பிரதமர் நரேந்திர மோடி, உள்நாட்டிலேயே முழுமையாகத் தயாரிக்கப்பட்ட 3 அதிநவீனப் போர்க்கப்பல்களை நாட்டுக்கு அர்ப்பணித்துள்ளார். கொல்கத்தா சியாமா பிரசாத் முகர்ஜி துறைமுகத்தில் இன்று நடந்த பிரம்மாண்ட நிகழ்ச்சியில், துனகிரி, சன்ஷோதக், அக்ரே ஆகிய மூன்று போர்க்கப்பல்களும் இந்திய கடற்படையில் அதிகாரப்பூர்வமாக இணைக்கப்பட்டன. இந்த அதிநவீனப் போர்க்கப்பல்களில், துனகிரி பிரமோஸ் ஏவுகணைகளைச் சுமந்து சென்று துல்லியமாகத் தாக்கும் வகையில் பிரத்தியேகமாக உருவாக்கப்பட்டுள்ளது. அதேபோல், அக்ரே கப்பல் கடலுக்கு அடியில் உள்ள அச்சுறுத்தல்களை முன்கூட்டியே கண்டறிந்து தாக்கும் வல்லமையுடன் சிறப்பாக வடிவமைக்கப்பட்டுள்ளது.

இன்று ஓட்டப்பிடாரம் காவல் நிலைய ஆய்வாளர் கார்த்திக் மற்றும் போலீஸார், ஓட்டப்பிடாரம் காவல் நிலைய எல்லைக்கு உட்பட்ட பரூம்பூர் பகுதியில் ரோந்து பணியில் ஈடுபட்டிருந்தனர். அப்போது அங்கு சந்தேகத்துக்கிடமான முறையில் நின்று கொண்டிருந்த மூன்று நபர்களைப் பிடித்து விசாரித்ததில், அவர்கள் விற்பனைக்காக கஞ்சா வைத்திருந்தது தெரியவந்தது. கைது செய்யப்பட்டவர்களில் ஓட்டப்பிடாரம் நாகம்பட்டி பகுதியைச் சேர்ந்த சங்கரபாண்டி மகன் மகேஷ் குமார் (19), வ.உ.சி காலனி பகுதியைச் சேர்ந்தவர்களான ராசுக்குட்டி மகன் அறிவுமதி (எ) அழகு (23) மற்றும் பாஸ் (எ) பாலமுருகன் (22) ஆகியோர் அடங்குவர். அவர்களிடம் இருந்து 600 கிராம் கஞ்சா மற்றும் 2 இருசக்கர வாகனங்களை போலீஸார் பறிமுதல் செய்தனர். இதனைத் தொடர்ந்து, இந்த மூவர் மீதும் வழக்குப் பதிவு செய்யப்பட்டு, அவர்கள் கைது செய்யப்பட்டனர். தற்போது போலீஸார் மேற்கொண்டு விசாரணை நடத்தி வருகின்றனர்.

