திருப்பத்தூர் மாவட்டம் ஆம்பூர் டவுன் போலீசார் நேற்று மாலை ரோந்து பணியில் ஈடுபட்டிருந்தபோது, தடை செய்யப்பட்ட பாக்கு மற்றும் குட்கா வகைகளை விற்பனை செய்த இருவரைக் கைது செய்துள்ளனர். ஆம்பூர் ஏ கஸ்பா 2-வது தெரு பகுதியைச் சேர்ந்த முருகன் மகன் ராஜா (35) என்பவரது கடையில் போலீசார் சோதனை நடத்தியபோது, அங்கிருந்து தடை செய்யப்பட்ட பாக்கு மற்றும் குட்கா வகைகள் பறிமுதல் செய்யப்பட்டன. இதேபோன்று, தமிழ்நாடு வீட்டு வசதி குடியிருப்பு பகுதியில் முகமது அஹமத் மகன் இஸ்மாயில் (57) என்பவரின் கடையிலும் தடை செய்யப்பட்ட குட்கா மற்றும் பாக்கு வகைகள் பறிமுதல் செய்யப்பட்டன. இந்த சட்டவிரோத விற்பனை தொடர்பாக போலீசார் வழக்கு பதிவு செய்து, நேற்று இரவு ராஜா மற்றும் இஸ்மாயில் ஆகிய இருவரையும் வேலூர் சிறையில் அடைத்தனர்.

திருப்பத்தூர் மாவட்டம் ஆம்பூர் கிருஷ்ணாபுரம் அருள்மிகு ஸ்ரீ சீனிவாச பெருமாள் திருக்கோயிலில், நன்கொடை பணியாகப் புதிதாகக் கட்டப்பட்ட அறநிலையத்துறை அலுவலகம், ஆலய அர்ச்சகர் வீடு மற்றும் திருமணங்கள் அல்லது பொதுவான சிறிய சுப நிகழ்ச்சிகளுக்கான சிறிய மண்டபம் ஆகியவற்றின் திறப்பு விழா மற்றும் கணபதி பூஜை ஜூலை 12 அன்று அதிகாலை நடைபெற்றது. இந்த புதிய கட்டிடங்களைக் கட்டப் பொறுப்பேற்றுச் சிறப்பாகக் கட்டி முடித்த சேகர் ரெட்டியார் மற்றும் ஆலய அறங்காவலர் குழுத் தலைவராக இருந்த கீதா சேகர் ஆகியோர் தலைமையில் இன்று இந்த திறப்பு விழா நடைபெற்றது.

திருப்பத்தூர் மாவட்டம் ஜோலார்பேட்டை நகராட்சி சோலையூர் பகுதியில் எழுந்தருளியிருக்கும் ஸ்ரீ செல்வவிநாயகர், ஸ்ரீ கெங்கையம்மன், ஸ்ரீ மாரியம்மன் மற்றும் நவகிரக மூர்த்திகள் ஆலய அஷ்டபந்த மஹா கும்பாபிஷேக விழா மிகச் சிறப்பாக நடைபெற்றது. இவ்விழாவின் போது காலையில் சுவாமிக்கு மகா அஷ்டபந்த ஹோமம் மற்றும் திருமாங்கல்யதாரணம் ஆகிய வழிபாடுகள் சிறப்பாக நடைபெற்றன. இந்த ஆன்மீக வழிபாட்டு நிகழ்வில் சிறப்பு அழைப்பாளர்கள், முக்கிய பிரமுகர்கள் மற்றும் ஏராளமான பொதுமக்கள் நேரில் கலந்து கொண்டு சுவாமி தரிசனம் செய்தனர். அதனைத் தொடர்ந்து, கும்பாபிஷேக விழாவில் பங்கேற்ற பக்தர்கள் அனைவருக்கும் சிறப்பான அறுசுவை அன்னதானம் வழங்கப்பட்டது.

