बारामती शहर आणि परिसरात सुरू असलेल्या अवैध दारू व्यवसायाला आळा घालण्यासाठी पोलीस आणि राज्य उत्पादन शुल्क विभागाने संयुक्त मोहीम राबवत मोठी कारवाई केली आहे. बारामती शहर पोलीस स्टेशनचे पोलीस निरीक्षक श्रीशैल चिवडशेट्टी यांच्या मार्गदर्शनाखाली आणि राज्य उत्पादन शुल्क विभागाच्या अधिकाऱ्यांच्या उपस्थितीत ही कारवाई करण्यात आली. या संयुक्त मोहिमेअंतर्गत अवैध हातभट्ट्यांवर छापे टाकण्यात आले. यामध्ये मोठ्या प्रमाणात हातभट्टी दारू आणि दारू निर्मितीसाठी वापरले जाणारे साहित्य जप्त करण्यात आले आहे. संबंधित व्यक्तींवर कायदेशीर कारवाईची प्रक्रिया सुरू करण्यात आली असून, प्रशासनाने अवैध दारू व्यवसायावर नियंत्रण ठेवण्यासाठी भविष्यातही अशाच धडक कारवाया सुरू ठेवणार असल्याचे स्पष्ट केले आहे.

बारामती शहर आणि परिसरातील अवैध दारू व्यवसायावर पोलिसांनी जोरदार कारवाई केली आहे. बारामती शहर पोलीस स्टेशनचे पोलीस निरीक्षक श्रीशैल चिवडशेट्टी यांच्या मार्गदर्शनाखाली तसेच राज्य उत्पादन शुल्क विभागाच्या अधिकाऱ्यांच्या उपस्थितीत ही संयुक्त मोहीम राबवण्यात आली. या कारवाई अंतर्गत अवैध हातभट्ट्यांवर छापे टाकण्यात आले, ज्यामुळे अवैध दारू व्यवसायाला मोठा दणका बसला आहे.

गुजरातमध्ये एका रस्त्याच्या मधोमध एक होर्डिंग अचानक कोसळल्याची घटना समोर आली आहे. सुदैवाने, या अपघातात कोणतीही जीवितहानी झाली नाही किंवा कोणत्याही मालमत्तेचे नुकसान झाले नाही.

शिरूर एमआयडीसी पोलिसांनी निमगाव भोगी येथील शेळके वस्ती परिसरात छापा टाकून गावठी हातभट्टी दारू निर्मितीचा मोठा अड्डा उद्ध्वस्त केला आहे. या कारवाईत पोलिसांनी १ लाख ५ हजार रुपयांचा मुद्देमाल जप्त करून एका आरोपीला अटक केली आहे, ज्याला न्यायालयाने ३ जूनपर्यंत पोलिस कोठडी सुनावली आहे. पोलिसांनी दिलेल्या माहितीनुसार, निलेश गुलाब लोंढे (वय ३४, रा. शेवाळे वस्ती, निमगाव भोगी, ता. शिरूर) याला २९ मे रोजी अटक करण्यात आली. त्याच्याविरुद्ध शिरूर पोलिस ठाण्यात गुन्हा क्रमांक २५०/२०२६ दाखल करण्यात आला आहे. निमगाव भोगी येथील शेळके वस्ती परिसरात शुक्रवारी (दि. २९) सायंकाळी सुमारे ७ वाजण्याच्या सुमारास ही कारवाई करण्यात आली. यावेळी आरोपीकडे तयार हातभट्टी दारू, तसेच दारू निर्मितीसाठी वापरले जाणारे कच्चे रसायन आणि साहित्य आढळून आले. कारवाईदरम्यान सुमारे ५०० लिटर कच्चे रसायन, २०० लिटर तयार गावठी हातभट्टी दारू आणि एक अल्टो कार (एमएच १२ पीएन ३६३४) असा एकूण १ लाख ५ हजार रुपयांचा मुद्देमाल जप्त करण्यात आला. घटनास्थळी असलेले दारू निर्मितीसाठीचे रसायन व साहित्य दोन जेसीबी मशीनच्या साहाय्याने जागीच नष्ट करण्यात आले. आरोपीविरुद्ध भारतीय न्याय संहिता कलम १२३ आणि महाराष्ट्र दारूबंदी कायदा कलम ६५ (ई) अन्वये गुन्हा दाखल करण्यात आला आहे. विशेष म्हणजे, आरोपीविरुद्ध यापूर्वीही दारूबंदी कायद्यांतर्गत तीन गुन्हे दाखल असल्याची माहिती पोलिसांनी दिली आहे. पोलीस निरीक्षक महादेव वाघमोडे यांच्या मार्गदर्शनाखाली पोलीस उपनिरीक्षक निळकंठ तिडके, विलास आंबेकर, संतोष औटी, उमेश कुतवळ, योगेश गुंड, विद्या बनकर, किशोर शिवणकर, अमोल रासकर, अजित पवार आणि चालक ज्ञानेश्वर शिंदे यांच्या पथकाने ही कारवाई यशस्वी केली. पुढील तपास पोलीस उपनिरीक्षक थोरात करीत आहेत.

