મોરબીના શોભેશ્વર રોડ ઉપર એક ભત્રીજાની ઘાતકી હથિયારથી માર મારીને હત્યા કરવામાં આવી છે. પ્રાપ્ત માહિતી અનુસાર, આ હત્યા કાકા સહિતના અન્ય ત્રણ ઈસમો દ્વારા કરવામાં આવી હતી.

મોરબી તાલુકાના જેતપર ગામમાં વીજ લાઈન અને યોગ્ય વળતરના મુદ્દે ખેડૂતો દ્વારા ચલાવવામાં આવી રહેલા આમરણાંત ઉપવાસ આંદોલનનો આજે ત્રીજો દિવસ પૂર્ણ થયો હતો. ખેડૂતોની માંગણીઓ અંગે હજુ સુધી કોઈ સકારાત્મક નિર્ણય ન આવતા આ આંદોલન વધુ ઉગ્ર બની રહ્યું છે. આંદોલનના ત્રીજા દિવસે ખેડૂતો અને ગ્રામજનોએ ઉપવાસ છાવણી ખાતે ગૌતમ અદાણીની ‘માનવતા’નું પ્રતિકાત્મક બેસણું યોજીને પોતાનો રોષ અનોખી રીતે વ્યક્ત કર્યો હતો. ખેડૂતોએ જણાવ્યું છે કે તેમની રજૂઆતો અને વિરોધ છતાં વીજ લાઈનનું કામ ચાલુ રાખવામાં આવી રહ્યું છે, જે તેમની લાગણીઓની અવગણના સમાન છે. આંદોલનને વધુ મજબૂત બનાવવા માટે ગઈકાલે રાત્રે લગભગ 15 જેટલા ખેડૂતોએ પ્રતીકાત્મક વિરોધ તરીકે મુંડન પણ કરાવ્યું હતું. ઉપવાસ છાવણી ખાતે મોટી સંખ્યામાં ખેડૂતો અને ગ્રામજનો ઉપસ્થિત રહીને આંદોલનને સમર્થન આપી રહ્યા છે. હાલમાં જેતપર ગામમાં આમરણાંત ઉપવાસ ચાલુ છે અને ખેડૂતોનો સ્પષ્ટ મત છે કે જ્યાં સુધી તેમને યોગ્ય વળતર અને ન્યાય નહીં મળે ત્યાં સુધી આ આંદોલન યથાવત રહેશે. ખેડૂતો દ્વારા પોતાની માંગણીઓને મજબૂતીથી રજૂ કરવા માટે વિવિધ પ્રતીકાત્મક કાર્યક્રમો, રામધૂન, ભજન અને વિરોધ પ્રદર્શનો યોજવામાં આવી રહ્યા છે. જેતપરમાં ચાલી રહેલું આ આંદોલન હવે આસપાસના ગામોના ખેડૂતોનું પણ સમર્થન મેળવી રહ્યું છે, જેના કારણે આ મુદ્દો સમગ્ર પંથકમાં ચર્ચાનો વિષય બન્યો છે.

મોરબી જિલ્લાના જેતપર ખાતે આવતીકાલે ખેડૂતોના હક્ક અને હિતના સમર્થનમાં એક ભવ્ય લોક ડાયરાનું આયોજન કરવામાં આવ્યું છે. આ કાર્યક્રમમાં લોકપ્રિય લોકગાયક હકભા ગઢવી સહિત અનેક જાણીતા કલાકારો ઉપસ્થિત રહી પોતાના સ્વરથી ખેડૂતોને સમર્થન આપશે. આ લડતમાં સહભાગી બનવા અને ખેડૂતોના હક્ક માટે મોટી સંખ્યામાં ઉપસ્થિત રહેવા સૌને અનુરોધ કરવામાં આવ્યો છે.

સુરેન્દ્રનગર જિલ્લાના ચુડા ગામે વિચરતી વિમુક્ત જાતિના લોકોનું ઘરના ઘરનું સપનું સાકાર થયું છે. આ પ્રસંગે આ સમુદાયના લોકોને પોતાના આવાસ મળ્યાનો સંતોષ વ્યક્ત કરવામાં આવ્યો છે.

જસદણ તાલુકાના આટકોટ ગોચરમાં વહીવટીતંત્ર દ્વારા દબાણ હટાવવાની કાર્યવાહી હાથ ધરવામાં આવી હતી. આ કાર્યવાહી દરમિયાન મામલતદાર, તાલુકા વિકાસ અધિકારી અને પોલીસ સ્ટાફ ઉપસ્થિત રહ્યા હતા. આટકોટના નવા ગામ તળ પર આવેલી આશરે ૨૦ વીઘા જમીન પર દબાણ થયું હતું, જે વાસ્તવમાં ગરીબ લોકોને ૧૦૦ ચોરસ વારના પ્લોટ ફાળવવા માટે હતી. તંત્ર દ્વારા આ દબાણ હટાવવાની કામગીરી હાથ ધરવામાં આવતા, જમીન પર દબાણ કરનારાઓમાં ભારે ફફડાટ વ્યાપી ગયો હતો. વહીવટીતંત્ર દ્વારા આટકોટ ગોચરમાં થયેલું દબાણ સફળતાપૂર્વક હટાવી દેવામાં આવ્યું છે.

