আজি বিধানসভাৰ মজিয়াত বকো-ছয়গাঁও সমষ্টিৰ নৱ নিৰ্বাচিত বিধায়ক ৰাজু মেছে শপত গ্ৰহণ কৰে। তেওঁ নৱগঠিত এই সমষ্টিটোৰ প্ৰথম বিধায়ক, যাক ৰাইজে অঞ্চলৰ সমস্যা সমাধানৰ আশাৰে জয়যুক্ত কৰিছিল।

সোণতলী আৰু নগৰবেৰাক সংযোগ কৰা গড়কাপ্তানী পথটো সম্পূৰ্ণৰূপে বিধ্বস্ত হৈ পৰিছে। এই জৰাজীৰ্ণ পথৰ বাবে পথচাৰীসকলে যমৰ যাতনা ভুগিবলগীয়া হৈছে।

কামৰূপ জিলাৰ ছয়গাঁৱৰ ১ নং জামবাৰীৰ বাসিন্দা আজগৰ খান আৰু ইলিজা বেগমৰ পুত্ৰ আতিক আছলম এজন ১৬ বছৰীয়া কিশোৰ, যি এক সুমধুৰ কণ্ঠৰ অধিকাৰী। উচ্চতৰ মাধ্যমিকৰ প্ৰথম বৰ্ষৰ এই ছাত্ৰজনৰ মনত এক বিশাল সপোন পুহি আছে।

ঈদ-উল-আজহা উপলক্ষে দক্ষিণ গাঁও শ্বাহী জামা মছজিদে এক বিশেষ আহ্বান জনাইছে। মছজিদ কৰ্তৃপক্ষই কৈছে যে পৱিত্ৰ ঈদ-উল-আজহাৰ বলিদানৰ দিনা কোনো ধৰণৰ অবৈধ জন্তুৰ বলিদান নকৰিব। তেওঁলোকে স্পষ্টকৈ কৈছে যে কেৱল চৰকাৰৰ দ্বাৰা অনুমতিপ্ৰাপ্ত জন্তুৰহে বলিদান কৰা উচিত।

পলাশবাৰীৰ বজৰাপাৰাত মাজনিশা দুখন মটৰচাইকেলৰ মুখামুখি সংঘৰ্ষত এক ভয়ংকৰ পথ দুৰ্ঘটনা সংঘটিত হৈছে। এই দুৰ্ঘটনাত থিতাতে তিনিজন যুৱকৰ মৃত্যু হয়। পিছত গুৱাহাটী চিকিৎসা মহাবিদ্যালয় হাস্পতালত আন এজন যুৱকৰ মৃত্যু হোৱাত মুঠ মৃতকৰ সংখ্যা ৪ জনলৈ বৃদ্ধি পায়।

সৰভোগ সমষ্টিৰ প্ৰাক্তন বিধায়ক মনোৰঞ্জন তালুকদাৰে এখন সংবাদ মেল অনুষ্ঠিত কৰে।

আজি ৰঙিয়াৰ কনিহাত কামৰূপ জিলা জ্যেষ্ঠ নাগৰিক সন্মিলনৰ নৱম দ্বি-বাৰ্ষিক অধিৱেশন অনুষ্ঠিত কৰা হয়। বড়িগোগ আঞ্চলিক জ্যেষ্ঠ নাগৰিক সন্মিলনৰ সৌজন্যত স্থানীয় তৰুণ সঙ্ঘ প্ৰেক্ষাগৃহত দিনযোৰা কাৰ্যসূচীৰে এই অধিৱেশন অনুষ্ঠিত হয়। কাৰ্যসূচী অনুসৰি পুৱা অৱসৰী অধ্যক্ষ সুৰেশ চন্দ্ৰ ভট্টাচাৰ্য, বড়িগোগ গাওঁ পঞ্চায়তৰ সভাপতি দীপাংকৰ শৰ্মা প্ৰমুখ্যে কেইবাগৰাকীও বিশিষ্ট ব্যক্তিয়ে বন্তি প্ৰজ্বলন কৰে। ইয়াৰ পিছতে কামৰূপ জিলা জ্যেষ্ঠ নাগৰিক সন্মিলনৰ সভাপতি নৰেন্দ্ৰ নৰ্মাই পতাকা উত্তোলন কৰে। এই কাৰ্যসূচীত অৱসৰী আৰক্ষী অধীক্ষক হেমন্ত কুমাৰ ভট্টাচাৰ্য আৰু আদৰণি সমিতিৰ কাৰ্যকৰী সভাপতি দীজেন্দ্ৰ মোহন শৰ্মা সহ আন কেইবাগৰাকীও বিশিষ্ট ব্যক্তিয়ে সহযোগ কৰে। সন্মিলনৰ কাৰ্যকৰী সভাপতি ৰমেন চৌধুৰীয়ে স্মৃতি তৰ্পণ কৰে। প্ৰতিনিধি পঞ্জীয়ন আৰু গছপুলি ৰোপণ কাৰ্যসূচী ৰূপায়নৰ অন্তত প্ৰতিনিধি সভা অনুষ্ঠিত কৰা হয়। বিয়লি কামৰূপ জিলা জ্যেষ্ঠ নাগৰিক সন্মিলনৰ সাধাৰণ সম্পাদক বীৰেন্দ্ৰ নাথ শৰ্মাৰ আদৰণি ভাষণৰে মুকলি অধিৱেশন শুভাৰম্ভ কৰা হয়। একেখন মঞ্চতে অধিৱেশন উপলক্ষে প্ৰকাশিত স্মৃতিগ্ৰন্থ 'অপৰাহ্ন' উন্মোচন কৰা হয়। এই অধিৱেশনত কামৰূপ জিলাৰ অন্তৰ্গত বিভিন্ন শাখা সমিতিৰ বিষয়ববীয়াসকল আৰু সদস্যসকলে উপস্থিত থাকি সৌষ্ঠৱ বৃদ্ধি কৰে।

