மதுரை அவனியாபுரம் அருகே உள்ள மாநகராட்சி காலனியில் கடந்த 20 நாட்களுக்கு முன் நடைபெற்ற கோவில் திருவிழாவில் ஏற்பட்ட முன்விரோதம் காரணமாக, நேற்று (ஜூன்.19) மாலை பட்டப்பகலில் 30 வயது மதிக்கத்தக்க பாலாஜி என்பவர் ஓட ஓட விரட்டி படுகொலை செய்யப்பட்டார். இதே தாக்குதலில் ராஜா உசேன் (33) படுகாயமடைந்து மதுரை அரசு மருத்துவமனையில் சிகிச்சைக்காக அனுமதிக்கப்பட்டுள்ளார். வில்லாபுரம் பகுதியைச் சேர்ந்த சஞ்சய் மற்றும் அவரது உறவினருடன் வந்த ஐந்து பேர் கொண்ட கும்பல் பாலாஜி மற்றும் ராஜா உசேன் இருவரையும் தாக்கியுள்ளது. தாக்குதலின்போது பாலாஜி அங்கிருந்து மூன்றாம் பிளாக் பகுதிக்கு தப்பி ஓட முயன்றபோதிலும், அந்தக் கும்பல் அவரை விடாமல் விரட்டிச் சென்று சரமாரியாக தாக்கியதில் சம்பவ இடத்திலேயே உயிரிழந்தார். இந்த கொடூரமான கொலை சம்பவம் குறித்து அவனியாபுரம் போலீசார் வழக்குப்பதிவு செய்து விசாரணை மேற்கொண்டு வருகின்றனர். மேலும், காவல் துணை ஆணையர் சம்பவ இடத்திற்கு நேரில் சென்று விசாரணையை நடத்தியுள்ளார். பட்டப்பகலில் நடந்த இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

மதுரை திருப்பரங்குன்றத்தில் அமைந்துள்ள அருள்மிகு சுப்ரமணியசாமி கோவிலில் நேற்று (ஜூன் 20) மாலை ஆனி ஊஞ்சல் திருவிழா காப்பு கட்டுகளுடன் கோலாகலமாக தொடங்கியது. பத்து நாட்கள் நடைபெறும் இந்தத் திருவிழா, ஆன்மிகச் சிறப்புடன் கொண்டாடப்படவுள்ளது. திருவிழாவின் முக்கிய நிகழ்ச்சியாக வருகின்ற ஜூன் 29ஆம் தேதி மதியம் 12 மணிக்கு சுவாமிக்கு மா, பலா, வாழை ஆகிய முக்கனிகள் வைத்து சிறப்பு பூஜை நடத்தப்படவுள்ளது. அன்றைய தினம் மாலை முருகப் பெருமான் சிம்மாசன வாகனத்தில் எழுந்தருளி நகரின் முக்கிய வீதிகளில் வீதியுலா வருவார்.

திண்டுக்கல் மாவட்டம் கொடைக்கானல் மன்னவனூர் கிராமத்தைச் சேர்ந்த 20 வயதான கோபாலகிருஷ்ணன் நேற்று மாலை பூச்சி மருந்து குடித்து தற்கொலைக்கு முயன்றார். உடனடியாக பெற்றோர் மற்றும் உறவினர்கள் அவரை கொடைக்கானல் அரசு மருத்துவமனையில் சிகிச்சைக்காக அனுமதித்தனர். எனினும், அவரது உடல்நிலை மோசமடைந்ததால் மேல் சிகிச்சைக்காக தேனி அரசு மருத்துவக் கல்லூரி மருத்துவமனைக்கு கொண்டுவரப்பட்டு, இன்று காலை 6 மணியளவில் சிகிச்சை பலனின்றி உயிரிழந்தார். அவரது குடும்பத்தார் கோபாலகிருஷ்ணனின் கண்களை தானம் செய்ய முடிவு செய்தனர். கோபாலகிருஷ்ணன் தற்கொலை செய்துகொண்டதால், வழக்கு விசாரணைக்காக மன்னவனூர் கிராம போலீசார் வர கால தாமதம் ஏற்பட்டது. இதனால் உடற்கூராய்வு செய்யாமல் உடலை வாங்க முடியாத சூழல் உருவானதால், நீண்ட நேரம் காத்திருந்த