પાટણ જિલ્લાના સાંતલપુરમાં છેલ્લા ઘણા સમયથી ગટરની સમસ્યાએ ગંભીર સ્વરૂપ ધારણ કર્યું છે. ખુલ્લી ગટર, તૂટેલા ઢાંકણા અને ગંદા પાણીના ભરાવાને કારણે સ્થાનિક નાગરિકોમાં ભારે રોષ જોવા મળી રહ્યો છે. આ સમસ્યાના કારણે સાંતલપુરના લોકો ખુલ્લી ગટર અને ગંદા પાણીથી ત્રાહિમામ પોકારી ઉઠ્યા છે.

૨૧ જૂન, 'આંતરરાષ્ટ્રીય યોગ દિવસ' ના પાવન અવસરે, તા. ૨૧ જૂન ૨૦૨૬ ના રોજ ઐતિહાસિક તીર્થધામ સારંગપુર સ્થિત BAPS સ્વામિનારાયણ મંદિરમાં આ દિવસની અત્યંત ઉત્સાહપૂર્વક ઉજવણી કરવામાં આવી હતી. BAPS સંસ્થાના આધ્યાત્મિક વડા પ્રગટ ગુરુહરિ પરમ પૂજ્ય મહંત સ્વામી મહારાજના દિવ્ય સાંનિધ્યમાં યોજાયેલા આ કાર્યક્રમમાં શારીરિક સ્વાસ્થ્ય અને આધ્યાત્મિક શાંતિનો અદ્ભુત સમન્વય જોવા મળ્યો હતો. ભારતીય સંસ્કૃતિની પ્રાચીન ધરોહર સમાન 'યોગ' ના મહિમાને ઉજાગર કરવા માટે સારંગપુર મંદિર પરિસરમાં વહેલી સવારે એક વિશેષ સત્રનું આયોજન કરાયું હતું. જેમાં સંસ્થાના સંતો, યુવકો અને વિશાળ સંખ્યામાં ઉપસ્થિત હરિભક્તોએ શિસ્તબદ્ધ રીતે વિવિધ યોગાસનો અને પ્રાણાયામનો અભ્યાસ કર્યો હતો, જેનાથી સમગ્ર વાતાવરણ ઊર્જાવાન અને પવિત્ર બની ગયું. ભારતીય ઋષિમુનિઓએ આપેલું યોગશાસ્ત્ર માત્ર શારીરિક કસરત પૂરતું સીમિત નથી; 'યોગ' નો સાચો અર્થ આત્માનું પરમાત્મા સાથેનું જોડાણ છે. આ ઉજવણીનો ઉદ્દેશ્ય સ્પષ્ટ હતો કે, જો શરીર સ્વસ્થ હશે તો જ ભગવાનની ભક્તિ અને સમાજની સેવા ઉત્તમ રીતે થઈ શકશે. આ દિવ્ય પ્રસંગે પરમ પૂજ્ય મહંત સ્વામી મહારાજે સૌને પોતાના આશીર્વાદ પાઠવ્યા હતા અને ઉપસ્થિત ભક્તોને નિયમિત યોગાસન, પ્રાણાયામ તેમજ વ્યાયામ કરવાની પ્રેરણા આપી હતી. પ.પૂ. મહંત સ્વામી મહારાજના આશીર્વાદ અને માર્ગદર્શન હેઠળ સારંગપુરમાં ઉજવાયેલો આ 'આંતરરાષ્ટ્રીય યોગ દિવસ' સૌના માટે સ્વાસ્થ્ય, શાંતિ અને ભક્તિનો એક અનોખો સંદેશ આપી ગયો.

