திருச்சி மாவட்டம் மணப்பாறையில், உதயம் தியேட்டருக்குப் பின்புறம் உள்ள குடியிருப்புப் பகுதி அருகே ஒரு நல்ல பாம்பு தென்பட்டதை அப்பகுதி மக்கள் கண்டனர். இதனையறிந்த பொதுமக்கள் உடனடியாக மணப்பாறை தீயணைப்புத் துறைக்குத் தகவல் அளித்தனர். தகவலின் பேரில், நிலை அலுவலர் ரமேஷ் குமார் தலைமையிலான தீயணைப்பு வீரர்கள் சம்பவ இடத்திற்கு விரைந்து வந்தனர். அங்கு வீட்டின் அருகே இருந்த சுமார் ஆறடி நீளமுள்ள நல்ல பாம்பை, பாம்பு பிடிப்பவர் உதவியுடன் லாவகமாகப் பிடித்து சாக்குப்பையில் அடைத்தனர். பிடிக்கப்பட்ட அந்த மலை பாம்பை தீயணைப்புத் துறையினர் வனத்துறையினரிடம் ஒப்படைத்தனர். வனத்துறையினர் அந்தப் பாம்பை அருகிலுள்ள அடர்ந்த வனப்பகுதிக்குள் கொண்டு சென்று பாதுகாப்பாக விட்டனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியது.

திருச்சி மாவட்டம் மணப்பாறை சட்டமன்றத் தொகுதியில் தமிழக வெற்றி கழகத்தின் வேட்பாளர் கதிரவன் வெற்றி பெற்றார். தனது வெற்றிக்காக வாக்களித்த மக்களுக்கு நன்றி தெரிவிக்கும் வகையில், மணப்பாறை சட்டமன்றத்திற்கு உட்பட்ட மஞ்சம்பட்டி, தீராம்பட்டி, நொச்சிமேடு, வெள்ளக்கல் உள்ளிட்ட பல முக்கிய பகுதிகளில் அவர் நேரடியாக சென்று வாக்காளர்களுக்கு நன்றி கூறினார். தீராம்பட்டியில் உள்ள தேவாலயத்தில் பிரார்த்தனை செய்து, மெழுகுவர்த்தி ஏற்றி, பொதுமக்களுக்கு தனது நன்றியைத் தெரிவித்தார். பின்னர், சட்டமன்ற உறுப்பினராகப் பேசிய கதிரவன், தங்கள் பகுதிகளில் எந்தக் குறைகள் இருந்தாலும் மணப்பாறை சட்டமன்ற உறுப்பினர் அலுவலகத்தில் மனுவாக எழுதிக் கொடுத்தால், உடனடியாக சரி செய்யப்படும் என்று உறுதியளித்தார். இந்த நிகழ்வின்போது, ஒரு மாற்றுத்திறனாளி சட்டமன்ற உறுப்பினருக்கு பொன்னாடை போர்த்தி தனது வாழ்த்துகளைத் தெரிவித்தார். இந்த நிகழ்வுகளில் தமிழக வெற்றிக்கழக நகர ஒன்றிய பொறுப்பாளர்கள் மற்றும் பல உறுப்பினர்கள் கலந்து கொண்டனர்.

திருச்சி மாவட்டம் மணப்பாறை சட்டமன்றத் தொகுதி உறுப்பினர் ரா. கதிரவன் எம்எல்ஏ, இன்று மணப்பாறை அடுத்த நொச்சி மேடு மற்றும் மஞ்சம்பட்டி சுற்றியுள்ள பகுதிகளில் வாக்காளர்களுக்கு நன்றி தெரிவிக்கும் நிகழ்ச்சியை நடத்தினார். இந்த நிகழ்வில் எம்எல்ஏ ரா. கதிரவன் உடன் அப்பகுதியைச் சேர்ந்த ஏராளமான தவெக நிர்வாகிகள் மற்றும் பொதுமக்கள் கலந்துகொண்டனர்.

கரூர் மாவட்டம் குளித்தலை ரயில்வே கேட்டில் இருந்து மணப்பாறை செல்லும் சாலையில், சாலையோர மரங்களில் காய்ந்த மரக்கிளைகள் உதிரும் நிலையில் காணப்படுகின்றன. மேலும், அந்த மரக்கிளைகளில் மின்சார கம்பிகள் பின்னிக் கிடப்பதால் பொதுமக்கள் மற்றும் வாகன ஓட்டிகள் உயிர் பயத்துடன் அப்பாதையில் சென்று வருகின்றனர். இந்த நிலை நீடித்தால் உயிரிழப்புகள் ஏற்பட வாய்ப்புள்ளதாகக் கருதி, குளித்தலை பொதுமக்கள் மற்றும் வாகன ஓட்டிகள் சம்பந்தப்பட்ட அதிகாரிகளிடம் கோரிக்கை விடுத்துள்ளனர். எவ்வித உயிர் சேதமும் ஏற்படும் முன்னதாகவே, காய்ந்து உதிரும் நிலையில் உள்ள மரக்கிளைகளை அகற்றி, அவற்றில் பின்னிக் கிடக்கும் மின் கம்பிகளைச் சீரமைத்துத் தருமாறு அவர்கள் வலியுறுத்தியுள்ளனர்.

