కర్ణాటకలోని శివమొగ్గ వద్ద తుంగ నది ప్రవాహం 40 వేల క్యూసెక్కులకు చేరుకుంది. శివమొగ్గతో పాటు ఎగువ ప్రాంతాల్లో కురుస్తున్న భారీ వర్షాల కారణంగా వరద ప్రవాహం క్రమంగా పెరుగుతోంది. ఈ వరద ప్రభావంతో రానున్న రోజుల్లో తుంగభద్ర జలాశయానికి గణనీయంగా నీరు చేరే అవకాశం ఉందని అధికారులు అంచనా వేస్తున్నారు. ఈ పరిస్థితి కర్ణాటక మరియు ఆంధ్రప్రదేశ్ రాష్ట్రాల్లోని తాగు, సాగునీటి అవసరాలకు ఎంతో అనుకూలమని రైతులు, ప్రజలు ఆశాభావం వ్యక్తం చేస్తున్నారు.

శ్రీ సత్యసాయి జిల్లా పుట్టపర్తిలో ప్రపంచ జనాభా దినోత్సవాన్ని పురస్కరించుకుని జిల్లా వైద్య మరియు ఆరోగ్యశాఖ ఆధ్వర్యంలో శనివారం ఘనంగా అవగాహన ర్యాలీ నిర్వహించారు. ఈ కార్యక్రమానికి జిల్లా కలెక్టర్ ఎ. శ్యామ్ ప్రసాద్ ముఖ్య అతిథిగా హాజరయ్యారు. జిల్లా వైద్య మరియు ఆరోగ్యశాఖ కార్యాలయం నుండి వై జంక్షన్ వరకు నిర్వహించిన ఈ భారీ అవగాహన ర్యాలీని కలెక్టర్ జెండా ఊపి ప్రారంభించారు. కుటుంబ నియంత్రణ, మాతా–శిశు ఆరోగ్యం, మహిళల సాధికారత, బాలికల విద్య, బాధ్యతాయుతమైన తల్లిదండ్రత్వం మరియు సమతుల్య జనాభా ద్వారా ఆరోగ్యవంతమైన సమాజ నిర్మాణంపై ప్రజల్లో అవగాహన కల్పించడమే ధ్యేయంగా ఈ కార్యక్రమం సాగింది. ఈ సందర్భంగా జిల్లా కలెక్టర్ మాట్లాడుతూ, భారత ప్రభుత్వం ఈ ఏడాది నిర్దేశించిన నినాదాన్ని ప్రజల్లోకి బలంగా తీసుకెళ్లాలని వైద్య ఆరోగ్యశాఖ సిబ్బందికి సూచించారు. "పిల్లల మధ్య సరైన ఎడం – ఆరోగ్యకరమైన, ఆనందకరమైన కుటుంబానికి ఆధారం", "పిల్లల మధ్య ఎడం పాటిద్దాం – ఆరోగ్యవంతమైన, సంతోషకరమైన కుటుంబాన్ని నిర్మిద్దాం" అనే నినాదాలతో ప్రజల్లో చైతన్యం తీసుకురావాలని పిలుపునిచ్చారు. జననాల మధ్య సరైన విరామం, మాతా–శిశు సంక్షేమం, మహిళల ఆరోగ్యం మరియు లింగ సమానత్వంపై ప్రజలను చైతన్యపరచడమే ఈ దినోత్సవం ముఖ్య ఉద్దేశమని కలెక్టర్ తెలిపారు. ప్రభుత్వం ఆసుపత్రుల ద్వారా ఉచితంగా అందిస్తున్న కుటుంబ నియంత్రణ సేవలను దంపతులు సద్వినియోగం చేసుకోవాలని కోరారు. జిల్లా వైద్య మరియు ఆరోగ్య అధికారి (DM&HO) డాక్టర్ ఎస్. ఫైరోజా బేగం ఆధ్వర్యంలో జరిగిన ఈ ర్యాలీలో ఎన్‌సీడీ–సీడీ ప్రోగ్రామ్ ఆఫీసర్ డాక్టర్ సునీల్ కుమార్, స్టాటిస్టికల్ ఆఫీసర్ కె. కళాధర్, డిపిహెచ్‌ఎన్‌ఓ వీరమ్మ, డిప్యూటీ డెమో సుబ్రహ్మణ్యం, జిల్లా ప్రోగ్రామ్ ఆఫీసర్ నాగరాజు పాల్గొన్నారు. వీరితో పాటు వైద్యాధికారులు డాక్టర్ సుమదుర, డాక్టర్ గాయత్రి, సీహెచ్‌ఓ శివరామ్, సూపర్‌వైజర్ రామమోహన్, అలాగే ఏఎన్‌ఎంలు, ఎంఎల్‌హెచ్‌పీలు, ఆశా కార్యకర్తలు ప్లకార్డులతో నినాదాలు చేస్తూ ఉత్సాహంగా పాల్గొన్నారు.

వైఎస్ఆర్ జిల్లా బద్వేల్ నియోజకవర్గ నూతన టీడీపీ ఇన్‌ఛార్జ్‌గా డీసీసీబీ ఛైర్మన్ మంచూరి సూర్యనారాయణరెడ్డికి సీఎం చంద్రబాబు బాధ్యతలు అప్పగించారు. ఈ నిర్ణయంతో సంతోషంలో మునిగిపోయిన ఆయన వర్గీయులు, అనుచరులు బద్వేల్ పట్టణంలోని నాలుగు రోడ్ల కూడలిలో బాణాసంచా పేలుస్తూ ఘనంగా సంబరాలు చేసుకుంటున్నారు. గతంలో ఈ నియోజకవర్గ ఇన్‌ఛార్జ్‌గా రితేశ్ రెడ్డి వ్యవహరించారు. ఇప్పుడు మంచూరి సూర్యనారాయణరెడ్డికి బాధ్యతలు అప్పగించడంతో ఆయన అనుచరులు బద్వేలులో పెద్ద ఎత్తున విజయోత్సవాలు జరుపుకుంటున్నారు.