கிருஷ்ணகிரி நகரின் மையப் பகுதியில் அமைந்துள்ள தூய பாத்திமா அன்னை திருத்தலத்தின் 53-வது வருட திருத்தல தேர்திருவிழா கடந்த ஜூலை 4-ஆம் தேதி கொடியேற்றத்துடன் தொடங்கியது. இவ்விழாவின் முக்கிய நிகழ்வான அன்னையின் தேர்பவனி வெகு விமர்சையாக நடைபெற்றது. வண்ண விளக்குகளாலும், மலர்களாலும் அலங்கரிக்கப்பட்டிருந்த அன்னையின் திருத்தேர் பவனியை, தருமபுரி மறைமாவட்ட ஆயர் மேதகு லாரன்ஸ் பயஸ் மந்திரித்து முறைப்படி துவக்கி வைத்தார்.

தர்மபுரி மாவட்டம் காரிமங்கலத்தில் உள்ள பிரசித்தி பெற்ற ஸ்ரீகோடாலம்மன் திருக்கோயிலுக்கு சொந்தமான இடங்களில் சுமார் 2 கோடி ரூபாய் இழப்பு ஏற்பட்டுள்ளதாகக் கூறி, இந்து சமய அறநிலையத்துறை அதிகாரிகள் மற்றும் காரிமங்கலம் காவல் ஆய்வாளர் மீது திருத்தொண்டர்கள் அறக்கட்டளை அறங்காவலர் ராதாகிருஷ்ணன் காவல் நிலையத்தில் புகார் அளித்துள்ளார். இந்து சமய அறநிலையத் துறையின் கட்டுப்பாட்டில் உள்ள இக்கோயிலுக்குச் சொந்தமாக மொரப்பூர் நெடுஞ்சாலையில் 20-க்கும் மேற்பட்ட ஏக்கர் நிலம் உள்ளது. ஆனால், தற்போது இக்கோயில் சிதிலமடைந்து, விளக்கேற்றக் கூட பணம் இல்லாமல், மதுப்பிரியர்களின் கூடாரமாக மாறியுள்ளதாகக் கூறப்படுகிறது. இக்கோயிலை நேரில் பார்வையிட்ட திருத்தொண்டர்கள் அறக்கட்டளை அறங்காவலர் ராதாகிருஷ்ணன், கோயிலுக்குச் சொந்தமான நிலத்தில் உள்ள கட்டுமானங்களை ஆய்வு செய்தார். அப்போது, அங்குள்ள எந்தவொரு கட்டிடத்திலும் 'இந்து சமய அறநிலையத்துறை கட்டிடம்' என்பதற்கான பெயர்ப்பலகை இல்லாதது குறித்து இந்து அறநிலையத்துறை ஆய்வாளர் மற்றும் செயல் அலுவலர் கீர்த்தனா உள்ளிட்ட அதிகாரிகளிடம் அவர் சரமாரியாகக் கேள்விகளை எழுப்பினார். மேலும், கோயில் நிலத்தில் உள்ள கட்டிடங்களுக்கு முறையாக வாடகை வசூலிக்கப்படுகிறதா என்றும், புதிய கட்டுமானப் பணிகளுக்கான அனுமதி எவ்வாறு வழங்கப்பட்டது என்றும் அவர் கேட்டறிந்தார். இது தொடர்பாக முன்னதாக காவல் நிலையத்தில் அளிக்கப்பட்ட புகாரை, நிலப் பிரச்சனை எனக் கூறி போலீசார் நிராகரித்துள்ளனர். இந்த புகாரை உதாசீனம் செய்யும் வகையில் மனு நிராகரிக்கப்பட்டதால், கோயிலுக்குச் சொந்தமான இடத்தில் சுமார் 2 கோடி ரூபாய் இழப்பு ஏற்பட்டுள்ளதாகக் கூறி, காரிமங்கலம் காவல் நிலையத்தில் ராதாகிருஷ்ணன் மீண்டும் புகார் மனு அளித்துள்ளார். இந்த மனுவில், இந்து அறநிலையத்துறை ஆய்வாளர், செயல் அலுவலர் உள்ளிட்ட அதிகாரிகள் மீது துறை ரீதியான நடவடிக்கை எடுக்க வேண்டும் என்றும், காரிமங்கலம் காவல் ஆய்வாளர் மீதும் நடவடிக்கை எடுக்க வேண்டும் என்றும் வலியுறுத்தப்பட்டுள்ளது.

