আজি জাগীৰোড সমষ্টিৰ বিধায়ক পীযুষ হাজৰিকাই উত্তৰ ধৰমতুল গাঁও পঞ্চায়তত শিক্ষার্থীসকলক সম্বৰ্ধনা জনাই থকা সময়ছোৱাত পূব বিহুবড়ি জনজাতি নামঘৰৰ সমীপত স্থানীয় আই-মাতৃসকলৰ সৈতে ক্ষন্তেক সময়ৰ বাবে মত বিনিময় কৰে।

মৰিগাঁও জিলাত প্ৰশাসনৰ ধাৰাবাহিক অভিযান এতিয়াও অব্যাহত আছে, য'ত অতিৰিক্ত আয়ুক্ত নীতিশা বৰাৰ নেতৃত্বত কেইবাদিনো ধৰি অবিৰতভাৱে হেলমেট আৰু চিট বেল্টৰ তীব্ৰ পৰীক্ষা চলি আছে। এই অভিযানৰ জৰিয়তে জনসাধাৰণক যান-বাহন নিয়মৰ প্ৰতি সজাগ কৰিব বিচৰা হৈছে, কাৰণ সামান্য অসচেতনতাৰ বাবেই ডাঙৰ জৰিমনা ভৰিবলগীয়া হ'ব পাৰে। প্ৰশাসনে জনসাধাৰণক জৰিমনাৰ ভয়ত নহয়, বৰঞ্চ নিজৰ আৰু পৰিয়ালৰ জীৱনৰ স্বাৰ্থত ট্ৰেফিক নিয়ম মানি গাড়ী চলাবলৈ আহ্বান জনাইছে।

ৰঙিয়াৰ কৰৰা গড়ভিতৰত যোৱা নিশা পথৰ দাঁতিৰ এক উন্মুক্ত দ পুখুৰীত পৰি এজন স্থানীয় যুৱকৰ অকাল মৃত্যু হোৱা হৃদয় বিদাৰক ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰিছে। মৃত যুৱকজনক বিছেন্নালা গাঁৱৰ দক্ষিণতোলা চুবুৰীৰ তপন কলিতা হিচাপে চিনাক্ত কৰা হৈছে। ঘটনাৰ বিৱৰণী অনুসৰি, যোৱা নিশা প্ৰায় ১০:৩০ বজাত তপন কলিতাই নিজৰ মটৰচাইকেলেৰে উক্ত পথটোৰে ঘৰলৈ উভতি আহিছিল। পথৰ দাঁতিত লাগি থকা প্ৰায় ১০ ফুট দ পুখুৰীটোত নিয়ন্ত্ৰণ হেৰুৱাই চলন্ত বাইকসহ আকস্মিকভাবে পৰি তেওঁ সলিল সমাধি ঘটে। পুখুৰীটোৰ চাৰিওফালে গাৰ্ড ৱাল বা ফেঞ্চিং নথকাত সম্পূৰ্ণ উন্মুক্ত হৈ থকাৰ বাবে স্থানীয় ৰাইজে পুখুৰীটোৰ গৰাকী নৃপেন কলিতাৰ বিৰুদ্ধে তীব্ৰ ক্ষোভ প্ৰকাশ কৰিছে। ইতিমধ্যে ৰঙিয়া আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে আৰু অভিযুক্ত নৃপেন কলিতাকো আটক কৰিছে। আজি দিনৰ ভাগত অভিযানকাৰী দল ঘটনাস্থলীত উপস্থিত হৈ যুৱকজনৰ মটৰচাইকেলখনো উদ্ধাৰ কৰে। এই ঘটনাক কেন্দ্ৰ কৰি দুৰ্ভগীয়া তপন কলিতাৰ বাসগৃহৰ লগতে সমগ্ৰ অঞ্চলটোত এক শোকাকুল পৰিৱেশে বিৰাজ কৰিছে। মৃত তপন কলিতা এজন দিন হাজিৰা কৰা ব্যক্তি আছিল আৰু তেওঁৰ পত্নী তথা দুই সন্তানক পোহপাল দিছিল। সেয়েহে, ৰাইজে তেওঁৰ পত্নী আৰু দুই সন্তানৰ ভৰণ-পোষণৰ দায়িত্ব লোৱাৰ লগতে অভিযুক্ত নৃপেন কলিতাৰ দৃষ্টান্তমূলক শাস্তিৰ দাবী উত্থাপন কৰিছে।

