रक्षाबंधनाच्या दिवशी कुडूस नाक्यावर वाहतूक कोंडी; लाडक्या बहिणींचा सवाल, “लाडका भाऊ कधी येणार?” कुडूस | प्रतिनिधी वाडा तालुक्यातील कुडूस नाका येथे शुक्रवारी, दि. २८ ऑगस्ट रोजी रक्षाबंधनाच्या सणाच्या पार्श्वभूमीवर मोठ्या प्रमाणात वाहतूक कोंडी झाली. सणानिमित्त कुडूस परिसरात ये-जा करणाऱ्या नागरिकांची संख्या वाढल्याने वाहनांच्या लांबच लांब रांगा लागल्या. त्यामुळे अवघ्या काही मिनिटांच्या प्रवासासाठी नागरिकांना तासन्‌तास वाहतूक कोंडीत अडकून राहावे लागले. कुडूस नाका हा वाडा तालुक्यातील महत्त्वाचा वाहतूक मार्ग असून या ठिकाणी नेहमीच वाहनांची मोठी वर्दळ असते. त्यातच सध्या ईगल इन्फ्रास्ट्रक्चर या ठेकेदारामार्फत रस्त्याचे काम सुरू असून एका बाजूने वाहतूक सुरू ठेवण्यात आली आहे. दुसऱ्या बाजूचा रस्ता खोदून ठेवण्यात आल्याने वाहतुकीवर मोठा परिणाम होत असल्याचे नागरिकांचे म्हणणे आहे. याशिवाय कुडूस नाका परिसरातील बेशिस्त वाहतूक हीदेखील वाहतूक कोंडीचे प्रमुख कारण असल्याच्या तक्रारी नागरिकांकडून करण्यात येत आहेत. काही वाहनचालक तसेच रिक्षाचालकांकडून वाहतूक नियमांचे पालन न करता विरुद्ध दिशेने वाहने चालविली जात असल्याने वाहतुकीचा खोळंबा वाढत असल्याचे चित्र आहे. दरम्यान, कुडूस नाक्यावरील अनधिकृत बांधकामांचा प्रश्न गेल्या अनेक वर्षांपासून प्रलंबित आहे. या बांधकामांमुळे रस्त्याची उपलब्ध जागा कमी होत असून वाहतुकीला अडथळा निर्माण होत असल्याची नागरिकांची तक्रार आहे. सार्वजनिक बांधकाम विभागाने या प्रश्नाकडे गांभीर्याने लक्ष देऊन कायमस्वरूपी तोडगा काढण्याची मागणी होत आहे. कुडूस नाक्यावर उड्डाणपूल उभारण्यात यावा, अशी मागणीही स्थानिक नागरिकांकडून गेल्या अनेक वर्षांपासून केली जात आहे. मात्र अद्याप या मागणीवर ठोस कार्यवाही झालेली नसल्याने नागरिकांमध्ये नाराजी आहे. रक्षाबंधनाच्या दिवशी बहिणींची गैरसोय रक्षाबंधनाच्या निमित्ताने भावाला राखी बांधण्यासाठी निघालेल्या अनेक बहिणींना कुडूस नाक्यावरील वाहतूक कोंडीचा फटका बसला. तासन्‌तास ट्रॅफिकमध्ये अडकून राहावे लागल्याने काही महिलांनी संताप व्यक्त केला. “लाडक्या बहिणींच्या अडचणी सोडविण्याची चर्चा केली जाते; मात्र कुडूस नाक्यावर आम्हाला तासन्‌तास ट्रॅफिकमध्ये अडकावे लागत आहे. लाडक्या बहिणींना या ट्रॅफिकमधून बाहेर काढण्यासाठी लाडका भाऊ कधी येणार?” असा सवाल संतप्त नागरिकांकडून उपस्थित करण्यात आला. कुडूस नाक्यावरील वाहतूक कोंडीचा प्रश्न केवळ सणासुदीपुरता मर्यादित नसून दररोज नागरिकांना याचा सामना करावा लागत आहे. त्यामुळे सुरू असलेले रस्त्याचे काम तातडीने पूर्ण करणे, बेशिस्त वाहतुकीवर नियंत्रण आणणे, अनधिकृत बांधकामांचा प्रश्न मार्गी लावणे आणि भविष्यातील वाहतुकीचा विचार करून उड्डाणपुलाबाबत ठोस निर्णय घेणे आवश्यक असल्याची मागणी नागरिकांकडून होत आहे. आता सार्वजनिक बांधकाम विभाग, वाहतूक विभाग आणि संबंधित प्रशासन कुडूस नाक्यावरील या गंभीर वाहतूक समस्येवर कायमस्वरूपी तोडगा कधी काढणार, याकडे नागरिकांचे लक्ष लागले आहे.