தர்மபுரி மாவட்டம் காரிமங்கலத்தில் இந்து அறநிலைத்துறை கட்டுப்பாட்டில் உள்ள பிரசித்தி பெற்ற ஸ்ரீகோடாளம்மன் திருக்கோவில் சிதலமடைந்து, விளக்கு ஏற்றக்கூட பணம் இல்லாமல் மதுப்பிரியர்களின் கூடாரமாக மாறியுள்ளதாகக் கூறப்படுகிறது. மொரப்பூர் நெடுஞ்சாலையில் இக்கோயிலுக்குச் சொந்தமாக சுமார் 20-க்கும் மேற்பட்ட ஏக்கர் நிலம் உள்ளது. இக்கோயிலை நேரில் பார்வையிட்ட திருத்தொண்டர்கள் அறக்கட்டளை அறங்காவலர் ராதாகிருஷ்ணன், கோயிலுக்குச் சொந்தமான நிலத்தில் உள்ள கட்டுமானங்களை ஆய்வு செய்தார். தொடர்ந்து, இந்து அறநிலைத்துறை ஆய்வாளர் மற்றும் செயல் அலுவலரிடம் எந்தவொரு கட்டிடத்திலும் 'இந்து அறநிலைத்துறை கட்டிடம்' என்ற பெயர் பலகை இல்லாதது, கட்டிடங்களுக்கு வாடகை முறையாக வசூலிக்கப்படுகிறதா என்பது மற்றும் புதிய கட்டுமான பணிகளுக்கு எவ்வாறு அனுமதி கொடுக்கப்பட்டது என்பது குறித்து சரமாரியாகக் கேள்வி எழுப்பினார். இது தொடர்பாக முன்னதாக காவல் நிலையத்தில் அளிக்கப்பட்ட புகார், நிலப் பிரச்சனை எனக் கூறி நிராகரிக்கப்பட்டது. இந்த நிலையில், கோயிலுக்குச் சொந்தமான இடத்தில் சுமார் ₹2 கோடி ரூபாய் இழப்பு ஏற்பட்டுள்ளதாகக் கூறி, காரிமங்கலம் காவல் நிலையத்தில் இந்து அறநிலைத்துறை ஆய்வாளர், செயல் அலுவலர் மற்றும் காரிமங்கலம் காவல் ஆய்வாளர் ஆகியோர் மீது துறை ரீதியான நடவடிக்கை எடுக்கக் கோரி அறங்காவலர் ராதாகிருஷ்ணன் புகார் மனு அளித்துள்ளார்.

ஒசூர் கெலவரப்பள்ளி அணையின் இடதுபுற பாசனக் கால்வாயில் நடைபெற்று வரும் சீரமைப்புப் பணிகளை வேப்பனஹள்ளி சட்டமன்ற உறுப்பினர் சீனிவாசன் நேரில் சென்று ஆய்வு செய்தார். ஓசூர் தொகுதி ஆளூர் பகுதி முதல் சூளகிரி தொகுதி வரை உள்ள கால்வாய் பகுதிகளை இருசக்கர வாகனத்தில் சென்றே அவர் ஆய்வு மேற்கொண்டார். இந்த ஆய்வுப் பணியின்போது, நான்கு சக்கர வாகனங்கள் செல்ல முடியாத இடங்களிலும் நேரில் சென்று பணிகளின் தரத்தையும் முன்னேற்றத்தையும் அவர் பார்வையிட்டார். கடந்த ஆண்டு முன்னாள் முதலமைச்சர் கவனத்திற்கு கொண்டு செல்லப்பட்டதையடுத்து, இந்தக் கால்வாய் சீரமைப்பிற்காக ₹8.5 கோடி நிதி ஒதுக்கீடு பெறப்பட்டு தற்போது பணிகள் விறுவிறுப்பாக நடைபெற்று வருகின்றன. கால்வாய் சீரமைப்புப் பணிகள் தற்போது 80 விழுக்காடு நிறைவடையும் நிலையில் இருப்பதாகத் தெரிவித்துள்ள சீனிவாசன், மீதமுள்ள பணிகளை விரைந்து முடிக்குமாறு சம்பந்தப்பட்ட துறை சார்ந்த அதிகாரிகளுக்கு அறிவுறுத்தல்களை வழங்கியுள்ளார். விவசாயிகளின் கோரிக்கையை ஏற்று, நடப்பு ஜூலை மாத இறுதிக்குள் அனைத்துப் பணிகளையும் முழுமையாக முடித்து, பாசனத்திற்காகக் கால்வாயில் தண்ணீர் திறந்து விட போர்க்கால அடிப்படையில் நடவடிக்கைகள் எடுக்கப்படும் என அவர் உறுதியளித்தார். இந்த ஆய்வின்போது உள்ளூர் விவசாயப் பிரதிநிதிகள் மற்றும் திமுக நிர்வாகிகள் உடனிருந்தனர்.