பெற்றோர் மற்றும் உறவினர்கள் ஆத்திரமடைந்தனர். அவர்கள் மருத்துவமனையை முற்றுகையிட்டு போராட்டத்தில் ஈடுபட முயன்ற நிலையில், போலீசார் அவர்களை சமாதானப்படுத்தி, உடலைப் பெறுவதற்கான நடவடிக்கைகளை மேற்கொள்வதாக உறுதி அளித்தனர். இதனையடுத்து, அவர்கள் மருத்துவமனை வளாகத்தில் காத்துக் கொண்டிருக்கின்றனர். இதுகுறித்து கோபாலகிருஷ்ணனின் உறவினர் ஒருவர் கூறுகையில், கொடைக்கானலில் போதுமான மருத்துவ வசதி இருந்திருந்தால், தாங்கள் ஏன் தேனி மருத்துவமனைக்கு வந்திருக்க வேண்டும் என்று கேள்வி எழுப்பினார். மேலும், காலை 6 மணியளவில் உயிரிழந்த நிலையில், தற்போது வரை தங்களிடம் உடலை ஒப்படைக்காமல் இருப்பதாகவும், கண் தானம் செய்யப்பட்ட பின்பும் கூட போலீசார் மற்றும் மருத்துவமனை நிர்வாகம் அலட்சியத்துடன் செயல்படுவதாகவும் அவர் குற்றம் சாட்டினார். எனவே, விரைவில் உடற்கூராய்வு செய்து உயிரிழந்த கோபாலகிருஷ்ணனின் உடலை தங்களிடம் ஒப்படைக்க வேண்டும் என அவரது பெற்றோர் மற்றும் உறவினர்கள் கோரிக்கை விடுத்துள்ளனர்.

திண்டுக்கல் நாடாளுமன்ற உறுப்பினர் தொகுதி மேம்பாட்டு நிதியின் கீழ், சித்தையன் கோட்டை பேரூராட்சிக்குட்பட்ட நரசிங்கபுரத்தில் ரூபாய் 35 லட்சம் மதிப்பீட்டில் கட்டி முடிக்கப்பட்ட 60 ஆயிரம் லிட்டர் கொள்ளளவு கொண்ட புதிய மேல்நிலை நீர்த்தேக்க தொட்டி மக்கள் பயன்பாட்டிற்காக திறக்கப்பட்டது. மார்க்சிஸ்ட் கம்யூனிஸ்ட் கட்சி திண்டுக்கல் நாடாளுமன்ற உறுப்பினர் ஆர். சச்சிதானந்தம் மற்றும் திமுக முன்னாள் அமைச்சரும் ஆத்தூர் சட்டமன்ற உறுப்பினருமாகிய ஐ. பெரியசாமி ஆகியோர் இந்த நீர்த்தேக்க தொட்டியை திறந்து வைத்தனர். இந்நிகழ்ச்சியில், பேரூராட்சி தலைவர் போதும் பொண்ணு முரளி, வார்டு உறுப்பினர்கள், பேரூராட்சி செயல் அலுவலர் ஜெயமாலு மற்றும் அலுவலக பணியாளர்கள், திமுக மற்றும் மார்க்சிஸ்ட் கம்யூனிஸ்ட் கட்சியைச் சேர்ந்த மாவட்ட, ஒன்றிய, கிளை பொறுப்பாளர்கள் மற்றும் தொண்டர்கள், அரசு ஒப்பந்ததாரர் மற்றும் ஏராளமான பொதுமக்கள் என பலரும் கலந்துகொண்டனர்.

சிங்கம்புணரி அருகே முறையூரில் அமைந்துள்ள 800 ஆண்டுகள் பழமையான ஸ்ரீ மீனாட்சி சொக்கநாதர் திருக்கோவிலின் ஆனி திருமஞ்சன பெருவிழா இன்று (ஜூன் 20) கொடியேற்றத்துடன் விமர்சையாக தொடங்கியது. இந்த விழாவின் தொடக்கமாக, ரிஷப கொடியுடன் ஊர்வலம் மற்றும் சிறப்பு பூஜைகள் விமர்சையாக நடைபெற்றன. சிவகங்கை தேவஸ்தானம் மற்றும் பொதுமக்கள் இணைந்து இந்த பெருவிழாவை ஏற்பாடு செய்துள்ளனர். விழாவின் முக்கிய நிகழ்வுகளாக, ஜூன் 27 அன்று திருக்கல்யாணம் மற்றும் ஜூன் 28 அன்று திருத்தேரோட்டம் நடைபெற உள்ளது.

