బాన్సువాడలో తెలంగాణ సాంస్కృతి సారథి ఆధ్వర్యంలో ఒక కళాజాత కార్యక్రమం జరిగింది. ఈ కార్యక్రమం ప్రధానంగా ప్లాస్టిక్ వాడకం, అలాగే తడి చెత్తను పొడి చెత్త నుండి వేరు చేయడం అనే అంశాలపై దృష్టి సారించింది.

మెదక్ జిల్లాలో మాజీ మంత్రి హరీష్ రావు, కేటీఆర్ వ్యాఖ్యలు పూర్తిగా బాధ్యతారాహిత్యమని డీసీసీ అధ్యక్షుడు ఆంజనేయులు గౌడ్ తీవ్రంగా విమర్శించారు. సోమవారం ఎమ్మెల్యే క్యాంపు కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడుతూ, మెదక్ జిల్లాకు శని పట్టడానికి హరీష్ రావు, కేటీఆర్ వల్లే కారణమని ధ్వజమెత్తారు. మెదక్ ఎమ్మెల్యే డాక్టర్ మైనంపల్లి రోహిత్ రావు, మాజీ ఎమ్మెల్యే మైనంపల్లి హనుమంతరావు ప్రజలకు జవాబుదారీతనంతో పనిచేస్తున్న నాయకులని ఆంజనేయులు గౌడ్ అన్నారు. ఎమ్మెల్యే రోహిత్ రావు గానీ, మైనంపల్లి హనుమంతరావు గానీ కమిషన్ల కోసం రాజకీయాలు చేసే వ్యక్తులు కాదని స్పష్టం చేశారు. వారికి, బీఆర్ఎస్ నాయకులకూ మధ్య “నక్కకు నాగలోకానికి ఉన్నంత తేడా” ఉందని వ్యాఖ్యానించారు. మాజీ డిప్యూటీ స్పీకర్ చేసిన వ్యక్తిగత విమర్శలు తగవని, “బడిమియా–చోటిమియా” వంటి వ్యాఖ్యలను మానుకోవాలని సూచించారు. అభివృద్ధికి చిరునామాగా ఎమ్మెల్యే రోహిత్ రావు నిలుస్తున్నారని ఆయన కొనియాడారు. కాంగ్రెస్ ప్రభుత్వం అమలు చేస్తున్న సంక్షేమ పథకాలతో ప్రజలు సంతోషంగా ఉన్నారని, ప్రజల పూర్తి మద్దతు కాంగ్రెస్‌కే ఉందని ఆంజనేయులు గౌడ్ పేర్కొన్నారు. ఈ సమావేశంలో మునిసిపల్ చైర్‌పర్సన్ కానుగురాధిక, వైస్ చైర్మన్ నరేష్ గౌడ్, మెదక్ కాంగ్రెస్ పార్టీ అధ్యక్షులు గంగాధర్, బ్లాక్ కాంగ్రెస్ అధ్యక్షులు హఫీజుద్దీన్ తదితరులు పాల్గొన్నారు.

రాజన్న సిరిసిల్ల జిల్లా బోయినపల్లి మండలం జగ్గారావు పల్లిలో గ్రామస్థులు పోచమ్మ బోనాలను అత్యంత వైభవంగా నిర్వహించారు. ఈ వేడుకలో మహిళలు ఉపవాసంతో తమ తలపై బోనం ఎత్తుకొని, డప్పు చప్పుళ్ల మధ్య, బైండ్ల పూజారుల విన్యాసాల నడుమ ఊరేగింపుగా పోచమ్మ ఆలయానికి చేరుకున్నారు. అక్కడ వారు నైవేద్యం సమర్పించి, తమ మొక్కులను చెల్లించుకున్నారు. ఈ సందర్భంగా సర్పంచ్ మధు మాట్లాడుతూ, గ్రామానికి సమృద్ధిగా వర్షాలు కురిసి సుభిక్షంగా ఉండాలని, పాడిపంటలు, గ్రామస్తులు బాగుండాలని పోచమ్మ తల్లిని వేడుకున్నట్లు తెలిపారు. పోచమ్మ బోనాల నిర్వహణకు సహకరించిన గ్రామస్థులందరికీ ఆయన ధన్యవాదాలు తెలియజేశారు.

కమ్మర్పల్లి మండలం పరిధిలోని అమీర్ నగర్ గ్రామంలో నిర్వహించిన శ్రమదాన కార్యక్రమంలో మానాల మరియు మోహన్ రెడ్డిలు పాల్గొన్నారు.