બોટાદ જિલ્લામાં ૧૨મા આંતરરાષ્ટ્રીય યોગ દિવસની ભવ્ય ઉજવણી કરવામાં આવી, જ્યાં જિલ્લા પંચાયતના પ્રમુખશ્રી પાયલબેન માથોળીયાની અધ્યક્ષતામાં અને જિલ્લા કલેક્ટરશ્રી હર્ષદ વોરાની વિશેષ ઉપસ્થિતિમાં સરકારી હાઈસ્કૂલ ખાતે જિલ્લાકક્ષાનો મુખ્ય કાર્યક્રમ યોજાયો. 'સ્વસ્થ જીવન માટે યોગ'ની થીમ સાથે બોટાદ જિલ્લામાં સાળંગપુર સહિત ૨૫૦થી વધુ સ્થળોએ અંદાજે ૭૫,૦૦૦થી વધુ લોકોએ ઉત્સાહભેર યોગાભ્યાસ કરી આ દિવસની ઉજવણી કરી હતી. વડાપ્રધાનશ્રી નરેન્દ્ર મોદીના દૂરંદેશી નેતૃત્વ હેઠળ ભારતે વિશ્વ સમક્ષ યોગની પ્રાચીન અને વૈજ્ઞાનિક પરંપરાને નવી ઓળખ આપી છે, જેના પરિણામે વર્ષ ૨૦૧૪માં સંયુક્ત રાષ્ટ્ર મહાસભામાં પ્રધાનમંત્રીશ્રીના પ્રસ્તાવને ૧૭૭ દેશોનું સમર્થન મળ્યા બાદ દર વર્ષે ૨૧ જૂને આંતરરાષ્ટ્રીય યોગ દિવસ મનાવાય છે. આજે યોગ માત્ર વ્યાયામ નથી, પરંતુ સ્વસ્થ જીવનશૈલી, માનસિક શાંતિ અને સર્વાંગી સુખાકારીનું વૈશ્વિક આંદોલન બની ચૂક્યો છે. જિલ્લાકક્ષાના કાર્યક્રમ ઉપરાંત, ગઢડા તાલુકાના મામલતદાર કચેરી ગ્રાઉન્ડ, બરવાળા તાલુકાના શ્રી કષ્ટભંજન દેવ હનુમાનજી મંદિર-સાળંગપુર, બોટાદ તાલુકાની મોડેલ સ્કૂલ-ખાસ રોડ અને રાણપુર તાલુકાની ગીતાંજલી ગ્લોબલ સ્કૂલ સહિત જિલ્લાના વિવિધ સ્થળોએ પણ સામૂહિક યોગાભ્યાસના કાર્યક્રમો યોજાયા હતા. આ પ્રસંગે કોલકાતામાં વડાપ્રધાનશ્રીના રાષ્ટ્રીય કાર્યક્રમ અને ગાંધીનગરમાં મુખ્યમંત્રીશ્રીની અધ્યક્ષતામાં યોજાયેલા રાજ્યકક્ષાના કાર્યક્રમનું જીવંત પ્રસારણ પણ ઉપસ્થિત સૌએ નિહાળ્યું હતું. જિલ્લા કલેક્ટરશ્રી હર્ષદ વોરાએ પોતાના સંબોધનમાં 'સ્વસ્થ જીવન માટે યોગ'ના સંદેશને જનજન સુધી પહોંચાડવા માટે જિલ્લામાં યોજાયેલા ૨૫૦થી વધુ કાર્યક્રમો અને ૭૫,૦૦૦થી વધુ લોકોની ઉત્સાહભરી ભાગીદારીને બિરદાવી હતી. બોટાદ જિલ્લાના યોગ કોઓર્ડિનેટર પ્રવીણભાઈ કળથીયાએ વર્ષ ૨૦૨૬ની થીમને અનુરૂપ યોગના વૈજ્ઞાનિક, શારીરિક અને માનસિક લાભો વિશે વિસ્તૃત માર્ગદર્શન આપી નિયમિત યોગાભ્યાસ દ્વારા નિરોગી અને સંતુલિત જીવન જીવવા પ્રેરણા આપી હતી. આ કાર્યક્રમમાં જિલ્લા પોલીસ અધિક્ષક ધર્મેન્દ્ર શર્મા, નિવાસી અધિક કલેક્ટરશ્રી પી.એલ. ઝણકાત, ડી.આર.ડી.એ. નિયામક ભાર્ગવ પટેલ, બોટાદ પ્રાંત અધિકારીશ્રી આરતીબેન ગોસ્વામી, જિલ્લા પુરવઠા અધિકારી અર્જુન ચાવડા, જિલ્લા શિક્ષણાધિકારીશ્રી ભારત વાઢેર, જિલ્લા આયોજન અધિકારીશ્રી સહિત વિવિધ વિભાગોના અધિકારીઓ, પદાધિકારીઓ, યોગ પ્રશિક્ષકો અને મોટી સંખ્યામાં યોગપ્રેમીઓ ઉપસ્થિત રહ્યા હતા. આ ઉજવણી પ્રધાનમંત્રીશ્રીના નેતૃત્વમાં ૧૨ વર્ષના વિકાસ, વિશ્વાસ અને જનકલ્યાણના સંકલ્પને પણ પ્રતિબિંબિત કરતી હતી.