திண்டுக்கல் மாவட்டம், வடமதுரையில் உள்ள உதவி மின் பொறியாளர் அலுவலகத்தில், யாரும் இல்லாத நிலையிலும் மின்விசிறிகள் உள்ளிட்ட மின்சாரப் பொருள்கள் இயங்கிக்கொண்டிருக்கின்றன. அலுவலகத்தில் ஆள் இல்லாதபோதும் மின்சாரம் தொடர்ந்து விரயமாகி வருவதாகக் குற்றச்சாட்டு எழுந்துள்ளது. அரசு அலுவலர்கள் அவரவர் வீடுகளில் மின்சாரத்தைச் சேமிக்காமல் இவ்வாறு செயல்படுவார்களா என்ற கேள்வியும் முன்வைக்கப்பட்டுள்ளது. இது பொதுமக்களிடையே அதிருப்தியை ஏற்படுத்தியுள்ளது.

புதுக்கோட்டை மாவட்டம், மணமேல்குடி வட்டம், அம்மாபட்டினம் பகுதியில் தொடர்ந்து சீரான மின்சாரம் கிடைக்காததால் பொதுமக்கள் பெரிய அளவில் சிரமத்திற்கு உள்ளாகினர். இப்பிரச்சினை குறித்து அப்பகுதி மக்கள் தமிழ்நாடு மின் உற்பத்தி மற்றும் பகிர்மான கழகத்தில் புகார் அளித்திருந்தபோதிலும், அதிகாரிகள் நடவடிக்கை எடுக்கவில்லை என கூறப்படுகிறது. இதனால் பாதிக்கப்பட்ட பொதுமக்கள் இன்று அம்மாபட்டினத்தில் கிழக்குக் கடற்கரைச் சாலையில் சாலை மறியலில் ஈடுபட்டனர். இந்த சாலை மறியல் காரணமாக கன்னியாகுமரி முதல் சென்னை வரை செல்லும் கிழக்கு கடற்கரை சாலையில் போக்குவரத்து பாதிக்கப்பட்டது. சாலை மறியல் குறித்து தகவல் அறிந்த அதிகாரிகள் சம்பவ இடத்திற்கு வந்து பொதுமக்களிடம் பேச்சுவார்த்தை நடத்தினர். பேச்சுவார்த்தையில் உடன்பாடு ஏற்பட்டதை அடுத்து பொதுமக்கள் சாலை மறியலை கைவிட்டனர்.

மதுரை, பசுமலை விநாயகர் நகரைச் சேர்ந்த 19 வயதான தேவா மற்றும் முத்துப்பட்டியைச் சேர்ந்த 20 வயதான ரோகித் ஆகியோர் சின்ன உடைப்பு அருகே உள்ள ஒரு தனியார் கல்லூரியில் மூன்றாம் ஆண்டு படித்து வந்தனர். நேற்று (ஜூன் 25) காலை இவர்கள் இருவரும் கல்லூரிக்குச் செல்வதற்காக இருசக்கர வாகனத்தில் புறப்பட்டனர். இந்த வாகனத்தை ரோகித் ஓட்டிச் சென்றார். பெருங்குடி கணேசபுரம் அருகே வந்தபோது, இருசக்கர வாகனம் திடீரென கட்டுப்பாட்டை இழந்து சாலையின் ஓரத்தில் இருந்த தடுப்புச் சுவரில் மோதியது. இந்த விபத்தில் வாகனத்தின் பின்னால் அமர்ந்திருந்த தேவா தூக்கி வீசப்பட்டு தலையில் பலத்த காயம் அடைந்தார். ரோகித்தும் படுகாயமடைந்தார். உயிருக்குப் போராடிய நிலையில், தேவா மதுரை அரசு ராஜாஜி மருத்துவமனைக்குக் கொண்டு செல்லும் வழியிலேயே உயிரிழந்தார். ரோகித் தற்போது சிகிச்சை பெற்று வருகிறார். இந்த சாலை விபத்து குறித்து போக்குவரத்து புலனாய்வு போலீசார் விசாரணை நடத்தி வருகின்றனர்.

