बुलढाणा येथील प्रशासकीय इमारती समोरील एका पानटपरीवर एफडीएच्या पथकाने धडक कारवाई केली आहे. एफडीएच्या या दणक्यामुळे ही पानटपरी ‘सील’ करण्यात आली असून एफडीएच्या पथकाकडून ही धडक कारवाई करण्यात आली.

बुलढाणा जिल्ह्यातील चिखली येथे बोगस बियाण्यांमुळे शेतकऱ्यांचे कंबरडे मोडले असून त्यांच्यावर पुन्हा दुबार पेरणीची वेळ आली आहे. शेतात पेरणी करूनही शेती संपूर्णपणे रिकामीच राहिल्याने शेतकऱ्यांना मोठा आर्थिक फटका बसला असून, त्यांना आता पुन्हा एकदा पेरणी करावी लागत आहे.

बुलढाणा जिल्ह्यातील खामगाव मतदारसंघातील पिंपळगाव राजा येथे सुरू असलेल्या विशेष सखोल पुनरिक्षण (SIR) कार्यक्रमाची उपविभागीय अधिकारी तथा सहाय्यक मतदार नोंदणी अधिकारी डॉ. रामेश्वर पुरी यांनी प्रत्यक्ष पाहणी केली आहे. डॉ. पुरी यांनी मतदान केंद्राला भेट देऊन बीएलओ (BLO), पर्यवेक्षक आणि संबंधित कर्मचाऱ्यांकडून सुरू असलेल्या कामाचा आढावा घेतला. या पाहणी दरम्यान मतदार यादीशी संबंधित नोंदी, गणनापत्रके आणि आवश्यक कागदपत्रांची तपासणी करण्यात आली. त्यानंतर त्यांनी तेथे उपस्थित नागरिकांशी संवाद साधत विशेष सखोल पुनरिक्षण प्रक्रियेबाबत माहिती घेतली. तसेच बीएलओ (BLO) यांच्या कामातील अडचणी समजून घेत त्यांना आवश्यक मार्गदर्शन केले. आयोजित आढावा बैठकीत बोलताना उपविभागीय अधिकारी डॉ. रमेश पुरी यांनी मतदार यादीचे हे विशेष सखोल पुनरिक्षण अत्यंत अचूक, पारदर्शक आणि निर्धारित वेळेत पूर्ण करण्याच्या सूचना दिल्या. प्रत्येक पात्र मतदाराची नोंद सुनिश्चित करण्यासाठी सर्व संबंधित अधिकारी आणि कर्मचाऱ्यांनी परस्परांशी समन्वयाने काम करावे, असे आवाहनही त्यांनी या वेळी केले.

एस.टी. महामंडळाच्या उत्पन्नात वाढीबाबत बुलढाणा विभागाने संपूर्ण राज्यात प्रथम क्रमांक पटकावला आहे. गेल्या वर्षीच्या तुलनेत विभागाने बस फेऱ्यांमध्ये ५७ लाख किलोमीटरने वाढ केली असून, एकूण उत्पन्नात ४६ कोटी रुपयांची भर पडली आहे. या उत्कृष्ट कामगिरीमुळे विभागाचा नफा १० कोटी रुपयांवरून थेट २२ कोटी रुपयांवर पोहोचला आहे, तर प्रवाशांच्या संख्येतही ११ लाखांची वाढ नोंदवण्यात आली आहे. हे यश योग्य नियोजन आणि चालक-वाहकांच्या उत्कृष्ट कामगिरीमुळे साध्य झाल्याचे सांगण्यात आले आहे. या यशाबद्दल माहिती देताना विभागीय वाहतूक अधिकारी दिगंबर जाधव म्हणाले की, १ जून रोजी एस.टी.च्या वर्धापन दिनानिमित्त केंद्रीय कार्यालयाने बुलढाणा विभागाचा गौरव केला. या नियोजनामध्ये किलोमीटरमध्ये वाढ, खर्चात बचत आणि उत्पन्न वाढवण्यावर भर देण्यात आला होता. चालक-वाहकांच्या कार्यक्षमतेचा वापर करून प्रति चालक सरासरी १० किलोमीटर वाढवल्याचा फायदा झाला आहे. मात्र, बुलढाणा विभागाची ही कामगिरी कौतुकास्पद असतानाच, नाशिक जिल्ह्याच्या एस.टी. विभागाला मात्र दरमहा ८ कोटी रुपयांचा तोटा सहन करावा लागत असल्याचे समोर आले आहे.

श्री क्षेत्र एकलारा ते श्री क्षेत्र पंढरपूर पायी दिंडी सोहळ्यामध्ये देऊळगाव राजा येथून खंडोबाचे आगमन झाले आहे. या दिंडीमध्ये खंडोबाच्या सहभागाचे स्वागत हरिभक्त परायण भीमराव महाराज अंभोरे यांनी केले असून, त्यांनी या प्रसंगी आपले मनोगत व्यक्त केले. यापूर्वी श्री क्षेत्र एकलारा ते श्री क्षेत्र शेगाव या दिंडीमध्येही खंडोबाचे आगमन झाले होते. सतीश पुरी यांनी दिलेल्या माहितीनुसार, श्री किसन देव महाराज यांच्या सानिध्यात राहून त्यांच्या प्रत्येक दिंडीमध्ये सहभागी होण्याची खंडोबाची इच्छा असल्याचे दिसून येते. मागच्या जन्मी चुकून एखादी वारी हुकली असावी आणि ती वारी पूर्ण करण्यासाठीच खंडोबाने या रूपात येऊन दिंडीत सहभाग नोंदवला असावा, अशी भावनाही यावेळी व्यक्त करण्यात आली.