উত্তৰ-পশ্চিম তামুলপুৰ বায়খো পূজা উদযাপন সমিতিৰ উদ্যোগত অহা ৩১ মে’ত, ৰবিবাৰে জামুগুৰীৰ (ভেৰাখাট) বায়খো ডামত বায়খো পূজা অনুষ্ঠিত হ'ব। এই অনুষ্ঠানৰ বাবে অঞ্চলটোৰ ৰাভা জনগোষ্ঠীৰ লোকসকলে ব্যাপক প্ৰস্তুতি চলোৱা পৰিলক্ষিত হৈছে।

বাক্সা জিলাৰ ডুমুনীৰ পৰা চিমলালৈ যোৱা সংযোগী পথটোৰ অৱস্থা অত্যন্ত শোচনীয়। পথটোৰ দুৰাৱস্থাই অঞ্চলটোৰ ৰাইজক যথেষ্ট সমস্যাত পেলাইছে। ঠায়ে ঠায়ে পথত বৃহৎ বৃহৎ গাঁতৰ সৃষ্টি হৈছে, য'ত এজাক বৰষুণ দিলেই পানীৰে ভৰি পৰে আৰু জলাশয়ৰ দৰে হৈ পৰে। ইয়াৰোপৰি, প্ৰায় চাৰি বছৰৰ পূৰ্বে কালদিয়া নৈৰ পানীয়ে খহাই নিয়া পথৰ এটা অংশ আজিও মেৰামতি কৰা হোৱা নাই। এই বিপদসংকুল পথটোৰে দৈনিক বহু যান-বাহন পাৰ হয়। এই পৰিস্থিতিৰ প্ৰতি লক্ষ্য ৰাখি পথচাৰীসকলে বিটিচি চৰকাৰলৈ অতি শীঘ্ৰে এই পথচোৱা পুনৰ নিৰ্মাণ কৰিবলৈ আহ্বান জনাইছে।

মানাহ ৰাষ্ট্ৰীয় উদ্যানত পৰ্যটকৰ এটা দলে বনৰজাৰ বিচৰণৰ এক নান্দনিক দৃশ্য উপভোগ কৰে। এই মনোমোহা দৃশ্যে পৰ্যটকসকলক যথেষ্ট আনন্দিত কৰে।

ধেমাজিত এক পথ দুর্ঘটনাত স্বাৱলম্বী যুৱতী মণিকা সোণোৱালে অকালতে প্ৰাণ হেৰুৱাইছে। বৃহস্পতিবাৰে নিশা সংঘটিত এই দুৰ্ঘটনাত ধেমাজিৰ তেলিজানত ফ্ৰুট চালাড বিক্ৰী কৰি নিজৰ জীৱিকা অৰ্জন কৰা মণিকা সোণোৱালৰ মৃত্যু হয়। জানিব পৰা মতে, পিছফালৰ পৰা অহা এখন অচিনাক্ত বাহনে খুন্দিওৱাৰ ফলত মণিকা চেণ্ডগ্ৰেভেলৰ শিলত পৰিছিল, যাৰ ফলত তেওঁ নিहत হয়।

বাক্সা জিলাৰ শালবাৰীৰ মটঙা অঞ্চলত এক দুৰ্ভাগ্যজনক অঘটন সংঘটিত হৈছে। এই ঘটনাত পল্লা নৈত দুজন শিশুৰ সলিল সমাধি হয়।

বোকাজানৰ খটখটিত এক ভয়ংকৰ পথ দুৰ্ঘটনা সংঘটিত হৈছে। এই দুৰ্ঘটনাৰ ফলত এজন আৰোহীয়ে প্ৰাণ হেৰুৱাইছে।