சிவகங்கை மாவட்டம் திருவேம்பத்தூர் அருகே உள்ள நீடோடை மாரியம்மன் கோவில் திருவிழாவை முன்னிட்டு, மாட்டு வண்டி எல்லை பந்தயம் உற்சாகமாக நடைபெற்றது. இந்தப் போட்டியில் சிவகங்கை, மதுரை, புதுக்கோட்டை, தூத்துக்குடி மற்றும் இராமநாதபுரம் மாவட்டங்களைச் சேர்ந்த மொத்தம் 31 ஜோடி மாடுகள் பங்கேற்று தங்களது திறமையை வெளிப்படுத்தின. இந்த மாட்டு வண்டி பந்தயம் பெரிய மாடு, சிறிய மாடு மற்றும் பூஞ்சிட்டு என மூன்று பிரிவுகளாக நடத்தப்பட்டது. பெரிய மாட்டுப் பிரிவில் 11 ஜோடி மாடுகள் 8 மைல் தூரத்திற்கும், சிறிய மாட்டுப் பிரிவில் 16 ஜோடி மாடுகள் 6 மைல் தூரத்திற்கும், பூஞ்சிட்டுப் பிரிவில் 11 ஜோடி மாடுகள் 5 மைல் தூரத்திற்கும் பந்தய எல்லையாக நிர்ணயிக்கப்பட்டு போட்டியிட்டன. விறுவிறுப்பாக நடைபெற்ற இந்தப் போட்டியில், சீறிப்பாய்ந்த காளைகள் ஒன்றையொன்று முந்திச் செல்ல முயன்ற காட்சிகள் பார்வையாளர்களை வெகுவாகக் கவர்ந்தன. காளையார்கோவில், புலியடித்தம்பம், திருவேம்பத்தூர் மற்றும் சுற்றுவட்டாரப் பகுதிகளைச் சேர்ந்த ஏராளமான பொதுமக்கள் சாலையின் இருபுறங்களிலும் திரண்டு நின்று போட்டியை உற்சாகமாக கண்டுகளித்தனர். போட்டியின் முடிவில், முதல் நான்கு இடங்களைப் பிடித்த மாட்டு வண்டிகளின் உரிமையாளர்கள் மற்றும் சாரதிகளுக்கு ரொக்கப் பரிசுகளும் கோப்பைகளும் வழங்கப்பட்டன.

