అమ‌రావ‌తి అభివృద్ధి సంస్థ‌(ఏడీసీ) సీఎండీ శ్రీ‌మ‌తి డి.ల‌క్ష్మీపార్థ‌సార‌థి, ఉండవల్లి పంపింగ్ స్టేషన్ వద్ద నీటిపారుదల శాఖ అధికారులు వేసిన అడ్డుక‌ట్ట‌ను త‌క్ష‌ణం తొల‌గించాలని ఏడీసీ ఇంజినీరింగ్ అధికారులకు ఆదేశాలు జారీచేశారు. స్లూయీజ్ గేట్ల లీకేజీ ద్వారా కృష్ణాన‌దిలోని నీటి ప్ర‌వాహం కొండ‌వీటివాగులోనికి వెళ్ల‌కుండా నిరోధించేందుకు ఈ అడ్డుక‌ట్ట వేయబడిందని ఆమె పేర్కొన్నారు. పంపింగ్ స్టేష‌న్‌కు మ‌ర‌మ‌తులు చేసే క్రమంలో, నీటిపారుద‌ల శాఖ అధికారులు కొండ‌వీటివాగులో నీరు ఇన్‌టేక్ పాండ్‌లో క‌ల‌వ‌కుండా ఈ అడ్డుక‌ట్ట వేశారని వివరణ లభించింది. నీటిపారుదల హెడ్ రెగ్యులేటర్‌లో లీకేజీ మరియు ఈ కట్ట కారణంగా కృష్ణా నది నుండి పెనుమాక రిజర్వాయర్‌కు నీటి ప్రవాహం వెనక్కి ప్రవహించిందని ఏడీసీ ఛీఫ్ ఇంజినీరు బి.న‌ర‌సింహ‌మూర్తి సీఎండీకి వివరించారు. ఉండ‌వ‌ల్లి పంపింగ్ స్టేష‌న్ వ‌ద్ద కృష్ణాన‌దిలో కొండ‌వీటివాగు నీటి ప్ర‌వాహం కలుస్తుంది. ఇక్కడ అడ్డుకట్ట వేయడం వల్ల కృష్ణాన‌దిలో నీరు వెనక్కి వచ్చి, పెనుమాకలో అభివృద్ధి పనులలో ఉన్న రిజర్వాయర్‌లోనికి చేరి నిలిచిందని ఆయన నివేదించారు. ఈ అడ్డుక‌ట్ట బ‌కింగ్‌హాం కెనాల్‌లో వెళ్లాల్సిన కొండ‌వీటివాగు నీరు సైతం నిలిచిపోవడానికి కారణమైంది. ఈ పరిస్థితిపై శ‌నివారం ఏడీసీ ఇంజినీరింగ్ అధికారుల‌తో పంపింగ్ స్టేష‌న్ ప్రాంతాన్ని ప‌రిశీలించిన సీఎండీ, వెంటనే నీటిపారుద‌ల శాఖ అధికారుల‌తో మాట్లాడి, అడ్డుక‌ట్ట‌ను త‌క్ష‌ణ‌మే తొల‌గించాల‌ని ఖ‌చ్చిత‌మైన ఆదేశాలు జారీచేశారు. అనంతరం ఆమె పెనుమాక రిజర్వాయర్‌కు చేరిన కృష్ణా నీటి ప్ర‌వాహాన్ని పరిశీలించారు. వర్షాలు కురుస్తున్నందున, రాజ‌ధాని అమ‌రావ‌తి గుండా ప్ర‌వ‌హిస్తున్న కొండ‌వీటివాగు, పాల‌వాగుల మ‌ధ్య నిర్మిస్తున్న ర‌హ‌దార్ల వంతెన‌ల వ‌ద్ద నీటి ప్ర‌వాహానికి ఆటంకం లేకుండా అధికారులు వెంటనే చ‌ర్య‌లు చేప‌ట్టాలని కూడా ఆమె ఆదేశించారు. అలాగే, పాల‌వాగు ప్రారంభ‌మ‌య్యే రాయ‌పూడి వ‌ద్ద ఉన్న డైవ‌ర్ష‌న్ ఛానెల్‌ను మరింత లోతుగా తవ్వకం చేయాలని సూచించారు. ఈ ప‌ర్య‌ట‌న‌లో ఏడీసీ ఛీఫ్ ఇంజినీర్లు ఆర్‌.గోపాల‌కృష్ణారెడ్డి, సీహెచ్‌. ధ‌నుంజ‌య‌, ఎస్ఈ రామ‌మోహ‌న‌రావుతో పాటు ఇతర ఇంజినీరింగ్ అధికారులు పాల్గొన్నారు.

