महायुतीचे उमेदवार सईद खान यांनी मंत्री संजय शिरसाठ आणि पालकमंत्री बोर्डीकर यांच्या उपस्थितीत आपला उमेदवारी अर्ज दाखल केला आहे.

परभणी-हिंगोली विधान परिषदेच्या निवडणुकीसाठी महाविकास आघाडीचे उमेदवार डॉ. विवेक नावंदर यांनी आपला उमेदवारी अर्ज दाखल केला आहे.

परभणी-हिंगोली विधान परिषद निवडणुकीसाठी शिवसेना शिंदे गटाकडून सईद खान यांनी आपला उमेदवारी अर्ज दाखल केला आहे. या प्रसंगी मंत्री संजय शिरसाट, मंत्री मेघना बोर्डीकर, आमदार संतोष बांगर आणि उदय सावंत यांच्यासह अनेक आमदारांची उपस्थिती होती.

परभणी जिल्ह्यात अहिल्याबाई होळकर यांची जयंती मोठ्या उत्साहात साजरी करण्यात आली. याचबरोबर, डॉक्टर विवेक नावंदर यांच्या उमेदवारीमुळे परभणी आणि हिंगोली विधान परिषद निवडणुकीतील चुरस लक्षणीयरीत्या वाढली आहे.

श्री छत्रपती संभाजी महाराज यांच्या जयंतीनिमित्त विविध कार्यक्रमांचे आयोजन करण्यात आले आहे.

नांदेड जिल्ह्यामध्ये उष्णतेमुळे हैराण झालेल्या नागरिकांना पावसाने मोठा दिलासा दिला आहे. या पावसामुळे तापमानात घट होऊन लोकांना थंडावा जाणवला. मात्र, दुसरीकडे वीजपुरवठ्याच्या समस्येने नागरिक त्रस्त झाले आहेत. वीज वारंवार खंडित होण्याच्या प्रकारामुळे लोकांना मोठ्या अडचणींचा सामना करावा लागत आहे.

मंठा तालुक्यातील पांगरी खुर्द येथे एका १७ वर्षीय अल्पवयीन विद्यार्थिनीचा छळ केल्याप्रकरणी वैभव ज्ञानदेव काळे याच्याविरुद्ध गुन्हा दाखल करण्यात आला आहे. आरोपीच्या सततच्या त्रासाला आणि जीवे मारण्याच्या धमक्यांना कंटाळून या विद्यार्थिनीने भीतीपोटी चालू शैक्षणिक वर्षातील बारावीच्या शेवटच्या दोन परीक्षा देखील दिल्या नाहीत, अशी धक्कादायक माहिती समोर आली आहे. मिळालेल्या माहितीनुसार, संबंधित विद्यार्थिनीचे लग्न ठरले होते. मात्र, आरोपी वैभव काळे याने लग्न ठरलेल्या युवकाला वारंवार फोन करून मुलीबाबत चुकीची माहिती दिली, ज्यामुळे हे लग्न मोडल्याचा आरोप करण्यात आला आहे. यानंतरही आरोपीने विद्यार्थिनीचा पाठलाग करणे, तिला त्रास देणे तसेच जीवे मारण्याच्या धमक्या देणे सुरूच ठेवल्याचे तक्रारीत नमूद करण्यात आले आहे. आरोपीच्या या सततच्या छळामुळे विद्यार्थिनी मानसिक तणावाखाली गेली होती आणि याच भीतीमुळे तिने बारावीच्या शेवटच्या दोन परीक्षा न देता घरीच राहणे पसंत केले. या घटनेमुळे परिसरात संतापाची लाट उसळली असून, नागरिकांकडून आरोपीवर कठोर कारवाई करण्याची मागणी केली जात आहे. या प्रकरणी मंठा पोलीस ठाण्यात गुन्हा दाखल करण्यात आला असून, पोलीस निरीक्षक पुरुषोत्तम देशमुख यांच्या मार्गदर्शनाखाली पुढील तपास सुरू आहे.

राज्याभिषेकाच्या स्मृती कायम जपण्यासाठी अखिल भारतीय शिवराज्याभिषेक समितीच्या वतीने दुर्गराज रायगडावर दरवर्षीप्रमाणे यंदाही भव्य शिवराज्याभिषेक सोहळा ५ ते ६ जून रोजी विविध कार्यक्रमांनी साजरा होणार आहे. छत्रपती शिवराय आणि राजर्षी शाहू महाराज यांचे वारसदार तसेच अखिल भारतीय शिवराज्याभिषेक समितीचे मार्गदर्शक युवराज छत्रपती संभाजीराजे, आईसाहेब संयोगिता राजे आणि शहाजीराजे यांच्या मार्गदर्शनाखाली हा सोहळा पार पडेल. यावर्षी सुमारे ५ ते १० लाख शिवभक्त, इतिहास संशोधक, अभ्यासक आणि इतिहासप्रेमी देशभरातून या सोहळ्यात सहभागी होण्याची शक्यता आहे. शिवभक्तांना सर्व सोयी-सुविधा उपलब्ध करून देण्यासाठी समितीने जय्यत तयारी केली असल्याची माहिती अखिल भारतीय शिवराज्याभिषेक सोहळा समिती सदस्य दुर्गराज रायगड, मंगेश पाटील कदम यांनी नांदेड येथून १ जून रोजी दिली आहे. सोहळ्याची सुरुवात पहाटे रायगडावरील नगारखान्यासमोर भगवा ध्वज उभारून होईल, त्यानंतर युवराज संभाजीराजे यांच्या हस्ते मुख्य राज्याभिषेक सोहळा पार पडेल. यानंतर मूर्तीवर सुवर्णनाण्यांचा अभिषेक केला जाईल. रणवाद्य, हलगी, घुमक आणि कैताळाच्या कडकडाटात होळीच्या माळावर शिवकालीन युद्धकलेची प्रात्यक्षिके सादर केली जातील. या लोकोत्सवाचे मुख्य आकर्षण म्हणजे भव्य पालखी सोहळा आणि छत्रचामरासह शिवछत्रपतींच्या प्रतिमेची शोभायात्रा. पारंपरिक वेशभूषेत सहभागी होणाऱ्या शिवभक्तांना युवराज संभाजीराजे मार्गदर्शन करतील. पुण्याचे रणवाद्य ढोल ताशा पथक, शंभूगर्जना ढोल ताशा पथक, तसेच कोल्हापूर येथील नाद ढोल ताशा पथके या सोहळ्यांमध्ये विशेष आकर्षण ठरतील, असेही मंगेश पाटील कदम यांनी नमूद केले.

परभणी-हिंगोली विधान परिषदेच्या निवडणुकीसाठी सुशील देशमुख यांनी अपक्ष उमेदवार म्हणून आपला उमेदवारी अर्ज दाखल केला आहे. हा अर्ज विधान परिषदेसाठी भरण्यात आला आहे.