କୁଜଙ୍ଗ ତହସିଲ ଅନ୍ତର୍ଗତ ରାଜସ୍ୱ ଗ୍ରାମ ସାଇଲୋ, ରାହାମା ଅଞ୍ଚଳରେ ଥିବା ସ୍ମଶାନ ଭୂମିରୁ ବେଆଇନ ଜବରଦଖଲ ହଟାଇବା ପାଇଁ ଗ୍ରାମବାସୀମାନେ ଆଇନଗତ ଉଦ୍ୟମ ଆରମ୍ଭ କରିଛନ୍ତି। ଖତିଆନ ନମ୍ବର ୪୨୫ ଅନ୍ତର୍ଗତ ପ୍ଲଟ ନମ୍ବର ୮୬୬ (୦.୭୪ ଡିସିମିଲ) ଏବଂ ପ୍ଲଟ ନମ୍ବର ୯୧୭ (୧.୦୪ ଡିସିମିଲ) ସମେତ ମୋଟ ୧.୭୮ ଡିସିମିଲ ସ୍ମଶାନ ଭୂମିକୁ କିଛି ଲୋକ ବେଆଇନ ଭାବେ ଦଖଲ କରି ରହିଥିବା ଅଭିଯୋଗ ହୋଇଛି। ଏହି ପ୍ରସଙ୍ଗରେ ଗ୍ରାମବାସୀମାନେ କୁଜଙ୍ଗ ତହସିଲଦାରଙ୍କୁ ଲିଖିତ ଅଭିଯୋଗ କରିବା ପରେ ତହସିଲଦାରଙ୍କ ନିର୍ଦ୍ଦେଶ କ୍ରମେ ରାହାମା ରାଜସ୍ୱ ନିରୀକ୍ଷକ ଶ୍ରୀ ନାରାୟଣ ସେଠୀ ଏକ ସର୍ଜମିନ ତଦନ୍ତ କରି ତହସିଲଦାରଙ୍କୁ ରିପୋର୍ଟ ପ୍ରଦାନ କରିଛନ୍ତି। ତଦନ୍ତ ରିପୋର୍ଟ ଅନୁଯାୟୀ, ଗତ ୫ରୁ ୧୦ ବର୍ଷ ମଧ୍ୟରେ ଦୂରଦୁରାନ୍ତରୁ ଆସି ସାଇଲୋ ଗ୍ରାମରେ ଘରବାଡ଼ି କରି ରହୁଥିବା କେତେକ ବ୍ୟକ୍ତି ସେମାନଙ୍କ ଘର ସମ୍ମୁଖରେ ଥିବା ସ୍ମଶାନ ଭୂମିକୁ ଜବରଦଖଲ କରିଛନ୍ତି। ଗ୍ରାମବାସୀମାନେ ପୂର୍ବରୁ ଏହାର ବିରୋଧ କରିଥିଲେ ମଧ୍ୟ ଦଖଲକାରୀମାନେ ଏହାକୁ ଭୃକ୍ଷେପ କରିନଥିଲେ, ଯେଉଁଥିପାଇଁ ଆଇନଗତ ପଦକ୍ଷେପ ନିଆଯାଇଛି। ତେଣୁ, ଗ୍ରାମବାସୀମାନେ ସରକାରଙ୍କୁ ଏହି ବେଆଇନ ଦଖଲକୁ ଯଥାଶୀଘ୍ର ହଟାଇବା ପାଇଁ ଦୃଢ଼ ଦାବି କରିଛନ୍ତି। ସରକାର ଯଦି ଏ ଦିଗରେ କୌଣସି ପଦକ୍ଷେପ ଗ୍ରହଣ ନକରନ୍ତି, ତେବେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବାର ସମ୍ଭାବନା ରହିଛି ବୋଲି ସେମାନେ ଚେତାବନୀ ଦେଇଛନ୍ତି।