కర్ణాటకలోని హంపిలో యంత్రోద్ధారక ఆంజనేయ స్వామి దేవాలయం ఉంది. ఈ ఆలయం ప్రత్యేకమైనదిగా పరిగణించబడుతుంది.

కాస్త ఈ రోడ్డు కూడా వేసి పుణ్యం కట్టుకోండి మహాప్రభో..! తిమ్మాపురం గ్రామస్తుల ఆవేదన నంద్యాల జిల్లా మహానంది : కాస్త మా వీధి రోడ్డు కూడా వేసి పుణ్యం కట్టుకోండి మహాప్రభో అంటూ గ్రామస్తులు వేడుకుంటున్నారు. శనివారం మహానంది మండలంలో తెల్లవారుజామున కురిసిన వర్షానికి మండల కేంద్రమైన తిమ్మాపురం గ్రామంలో పెద్దమ్మ అరుగు వీధి రోడ్డు జలమయమైంది. చినుకు చిటుక్కుమంటే చాలు రోడ్డంతా వర్షపు నీరు నిలిచిపోయి కాలనీవాసులు తిరగడానికి కూడా లేని పరిస్థితి, గ్రామంలో అన్ని సిసి రోడ్లు అయితే వేశారు. కానీ మా కాలనీ రోడ్డు తరుగు అవడంతో వర్షపు నీరు చేరి తీవ్ర ఇబ్బందులకు గురవుతున్నామని కాలనీవాసులు ఆవేదన వ్యక్తం చేస్తున్నారు. ఇప్పటికైనా అధికారులు స్పందించి రోడ్డు వేసి పుణ్యం కట్టుకోవాలని గ్రామస్తులు కోరుతున్నారు.

నంద్యాల జిల్లాలోని చాగలమర్రి మండలానికి చెందిన తెలుగుదేశం పార్టీ నాయకుడు నరేంద్ర రోడ్డు ప్రమాదంలో మరణించారు. కొత్త కారు కొనుగోలు చేసి రిజిస్ట్రేషన్ ప్రక్రియ కోసం నంద్యాల వెళ్లి తిరిగి వస్తుండగా ఈ దుర్ఘటన జరిగింది. ఆళ్లగడ్డ వీరాయిపల్లె సమీపంలో ఆయన కారు రోడ్డు డివైడర్‌ను బలంగా ఢీకొనడంతో పూర్తిగా నుజ్జయింది. ఈ ఘోర ప్రమాదంలో నరేంద్ర సంఘటనా స్థలంలోనే ప్రాణాలు కోల్పోగా, కారులో ఉన్న మరో ముగ్గురు వ్యక్తులు తీవ్రంగా గాయపడ్డారు. ప్రస్తుతం వారికి ప్రభుత్వ ఆసుపత్రిలో చికిత్స అందిస్తున్నారు.