बुलढाणा जिल्ह्यातील वारकऱ्यांच्या सोयीसाठी सुरू करण्यात आलेल्या खामगाव-पंढरपूर विठ्ठल दर्शन एक्सप्रेसच्या वेळापत्रकात तातडीने बदल करण्याची मागणी शिवसेना (उद्धव बाळासाहेब ठाकरे) पक्षाने केली आहे. या संदर्भात खामगाव रेल्वे प्रशासनाद्वारे भुसावळ रेल्वे प्रबंधकांना निवेदन देण्यात आले असून, मागणी मान्य न झाल्यास तीव्र आंदोलनाचा इशारा देण्यात आला आहे. निवेदनात नमूद केल्यानुसार, ही विशेष एक्सप्रेस २१ जुलै २०२६ आणि २३ जुलै २०२६ रोजी खामगाववरून सुटणार आहे. मात्र, परतीचे वेळापत्रक अनुक्रमे २२ जुलै आणि २४ जुलै असे निश्चित करण्यात आले आहे. यंदा आषाढी एकादशी २५ जुलै २०२६ रोजी असल्याने, वारकरी एकादशीचे दर्शन घेऊन द्वादशीला परततात. सध्याच्या नियोजनामुळे रेल्वेच्या दोन्ही फेऱ्या एकादशीपूर्वीच पूर्ण होत असल्याने वारकऱ्यांची मोठी गैरसोय होणार आहे. त्यामुळे आषाढी एकादशीनंतर परतीचा प्रवास नियोजित करण्याची मागणी करण्यात आली आहे. हे निवेदन शिवसेना तालुकाप्रमुख श्रीराम खेलदार आणि शहरप्रमुख रवी जैन यांच्या नेतृत्वात देण्यात आले. यावेळी ह.भ.प. श्री महादेव महाराज बोराडे, सुभाष ठाकूर, बाबा काळे, राहुल मनमोडे, अक्षय हातेकर, हेमंत खारोडे, गजानन होगे, रामेश्वर लहुडकार आणि प्रमोदभाऊ फाटे यांच्यासह अनेक पदाधिकारी व शिवसैनिक उपस्थित होते.

बुलढाणा जिल्ह्यात आज शिक्षकांनी राज्यव्यापी शाळा बंद आंदोलनाचा भाग म्हणून जिल्हाधिकारी कार्यालयावर भव्य महामोर्चा काढला. मुंबईतील आझाद मैदानावर सुरू असलेल्या आंदोलनाला पाठिंबा दर्शवत, जिल्ह्यातील विविध संघटनांच्या शेकडो शिक्षकांनी रस्त्यावर उतरून आपल्या मागण्यांसाठी आवाज उठवला. शहरातील जिजामाता संकुल येथून निघालेला हा मोर्चा संगम चौक आणि जयस्तंभ चौक मार्गे थेट जिल्हाधिकारी कार्यालयावर धडकला. शिक्षकांनी प्रामुख्याने अशैक्षणिक कामांपासून सुटका मिळावी, अशी ठाम मागणी केली आहे. याशिवाय टीईटीची सक्ती रद्द करणे आणि पदोन्नतीमधील जाचक व अन्यायकारक अटी काढून टाकणे या प्रमुख मागण्यांचाही समावेश आहे. विशेषतः बीएलओ (BLO) म्हणून शिक्षकांवर लादल्या जाणाऱ्या कामांचा मोठा वैताग असल्याचे आंदोलकांनी स्पष्ट केले. आंदोलक शिक्षकांच्या शिष्टमंडळाने जिल्हाधिकारी कार्यालयात निवेदन सादर केले असून, शासनाने तातडीने या मागण्यांवर सकारात्मक निर्णय घ्यावा, अन्यथा यापेक्षा तीव्र स्वरूपाचे आंदोलन छेडले जाईल, असा इशारा देण्यात आला आहे.

दक्षिणी विएतनाममधील प्रसिद्ध पर्यटन स्थळ असलेल्या फू क्वोक बेटाजवळ शनिवारी एक अत्यंत वेदनादायक दुर्घटना घडली. ३२ भारतीय पर्यटक आणि चालक दलाच्या ४ सदस्यांना घेऊन जाणारी एक स्पीडबोट समुद्रात उलटली. या भीषण अपघातात १५ भारतीय पर्यटकांचा मृत्यू झाला आहे. प्राथमिक माहितीनुसार, ही बोट एका बेटाच्या सफरीवरून परतत होती. किनाऱ्यापासून काही अंतरावर असतानाच, समुद्रातील प्रचंड लाटा आणि खराब हवामानामुळे बोट उलटली. या दुर्घटनेनंतर स्थानिक मच्छिमार आणि बचाव पथकाने तातडीने मदत व बचाव कार्य सुरू केले आणि २१ लोकांना सुखरूप बाहेर काढले।