నిర్మల్ జిల్లాలోని బాసర అమ్మవారి ఉప ఆలయమైన మహాకాళి అమ్మవారి ఆలయంలో భారీ చోరీ జరిగింది. చోరీకి పాల్పడిన దుండగులు సెంటిమెంట్ ప్రదర్శిస్తూ అమ్మవారి మెడలోని బంగారు ఆభరణాలు, ముక్కుపుడకను వదిలివెళ్లారు. అయితే, ఆలయ హుండీతో పాటు అమ్మవారి వెండి కిరీటాన్ని ఎత్తుకెళ్లారు. ఈ చోరీ ఘటన వెలుగులోకి రావడంతో ఉదయం నాలుగు గంటలకు జరగాల్సిన మహాకాళి అమ్మవారి అభిషేక సేవ ఆలస్యమైంది. సంఘటన స్థలానికి చేరుకున్న జిల్లా ఎస్పీ జానకి షర్మిల, బైంసా ఏఎస్పీ సాయికుమార్‌తో కలిసి సీసీ ఫుటేజీ రికార్డులను పరిశీలించి వివరాలు సేకరించారు. బైంసా సబ్ కలెక్టర్ సంకేత్ కుమార్‌తో కలిసి ఆలయంలోని ఘటనను సమీక్షించిన ఎమ్మెల్యే రామారావు పటేల్, ఈవో అంజని దేవిని వివరాలు అడిగి తెలుసుకున్నారు. ఈ ఘటనపై స్పందించిన ఎస్పీ జానకి షర్మిల, నిందితులను త్వరలోనే పట్టుకుంటామని హామీ ఇచ్చారు.

రాజన్న సిరిసిల్ల జిల్లాలో మున్సిపల్ కార్మికులు తమ ఎన్నికల హామీలను నెరవేర్చాలని రాష్ట్ర ప్రభుత్వాన్ని డిమాండ్ చేస్తూ సిరిసిల్ల కలెక్టరేట్ ఎదుట భారీ ధర్నా నిర్వహించారు. ఈ సందర్భంగా వారు ఏ.ఓ. గారికి వినతిపత్రం అందజేశారు. సీఐటీయూ ఆధ్వర్యంలో సిరిసిల్ల - వేములవాడ మున్సిపల్ కార్మికులు చేపట్టిన ఈ నిరసనలో మున్సిపల్ వర్కర్స్ & ఎంప్లాయిస్ యూనియన్ రాష్ట్ర కోశాధికారి గుర్రం అశోక్, సీఐటీయూ జిల్లా కార్యదర్శి కోడం రమణ మాట్లాడుతూ, అధికారంలోకి వచ్చిన కాంగ్రెస్ ప్రభుత్వం ఎన్నికల సమయంలో మున్సిపల్ కార్మికులకు కనీస వేతనం రూ.26 వేలు, ఉద్యోగ భద్రత, ప్రమాద బీమా కల్పిస్తామని హామీ ఇచ్చిందని గుర్తుచేశారు. అయితే, రెండున్నర సంవత్సరాలు గడిచినా ఈ హామీలను అమలు చేయకుండా ప్రభుత్వం కార్మికులను శ్రమ దోపిడీకి గురి చేస్తోందని మండిపడ్డారు. పట్టణాలను పరిశుభ్రంగా ఉంచేందుకు ఎండ, వాన, చలిని సైతం లెక్కచేయకుండా పనిచేస్తున్న కార్మికుల సమస్యల పట్ల ప్రభుత్వం నిర్లక్ష్యంగా వ్యవహరిస్తోందని నాయకులు ఆరోపించారు. మరణించిన లేదా 60 సంవత్సరాలు పైబడిన కార్మికుల స్థానంలో వారి కుటుంబ సభ్యులను పనిలోకి తీసుకోకపోవడం వల్ల ప్రస్తుతం పని చేస్తున్న వారిపై పని భారం విపరీతంగా పెరిగిందని ఆందోళన వ్యక్తం చేశారు. గతంలో పనిచేసిన కార్మికుల కుటుంబ సభ్యులను వెంటనే పనిలోకి తీసుకొని, కార్మికుల పని భారాన్ని తగ్గించాలని డిమాండ్ చేశారు. సిరిసిల్ల, వేములవాడ మున్సిపాలిటీలలో 2009 నుండి 2012 వరకు సంబంధించిన పీఎఫ్ బకాయిలు ఇప్పటికీ అందలేదని, అలాగే ఈఎస్ఐ కార్డులు, ఐడెంటిటీ కార్డులు, రక్షణ పరికరాలు సరిగా ఇవ్వడం లేదని కార్మికులు ఆవేదన వ్యక్తం చేశారు. రాష్ట్ర ప్రభుత్వం జారీ చేసిన ఆదేశాలను అధికారులు అమలు చేయడం లేదని కూడా ఆరోపణలు చేశారు. అనంతరం తమ సమస్యలపై జిల్లా కలెక్టర్‌కు వినతిపత్రాన్ని సమర్పించారు. ప్రభుత్వం వెంటనే స్పందించి హామీలను అమలు చేయాలని కోరిన కార్మికులు, లేనిపక్షంలో రానున్న రోజుల్లో నిరవధిక సమ్మెకు దిగుతామని హెచ్చరించారు. ఈ ధర్నా రాష్ట్ర వ్యాప్త పిలుపులో భాగంగా నిర్వహించబడింది.