ସରକାରଙ୍କ ଦୁଇ ବର୍ଷ ପୂର୍ତ୍ତି ଅବସରରେ କୋରେଇ ବ୍ଲକରେ ଏକ 'ବିକାଶ ଧାରା ଓଡ଼ିଶା ସାରା' କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଅବସରରେ ସ୍ଥାନୀୟ ବିଧାୟକ ଆକାଶ ଦାସ ନାୟକଙ୍କ ଦ୍ୱାରା ବିଭିନ୍ନ ଯୋଜନାରେ ଅନ୍ତର୍ଭୁକ୍ତ ହିତାଧିକାରୀମାନଙ୍କୁ ସହାୟତା ପ୍ରଦାନ କରାଯାଇଛି। ସେମାନଙ୍କୁ ଅର୍ନପୂର୍ଣ୍ଣା କାର୍ଡ, ମୋବାଇଲ, ପଟା, ଟ୍ରାଇ ସାଇକେଲ, ଶ୍ରବଣ ଯନ୍ତ୍ର, ଏବଂ ବିବାହ ସହାୟତା ରାଶି ପ୍ରଦାନ କରାଯାଇଥିଲା।

ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ବହିରେ ଥିବା ତ୍ରୁଟିକୁ ନେଇ ସାରା ଓଡ଼ିଶାରେ ତୀବ୍ର ପ୍ରତିବାଦ ସୃଷ୍ଟି ହୋଇଛି। ଅଖିଳ ଭାରତୀୟ ଛାତ୍ର ସଂଘ ଅଭିଯୋଗ କରିଛି ଯେ, ବିଜେପି ସରକାର ଓଡ଼ିଶାର ଶିକ୍ଷା ବ୍ୟବସ୍ଥାକୁ ଧ୍ୱଂସ କରିବା ପାଇଁ ଏକ ଚକ୍ରାନ୍ତ କରୁଛି। ଏହି ପ୍ରତିବାଦର ଅଂଶସ୍ୱରୂପ, ଆଜି ଚାନ୍ଦବାଲି ଠାରେ ସଂଘର ରାଜ୍ୟ ସଭାପତି ସଂଘମିତ୍ରା ଜେନାଙ୍କ ସମେତ ବହୁ କାର୍ଯ୍ୟକର୍ତ୍ତା ଏକାଠି ହୋଇ ପୁସ୍ତକ ଜନିତ ତ୍ରୁଟିକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଥିଲେ। ସେମାନେ ରାଜ୍ୟ ସରକାରଙ୍କ ବିରୁଦ୍ଧରେ ବିଭିନ୍ନ ସ୍ଲୋଗାନ ଦେଇ ଚାନ୍ଦବାଲି ସହର ପରିକ୍ରମା କରିଥିଲେ। ପରେ, କାଳୀ ମନ୍ଦିର ନିକଟରେ ଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ କୁଶପୁତ୍ତଳିକା ଦାହ କରି ତାଙ୍କର ଇସ୍ତଫା ଦାବି କରିଛନ୍ତି। ଏହି ଘଟଣାରେ ଅଖିଳ ଭାରତୀୟ ଛାତ୍ର ସଂଘ ପୁନର୍ବାର ଦୋହରାଇଛି ଯେ, ବିଜେପି ସରକାର ଓଡ଼ିଶାର ଶିକ୍ଷା ବ୍ୟବସ୍ଥାକୁ ଧ୍ୱଂସ କରିବାକୁ ଚକ୍ରାନ୍ତ କରୁଛି।