पुण्यातील कोंढवा परिसरात असलेल्या 'ट्रायबेका हायस्ट्रीट' मॉलबाहेर लावण्यात आलेले 'नो-पार्किंग'चे फलक केवळ नावापुरतेच उरले आहेत. वाहनचालकांकडून या नियमांचे सर्रासपणे उल्लंघन केले जात असून, बेबंद पार्किंगमुळे वाहतुकीची समस्या गंभीर बनली आहे. या परिस्थितीमुळे सामान्य जनतेचा जीव टांगणीला लागला असल्याची तीव्र भावना व्यक्त होत आहे. याबाबत पोलिसांकडून केली जाणारी कारवाई फक्त 'दाखवण्यापुरती' असून, त्याचा कोणताही ठोस परिणाम दिसत नसल्याचा आरोप होत आहे, जणू 'डोळे असून आंधळे' अशी ही परिस्थिती असल्याची टीका करण्यात येत आहे.

भोर तालुक्यातील नसरापूर प्राथमिक आरोग्य केंद्रातील त्रुटी आणि निकृष्ट कामकाजाबाबत आलेल्या तक्रारींची दखल घेत आमदार शंकर मांडेकर यांनी दि.31 रोजी आरोग्य केंद्राला प्रत्यक्ष भेट दिली. यावेळी त्यांनी इमारतीतील विविध त्रुटी, अपूर्ण कामे तसेच नागरिकांनी केलेल्या तक्रारींची पाहणी केली. संबंधित अधिकारी आणि कर्मचाऱ्यांशी चर्चा करून, आमदार मांडेकर यांनी आढळलेल्या सर्व त्रुटींची तातडीने दुरुस्ती करण्याचे निर्देश दिले. नागरिकांना दर्जेदार आरोग्य सुविधा मिळाल्याच पाहिजेत, यासाठी आवश्यक ती कार्यवाही केली जाईल, असेही त्यांनी स्पष्ट केले.

शिरूर शहरात एका थार कार चालकाने भररस्त्याच्या कडेला असलेल्या मोकळ्या पटांगणात धोकादायक पद्धतीने स्टंटबाजी केल्याचा व्हिडिओ सध्या सोशल मीडियावर मोठ्या प्रमाणात व्हायरल होत आहे. व्हायरल झालेल्या या व्हिडिओमध्ये चालक भरधाव वेगात थार वाहन गोलाकार फिरवताना दिसत आहे. या वेळी मोठ्या प्रमाणात धूळ उडत असून परिसरात काही काळ थरारक वातावरण निर्माण झाल्याचे पाहायला मिळाले. या बेफाम स्टंटबाजीमुळे रस्त्यावरून ये-जा करणाऱ्या नागरिकांच्या सुरक्षिततेचा प्रश्न ऐरणीवर आला आहे, कारण अशा प्रकारच्या कृत्यांमुळे गंभीर अपघात होण्याची शक्यता नाकारता येत नाही. सोशल मीडियावर प्रसिद्धी मिळविण्यासाठी आणि व्हायरल होण्याच्या नादात अनेकजण स्वतःचा तसेच इतरांचाही जीव धोक्यात घालत असल्याचे प्रकार वारंवार समोर येत आहेत. दरम्यान, हा व्हिडिओ शिरूर परिसरात चर्चेचा विषय ठरला आहे. संबंधित वाहन चालकाची ओळख पटवून त्याच्यावर कारवाई होणार का, याकडे नागरिकांचे लक्ष लागले आहे. या प्रकरणी शिरूर पोलीस कोणती भूमिका घेतात आणि कायदेशीर कारवाई करतात का, हे पाहणे महत्त्वाचे ठरणार आहे.