ட குழந்தைகள் பாதுகாப்பு அலகு அதிகாரிகளை அனுப்பி சிறுவனை மீட்டனர். மீட்கப்பட்ட லோகேஷ் தற்போது அருகில் உள்ள ஐ.இ.எல்.சி. ஆதரவற்றோர் இல்லத்தில் தற்காலிகமாகத் தங்க வைக்கப்பட்டுள்ளார்.

தர்மபுரி மாவட்டம் பென்னாகரம் தாலுக்கா அச்சனஅள்ளி கிராமத்தைச் சேர்ந்த சக்திவேல் என்பவரின் மகள் நர்மதா (19) மற்றும் அதே பகுதியைச் சேர்ந்த குமாரின் மகன் பெருமாள் (21) ஆகிய இருவரும் கடந்த 4 ஆண்டுகளாகக் காதலித்து வந்துள்ளனர். டிப்ளமோ படித்துள்ள நர்மதாவும், பட்டதாரியான பெருமாளும், பெற்றோர்களின் எதிர்ப்பையும் மீறி இன்று காலை பாலக்கோடு அருகே உள்ள மணியாகரன் கொட்டாய் சிவன் கோயிலில் திருமணம் செய்து கொண்டனர். பெற்றோர்களுக்குப் பயந்து பாதுகாப்பு கோரி இருவரும் பாலக்கோடு காவல் நிலையத்தில் தஞ்சம் அடைந்தனர். காவல்துறையினர் இருவரின் பெற்றோர்களுக்கும் தகவல் தெரிவித்ததையடுத்து, காவல் நிலையம் வந்த பெண்ணின் பெற்றோர் இந்தத் திருமணத்திற்கு எதிர்ப்பு தெரிவித்தனர். இருப்பினும், காதலனுடன்தான் செல்வேன் என்று நர்மதா உறுதியாகக் கூறியதால், காவல்துறையினர் அவரை காதலனுடன் அனுப்பி வைத்தனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

திருப்பத்தூர் மாவட்டம் திருப்பத்தூர் அருகே உள்ள தண்ணீர்பந்தல் கிராமத்தில், தாகம் காரணமாக தண்ணீர் தேடி புள்ளி மான் ஒன்று வழிமாறி கிராமத்திற்குள் புகுந்தது. கிராமப்பகுதிக்குள் மான் அங்கும் இங்கும் அலைந்ததைக் கண்டு ஆச்சரியமடைந்த அப்பகுதி மக்கள், அந்த மான் நாய்களிடம் சிக்காமல் இருக்கத் துரிதமாகச் செயல்பட்டு அதனை மீட்டனர். மான் மீட்கப்பட்டவுடன் பொதுமக்கள் உடனடியாக வனத்துறையினருக்குத் தகவல் தெரிவித்தனர். தகவலின் பேரில் சம்பவ இடத்திற்கு விரைந்து வந்த வனத்துறையினரிடம், பொதுமக்கள் மீட்ட அந்தப் புள்ளி மானை ஒப்படைத்தனர். கிராம மக்களின் இந்த மனிதாபிமான செயலைப் பாராட்டிய வனத்துறையினர் மற்றும் சமூக ஆர்வலர்கள், மீட்கப்பட்ட அந்த மானைப் புதூர்நாடு வனப்பகுதியில் பத்திரமாக விடுவித்தனர்.

தருமபுரி மாவட்டம், காரிமங்கலம் தாலுகா, இருமத்தூர் கிராமத்தில் மக்கள் தொடர்பு திட்ட முகாம் நடைபெற்றது. இந்த முகாமிற்கு மாவட்ட ஆட்சியர் சரவணன் தலைமை தாங்கினார். முகாமின் போது, பொதுமக்களிடமிருந்து கோரிக்கை மனுக்களைப் பெற்றுக்கொண்ட ஆட்சியர், அவற்றின் மீது உரிய நடவடிக்கை எடுக்குமாறு சம்பந்தப்பட்ட துறை அலுவலர்களுக்கு உத்தரவிட்டார். அரூர் சட்டமன்ற உறுப்பினர் சம்பத்குமார் இந்த நிகழ்வில் முன்னிலை வகித்தார். இந்த முகாமில் பல்வேறு துறைகளின் சார்பில் மொத்தம் 114 பயனாளிகளுக்கு 37 லட்சத்து 78 ஆயிரம் ரூபாய் மதிப்பிலான நலத்திட்ட உதவிகளை ஆட்சியர் வழங்கினார். இதில் வருவாய் துறை சார்பில் 41 பேருக்கு 4 லட்சம் ரூபாய் மதிப்பிலான இலவச வீட்டுமனை பட்டாக்களும், சமூக பாதுகாப்பு திட்டம் மூலம் 5 பேருக்கு இயற்கை மரணம் மற்றும் ஈமச் சடங்கு உதவித்தொகையாக 1.82 லட்சம் ரூபாயும் வழங்கப்பட்டது. மேலும், உணவுப் பொருள் வழங்கல் துறையின் சார்பில் 47 பேருக்கு 7.56 லட்சம் ரூபாய் மதிப்பிலான மின்னணு குடும்ப அட்டைகளும், தொழிலாளர் நலன் மற்றும் திறன் மேம்பாட்டு துறையின் சார்பில் 4 பேருக்கு 16 லட்சம் ரூபாய் மதிப்பிலான வீட்டு வசதி திட்ட உதவிகளும் வழங்கப்பட்டன. இந்த நிகழ்ச்சியில் அரூர் உதவி ஆட்சியர் கோவிந்தன், சமூக பாதுகாப்பு திட்ட தனித்துணை ஆட்சியர் செல்வி, மாவட்ட மாற்றுத்திறனாளிகள் நல அலுவலர் சரவணன், கால்நடை பராமரிப்பு துறை மண்டல இணை இயக்குனர் முருக லட்சுமி, தாசில்தார் சிவக்குமார் மற்றும் அரசு அலுவலர்கள் உட்பட பலர் கலந்து கொண்டனர்.