କୋଣାର୍କ ଅଞ୍ଚଳରେ ଘର ଅଭାବରୁ ଅନେକ ଲୋକ ପ୍ରବଳ ଶୀତରେ ଅତ୍ୟନ୍ତ କଷ୍ଟ ଭୋଗୁଛନ୍ତି। ଉପଲବ୍ଧ ସୂଚନା ଅନୁଯାୟୀ, ଗରିବ ଶ୍ରେଣୀର ଲୋକମାନଙ୍କୁ ଘର ମିଳୁନଥିବାରୁ ସେମାନେ ପଦାରେ ପଡ଼ି ଭୀଷଣ ଶୀତ ଦିନ କାଟୁଛନ୍ତି।

ଖାଇବା ତେଲ କମ୍ପାନୀମାନେ ଗ୍ରାହକମାନଙ୍କୁ ଲୁଟୁଥିବା ଅଭିଯୋଗ ହୋଇଛି, ଯେଉଁମାନେ ଟଙ୍କା ନେଇ ଓଜନରେ ଠକୁଛନ୍ତି। ଫଳରେ, ଗ୍ରାହକମାନେ ଟଙ୍କା ଦେଇ ମଧ୍ୟ ଶୋଷଣର ଶିକାର ହେଉଛନ୍ତି। ଏହି ପରିପ୍ରେକ୍ଷୀରେ, କେନ୍ଦ୍ର ସରକାର ଏକ ନୂଆ ନିୟମ କରିଛନ୍ତି, ଯାହା ଅନୁଯାୟୀ ଖାଇବା ତେଲ ପ୍ୟାକେଟରେ ଓଜନ ଗଡ଼ବଡ଼ ଆଉ ହେବ ନାହିଁ। ଏହି ନୂଆ ନିୟମ ଖାଉଟିଙ୍କ ପାଇଁ ଏକ ବଡ଼ ଖବର।

ରାଉରକେଲା-ଗୁଣପୁର ରାଜାରାଣୀ ଏକ୍ସପ୍ରେସରେ ଯାତ୍ରା କରୁଥିବା ଜଣେ ମହିଳା ଜେନେରାଲ୍ କୋଚ୍ ମଧ୍ୟରେ ଏକ ଶିଶୁପୁତ୍ରକୁ ଜନ୍ମ ଦେଇଛନ୍ତି। ଯାତ୍ରା ସମୟରେ ମହିଳାଙ୍କୁ ପ୍ରସବ ବେଦନା ହୋଇଥିଲା। ଏହାପରେ ରେଲ୍ ମଦଦ ମାଧ୍ୟମରେ ଅଭିଯୋଗ କରାଯିବା ପରେ RPF ଟିମ୍ କଟକ ଷ୍ଟେସନରେ ପହଞ୍ଚିଥିଲା। ତେବେ, RPF ପହଞ୍ଚିବା ପୂର୍ବରୁ ମହିଳା ଜଣକ ଶିଶୁପୁତ୍ରକୁ ଜନ୍ମ ଦେଇସାରିଥିଲେ। RPF କର୍ମଚାରୀମାନେ ମହିଳାଙ୍କ ପାଇଁ ତୁରନ୍ତ ସହାୟତାର ବ୍ୟବସ୍ଥା କରିଥିଲେ। ପରେ ପୁଣି ବେଦନା ଅନୁଭବ ହେବାରୁ ୧୦୮ ଆମ୍ବୁଲାନ୍ସ ଯୋଗେ ତାଙ୍କୁ SCB ମେଡିକାଲ୍ ପଠାଯାଇଥିଲା।