தமிழக வெற்றிக் கழகத் தலைவரும் தமிழக முதல்வருமான ஜோசப் விஜய் தனது 52-வது பிறந்தநாளை முன்னிட்டு பொதுமக்களுக்கு எவ்வித இடையூறும் ஏற்படக் கூடாது என்றும், யாரும் பேனர்கள் வைக்கக் கூடாது என்றும் கடுமையான உத்தரவைப் பிறப்பித்திருந்தார். ஆனால், தேனி மாவட்டம் பெரியகுளம் மற்றும் அதன் சுற்றுவட்டாரப் பகுதிகளில், இந்த உத்தரவை முற்றிலுமாக மீறி, தவெக நிர்வாகிகள் அராஜகமாக பேனர்களை குவித்து, மைக் செட் அமைத்து பொதுமக்களுக்கும், போக்குவரத்துக்கும் பெரும் அச்சுறுத்தலை ஏற்படுத்தியுள்ளது. இது அப்பகுதி மக்களிடையே பெரும் அதிர்ச்சியை ஏற்படுத்தியுள்ளது. பெரியகுளம் பகுதி தவெக மாவட்டச் செயலாளர்கள், நிர்வாகிகள் மற்றும் முக்கிய பொறுப்பில் உள்ளவர்கள், தங்கள் தலைவரின் உத்தரவை காலில் போட்டு மிதிப்பது போல், போட்டிப்போட்டுக் கொண்டு பேனர்களை நட்டு வைத்துள்ளனர். குறிப்பாக, பெரியகுளம் அருகே உள்ள புதுப்பட்டி புறவழிச்சாலையின் இருபுறங்களிலும் விதிகளை மீறி 50-க்கும் மேற்பட்ட ராட்சத பேனர்கள் வைக்கப்பட்டுள்ளதால், குறுகலான சாலைப் பகுதிகளில் வாகன ஓட்டிகளின் பார்வை மறைக்கப்பட்டு விபத்து அபாயம் உருவாகியுள்ளது. அதேபோல், பெரியகுளம் நகராட்சி, ஒன்றிய மற்றும் பேரூராட்சிப் பகுதிகளிலும் நடைபாதைகளையும், சாலை ஓரங்களையும் ஆக்கிரமித்து பேனர்கள் வைக்கப்பட்டு பாதசாரிகள் நடக்க முடியாத நிலையை ஏற்படுத்தியுள்ளன. மேலும், நலத்திட்ட உதவிகள் மற்றும் ரத்ததான முகாம் என்ற பெயரில், விதிகளை மீறி சாலைகளில் அதிக ஒலியெழுப்பும் மைக் செட்டுகள் அமைக்கப்பட்டு, உச்சகட்ட சத்தத்தில் பாடல்கள் ஒலிக்கவிடப்படுவதால், அப்பகுதியில் உள்ள முதியவர்கள் மற்றும் நோயாளிகள் நிம்மதியிழந்து தவித்து வருவதாகவும், பொதுமக்களின் அமைதியைக் கெடுக்கும் வகையில் இந்த அராஜகம் அரங்கேறி வருவதாகவும் தெரிவிக்கப்பட்டுள்ளது. கட்சி ஆரம்பித்து முழுமையாகத் தேர்தலைச் சந்திக்காத நிலையிலேயே, அக்கட்சியின் எம் எல் ஏக்கள், மாவட்டச் செயலாளர்கள் மற்றும் நிர்வாகிகள் தலைவரின் பேச்சை மதிக்காமல் இப்படித் தன்னிச்சையாகச் செயல்படுவது பொதுமக்களிடையே பெரும் அதிருப்தியை ஏற்படுத்தியுள்ளது. தவெக நிர்வாகிகளின் இந்த 'சொல்வது ஒன்று, செய்வது ஒன்று' என்ற இரட்டை வேடப் போக்கைக் கண்டு பெரியகுளம் பகுதி மக்கள் பெரும் அதிர்ச்சியிலும், வேதனையிலும் ஆழ்ந்துள்ளனர். பொதுமக்களுக்கு ஆபத்தை விளைவிக்கும் இந்த பேனர்களை காவல்துறையும், நகராட்சி நிர்வாகமும் உடனடியாக அகற்ற வேண்டும் என்பதே அப்பகுதி மக்களின் மனக்குமுறலாக உள்ளது.

விருதுநகர் மாவட்டம், சாத்தூர் பெரியார் நகர் சிறுவர் பூங்காவில், ஒரு தனியார் தொண்டு நிறுவனத்தின் 15வது ஆண்டு தினத்தையொட்டியும், சுற்றுச்சூழல் தினத்தை முன்னிட்டும், மரம் நடு விழா மற்றும் பிளாஸ்டிக் ஒழிப்பு விழிப்புணர்வு நிகழ்ச்சி நடைபெற்றது. இந்நிகழ்வில் சாத்தூர் நகர் தலைவர் குருசாமி, நகராட்சி ஆணையாளர் ஜெகதீஸ்வரி, தொண்டு நிறுவன அமைப்பினர், சிலம்பம் கலைக்கூட ஆசான் மற்றும் மாணவ மாணவிகள் எனப் பலரும் கலந்து கொண்டனர். நிகழ்ச்சியில் பேசிய தொண்டு நிறுவன அமைப்பினர், பொதுமக்கள் ஆர்வத்துடன் விலங்குகளை வளர்ப்போம் என்ற எண்ணத்தில் மாடுகளை சாலைகளில் துரத்திவிடுவது பெரும் ஆபத்தை விளைவிப்பதாகக் குறிப்பிட்டனர். இதேபோன்று, நாய்களை விருப்பப்பட்டு வளர்த்து, பின்பு பராமரிக்க முடியாமல் தெருக்களில் விட்டுவிடுவதால் பல்வேறு இடர்பாடுகளும் பொதுமக்களுக்கு ஆபத்தும் ஏற்படுவதாகவும் சுட்டிக்காட்டினர். இதனால் பொதுமக்கள் முறைப்படி நாய்களை வளர்க்க லைசன்ஸ் பெற்று வளர்க்க வேண்டும் என்றும், ஆர்வத்துடன் நாய்களை வளர்த்து தெருவில் விட்டுவிடுவதால் ஏற்படும் விபத்துகளைத் தவிர்க்க வேண்டும் என்றும் கேட்டுக்கொண்டனர். இதனைத் தொடர்ந்து, நாகர்கோவில் சேர்மன், ஆணையாளர், தொண்டு நிறுவன அமைப்பினர் மற்றும் மாணவர்கள் அனைவரும் அப்பகுதியில் ஏராளமான மரக்கன்றுகளை நட்டு சுற்றுச்சூழல் விழிப்புணர்வை ஏற்படுத்தினர். மேலும், பிளாஸ்டிக்கால் ஏற்படும் ஆபத்துகளை எடுத்துரைத்து, பிளாஸ்டிக் ஒழிப்பது தொடர்பான விழிப்புணர்வு துண்டுப் பிரசுரங்களையும் வழங்கினர். இறுதியாக, சிலம்பக் கலைக்கூட மாணவர்கள் பொதுமக்களுக்கு விழிப்புணர்வு ஏற்படுத்தும் வகையில் பல்வேறு வகையான சிலம்பக் கலைகளைச் சுழற்றி வெளிப்படுத்தினர்.

ஒட்டன்சத்திரம் திண்டுக்கல் சாலையின் ஓரத்தில், பாதயாத்திரை செல்லும் பயணிகளுக்காக அமைக்கப்பட்ட நடைபாதையில், ஒரு தனியார் உணவகம் புரோட்டா ஸ்டால், டீக்கடை ஸ்டால், மற்றும் அமர்ந்து உணவு உண்ணும் இருக்கைகள் போன்றவற்றை அமைத்து ஆக்கிரமிப்பு செய்துள்ளது. இந்த ஆக்கிரமிப்பால், குறிப்பாக பங்குனி உத்திரம் மற்றும் தைப்பூசத்திற்கு பாதயாத்திரை செல்லும் பயணிகள் விபத்தில் சிக்கும் ஆபத்து உள்ளதாக அச்சம் தெரிவிக்கப்பட்டுள்ளது. இந்த விவகாரத்தில் நகராட்சி நிர்வாகம் உரிய நடவடிக்கை எடுக்கவில்லை எனக் குற்றம் சாட்டியுள்ள ஒட்டன்சத்திரம் நகர மக்கள், ஆக்கிரமிப்புகளை உடனடியாக அகற்ற கோரி ஒட்டன்சத்திரம் நகராட்சிக்கு வலியுறுத்தியுள்ளனர். மேலும், ஆக்கிரமிப்புகளை அகற்றாமல் ஒட்டன்சத்திரம் நகராட்சி தூங்குகிறதா என பொதுமக்கள் நேரடியாக கேள்வி எழுப்பியுள்ளனர்.