అన్నమయ్య జిల్లా పుంగనూరులోని చౌడేపల్లి మండలం, శ్రీ రాజనాల బండ వీరాంజనేయ స్వామి దేవస్థానం నందు ప్రత్యేక పూజలు చేసిన అనంతరం, తెలుగుదేశం పార్టీ సీనియర్ నాయకులు మధుసూదన్ రాయల్ మీడియా సమావేశంలో మాట్లాడారు. గత మూడు రోజుల క్రితం బిసివై పార్టీకి చెందిన ప్రేమ్ కుమార్, హరిబాబు యాదవ్ లు తెలుగుదేశం పార్టీపై మీడియా సమావేశం ఏర్పాటు చేసి విమర్శలు చేశారని ఆయన ప్రస్తావించారు. సంక్షేమ పథకాలు చంద్రబాబు నాయుడు తండ్రి గారైన ఖర్జూరపు నాయుడు సొత్తి నుండి ఇస్తున్నారా అని ప్రశ్నిస్తూ వారు మాట్లాడారని, అయితే రాజకీయ విమర్శలు రాజకీయపరంగానే ఉండాలి తప్ప కుటుంబ సభ్యుల జోలికి గానీ వ్యక్తిగత విషయాల్లోకి గానీ వెళ్లకూడదని మధుసూదన్ రాయల్ స్పష్టం చేశారు. ఈ సందర్భంగా, మూడు రోజుల క్రితం చేసిన ఆరోపణలకు సంబంధించిన ఆధారాలు ఏమైనా ఉంటే తీసుకురావాలని మధుసూదన్ రాయల్ సవాల్ విసిరారు. మీ నాయకుడి దగ్గర ఆధారాలు ఉంటే బోడే రామచంద్ర యాదవ్ ప్రమాణానికి హాజరుకావాలని ఆయన డిమాండ్ చేశారు. అంతేకాకుండా, విద్యహక్కు చట్టం బోడె రామచంద్ర యాదవ్‌కు గత వైకాపా ప్రభుత్వంలో గుర్తుకు రాలేదా, ఇప్పుడే గుర్తుకు వచ్చిందా అని ప్రశ్నించారు. తాను బోడే రామచంద్ర యాదవ్‌కే సవాల్ విసిరానని, అయితే అతని స్థానంలో అతని చెంచాలు వచ్చి ఆర్భాటాలు చేస్తున్నారని రాయల్ మండిపడ్డారు. తమ అధినేతలపై నిరాధారమైన ఆరోపణలు చేస్తే తగిన బుద్ధి చెబుతామని మధుసూదన్ రాయల్ తీవ్రంగా హెచ్చరించారు.

చిత్తూరు జిల్లాలోని పుంగనూరు నియోజకవర్గంలో ఈ నెల 27 మరియు 28 తేదీల్లో నిర్వహించనున్న మహానాడు కార్యక్రమంపై చర్చ జరిగింది. టీడీపీ ఇంచార్జి శ్రీ చల్లా రామచంద్రారెడ్డి గారి ఆదేశాల మేరకు ఈ సమావేశం ఏర్పాటు చేశారు. ఈ సందర్భంగా, మాజీ కౌన్సిలర్ సయ్యద్ ఇబ్రహీం మాట్లాడుతూ, కష్టపడిన పార్టీ కార్యకర్తలకు న్యాయం జరుగుతుందని, క్షేత్రస్థాయిలో అంకితభావంతో పనిచేసి పార్టీకి మంచి పేరు తీసుకురావాలని సూచించారు.