தர்மபுரி மாவட்டம் பென்னாகரம் தாலுக்கா அச்சனஅள்ளி கிராமத்தைச் சேர்ந்த சக்திவேல் என்பவரின் மகள் நர்மதா (19) மற்றும் அதே பகுதியைச் சேர்ந்த குமாரின் மகன் பெருமாள் (21) ஆகிய இருவரும் கடந்த 4 ஆண்டுகளாகக் காதலித்து வந்துள்ளனர். டிப்ளமோ படித்துள்ள நர்மதாவும், பட்டதாரியான பெருமாளும், பெற்றோர்களின் எதிர்ப்பையும் மீறி இன்று காலை பாலக்கோடு அருகே உள்ள மணியாகரன் கொட்டாய் சிவன் கோயிலில் திருமணம் செய்து கொண்டனர். பெற்றோர்களுக்குப் பயந்து பாதுகாப்பு கோரி இருவரும் பாலக்கோடு காவல் நிலையத்தில் தஞ்சம் அடைந்தனர். காவல்துறையினர் இருவரின் பெற்றோர்களுக்கும் தகவல் தெரிவித்ததையடுத்து, காவல் நிலையம் வந்த பெண்ணின் பெற்றோர் இந்தத் திருமணத்திற்கு எதிர்ப்பு தெரிவித்தனர். இருப்பினும், காதலனுடன்தான் செல்வேன் என்று நர்மதா உறுதியாகக் கூறியதால், காவல்துறையினர் அவரை காதலனுடன் அனுப்பி வைத்தனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

தருமபுரி மாவட்டம் பாப்பிரெட்டிப்பட்டியில் அண்ணாமலை துவக்கியுள்ள "We The Leaders" அமைப்பின் சார்பில், போதை இல்லாத தருமபுரி மாவட்டத்தை உருவாக்க வேண்டும் என வலியுறுத்தி விழிப்புணர்வு பேரணி மற்றும் கருத்தரங்கம் நடைபெற்றது. டெல்லி பழனிவேல் தலைமையில் நடைபெற்ற இந்த பேரணியை, சிறப்பு அழைப்பாளராகப் பங்கேற்ற கரு நாகராஜன் கொடியசைத்து துவக்கி வைத்தார். பாப்பிரெட்டிப்பட்டி ஸ்டான்லி பள்ளி அருகில் இருந்து தொடங்கிய இந்த பேரணி அங்குள்ள பேருந்து நிலையம் வரை நடைபெற்றது. பேரணியில் பங்கேற்றவர்கள் போதை ஒழிப்பு குறித்து பொதுமக்களுக்கு விழிப்புணர்வு ஏற்படுத்தும் வகையில் விழிப்புணர்வு கோஷங்களை எழுப்பியும், துண்டு பிரசுரங்களை வழங்கியும் விழிப்புணர்வு ஏற்படுத்தினர். தொடர்ந்து, போதையில்லா தமிழகத்தை உருவாக்க அனைவரும் உறுதிமொழி ஏற்றுக்கொண்டனர். இதனைத் தொடர்ந்து, சாமியாபுரம் கூட்ரோட்டில் உள்ள தனியார் திருமண மண்டபத்தில் கருத்தரங்கம் நடைபெற்றது. இந்த நிகழ்வில் தமிழ்மணி, வேலுமணி, சிவகுமார், ஒருங்கிணைப்பாளர்கள் சாய்சத்யன், ராஜா, கிருஷ்ணாசாய், சிமோன் கிறிஸ்டி, கார்த்திக், பிரபு, கடத்தூர் குமார், சுக்ரி, சத்திவேல், மணி கல்பனா, வடபழனி ராஜா, சிவன், ராம் உள்ளிட்ட ஏராளமானோர் கலந்துகொண்டு, போதை இல்லா தருமபுரி மாவட்டத்தை உருவாக்க வலியுறுத்தி உறுதிமொழி ஏற்றுக்கொண்டனர்.