தூத்துக்குடி மாவட்டம் கோவில்பட்டியில் அமைக்கப்பட்டு வரும் விமானப் பயிற்சி மையத்தின் (Flying Training Organization - FTO) கட்டுமானப் பணிகளைக் கண்காணிப்பதற்கான முக்கிய நடவடிக்கையை தமிழ்நாடு தொழில் மேம்பாட்டுக் கழகம் (TIDCO) மேற்கொண்டுள்ளது. தமிழ்நாடு அரசின் நிறுவனமான TIDCO, இந்தப் பணிகளை மேற்பார்வையிட ஒரு சுயாதீன பொறியாளரைத் தேர்ந்தெடுப்பதற்கான மின்னணு டெண்டர் அறிவிப்பை வெளியிட்டுள்ளது. இந்த அறிவிப்பின்படி, கட்டுமானப் பணிகளின் தரம், தொழில்நுட்ப அம்சங்கள் மற்றும் திட்ட முன்னேற்றத்தைத் தொடர்ந்து கண்காணித்து ஆலோசனை வழங்கும் தகுதியான நிறுவனங்களிடமிருந்து விண்ணப்பங்கள் வரவேற்கப்படுகின்றன. ஆர்வமுள்ள நிறுவனங்கள் டெண்டர் ஆவணங்களை TIDCO மற்றும் தமிழ்நாடு அரசின் மின்னணு டெண்டர் இணையதளங்களிலிருந்து இலவசமாகப் பதிவிறக்கம் செய்துகொள்ளலாம். ஒப்பந்தப் புள்ளிகள் மற்றும் விண்ணப்பங்களைச் சமர்ப்பிப்பதற்கான கடைசி நாள் வருகிற ஜூலை 15ஆம் தேதி மதியம் 3 மணி என நிர்ணயிக்கப்பட்டுள்ளது. இந்த விமானப் பயிற்சி மையம் கோவில்பட்டி வட்டம் கயத்தாறு பகுதியில் அமைய உள்ளதாகத் தெரிவிக்கப்பட்டுள்ளது. திட்டமிட்ட காலக்கெடுவிற்குள் உயர்தரத்துடன் பணிகள் நிறைவேறுவதை உறுதி செய்வதே இந்த டெண்டரின் முக்கிய நோக்கம் என்று TIDCO தெரிவித்துள்ளது. கோவில்பட்டியில் உருவாகி வரும் இந்த விமானப் பயிற்சி மையம் செயல்பாட்டுக்கு வந்தால், தமிழகத்தில் விமானப் பயிற்சி மற்றும் விமானத் துறை சார்ந்த உள்கட்டமைப்பு வசதிகள் வலுப்பெறும் எனக் கருதப்படுகிறது. மேலும், தென் தமிழக இளைஞர்களுக்கு விமானப் பயிற்சி பெறும் புதிய வாய்ப்புகள் உருவாகும் என்பதுடன், அப்பகுதியின் தொழில் மற்றும் பொருளாதார வளர்ச்சிக்கும் இது ஊக்கமளிக்கும் என்று எதிர்பார்க்கப்படுகிறது.

விருதுநகர் மாவட்டம், சாத்தூர் பெரியார் நகர் சிறுவர் பூங்காவில், ஒரு தனியார் தொண்டு நிறுவனத்தின் 15வது ஆண்டு தினத்தையொட்டியும், சுற்றுச்சூழல் தினத்தை முன்னிட்டும், மரம் நடு விழா மற்றும் பிளாஸ்டிக் ஒழிப்பு விழிப்புணர்வு நிகழ்ச்சி நடைபெற்றது. இந்நிகழ்வில் சாத்தூர் நகர் தலைவர் குருசாமி, நகராட்சி ஆணையாளர் ஜெகதீஸ்வரி, தொண்டு நிறுவன அமைப்பினர், சிலம்பம் கலைக்கூட ஆசான் மற்றும் மாணவ மாணவிகள் எனப் பலரும் கலந்து கொண்டனர். நிகழ்ச்சியில் பேசிய தொண்டு நிறுவன அமைப்பினர், பொதுமக்கள் ஆர்வத்துடன் விலங்குகளை வளர்ப்போம் என்ற எண்ணத்தில் மாடுகளை சாலைகளில் துரத்திவிடுவது பெரும் ஆபத்தை விளைவிப்பதாகக் குறிப்பிட்டனர். இதேபோன்று, நாய்களை விருப்பப்பட்டு வளர்த்து, பின்பு பராமரிக்க முடியாமல் தெருக்களில் விட்டுவிடுவதால் பல்வேறு இடர்பாடுகளும் பொதுமக்களுக்கு ஆபத்தும் ஏற்படுவதாகவும் சுட்டிக்காட்டினர். இதனால் பொதுமக்கள் முறைப்படி நாய்களை வளர்க்க லைசன்ஸ் பெற்று வளர்க்க வேண்டும் என்றும், ஆர்வத்துடன் நாய்களை வளர்த்து தெருவில் விட்டுவிடுவதால் ஏற்படும் விபத்துகளைத் தவிர்க்க வேண்டும் என்றும் கேட்டுக்கொண்டனர். இதனைத் தொடர்ந்து, நாகர்கோவில் சேர்மன், ஆணையாளர், தொண்டு நிறுவன அமைப்பினர் மற்றும் மாணவர்கள் அனைவரும் அப்பகுதியில் ஏராளமான மரக்கன்றுகளை நட்டு சுற்றுச்சூழல் விழிப்புணர்வை ஏற்படுத்தினர். மேலும், பிளாஸ்டிக்கால் ஏற்படும் ஆபத்துகளை எடுத்துரைத்து, பிளாஸ்டிக் ஒழிப்பது தொடர்பான விழிப்புணர்வு துண்டுப் பிரசுரங்களையும் வழங்கினர். இறுதியாக, சிலம்பக் கலைக்கூட மாணவர்கள் பொதுமக்களுக்கு விழிப்புணர்வு ஏற்படுத்தும் வகையில் பல்வேறு வகையான சிலம்பக் கலைகளைச் சுழற்றி வெளிப்படுத்தினர்.