కర్నూలు జిల్లా పెద్దకడబూరులో ఏబీఎన్ రిపోర్టర్‌కు ఫోన్ ద్వారా బెదిరింపులు వచ్చాయి. ఈ బెదిరింపుల ఘటనపై ఏపీయూడబ్ల్యూజే (APUWJ) ప్రతినిధులు పెద్దకడబూరు పోలీసులకు ఫిర్యాదు చేశారు.

ఎమ్మిగనూరు పట్టణంలో ఏపీఆర్టీసీ ఎంప్లాయిస్ యూనియన్ (AITUC) 75వ ఆవిర్భావ దినోత్సవం ఘనంగా జరిగింది. ఈ సందర్భంగా నిర్వహించిన కార్యక్రమంలో యూనియన్ ప్రతినిధులు ఏపీఆర్టీసీ ఎంప్లాయిస్ యూనియన్ జెండాను ఆవిష్కరించారు.

జోగులాంబ గద్వాల జిల్లా అలంపూర్ మున్సిపల్ పరిధిలోని స్థానిక మున్సిపల్ కార్యాలయంలో నేడు స్థానిక కమిషనర్ రాజేష్ ఆదేశానుసారం సీనియర్ అసిస్టెంట్లు సుప్రియ, ప్రియాంక ఆధ్వర్యంలో వర్షపు నీటి సంరక్షణపై ప్రతిజ్ఞ కార్యక్రమం నిర్వహించారు. ఈ సందర్భంగా వారు మాట్లాడుతూ వర్షపు నీటిని సంరక్షించుకోవడం వలన భవిష్యత్ తరాలకు నీటి కొరత లేకుండా చూడవచ్చని తెలిపారు. ఇందులో భాగంగా ప్రతి ఒక్కరూ తప్పకుండా వర్షపు నీటిని సంరక్షించుకోవాలని పిలుపునిచ్చారు.

నంద్యాల కోర్టులో జరిగిన జాతీయ మెగా లోక్ అదాలత్‌లో తమ ఆత్మీయులను కోల్పోయిన బాధితులకు ఇన్సూరెన్స్ కంపెనీల నుండి రూ. 3 కోట్ల 50 లక్షల ఆర్థిక సహాయం లభించింది. ఈ సందర్భంగా గౌరవ నంద్యాల మూడో అదనపు జిల్లా జడ్జి అమ్మన్న రాజు చేతుల మీదుగా బాధితులకు ఈ చెక్కులను పంపిణీ చేశారు. ఈ కష్టకాలంలో బాధితులకు అండగా నిలిచిన వకీల్ సాబ్ సుబ్బరాయుడుపై అభినందనల వర్షం కురుస్తోంది. ఈ కార్యక్రమంలో పాల్గొన్న జడ్జి అమ్మన్న రాజా మాట్లాడుతూ, జాతీయ మెగా లోక్ అదాలత్‌లో 125 మోటర్ వెహికల్ యాక్సిడెంట్ కేసులను పరిష్కరించినట్లు తెలిపారు. న్యాయవాదులు ఎన్నడూ లేని విధంగా కక్షిదారులు రాజీ పడేలా విశేష కృషి చేశారని కొనియాడారు. మోటర్ వెహికల్స్ యాక్సిడెంట్ కేసులు, జిల్లా కోర్టు స్థాయి సివిల్ కేసులు, బ్యాంకు వ్యవహారాలు, లిటికేషన్ కేసులు కలిపి దాదాపు 300 వరకు పరిష్కారం కానున్నాయని ఆయన పేర్కొన్నారు. ఇన్సూరెన్స్ కంపెనీలకు సంబంధించి న్యాయవాది సుబ్బరాయుడు మాట్లాడుతూ, ఇన్సూరెన్స్ కంపెనీల సహకారంతో పాటు కంపెనీల లీగల్ అడ్వైజర్ విజయ శేఖర్ రెడ్డి సహాయంతో 30 నుంచి 40 కేసులకు సంబంధించి రూ. 3 కోట్ల 50 లక్షల విలువైన చెక్కులను బాధితులకు పంపిణీ చేయడం జరిగిందని వివరించారు. బాధితుల పక్షాన నిలబడి అండగా నిలిచిన వకీల్ సాబ్ సుబ్బరాయుడికి అభినందనలు వ్యక్తమవుతున్నాయి.

అనంతపురం జిల్లా శెట్టూరు మండలం బొచ్చుపల్లి గ్రామంలో మొహరం వేడుకలు నిర్వహించలేదనే మనస్తాపంతో వన్నూరు స్వామి అనే వ్యక్తి గురువారం సెల్ టవర్ ఎక్కి ఆత్మహత్యాయత్నానికి పాల్పడ్డాడు. ఈ ఘటనతో స్థానికంగా తీవ్ర కలకలం రేగింది. సమాచారం అందుకున్న పోలీసులు, రెవెన్యూ అధికారులు మరియు గ్రామ పెద్దలు హుటాహుటిన సెల్ టవర్ వద్దకు చేరుకున్నారు. టవర్ పై ఉన్న వన్నూరు స్వామిని కిందకు దిగి రావాలని వారు పదేపదే విన్నవించినా, అతను వినిపించుకోకుండా మొండిగా అక్కడే ఉండిపోయాడు. దీనివల్ల అక్కడ ఆందోళనకరమైన పరిస్థితి నెలకొంది.