சேலம் தெற்கு தொகுதி எம்எல்ஏவும், போக்குவரத்து துறை அமைச்சருமான தமிழன் ஆ பார்த்திபன் இன்று தனது சமூக வலைதளப் பக்கத்தில் புதிய வீடியோ ஒன்றை வெளியிட்டுள்ளார்.

ஒசூர் கெலவரப்பள்ளி அணையின் இடதுபுற பாசனக் கால்வாயில் நடைபெற்று வரும் சீரமைப்புப் பணிகளை வேப்பனஹள்ளி சட்டமன்ற உறுப்பினர் சீனிவாசன் நேரில் சென்று ஆய்வு செய்தார். ஓசூர் தொகுதி ஆளூர் பகுதி முதல் சூளகிரி தொகுதி வரை உள்ள கால்வாய் பகுதிகளை இருசக்கர வாகனத்தில் சென்றே அவர் ஆய்வு மேற்கொண்டார். இந்த ஆய்வுப் பணியின்போது, நான்கு சக்கர வாகனங்கள் செல்ல முடியாத இடங்களிலும் நேரில் சென்று பணிகளின் தரத்தையும் முன்னேற்றத்தையும் அவர் பார்வையிட்டார். கடந்த ஆண்டு முன்னாள் முதலமைச்சர் கவனத்திற்கு கொண்டு செல்லப்பட்டதையடுத்து, இந்தக் கால்வாய் சீரமைப்பிற்காக ₹8.5 கோடி நிதி ஒதுக்கீடு பெறப்பட்டு தற்போது பணிகள் விறுவிறுப்பாக நடைபெற்று வருகின்றன. கால்வாய் சீரமைப்புப் பணிகள் தற்போது 80 விழுக்காடு நிறைவடையும் நிலையில் இருப்பதாகத் தெரிவித்துள்ள சீனிவாசன், மீதமுள்ள பணிகளை விரைந்து முடிக்குமாறு சம்பந்தப்பட்ட துறை சார்ந்த அதிகாரிகளுக்கு அறிவுறுத்தல்களை வழங்கியுள்ளார். விவசாயிகளின் கோரிக்கையை ஏற்று, நடப்பு ஜூலை மாத இறுதிக்குள் அனைத்துப் பணிகளையும் முழுமையாக முடித்து, பாசனத்திற்காகக் கால்வாயில் தண்ணீர் திறந்து விட போர்க்கால அடிப்படையில் நடவடிக்கைகள் எடுக்கப்படும் என அவர் உறுதியளித்தார். இந்த ஆய்வின்போது உள்ளூர் விவசாயப் பிரதிநிதிகள் மற்றும் திமுக நிர்வாகிகள் உடனிருந்தனர்.

திருப்பத்தூர் மாவட்டம் ஆம்பூர் அருகே உள்ள வீராங்குப்பம் பாலாற்றில், இன்று காலை 11 மணியளவில் பாலாறு நீர்நிலை பாதுகாப்பு தடுப்பு சுவர் மீது பைக்கில் சென்ற இளைஞர் ஒருவர் தவறி கீழே விழுந்ததில் சம்பவ இடத்திலேயே உயிரிழந்தார். இந்த விபத்து குறித்த தகவல் கிடைத்தவுடன், அருகில் இருந்த பொதுமக்கள் உடனடியாக தீயணைப்புத் துறையினருக்கும் காவல்துறையினருக்கும் தகவல் தெரிவித்தனர். சம்பவ இடத்திற்கு விரைந்து சென்ற அதிகாரிகள், உயிரிழந்தவரின் உடலை மீட்டதுடன், இது குறித்து விசாரணை மேற்கொண்டு வருகின்றனர்.