ఆంధ్రప్రదేశ్ రాష్ట్రంలో దేవాదాయ ధర్మాదాయ శాఖ నడుస్తోందా లేక కొందరి అవినీతి సామ్రాజ్యంగా మారిందా అని వైఎస్సార్ కాంగ్రెస్ పార్టీ నాయకుడు కామరాజ్ హరీష్ కుమార్ తీవ్రంగా ప్రశ్నించారు. శనివారం విడుదల చేసిన ఒక ప్రకటనలో ఆయన, రాష్ట్రంలో దేవాదాయ శాఖకు అసలు మంత్రి ఉన్నారా లేదా అని అనుమానం వ్యక్తం చేస్తూ, ఒకవేళ ఉంటే ఆయన కేవలం ఒక "కీలుబొమ్మ" లాగే వ్యవహరిస్తున్నారని ఆరోపించారు. గత 16 నెలల కాలంలో ఈ శాఖలో జరుగుతున్న అవినీతి, అక్రమాలు సామాన్య ప్రజలను దిగ్భ్రాంతికి గురిచేస్తున్నాయని ఆయన పేర్కొన్నారు. దేవుడి సొమ్మును, భూములను రక్షించాల్సిన అధికారులే భక్షకులుగా మారారని ఆరోపణలు చేస్తూ, గత 16 నెలల కాలంలోనే వందల ఎకరాల దేవాదాయ భూములకు నిబంధనలకు విరుద్ధంగా ఎన్‌ఓసిలు ఇచ్చిన ఘోర కలియుగాన్ని చూస్తున్నామని హరీష్ కుమార్ అన్నారు. ప్రస్తుత దేవాదాయ శాఖ కమిషనర్ రామచంద్ర మోహన్ రానున్న రోజుల్లో మరికొన్ని వేల ఎకరాల దేవుడి భూములకు ఎన్‌ఓసిలు ఇవ్వడానికి సిద్ధంగా ఉన్నట్లు స్పష్టంగా కనిపిస్తోందని ఆయన ఆరోపించారు. నిబంధనలకు విరుద్ధంగా ఒకే వ్యక్తి కమిషనర్‌గా, ఏడీసీ-1గా, ఏడీసీ-2గా మూడు ఉన్నత పదవులను అనుభవిస్తూ దేవాదాయ శాఖను పూర్తిగా భ్రష్టు పట్టించారని ఆయన మండిపడ్డారు. కూటమి ప్రభుత్వం అధికారంలోకి వచ్చినప్పటి నుంచి రాష్ట్రంలోని ఆలయాల్లో దేవుళ్లకు జరగాల్సిన కైంకర్యాల్లో తీవ్ర లోపాలు జరుగుతున్నాయని, ఎన్నో చోట్ల దేవుడి విగ్రహాలను ధ్వంసం చేసినా ప్రభుత్వానికి చలనం లేదని హరీష్ కుమార్ విమర్శించారు. భక్తులకు పెట్టే అన్నదానాల్లో సైతం నాణ్యత లోపించి, అవినీతి రాజ్యమేలుతోందని ఆయన అన్నారు. వయసులో పెద్దవారు, దేవుడిపై ఎంతో భక్తి శ్రద్ధలు కలిగిన మంత్రిని చూస్తే జాలేస్తోందని, దేవాదాయ శాఖకు సంబంధించిన ఏ కార్యక్రమంలో చూసినా కమిషనర్ రామచంద్ర మోహనే కనిపిస్తున్నారని, మంత్రి ఉనికి ఎక్కడా కనిపించడం లేదని భక్తులు ముక్కున వేలేసుకుంటున్నారని ఆయన తెలిపారు. గత 16 నెలల కాలంలో దేవాదాయ శాఖలో జరిగిన భూముల ఎన్‌ఓసిలు, ఉద్యోగాల ప్రమోషన్లపై రాష్ట్ర ప్రభుత్వం వెంటనే ఒక ఉన్నత స్థాయి విచారణ కమిటీని నియమించాలని కామరాజ్ హరీష్ కుమార్ డిమాండ్ చేశారు. రానున్న గోదావరి పుష్కరాలు, కృష్ణా నది పుష్కరాల పర్యవేక్షణకు తక్షణమే దేవాదాయ శాఖ తరపున ఒక సమర్థుడైన ఐఏఎస్ అధికారిని కమిషనర్‌గా నియమించాలని, గతంలో చంద్రబాబు నాయుడు ముఖ్యమంత్రిగా ఉన్నప్పుడు జరిగిన గోదావరి పుష్కరాల్లో జరిగిన చేదు అనుభవాలను గుర్తుచేశారు. ప్రస్తుత కమిషనర్ రామచంద్ర మోహన్‌పై తక్షణమే న్యాయపరమైన విచారణ జరిపించాలని ఆయన డిమాండ్ చేశారు. ఒకవేళ రాష్ట్ర ప్రభుత్వం ఈ అవినీతిపై స్పందించకపోతే, దేవుడిని నమ్మే ఒక సాధారణ భక్తుడిగా హైకోర్టును ఆశ్రయించి అయినా సరే న్యాయపరమైన విచారణ జరిగేలా చూస్తామని హెచ్చరించారు. దేవుడి సొమ్మును దోచుకుంటున్న వారిపై విచారణ జరిపించేంత వరకు తమ పోరాటం ఆగదని ఆయన స్పష్టం చేశారు.