జిల్లా కలెక్టర్ మరియు డిపిఆర్ఓ ఆదేశాల మేరకు, తెలంగాణ సాంస్కృతిక సారథి కళాకారులు విద్యార్థులకు వివిధ అంశాలపై పాటల ద్వారా అవగాహన కల్పించారు. ఈ కార్యక్రమంలో ప్రభుత్వ పథకాలు, రోడ్డు భద్రత, పర్యావరణ పరిరక్షణ, సైబర్ నేరాల వంటి విషయాలపై దృష్టి సారించారు. ఈ కళాజాత ప్రదర్శనలో ఆకుల మహేందర్, రమేష్ రావు, తిరుపతి, రాము, నాగరాజు, లక్ష్మీనారాయణ, పోశెట్టి, కాశీరాం, సవిత, దివ్య, లతా, శిల్ప, నరేష్ వంటి కళాకారులు పాల్గొన్నారు.

మెదక్ జిల్లా చిన్నశంకరంపేట మండలం సూరారం గ్రామానికి చెందిన యాట శ్రీధర్ మృతి స్థానికంగా తీవ్ర ఉద్రిక్తతకు దారితీసింది. పని ఉందని నమ్మించి కొందరు వ్యక్తులు శ్రీధర్‌ను చేగుంట మండలం అనంతసాగర్‌కు తీసుకెళ్లి, అక్కడ ఇనుప రాడ్‌తో దాడి చేసి హత్య చేశారని మృతుడి కుటుంబ సభ్యులు ఆరోపిస్తున్నారు. ఈ ఘటనతో గ్రామంలో ఆందోళనకర పరిస్థితులు నెలకొనగా, ఎలాంటి అవాంఛనీయ సంఘటనలు జరగకుండా పోలీసులు ముందస్తు చర్యలు చేపట్టారు. సూరారం గ్రామంలో భారీ పోలీసు బందోబస్తు ఏర్పాటు చేసి పరిస్థితిని ఎప్పటికప్పుడు పర్యవేక్షిస్తున్నారు. శ్రీధర్ మృతికి గల అసలు కారణాలపై పోలీసులు అన్ని కోణాల్లో దర్యాప్తు కొనసాగిస్తున్నారు. పోస్టుమార్టం నివేదికతో పాటు సేకరించిన ఆధారాల ఆధారంగా నిజానిజాలను వెలికితీసే ప్రయత్నం చేస్తున్నారు; ఈ ఘటనపై పూర్తి వివరాలు ఇంకా తెలియాల్సి ఉంది.

రాజన్న సిరిసిల్ల జిల్లాలో వెలుగు చూసిన వరి ధాన్యం కుంభకోణంపై సమగ్ర దర్యాప్తు నిర్వహించి, బాధ్యులపై కఠిన చర్యలు తీసుకోవాలని జిల్లా ఉద్యమకారుడు మరవేణి రంజిత్ కుమార్ సివిల్ సప్లైస్ మరియు డైరెక్టర్ జనరల్, విజిలెన్స్, ఎన్‌ఫోర్స్‌మెంట్‌కు యల్లారెడ్డిపేట కిషన్ దాస్ పేట్ పోస్ట్ ఆఫీస్ ద్వారా పిర్యాదు చేశారు. ఈ వ్యవహారంపై ప్రత్యేక విచారణ కమిటీని ఏర్పాటు చేయాలని ఆయన డిమాండ్ చేశారు. జిల్లాలో వరి ధాన్యం కొనుగోలు, నిల్వలు మరియు మిల్లింగ్ ప్రక్రియలో భారీ స్థాయిలో అవినీతి, అక్రమాలు జరిగాయని రంజిత్ కుమార్ ఆరోపించారు. ఈ కుంభకోణం కొందరు వ్యక్తులకు మాత్రమే పరిమితం కాదని, గత అనేక సంవత్సరాలుగా ఇదే తరహా అక్రమాలు జిల్లాలో కొనసాగుతున్నాయని ఆయన అనుమానం వ్యక్తం చేశారు. కొంత మంది అధికారులు, రైస్ మిల్లర్లు, కొనుగోలు కేంద్రాల ఇన్‌చార్జిలు కుమ్మక్కై రైతుల హక్కులను కాలరాస్తూ ప్రభుత్వ ఖజానాకు భారీ నష్టం కలిగించారని ఆరోపణలు వినిపిస్తున్నాయని ఆయన పేర్కొన్నారు. ఈ వ్యవహారంలో భాగస్వాములైన ప్రతి ఒక్కరి పాత్రను లోతుగా విచారించి నిజాలను వెలికితీయాల్సిన అవసరం ఉందని రంజిత్ కుమార్ అన్నారు. సంబంధిత అధికారులు, రైస్ మిల్లర్లు, కొనుగోలు కేంద్రాల ఇన్‌చార్జిల ఆస్తులపై సమగ్ర విచారణ చేపట్టాలని ఆయన డిమాండ్ చేశారు. అలాగే, కొనుగోలు చేసిన మొత్తం ధాన్యం, మిల్లింగ్‌కు పంపిన ధాన్యం, ప్రభుత్వానికి అప్పగించిన బియ్యం మరియు ప్రస్తుతం మిగిలి ఉన్న ధాన్యం, బియ్యం నిల్వలపై పూర్తి వివరాలను సేకరించి ప్రజలకు వెల్లడించాలని కోరారు. నిల్వలు, రికార్డులు, ఆన్‌లైన్ ఎంట్రీలు మరియు లెక్కల్లో ఉన్న వ్యత్యాసాలను గుర్తించి బాధ్యులను నిర్ధారించాలని సూచించారు. ఈ వ్యవహారం వల్ల రైతులకు, ప్రభుత్వానికి జరిగిన నష్టాన్ని అంచనా వేసి బాధ్యుల నుండి రికవరీ చేయడంతో పాటు, విచారణ పూర్తయ్యే వరకు అనుమానిత అధికారులు మరియు సంబంధిత ఇన్‌చార్జిలను విధుల నుండి తప్పించి నిష్పాక్షిక దర్యాప్తు నిర్వహించాలని రంజిత్ కుమార్ డిమాండ్ చేశారు. రైతులు పండించిన ధాన్యం విషయంలో జరిగిన ఈ అక్రమాలపై విజిలెన్స్ & ఎన్‌ఫోర్స్‌మెంట్ శాఖ మరియు సివిల్ సప్లైస్ శాఖ సంయుక్తంగా ప్రత్యేక విచారణ చేపట్టి, వాస్తవాలను ప్రజల ముందుకు తీసుకురావడంతో పాటు బాధ్యులపై కఠిన చర్యలు తీసుకోవాలని ఆయన విజ్ఞప్తి చేశారు.

మెదక్ జిల్లాలోని చిన్నశంకరంపేట శివారులో చోటుచేసుకున్న భూ వివాదం తీవ్ర ఉద్రిక్తతకు దారితీసింది. తన ఆధీనంలో ఉన్న భూమిని చదును చేయవద్దని అనేకసార్లు హెచ్చరించినా పట్టించుకోకపోవడంతో ఆగ్రహానికి గురైన ఓ రైతు, అక్కడ పనులు చేస్తున్న జేసీబీకి నిప్పుపెట్టాడు. స్థానికులు వెల్లడించిన వివరాల ప్రకారం, హైదరాబాద్‌కు చెందిన ఒక వ్యక్తి తాను ఆ భూమిని కొనుగోలు చేశానని పేర్కొంటూ జేసీబీ యంత్రంతో చదును పనులు ప్రారంభించాడు. అయితే, ఆ భూమిపై తనకే హక్కు ఉందని రైతు అభ్యంతరం వ్యక్తం చేశాడు. పనులు ఆపమని కోరినప్పటికీ ఎటువంటి స్పందన లభించకపోవడంతో ఆవేశానికి లోనైన రైతు ఈ చర్యకు పాల్పడ్డాడు. దీంతో ఆ జేసీబీ యంత్రం మంటల్లో కాలిపోగా, ఆ ప్రాంతంలో కొంతసేపు ఉద్రిక్త పరిస్థితులు నెలకొన్నాయి. సమాచారం అందుకున్న అగ్నిమాపక సిబ్బంది వెంటనే సంఘటనా స్థలానికి చేరుకుని మంటలను అదుపులోకి తెచ్చారు. ఈ ఘటనపై పోలీసులు విచారణ ప్రారంభించారు.