தேனி மாவட்டம், ஆண்டிபட்டி அருகே சண்முகசுந்தரபுரம் கிராமத்தில், தேனி - மதுரை நெடுஞ்சாலை ஓரம் வளர்ந்துள்ள சீமை கருவேல மரங்களை அகற்றும் தூய்மைப் பணியை மறுமலர்ச்சி திராவிட முன்னேற்றக் கழகம் (மதிமுக) மேற்கொண்டது. நிலத்தடி நீரையும், இயற்கையையும் பாதுகாக்கும் நோக்கத்துடன் நடைபெற்ற இந்த பணியில், மதிமுக பொதுச்செயலாளர் வைகோ நேரில் கலந்து கொண்டு பணிகளைத் தொடங்கி வைத்தார். அவர் நவீன இயந்திரத்தைக் கொண்டும், ஜேசிபி வாகனத்தையும் நேர்த்தியாக இயக்கி புதர் மண்டிப் போயிருந்த கருவேல மரங்களை வேரோடு அகற்றினார். வைகோவின் இந்த சுறுசுறுப்பான செயல்பாட்டைக் கண்டு அங்கிருந்த கட்சியினரும், பொதுமக்களும் உற்சாகமடைந்தனர். மதிமுக முக்கிய நிர்வாகிகள், தொண்டர்கள் மற்றும் தமிழக வெற்றிக் கழகம் (தவெக), கம்யூனிஸ்ட் உள்ளிட்ட தோழமைக் கட்சிகளின் நிர்வாகிகள், பொதுமக்கள் எனப் பலர் இந்தப் பணியில் திரளாகக் கலந்து கொண்டனர். பின்னர் செய்தியாளர்களைச் சந்தித்த வைகோ, தமிழக சட்டசபையில் எந்தத் தீர்மானம் போட்டாலும், அதற்கு முட்டுக்கட்டை போட்டு தமிழகத்துக்குக் கேடு விளைவிப்பதே மத்திய அரசுதான் என்று குற்றம் சாட்டினார். தமிழ்நாட்டின் வாழ்வாதாரங்களைப் பாதுகாப்பதற்கு காவிரி மண்டலத்தில் ஹைட்ரோ கார்பன் திட்டம் வரக்கூடாது என்பதுடன், மேகதாது அணையை கட்ட முயலும் கர்நாடக அரசைக் கண்டித்து கடந்த 2012ஆம் ஆண்டிலேயே முதன்முதலில் போராட்டம் நடத்தியது மதிமுகதான் என்றும் அவர் குறிப்பிட்டார். தற்போது மேகதாது அணைக்கு எதிராக சட்டசபையில் ஒரு நல்ல தீர்மானத்தை அனைத்து கட்சிகளும் ஒருசேர இணைந்து, நம்முடைய மாண்புமிகு முதலமைச்சர் ஜோசப் விஜய் அவர்கள் கொண்டு வந்திருப்பதாக வைகோ தெரிவித்தார். ஆனால், கர்நாடக அரசு மட்டும் தனித்து இதைச் செய்யவில்லை என்றும், இதற்கு முழுக்க முழுக்கப் பின்புலமாக இருந்து இயக்குவது நரேந்திர மோடி தலைமையிலான மத்திய சர்க்கார்தான் என்றும் அவர் எச்சரித்தார். மேலும், கடந்த 2014 டிசம்பர் 7, 8 ஆகிய தேதிகளில் டெல்லியில் நடந்த ஒரு ரகசியக் கூட்டத்தில், கர்நாடக மாநில அமைச்சர்கள், எம்பிக்கள், எம்எல்ஏக்கள் கலந்து கொண்டதாகவும், அப்போது 'நீங்கள் மேகதாது அணையை கட்டுங்கள், நாங்கள் தடுக்க மாட்டோம், நீங்கள் கட்டிக்கொண்டே இருங்கள்' என்று மத்திய சர்க்கார் பச்சைக்கொடி காட்டியதாகவும் வைகோ கூறினார். இந்தச் சதித்திட்டத்தை 'தி இந்து' ஆங்கில நாளிதழ்தான் வெளி உலகத்திற்கு அம்பலப்படுத்தியது என்றும் அவர் அப்போது தெரிவித்தார்.