ଭୁବନେଶ୍ୱରର ଭର୍ସା ରିଭେରା ଆପାର୍ଟମେଣ୍ଟ ପରିସରରେ ଆଜି, ଜୁନ ୨୧, ୨୦୨୬ ରେ, ଆନ୍ତର୍ଜାତୀୟ ଯୋଗ ଦିବସ–୨୦୨୬ ଅତ୍ୟନ୍ତ ଉତ୍ସାହ, ଆନନ୍ଦ ଏବଂ ସମୁଦାୟିକ ଏକତାର ବାତାବରଣ ମଧ୍ୟରେ ସଫଳତାର ସହ ପାଳିତ ହୋଇଛି। ପ୍ରଭାତ ୬:୦୦ ରୁ ୮:୦୦ ଟା ପର୍ଯ୍ୟନ୍ତ ଆୟୋଜିତ ଏହି ଯୋଗ ଅଧିବେଶନରେ ଆପାର୍ଟମେଣ୍ଟ ସମୁଦାୟର ପ୍ରାୟ ୫୦ ଜଣ ଅଂଶଗ୍ରହଣକାରୀ ସକ୍ରିୟ ଭାବେ ଯୋଗ ଦେଇଥିଲେ, ଯେଉଁମାନଙ୍କ ମଧ୍ୟରେ ମହିଳା, ପୁରୁଷ, ବରିଷ୍ଠ ନାଗରିକ, ଯୁବକ-ଯୁବତୀ ଏବଂ ଶିଶୁମାନେ ସାମିଲ ଥିଲେ। ଏହି ବ୍ୟାପକ ଅଂଶଗ୍ରହଣ ଯୋଗ ପ୍ରତି ସମସ୍ତ ବୟସ ବର୍ଗରେ ବଢ଼ୁଥିବା ସଚେତନତା ଓ ଉତ୍ସାହର ଏକ ସ୍ପଷ୍ଟ ପ୍ରତିଫଳନ ଥିଲା। କାର୍ଯ୍ୟକ୍ରମଟି ଭାରତ ସରକାରଙ୍କ ଆୟୁଷ ମନ୍ତ୍ରଣାଳୟ ଦ୍ୱାରା ପ୍ରଣୀତ 'କମନ୍ ଯୋଗ ପ୍ରୋଟୋକଲ (CYP)' ଅନୁସାରେ ପରିଚାଳିତ ହୋଇଥିଲା। ଏଥିରେ ବିଭିନ୍ନ ଯୋଗାସନ, ପ୍ରାଣାୟାମ, ଧ୍ୟାନ ଏବଂ ଶିଥିଳୀକରଣ ଅଭ୍ୟାସ କରାଯାଇଥିଲା। ଅଂଶଗ୍ରହଣକାରୀମାନେ ଅନୁଭବ କରିଥିଲେ ଯେ ଏହି ଅଭ୍ୟାସଗୁଡ଼ିକ ଶାରୀରିକ ସୁସ୍ଥତା, ମାନସିକ ଶାନ୍ତି, ଏକାଗ୍ରତା ଏବଂ ସମଗ୍ର ସ୍ୱାସ୍ଥ୍ୟ ବିକାଶରେ ସହାୟକ ହୋଇଥାଏ। ଏହି ଯୋଗ ଅଧିବେଶନକୁ ଭର୍ସା ରିଭେରା ଆପାର୍ଟମେଣ୍ଟ ଆଲଟିଜ୍ ଆସୋସିଏସନର ସଭାପତି ତଥା ବରିଷ୍ଠ ଯୋଗ ପ୍ରଶିକ୍ଷକ ଶ୍ରୀ ସୁବାସ ଚନ୍ଦ୍ର ଷଡ଼ଙ୍ଗୀ ଏବଂ ଶ୍ରୀ ଅଭିଜିତ ଭୌମିକ ପରିଚାଳନା କରିଥିଲେ। ଆୟୁଷ ମନ୍ତ୍ରଣାଳୟ ସହ ଦୀର୍ଘଦିନର ଯୋଗ ସମ୍ପର୍କ ରଖୁଥିବା ଶ୍ରୀ ଷଡ଼ଙ୍ଗୀଙ୍କ ସରଳ ଉପସ୍ଥାପନା, ବୈଜ୍ଞାନିକ ଦୃଷ୍ଟିକୋଣ ଏବଂ ପ୍ରେରଣାଦାୟକ ମାର୍ଗଦର୍ଶନ ସମସ୍ତଙ୍କୁ ବିଶେଷ ଭାବରେ ପ୍ରଭାବିତ କରିଥିଲା। କାର୍ଯ୍ୟକ୍ରମର ଏକ ବିଶେଷ ଆକର୍ଷଣ ଥିଲା 'ଯୋଗିକ ଲାଫ୍ଟର ଥେରାପି', ଯେଉଁଥିରେ ସମସ୍ତେ ମିଳିତ ଭାବରେ ହସିବା, ଆନନ୍ଦ ବାଣ୍ଟିବା ଏବଂ ସକାରାତ୍ମକ ଶକ୍ତିର ଅନୁଭବ କରିଥିଲେ। ଏହି ଅବସରରେ ବକ୍ତାମାନେ ଯୋଗକୁ କେବଳ ଏକ ବ୍ୟାୟାମ ପ୍ରଣାଳୀ ନୁହେଁ, ବରଂ ଏକ ସୁସ୍ଥ, ସନ୍ତୁଳିତ, ସଚେତନ ଏବଂ ଆନନ୍ଦମୟ ଜୀବନଶୈଳୀ ବୋଲି ବର୍ଣ୍ଣନା କରିଥିଲେ। ସେମାନେ ମତ ଦେଇଥିଲେ ଯେ ନିୟମିତ ଯୋଗାଭ୍ୟାସ ମାଧ୍ୟମରେ ଶରୀର, ମନ ଏବଂ ଚେତନାର ସମନ୍ୱିତ ବିକାଶ ସମ୍ଭବ। ଯୋଗାଭ୍ୟାସରେ ଯୋଗଦେଇଥିବା ପ୍ରମୁଖ ଅଂଶଗ୍ରହଣକାରୀମାନଙ୍କ ମଧ୍ୟରେ ଶ୍ରୀ ଚନ୍ଦନ ନନ୍ଦ, ଶ୍ରୀ ଗୋଲକ ବିହାରୀ ପଣ୍ଡା, ଶ୍ରୀ ଡି. ସି. ମୋହନ, ଶ୍ରୀ ଶରତ ଚନ୍ଦ୍ର ଦାସ, ଶ୍ରୀମତୀ ରେଖା ଷଡ଼ଙ୍ଗୀ, ଶ୍ରୀମତୀ ଶକୁନ୍ତଳା ବିଶ୍ୱାଳ, କୁନି ବିଶ୍ୱାଳ, ସାଇ ବିଶ୍ୱାଳ, ଶ୍ରୀ ପି. କେ. ପଟ୍ଟନାୟକ, ଶ୍ରୀ ସୁରେଶ ମିଶ୍ର, ଶ୍ରୀ ପର୍ଶୁରାମ ମୁର୍ମୁ, ଡା. ଜି. ରଥ, ଶ୍ରୀ ଅବକାଶ ଓ କ୍ୟୁଟି ପ୍ରମୁଖ ଥିଲେ। କାର୍ଯ୍ୟକ୍ରମର ସଫଳ ଆୟୋଜନରେ ଆସୋସିଏସନର ସମ୍ପାଦକ ଶ୍ରୀ ଚନ୍ଦନ ନନ୍ଦ, କାର୍ଯ୍ୟକାରୀ ସଦସ୍ୟ ଶ୍ରୀ ଗୌତମ ସାମଲ ଏବଂ ଶ୍ରୀ ଗୌର ମୋହନ ସାସ୍ମଲ ପ୍ରମୁଖଙ୍କର ସକ୍ରିୟ ସହଯୋଗ, ନିଷ୍ଠା ଓ ନେତୃତ୍ୱ ବିଶେଷ ଭୂମିକା ଗ୍ରହଣ କରିଥିଲା। ସେମାନଙ୍କ ସମନ୍ୱିତ ପ୍ରୟାସ ଏବଂ ବାସିନ୍ଦାମାନଙ୍କର ଉତ୍ସାହପୂର୍ଣ୍ଣ ସହଯୋଗ ଯୋଗୁଁ କାର୍ଯ୍ୟକ୍ରମଟି ସୁଚାରୁ ଓ ସଫଳ ଭାବେ ସମ୍ପନ୍ନ ହୋଇପାରିଥିଲା। କାର୍ଯ୍ୟକ୍ରମ ଶେଷରେ ସମସ୍ତ ଅଂଶଗ୍ରହଣକାରୀଙ୍କୁ ହାଲୁକା ଜଳଖିଆ ଓ ଆପ୍ୟାୟନ ପ୍ରଦାନ କରାଯାଇଥିଲା, ଯାହା ଆପାର୍ଟମେଣ୍ଟ ସମୁଦାୟ ମଧ୍ୟରେ ସୌହାର୍ଦ୍ଦ୍ୟ, ଏକତା ଏବଂ ସୁସ୍ଥ ଜୀବନଧାରା ପ୍ରତି ସଚେତନତାକୁ ଆହୁରି ସୁଦୃଢ଼ କରିଥିଲା।