தென்காசி மாவட்டம் புளியரை சோதனைச் சாவடியில் கடையநல்லூர் சட்டமன்ற உறுப்பினர் திமு ராஜேந்திரன் ஆய்வு மேற்கொண்டார். கேரளாவுக்குச் செல்லும் கனிம வளங்களுக்கு நிரந்தரத் தடை விதிக்க வேண்டும் என்று வலியுறுத்திய அவர், இது குறித்து அமைச்சரிடம் முறையிட்டதாகவும் தெரிவித்தார். இந்த விவகாரத்தில் விரைவில் ஒரு நல்ல செய்தி வரும் என்றும் திமு ராஜேந்திரன் தகவல் அளித்தார்.

மதுரை திருப்பரங்குன்றத்தில் அமைந்துள்ள அருள்மிகு சுப்ரமணியசாமி கோவிலில் நேற்று (ஜூன் 20) மாலை ஆனி ஊஞ்சல் திருவிழா காப்பு கட்டுகளுடன் கோலாகலமாக தொடங்கியது. பத்து நாட்கள் நடைபெறும் இந்தத் திருவிழா, ஆன்மிகச் சிறப்புடன் கொண்டாடப்படவுள்ளது. திருவிழாவின் முக்கிய நிகழ்ச்சியாக வருகின்ற ஜூன் 29ஆம் தேதி மதியம் 12 மணிக்கு சுவாமிக்கு மா, பலா, வாழை ஆகிய முக்கனிகள் வைத்து சிறப்பு பூஜை நடத்தப்படவுள்ளது. அன்றைய தினம் மாலை முருகப் பெருமான் சிம்மாசன வாகனத்தில் எழுந்தருளி நகரின் முக்கிய வீதிகளில் வீதியுலா வருவார்.

திருச்செந்தூரில் உள்ள பத்மஸ்ரீ டாக்டர் சிவந்தி ஆதித்தனார் செவிலியர் கல்லூரியில் மாணவிகளுக்கான ஒருங்கிணைந்த பாரம்பரிய அறிவுப் பயிற்சித் திட்டம் நடத்தப்பட்டது. ஜூன் 20ஆம் தேதி (சனிக்கிழமை) பிற்பகல் கல்லூரி வளாகத்தில் நடைபெற்ற இந்தப் பயிற்சி முகாமில், ஏராளமான மாணவிகள் ஆர்வத்துடன் பங்கேற்று பாரம்பரிய வீரக்கலையான சிலம்பத்தை கற்றுக்கொண்டனர். இக்கல்லூரியின் கலை பண்பாட்டுக் குழு சார்பில் நடத்தப்பட்ட இந்த நிகழ்ச்சிக்கு கல்லூரி முதல்வர் டாக்டர் கலைக்குருசெல்வி தலைமை தாங்கினார். உதவிப் பேராசிரியை வனிஷா முன்னிலை வகித்தார். சிறப்பு விருந்தினராகக் கலந்துகொண்ட சிலம்ப மாஸ்டர் டாக்டர் சண்முக சுந்தரம், மாணவிகளுக்கு சிலம்பம் சுற்றுவதற்கான அடிப்படை தற்காப்பு நுணுக்கங்களைப் பயிற்றுவித்தார். அத்துடன், தற்காப்பு கலைகளின் அவசியம் குறித்தும் அவர் விரிவாகப் பேசினார். பாரம்பரிய கலைகளை மீட்டெடுக்கும் நோக்கிலும், மாணவிகளின் உடல் மற்றும் மன வலிமையை மேம்படுத்தும் வகையிலும் கல்லூரி நிர்வாகம் இந்தச் சிறப்புப் பயிற்சிக்கு ஏற்பாடு செய்திருந்தது. இந்தப் பயிற்சியில் கலந்து கொண்ட செவிலியர் கல்லூரி மாணவிகள் நமது பாரம்பரிய கலையை சிறப்பாகப் பயிற்சி செய்தனர். முடிவில், கல்லூரி கலை பண்பாட்டுக் குழுவினர் நன்றி தெரிவித்தனர்.

தூத்துக்குடி விமான நிலையப் பகுதியில் 21-6-2026 அன்று ஞாயிற்றுக்கிழமை மாலை வேளையில் பயங்கர சூறாவளி ஏற்பட்டது.