माहूर येथील ऐतिहासिक रामगड किल्ल्याजवळ बेकायदेशीर बांधकामे आणि निधीच्या गैरवापराच्या आरोपांवर जिल्हाधिकाऱ्यांनी ७ दिवसांत चौकशीचे आदेश दिले आहेत. नगरपंचायतीच्या कथित भ्रष्टाचाराने प्रशासकीय वर्तुळात खळबळ उडाली असून, दोषींवर फौजदारी गुन्हे दाखल होण्याची शक्यता आहे. आता तहसीलदारांच्या अहवालाकडे संपूर्ण जिल्ह्याचे लक्ष लागले आहे.

Post by Nandkumar Motiram Totewad

यवतमाळ जिल्ह्यातील घाटंजी येथे बॅंक ऑफ महाराष्ट्राचे एटीएम फोडण्याचा प्रयत्न करणाऱ्या एका सराईत चोरट्याला घाटंजी पोलिसांनी रात्रीच्या गस्तीवर असताना जेरबंद केले आहे. पोलिसांच्या सतर्कतेमुळे चोरट्याचा हा प्रयत्न पूर्णपणे फसला. या उत्कृष्ट कामगिरीबद्दल जिल्हा पोलीस अधीक्षक कुमार चिंता यांनी घाटंजी पोलिसांचे कौतुक केले. त्यांनी पोलिसांना १५ हजार रुपयांचे रोख बक्षीस देऊन त्यांचा सत्कारही केला.

मुंबई मंत्रालयातील भ्रष्टाचाराच्या विरोधात आणि ६५ कर्मचाऱ्यांना वेतनाची रक्कम न दिल्याच्या निषेधार्थ ९० कर्मचाऱ्यांनी अमरण उपोषण सुरू केले आहे. उपोषणकर्त्यांची मागणी आहे की, कर्मचाऱ्यांना वेतन न देता केवळ रेकॉर्ड तयार करून मंत्रालयाला उपयोगिता माहिती सादर न करणाऱ्या सर्व दोषी अधिकाऱ्यांवर फौजदारी गुन्हा दाखल करण्यात यावा.

सार्वजनिक बांधकाम विभागाच्या मंत्रालयातील अधिकाऱ्यांवर गंभीर भ्रष्टाचाराचे आरोप करत प्रजासत्ताक समाजवादी भारत पार्टी (पी.एस.बी.पी.) कर्मचारी-कामगार संघ, महाराष्ट्राने एक मोठी घोषणा केली आहे. या आरोपप्रकरणी ९० कर्मचारी ९ जूनपासून मुंबईतील आझाद मैदानावर बेमुदत आमरण उपोषणास बसणार आहेत. संघटनेने पत्रकार परिषद घेऊन आरोप केला आहे की, सन २०२० मध्ये दुसरा व चौथा शनिवार तसेच शासकीय सुट्ट्यांच्या दिवशी काम केलेल्या कर्मचाऱ्यांच्या मोबदल्यासाठी मंजूर झालेल्या निधीच्या वितरणात मोठ्या प्रमाणावर अनियमितता झाली आहे. २०६ कर्मचाऱ्यांच्या नावाने रक्कम वितरित केल्याची नोंद असली तरी, प्रत्यक्षात त्यापैकी ६५ कर्मचाऱ्यांच्या खात्यात पैसे जमा झाले नसल्याचा दावा संघटनेने केला आहे. संघटनेचे अध्यक्ष भगत यांच्या म्हणण्यानुसार, संबंधित मागणीपत्रावर मंत्रालयाकडून वारंवार अशा त्रुटी काढण्यात आल्या, ज्यांचा कर्मचाऱ्यांच्या कामाशी कोणताही संबंध नव्हता. याशिवाय, मंत्रालयातील अवर सचिव रणजीत अहिरे यांनी काम मंजूर करण्यासाठी चक्क ४० लाख रुपयांची मागणी केल्याचा गंभीर आरोपही संघटनेने केला आहे. या मागण्या मान्य होत नसल्याने कर्मचाऱ्यांना वारंवार वेठीस धरण्याचे काम सुरू असल्याचा आरोप संघटनेने केला आहे. त्यामुळे, संबंधित अधिकाऱ्यांच्या कारभाराची सखोल चौकशी करून त्यांच्यावर फौजदारी गुन्हा दाखल करावा, तसेच त्यांच्या चल-अचल मालमत्तेची लाचलुचपत प्रतिबंधक विभागामार्फत (एसीबी) चौकशी करावी, अशी मागणी संघटनेने केली आहे. याच मागण्यांसाठी ९ जूनपासून आझाद मैदानावर ९० कर्मचारी बेमुदत आमरण उपोषणाला बसणार असल्याचे संघटनेच्या पदाधिकाऱ्यांनी प्रसिद्धीपत्रकात म्हटले आहे.

विजेच्या तारेच्या संपर्कात आल्याने आदिल खान साजिद खान नावाच्या सात वर्षांच्या मुलाचा जागीच मृत्यू झाला.

मान्सून दक्षिण कोकणात दाखल झाला असून, सिंधुदुर्ग आणि रत्नागिरी जिल्ह्यांतील काही भागांमध्ये ९ जूनपर्यंत मध्यम ते जोरदार पाऊस अपेक्षित आहे. मात्र, हवामान अंदाजानुसार, त्यानंतर किमान १५ जूनपर्यंत राज्यातील पावसाचा एकंदरीत जोर कमी होण्याची तसेच मान्सूनच्या प्रगतीचा वेग मंदावण्याची शक्यता आहे. यामुळे या कालावधीत राज्यात सर्वत्र समाधानकारक पावसाची शक्यता कमी असल्याचे दिसून येते. सध्याच्या हवामान अंदाजानुसार, किमान १५ जूनपर्यंत विदर्भ, मराठवाडा, खानदेश आणि मध्य महाराष्ट्रातील काही भागांमध्ये दुपारनंतर ढग आणि विखुरलेल्या स्वरूपाचा मेघगर्जनेसह वादळी पाऊस पडण्याची शक्यता आहे. मात्र, हा पाऊस व्यापक क्षेत्रावर पेरणीसाठी पोषक ठरेल अशी परिस्थिती सध्या तरी नाही. दरम्यान, किमान १२ जूनपर्यंत राज्यातील अनेक भागांमध्ये कमाल तापमान सध्याप्रमाणेच उच्च राहण्याची शक्यता आहे. विशेषतः, विदर्भ आणि खानदेशात कमाल तापमान ४० अंश सेल्सिअसपेक्षा अधिक, तर मराठवाड्यात ३५ ते ४० अंश सेल्सिअस दरम्यान राहण्याचा अंदाज आहे. कृषी आणि आपत्ती व्यवस्थापन विभागाने शेतकरी व नागरिकांना आवाहन केले आहे की, आगामी वादळी पावसावर अवलंबून राहून पेरणीची घाई करू नये. तसेच, विजांच्या कडकडाटाच्या वेळी झाडाखाली, टिनशेडखाली तसेच विद्युत ट्रान्सफॉर्मर, वीज खांब आणि विद्युत वाहिन्यांच्या जवळ थांबणे टाळावे.

Post by Nandkumar Motiram Totewad

राजापेठ पोलिसांनी अवैध चायना चाकू बाळगणाऱ्या एका तरुणावर धडक कारवाई करत त्याला ताब्यात घेतले आहे.