திருச்சி மாநகராட்சி, ஓயாமரி நவீன எரிவாயு தகன மையத்தில் பிரேதங்களை தகனம் செய்வது மற்றும் பராமரிப்புப் பணிகளை ஓராண்டு காலத்திற்கு, கடந்த 15.06.2026 முதல் கோவையைச் சேர்ந்த 'ஈஷா பவுண்டேஷன் காயநத்ஸ்தானம்' என்ற தனியார் நிறுவனத்திற்கு ஒப்பந்த அடிப்படையில் வழங்கியுள்ளது. பொதுமக்களின் உணர்வுகளோடும், இறந்தவர்களுக்குச் செலுத்தப்படும் இறுதி மரியாதையோடும் தொடர்புடைய இத்தகைய முக்கியமான பொதுச்சேவையை தனியார் நிறுவனத்திற்கு ஒப்படைத்திருப்பது மிகுந்த கவலையளிப்பதாக மார்க்சிஸ்ட் கம்யூனிஸ்ட் கட்சி கண்டனம் தெரிவித்துள்ளது. தற்போதைய ஒப்பந்தத்தின்படி, ஒரு பிரேதத்தை தகனம் செய்ய ரூ. 2,500 கட்டணமாக வசூலிக்க அனுமதிக்கப்பட்டுள்ளது. இதில் வெறும் ரூ. 100 மட்டுமே மாநகராட்சிக்குச் செலுத்தப்படும் என்றும், மீதமுள்ள தொகையை தனியார் நிறுவனமே வைத்துக்கொண்டு பராமரிப்புப் பணிகளை மேற்கொள்ளும் என்றும் தெரிய வருகிறது. இதனால் மாநகராட்சிக்கு பெரும் வருமான இழப்பு ஏற்படுவதாகவும், இது பொதுச்சேவையை லாப நோக்கமிக்க வணிக நடவடிக்கையாக மாற்றும் அபாயத்தை உருவாக்குவதாகவும் கட்சி சுட்டிக்காட்டுகிறது. குறிப்பாக, ஏழை மற்றும் நடுத்தரக் குடும்பங்கள் தங்களது உறவினர்களின் இறுதிச்சடங்குகளை மேற்கொள்ளும்போது கூடுதல் பொருளாதாரச் சுமையை எதிர்கொள்ள நேரிடும் என அஞ்சப்படுகிறது. ஏற்கனவே கடந்த காலத்தில் கருமண்டபம் பகுதியில் செயல்பட்டு வந்த நவீன எரிவாயு தகன மேடையின் பராமரிப்புப் பணிகள் தனியார் நிறுவனத்திற்கு ஒப்படைக்கப்பட்டிருந்தபோது, இறந்தவர்களின் குடும்பத்தினரிடம் அஸ்திகள் முறையாக வழங்கப்படாததும், எரிவாயு செலவைக் குறைத்து லாபத்தை அதிகரிக்கும் நோக்கில் ஒன்றுக்கும் மேற்பட்ட பிரேதங்களை ஒரே நேரத்தில் தகனம் செய்ததும் போன்ற மனிதநேயமற்ற செயல்பாடுகள் வெளிச்சத்திற்கு வந்தன. மார்க்சிஸ்ட் கம்யூனிஸ்ட் கட்சி முன்னெடுத்த போராட்டங்களின் விளைவாகவே, அந்த பொறுப்புகள் தனியார் நிறுவனங்களிடமிருந்து மீட்கப்பட்டு மாநகராட்சி நிர்வாகமே நேரடியாக தகன மேடைகளை பராமரித்து வந்தது. இத்தகைய கசப்பான அனுபவங்கள் இருந்தும் மீண்டும் அதே தவறை மாநகராட்சி நிர்வாகம் செய்வது அதிர்ச்சியளிப்பதாகவும், இது பொதுமக்களின் நம்பிக்கையைச் சீர்குலைப்பதோடு மட்டுமல்லாமல், இறந்தவர்களின் உடல்களுக்கு உரிய மரியாதை மற்றும் கண்ணியம் வழங்கப்படுமா என்ற கேள்வியையும் எழுப்புவதாகவும் கட்சி வலியுறுத்தியுள்ளது. பொது சேவை என்பது லாப நோக்கத்திற்காக நடத்தப்பட வேண்டிய துறை அல்ல என்றும், குறிப்பாக, மருத்துவம், குடிநீர், சுகாதாரம், இடுகாடு போன்ற அத்தியாவசிய சேவைகள் அரசு மற்றும் உள்ளாட்சி அமைப்புகளின் நேரடிப் பொறுப்பிலேயே இருக்க வேண்டும் என்றும், இவற்றை தனியாருக்கு தாரைவார்ப்பது சமூக நீதி மற்றும் மக்கள் நலனுக்கு எதிரான நடவடிக்கை என்றும் தெரிவிக்கப்பட்டுள்ளது. எனவே, ஓயாமரி நவீன எரிவாயு தகன மையத்தை தனியாருக்கு வழங்கியுள்ள ஒப்பந்தத்தை உடனடியாக ரத்து செய்து, தகனம் மற்றும் பராமரிப்புப் பணிகளை திருச்சி மாநகராட்சி நிர்வாகமே நேரடியாக மேற்கொள்ள வேண்டும் என மார்க்சிஸ்ட் கம்யூனிஸ்ட் கட்சி கோரிக்கை விடுத்துள்ளது. மேலும், அங்கு பணியாற்றும் தொழிலாளர்கள் மற்றும் ஊழியர்களை நிரந்தரப்படுத்தி, அவர்களுக்கான பணிப்பாதுகாப்பு மற்றும் உரிய ஊதியத்தை உறுதி செய்து, மக்களுக்குத் தரமான மற்றும் நம்பகமான சேவை வழங்க நடவடிக்கை எடுக்க வேண்டும் என்றும் கோரப்பட்டுள்ளது. இக்கோரிக்கைகள் மீது மாநகராட்சி நிர்வாகம் உடனடியாக நடவடிக்கை எடுக்காத பட்சத்தில், பொதுமக்களைத் திரட்டி பல்வேறு கட்ட போராட்டங்கள் முன்னெடுக்கப்படும் என ஓயாமரி இடுகாட்டில் நடைபெற்ற செய்தியாளர் சந்திப்பில் மார்க்சிஸ்ட் கம்யூனிஸ்ட் கட்சியின் மாவட்ட செயற்குழு உறுப்பினர்கள் பா. லெனின் மற்றும் வி. சந்தானம், திருச்சி மாநகர் மாவட்ட செயலாளர் கோவி. வெற்றிச்செல்வம் ஆகியோர் எச்சரித்துள்ளனர்.