ଆଜି ସାରା ଦେଶ ଯୋଗମୁଦ୍ରାରେ ଅନ୍ତର୍ଜାତୀୟ ଯୋଗ ଦିବସ ପାଳନ କରିଛି। ଏହି ଅବସରରେ ଭୁବନେଶ୍ୱରରୁ କୋଲକାତା ପର୍ଯ୍ୟନ୍ତ ନେତା, ମନ୍ତ୍ରୀ ଓ ସାଧାରଣ ଜନତା ଯୋଗାଭ୍ୟାସରେ ସାମିଲ ହୋଇଥିଲେ। କଳିଙ୍ଗ ଷ୍ଟାଡିୟମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗର ମହତ୍ତ୍ୱ ବୁଝାଇ ସୁସ୍ଥ ଓ ଚାପମୁକ୍ତ ଜୀବନ ପାଇଁ ଏହାକୁ ଆପଣାଇବାକୁ ଆହ୍ୱାନ ଦେଇଛନ୍ତି।

ଜଗତସିଂହପୁର ଜିଲ୍ଲାର କୁଜଙ୍ଗ ବ୍ଲକ ଅନ୍ତର୍ଗତ ରାହାମା ବଜାର ନିକଟରେ ଏକ ଭୟାନକ ସଡ଼କ ଦୁର୍ଘଟଣାରେ ଜଣେ ବାଇକ ଚାଳକ ଅତି ଚମତ୍କାର ଭାବେ ନିଜ ଜୀବନ ବଞ୍ଚାଇଛନ୍ତି। କଟକରୁ ପାରାଦୀପ ଅଭିମୁଖେ ଆସୁଥିବା ଏକ ଡଲଫିନ ବସ ଏବଂ ପାରାଦୀପରୁ ଆସୁଥିବା ଏକ ବାଇକ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା, ଯାହା ଫଳରେ ବସଟି ବାଇକ ଉପରକୁ ମାଡ଼ି ଯାଇଥିଲା। ଏହି ସାଂଘାତିକ ପରିସ୍ଥିତିରେ, ବାଇକ ଚାଳକ ନିଜର ଉପସ୍ଥିତ ବୁଦ୍ଧି ଖଟାଇ ବସର ଚକା ତଳୁ ଗଡ଼ିଗଡ଼ି ବାହାରି ଆସି ନିଜ ଜୀବନ ରକ୍ଷା କରିବାରେ ସଫଳ ହୋଇଥିଲେ। ଏହି ଦୃଶ୍ୟ ଦେଖି ସେଠାରେ ଉପସ୍ଥିତ ଥିବା ଦୋକାନୀ ଓ ପଥଚାରୀମାନେ ଆଶ୍ଚର୍ଯ୍ୟଚକିତ ହୋଇଯାଇଥିଲେ। ଦୁର୍ଘଟଣା ପରେ କିଛି ସମୟ ପାଇଁ ଘଟଣାସ୍ଥଳରେ ଉତ୍ତେଜନା ଲାଗିରହିଥିବା ବେଳେ, ସ୍ଥାନୀୟ ଲୋକଙ୍କ ହସ୍ତକ୍ଷେପ ଏବଂ ବୁଝାମଣା ପରେ ପରିସ୍ଥିତି ସ୍ୱାଭାବିକ ହୋଇଥିଲା। ଏହି ଘଟଣାଟି ଏହି କଥାକୁ ପ୍ରମାଣିତ କରେ ଯେ 'ରଖେ ହରି ତ ମାରେ କିଏ'।