అన్నమయ్య జిల్లాలోని పుంగనూరులో తెలుగుదేశం (టీడీపీ) మరియు భారత చైతన్య యోజన (బీసీవై) పార్టీల నాయకుల మధ్య తీవ్ర మాటల యుద్ధం నడుస్తోంది. సోషల్ మీడియా వేదికగా ఒకరిపై ఒకరు తీవ్ర ఆరోపణలు చేసుకుంటూ, వాటిని నిరూపించుకోవడానికి రాజనాలబండలో సత్య ప్రమాణాలు చేయడానికి సవాళ్లు విసురుకుంటున్నారు. ఈ వివాదం బీసీవై పార్టీ అధినేత బోడే రామచంద్ర యాదవ్ గతంలో చేసిన ఆరోపణలతో మొదలైంది. తెలుగుదేశం ప్రభుత్వం విద్యా హక్కు చట్టాన్ని పట్టించుకోవడం లేదని, ప్రైవేటు పాఠశాలలు 25% ఉచిత విద్యను అమలు చేయడం లేదని, దీనికి బదులుగా విద్యాశాఖ మంత్రి నారా లోకేష్‌కు ముడుపులు అందాయని ఆయన ఆరోపించారు. ఈ ఆరోపణలను సత్యదూరమని పేర్కొంటూ, దమ్ముంటే వాటిని రుజువు చేయాలని లేదా రాజనాలబండకు వచ్చి ప్రమాణం చేయాలని పుంగనూరు పట్టణ తెలుగుదేశం పార్టీ మాజీ ఉపాధ్యక్షుడు మధుసూదన్ రాయల్ సోషల్ మీడియా వేదికగా సవాలు విసిరారు. దీనికి స్పందించిన బీసీవై పార్టీ యువజన విభాగం రాష్ట్ర కో కన్వీనర్ పూల ప్రేమ్ కుమార్, మధుసూదన్ రాయల్‌కు కౌంటర్ ఇస్తూ సోషల్ మీడియాలో వీడియోలు పోస్ట్ చేశారు. రామచంద్ర యాదవ్ కుటుంబ సభ్యులపై అసభ్యంగా మాట్లాడారని, బీసీవై పార్టీ వైకాపాకు కోవర్టుగా పనిచేస్తోందని మధుసూదన్ రాయల్ ఆరోపించారని ప్రేమ్ కుమార్ పేర్కొన్నారు. ఈ విషయమై ప్రమాణం చేయడానికి ఈ నెల 27వ తేదీన రాజనాలబండ ఆలయానికి వచ్చి ప్రత్యేక పూజలు నిర్వహించి మీడియా సమావేశం ఏర్పాటు చేశారు. రాష్ట్రంలో బీసీవై పార్టీ అధినేతకు, నాయకులకు, కార్యకర్తలకు వైసీపీ పార్టీతో ఎలాంటి సంబంధాలు లేవని, తాము కొవ్వొత్తులం కాదని ప్రమాణం చేసి చెబుతున్నానని ఆయన ఆలయం వెలుపల జరిగిన సమావేశంలో తెలిపారు. అలాగే, తన మాటలకు కట్టుబడి రాజనాలబండకు వచ్చి ప్రమాణం చేయాలని తెలుగుదేశం నాయకుడు మధుసూదన్ రాయల్‌కు శనివారం మరలా సవాలు విసిరారు. ఉదయమే పూల ప్రేమ్ కుమార్ రాజనాలబండ ఆలయంలో పూజలు చేసుకుని, మధుసూదన్ రాయల్ రాలేదని తెలిపి వెళ్లిపోయారు. అయితే, మధుసూదన్ రాయల్ ఉదయం 10:20 గంటలకు ఆలయం వద్దకు ప్రమాణం చేయడానికి రావడంతో ఆసక్తి నెలకొంది. ఈ సందర్భంగా మధుసూదన్ రాయల్ మాట్లాడుతూ, తాను బీసీవై పార్టీ అధినేత బోడే రామచంద్ర యాదవ్‌ను ప్రమాణం చేయమని చెప్పానని, ఆయన “చెంచాలను” గానీ, “తొత్తులను” గానీ ప్రమాణం చేయమని సవాలు విసరలేదని స్పష్టం చేశారు. అనంతరం పూల ప్రేమ్ కుమార్‌ను ఉద్దేశించి, పుంగనూరు పట్టణంలోని షటిల్ ఇండోర్ కోర్టును అర్ధరాత్రి దొంగతనంగా ఆయన కుటుంబ సభ్యులు కూల్చలేదా అని ప్రశ్నించారు. దమ్ముంటే ఈ విషయంపై ప్రమాణం చేయాలని సవాలు విసిరారు. అసలు విషయాన్ని తప్పుదోవ పట్టిస్తూ మాట్లాడటం సబబు కాదని, “నా నాలుకలు కోస్తా” అంటూ విర్రవీగడం ఏంటని ప్రశ్నించారు. పూల ప్రేమ్ కుమార్ సవాలును స్వీకరిస్తూ రాజనాలబండకు ప్రమాణం చేయడానికి వస్తానని సోషల్ మీడియా వేదికగా సమాచారం తెలిపినప్పటికీ, తాను వచ్చేలోపే అవాకులు చవాకులు మాట్లాడి వెళ్లిపోవడం ఏంటని ఎద్దేవా చేశారు. తన మాటలకు ఇప్పటికీ కట్టుబడి ఉన్నానని తెలియజేస్తూ, మీకు మీ నాయకునికి దమ్ముంటే రాజనాలబండకొచ్చి మీరు చేసిన ఆరోపణలను ఒప్పుకొని ప్రమాణం చేయాలని, ఇందుకు తాను ఎప్పుడూ సిద్ధంగానే ఉన్నానని మధుసూదన్ రాయల్ స్పష్టం చేశారు. తెలుగుదేశం, బీసీవై పార్టీల నాయకుల మధ్య సోషల్ మీడియా వేదికగా ఈ ఆరోపణలు, ప్రతి ఆరోపణలు కొనసాగుతున్నాయి.

పుంగనూరు నియోజకవర్గంలోని సోమల మండలం, రాంపల్లి సమీపంలో జరిగిన రోడ్డు ప్రమాదంలో యువకుడు రాంచరణ్ మృతి చెందగా, అతని బంధువులు తీవ్ర నిరసనకు దిగారు. బుధవారం రాత్రి నుండి గురువారం ఉదయం వరకు, రాంచరణ్ మృతదేహాన్ని అంబులెన్స్‌లో ఉంచి, పోలీస్ స్టేషన్ ఎదురుగా ధర్నా నిర్వహించారు. ఈ ఆందోళన కారణంగా కిలోమీటర్ల మేర వాహనాలు నిలిచిపోయి, ఆ మార్గంలో తీవ్ర ట్రాఫిక్ అంతరాయం ఏర్పడింది.