આજે સમગ્ર દેશમાં 12મા આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવી હતી, ત્યારે બોટાદ જિલ્લામાં પણ જિલ્લા કક્ષાએ યોગ દિવસની વિશેષ ઉજવણીનું આયોજન કરાયું હતું. બોટાદ શહેરની સરકારી હાઈસ્કૂલ ખાતે જિલ્લા વહીવટી તંત્ર દ્વારા આયોજિત આ કાર્યક્રમમાં મોટી સંખ્યામાં જનપ્રતિનિધિઓ, અધિકારીઓ અને વિદ્યાર્થીઓએ ભાગ લીધો હતો. આ અવસરે સૌએ યોગના મહત્વ અંગે સંદેશ આપી યોગના ફાયદાઓ પર ભાર મૂક્યો હતો.

મોરબી જિલ્લામાં પ્રોહિબિશન વિરોધી ઝુંબેશ અંતર્ગત વાંકાનેર તાલુકા પોલીસે મોટી કાર્યવાહી હાથ ધરી છે. પોલીસે નીરણ (સુકા ઘાસ)ની આડમાં ભારતીય બનાવટનો વિદેશી દારૂ લઈ જતી એક છકડો રિક્ષા ઝડપી પાડી હતી. આ કાર્યવાહીમાં પોલીસે કુલ ₹2,73,718ના મુદ્દામાલ સાથે રાજપાલસિંહ ઘનશ્યામસિંહ વાઘેલા નામના એક આરોપીની ધરપકડ કરી છે, જ્યારે અન્ય બે આરોપીઓને વોન્ટેડ જાહેર કરી તેમની શોધખોળ શરૂ કરવામાં આવી છે. પોલીસ મહાનિરીક્ષક, કચ્છ બોર્ડર રેન્જ, ચિરાગ કોરડિયા અને મોરબી જિલ્લા પોલીસ અધિક્ષક મુકેશ પટેલના માર્ગદર્શન હેઠળ જિલ્લામાં પ્રોહિબિશન અને જુગારની બદી નાબૂદ કરવા ખાસ ડ્રાઇવ ચલાવવામાં આવી રહી છે. આ ડ્રાઇવના ભાગરૂપે નાયબ પોલીસ અધિક્ષક એસ.એચ. સારડાના માર્ગદર્શન હેઠળ વાંકાનેર તાલુકા પોલીસ સતર્ક પેટ્રોલિંગમાં હતી. પીએસઆઈ ડી.વી. ખાંભલા અને પોલીસ સ્ટાફ તીથવા ઓપી વિસ્તારમાં પેટ્રોલિંગ કરી રહ્યા હતા, ત્યારે તેમને અરણીટીંબા ગામના બોર્ડ નજીકથી એક છકડો રિક્ષા દ્વારા નીરણની આડમાં વિદેશી દારૂનો જથ્થો મિતાણા તરફ લઈ જવાઈ રહ્યો હોવાની ચોક્કસ બાતમી મળી હતી. આ બાતમીના આધારે પોલીસે અરણીટીંબા ગામ નજીક વોચ ગોઠવી હતી. થોડીવારમાં શંકાસ્પદ છકડો રિક્ષા આવતા પોલીસે તેને રોકી તપાસ કરતા નીરણના ઢગલા નીચેથી અલગ-અલગ બ્રાન્ડની ભારતીય બનાવટની વિદેશી દારૂની કુલ 287 બોટલો મળી આવી હતી. પોલીસે ₹2,13,718ની કિંમતનો વિદેશી દારૂ, ₹50,000ની કિંમતની છકડો રિક્ષા અને ₹10,000નો મોબાઇલ ફોન સહિત કુલ ₹2,73,718નો મુદ્દામાલ કબજે કર્યો હતો. પકડાયેલા આરોપી રાજપાલસિંહ ઘનશ્યામસિંહ વાઘેલા (ઉંમર 20, રહે. પાળીયાદ, જિ. બોટાદ)ની પ્રાથમિક પૂછપરછમાં જાણવા મળ્યું કે, દારૂનો આ જથ્થો બોટાદ જિલ્લાના તરઘરા ગામના અજયભાઈ ખાચર દ્વારા આપવામાં આવ્યો હતો અને વિરવાવના અજયસિંહ હામુભા જાડેજાને પહોંચાડવાનો હતો. પોલીસે હવે આ બંને વોન્ટેડ આરોપીઓને પકડવા માટે કાર્યવાહી તેજ કરી છે. આ સફળ કામગીરીમાં પીઆઈ બી.વી. પટેલ, પીએસઆઈ ડી.વી. ખાંભલા, એએસઆઈ ગોપાલભાઈ કાલરિયા, હેડ કોન્સ્ટેબલ કિર્તીસિંહ જાડેજા, તેમજ પોલીસ કર્મચારીઓ અક્ષયરાજસિંહ પરમાર, ભરતભાઈ બોસીયા અને ક્રિપાલ ખિમાણીયા સામેલ હતા.