Sanvad Maharashtra News

वाडा, पालघर, महाराष्ट्र•

5 hrs ago

रक्षाबंधनाच्या दिवशी कुडूस नाक्यावर वाहतूक कोंडी; लाडक्या बहिणींचा सवाल, “लाडका भाऊ कधी येणार?” कुडूस | प्रतिनिधी वाडा तालुक्यातील कुडूस नाका येथे शुक्रवारी, दि. २८ ऑगस्ट रोजी रक्षाबंधनाच्या सणाच्या पार्श्वभूमीवर मोठ्या प्रमाणात वाहतूक कोंडी झाली. सणानिमित्त कुडूस परिसरात ये-जा करणाऱ्या नागरिकांची संख्या वाढल्याने वाहनांच्या लांबच लांब रांगा लागल्या. त्यामुळे अवघ्या काही मिनिटांच्या प्रवासासाठी नागरिकांना तासन्‌तास वाहतूक कोंडीत अडकून राहावे लागले. कुडूस नाका हा वाडा तालुक्यातील महत्त्वाचा वाहतूक मार्ग असून या ठिकाणी नेहमीच वाहनांची मोठी वर्दळ असते. त्यातच सध्या ईगल इन्फ्रास्ट्रक्चर या ठेकेदारामार्फत रस्त्याचे काम सुरू असून एका बाजूने वाहतूक सुरू ठेवण्यात आली आहे. दुसऱ्या बाजूचा रस्ता खोदून ठेवण्यात आल्याने वाहतुकीवर मोठा परिणाम होत असल्याचे नागरिकांचे म्हणणे आहे. याशिवाय कुडूस नाका परिसरातील बेशिस्त वाहतूक हीदेखील वाहतूक कोंडीचे प्रमुख कारण असल्याच्या तक्रारी नागरिकांकडून करण्यात येत आहेत. काही वाहनचालक तसेच रिक्षाचालकांकडून वाहतूक नियमांचे पालन न करता विरुद्ध दिशेने वाहने चालविली जात असल्याने वाहतुकीचा खोळंबा वाढत असल्याचे चित्र आहे. दरम्यान, कुडूस नाक्यावरील अनधिकृत बांधकामांचा प्रश्न गेल्या अनेक वर्षांपासून प्रलंबित आहे. या बांधकामांमुळे रस्त्याची उपलब्ध जागा कमी होत असून वाहतुकीला अडथळा निर्माण होत असल्याची नागरिकांची तक्रार आहे. सार्वजनिक बांधकाम विभागाने या प्रश्नाकडे गांभीर्याने लक्ष देऊन कायमस्वरूपी तोडगा काढण्याची मागणी होत आहे. कुडूस नाक्यावर उड्डाणपूल उभारण्यात यावा, अशी मागणीही स्थानिक नागरिकांकडून गेल्या अनेक वर्षांपासून केली जात आहे. मात्र अद्याप या मागणीवर ठोस कार्यवाही झालेली नसल्याने नागरिकांमध्ये नाराजी आहे. रक्षाबंधनाच्या दिवशी बहिणींची गैरसोय रक्षाबंधनाच्या निमित्ताने भावाला राखी बांधण्यासाठी निघालेल्या अनेक बहिणींना कुडूस नाक्यावरील वाहतूक कोंडीचा फटका बसला. तासन्‌तास ट्रॅफिकमध्ये अडकून राहावे लागल्याने काही महिलांनी संताप व्यक्त केला. “लाडक्या बहिणींच्या अडचणी सोडविण्याची चर्चा केली जाते; मात्र कुडूस नाक्यावर आम्हाला तासन्‌तास ट्रॅफिकमध्ये अडकावे लागत आहे. लाडक्या बहिणींना या ट्रॅफिकमधून बाहेर काढण्यासाठी लाडका भाऊ कधी येणार?” असा सवाल संतप्त नागरिकांकडून उपस्थित करण्यात आला. कुडूस नाक्यावरील वाहतूक कोंडीचा प्रश्न केवळ सणासुदीपुरता मर्यादित नसून दररोज नागरिकांना याचा सामना करावा लागत आहे. त्यामुळे सुरू असलेले रस्त्याचे काम तातडीने पूर्ण करणे, बेशिस्त वाहतुकीवर नियंत्रण आणणे, अनधिकृत बांधकामांचा प्रश्न मार्गी लावणे आणि भविष्यातील वाहतुकीचा विचार करून उड्डाणपुलाबाबत ठोस निर्णय घेणे आवश्यक असल्याची मागणी नागरिकांकडून होत आहे. आता सार्वजनिक बांधकाम विभाग, वाहतूक विभाग आणि संबंधित प्रशासन कुडूस नाक्यावरील या गंभीर वाहतूक समस्येवर कायमस्वरूपी तोडगा कधी काढणार, याकडे नागरिकांचे लक्ष लागले आहे.