বৰপেটা জিলাৰ অন্তৰ্গত বৃহত্তৰ কয়াকুছি অঞ্চলত দীৰ্ঘ সময় ধৰি বিদ্যুৎ যোগান ব্যাহত হৈ থকাৰ ফলত জনজীৱন স্তব্ধ হৈ পৰিছে। হঠাতে হোৱা এই বিদ্যুৎ বিপৰ্যয়ে অঞ্চলটোত তীব্ৰ সমস্যাৰ সৃষ্টি কৰিছে, যাৰ ফলত বিশেষকৈ অনলাইন ব্যৱসায়ী প্ৰতিষ্ঠানসমূহৰ মাজত এক হাহাকাৰ পৰিস্থিতি দেখা গৈছে। বিদ্যুৎ সংযোগ বিচ্ছিন্ন হৈ থকাৰ বাবে বিভিন্ন অনলাইন সেৱা, মোবাইল ৰিচাৰ্জ, ডিজিটেল পেমেণ্ট, ফটোষ্টেট, কম্পিউটাৰ আৰু ইণ্টাৰনেট নিৰ্ভৰ ব্যৱসায় সম্পূৰ্ণৰূপে ব্যাহত হৈছে। ব্যৱসায়ীসকলে জনাইছে যে ঘণ্টাৰ পিছত ঘণ্টা বিদ্যুৎ নথকাৰ ফলত তেওঁলোকৰ যথেষ্ট আৰ্থিক ক্ষতি হৈছে, লগতে গ্ৰাহকসকলেও ব্যাপক অসুবিধাৰ সন্মুখীন হ'বলগীয়া হৈছে। ইফালে, তীব্ৰ গৰমৰ মাজত সাধাৰণ ৰাইজেও চরম দুৰ্ভোগ ভোগ কৰিছে, ঘৰে ঘৰে পানীৰ সমস্যা হোৱাৰ লগতে ছাত্ৰ-ছাত্ৰীসকলৰ অধ্যয়নতো ইয়াৰ প্ৰভাৱ পৰিছে। বহু ৰাইজে ক্ষোভ প্ৰকাশ কৰিছে যে তেওঁলোকে নিশা আন্ধাৰত কটাবলগীয়া হৈছে। স্থানীয় ৰাইজে অভিযোগ উত্থাপন কৰিছে যে সঘনাই বিদ্যুৎ বিভ্ৰাট হোৱাৰ পিছতো সংশ্লিষ্ট বিভাগে ইয়াৰ স্থায়ী সমাধানৰ বাবে কোনো ফলপ্ৰসূ পদক্ষেপ গ্ৰহণ কৰা নাই। সেয়েহে, কয়াকুছিবাসীয়ে অতি শীঘ্ৰে বিদ্যুৎ যোগান স্বাভাৱিক কৰাৰ দাবী জনাইছে।

কামৰূপ জিলাৰ অন্তৰ্গত বালাগাঁও কোচপাৰাত অনুষ্ঠিত হোৱা চতুৰ্থ বাৰ্ষিক সাংস্কৃতিক সন্ধিয়াৰ সফল সামৰণি পৰে। এই আয়োজনে অঞ্চলটোত সাংস্কৃতিক সমাৱেশৰ পৰম্পৰা অব্যাহত ৰাখে।