গুৱাহাটীৰ চচলত পেট্ৰল, ডিজেল, গেছ আৰু অত্যাৱশ্যকীয় সামগ্ৰীৰ আকাশলংঘী মূল্যবৃদ্ধিৰ বিৰুদ্ধে কৃষক মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতিয়ে তীব্ৰ প্ৰতিবাদ সাব্যস্ত কৰে। এই প্ৰতিবাদী সভাত ছাত্ৰ মুক্তিৰ কেন্দ্ৰীয় কাৰ্যকৰী সভাপতি জাকিৰ হুছেইনে মূল্যবৃদ্ধি ৰোধ কৰিবলৈ চৰকাৰক দাবী জনায়। ৰাজ্যজুৰি মূল্যবৃদ্ধিৰ বিৰুদ্ধে জনসাধাৰণৰ মাজত ক্ষোভ বৃদ্ধি পাইছে।

আজি শনিবাৰে মৰনৈ আৰক্ষী থানাৰ সমীপৱৰ্তী অঞ্চলত এক শোকাবহ ঘটনা পোহৰলৈ আহিছে। যোৱা নিশা প্ৰায় ১:৩০ বজাত মধুৱা মাল্লাৰ বাসগৃহৰ চৌহদত কঁঠাল খাবলৈ অহা এটা বন্যহস্তী বিদ্যুতস্পৃষ্ট হৈ কৰুণ মৃত্যুক সাৱটি লয়। জানিব পৰা মতে, খাদ্যৰ সন্ধানত অহা হাতীটোৱে শুঁড়েৰে বিদ্যুতৰ তাঁৰ টানি চিঙি পেলোৱাৰ ফলতে এই অঘটন ঘটে। নিজৰ সদস্যৰ এনে কৰুণ মৃত্যুত প্ৰায় ২৫ ৰ পৰা ৪০ টা হাতীৰ এটা জাকে নিশা ৪ বজালৈকে মৃতদেহটো আৱৰি ধৰি এক শোকাকুল পৰিৱেশৰ সৃষ্টি কৰে। পৰৱৰ্তী সময়ত পুৱা স্থানীয় ৰাইজৰ সমাগম হোৱাতহে হাতীৰ জাকটোৱে মৃতদেহটো এৰি নিৰাপদ স্থানলৈ উভতি যায়।

কলগাছিয়াত এজাক বৰষুণতে কৃত্ৰিম বানপানীৰ সৃষ্টি হোৱাত স্থানীয় ৰাইজে ক্ষোভ প্ৰকাশ কৰিছে। এই বানপানীয়ে কলগাছিয়াৰ কে. কে. পাঠক উচ্চতৰ মাধ্যমিক বিদ্যালয়ৰ সন্মুখত আৰু ভাৰতীয় ষ্টেট বেংকৰ কলগাছিয়া শাখাৰ সন্মুখত গুৰুতৰ সমস্যাৰ সৃষ্টি কৰে। পৰিস্থিতিক লৈ ক্ষুব্ধ হৈ উঠা স্থানীয় ৰাইজে ৰাজপথতে জালেৰে মাছ ধৰি এক অভিনৱ প্ৰতিবাদ সাব্যস্ত কৰে। এই প্ৰতিবাদৰ জৰিয়তে ৰাইজে কৃত্ৰিম বানপানীৰ সমস্যা সমাধানৰ বাবে দাবী জনায়।

ৰাজ্যৰ লাখ লাখ ৰেচন কাৰ্ডধাৰী পৰিয়ালৰ বাবে এক বেয়া খবৰ আহিছে, যিহেতু সুলভ মূল্যত চেনি, নিমখ আৰু মচুৰ দাইল যোগান ধৰা আঁচনিৰ ভৱিষ্যৎক লৈ পুনৰ অনিশ্চয়তা সৃষ্টি হোৱাৰ আশংকাই হিতাধিকাৰীসকলৰ মাজত উদ্বেগ বৃদ্ধি কৰিছে। উল্লেখ্য যে, ৰাজ্য চৰকাৰে ২০২৫ চনৰ শেষৰ ফালে ৰাষ্ট্ৰীয় খাদ্য সুৰক্ষা আইন (NFSA)-ৰ অন্তৰ্গত প্ৰায় ৭০ লাখ পৰিয়াল আৰু ২.৪৫ কোটিতকৈ অধিক হিতাধিকাৰীক লাভান্বিত কৰিবলৈ এই বিশেষ আঁচনিখন আৰম্ভ কৰিছিল। এই আঁচনিৰ অধীনত প্ৰথম অৱস্থাত মচুৰ দাইল ৬৯ টকা, চেনি ৩৮ টকা আৰু নিমখ ১০ টকা মূল্যত প্ৰদান কৰা হৈছিল; পিছলৈ এই সামগ্ৰীসমূহৰ মূল্য অধিক হ্ৰাস কৰি মুঠ ১০০ টকাৰ ভিতৰত প্ৰদান কৰাৰ কথাও ঘোষণা কৰা হৈছিল। কিন্তু শেহতীয়া পৰিস্থিতিত বজাৰত খাদ্য সামগ্ৰীৰ মূল্য বৃদ্ধি, যোগান ব্যৱস্থাৰ ওপৰত চাপ আৰু চৰকাৰী ব্যয় বৃদ্ধিৰ ফলত এই সুবিধা অব্যাহত থাকিব নে নাই, তাক লৈ বিভিন্ন মহলত জল্পনা-কল্পনা আৰম্ভ হৈছে। ইয়াৰ ফলত বহু হিতাধিকাৰীয়ে আগন্তুক মাহসমূহত পুনৰ বজাৰ মূল্যত চেনি, নিমখ আৰু দাইল কিনিবলগীয়া হ’ব নেকি বুলি চিন্তা প্ৰকাশ কৰিছে। বিশেষজ্ঞসকলৰ মতে, ৰাজ্যৰ দৰিদ্ৰ আৰু নিম্ন মধ্যবিত্ত পৰিয়ালসমূহৰ বাবে এই আঁচনি এক ডাঙৰ সহায় আছিল আৰু যদি এই সুলভ মূল্যৰ সুবিধা বন্ধ হয় বা হ্ৰাস পায়, তেন্তে দৈনন্দিন জীৱনৰ ব্যয় অধিক বৃদ্ধি পোৱাৰ সম্ভাৱনা আছে। ইফালে, চৰকাৰৰ ফালৰ পৰা এতিয়ালৈকে এই আঁচনি সম্পূৰ্ণৰূপে বন্ধ কৰাৰ কোনো আনুষ্ঠানিক ঘোষণা প্ৰকাশ হোৱা নাই। তথাপিও হিতাধিকাৰীসকলৰ মাজত অনিশ্চয়তা অব্যাহত আছে আৰু সাধাৰণ জনতাই এই সন্দৰ্ভত চৰকাৰৰ স্পষ্টীকৰণৰ অপেক্ষাত আছে।

খটখটিত এক ভয়ংকৰ পথ দুৰ্ঘটনাত এজন স্কুটী আৰোহী গণেশ হাজৰিকাৰ ঘটনাস্থলীতে মৃত্যু হোৱাৰ লগতে আন এজন আৰোহী গুৰুতৰভাৱে আঘাতপ্ৰাপ্ত হয়। জানিব পৰা অনুসৰি, NL07 AA 4021 নম্বৰৰ এখন লোহা ভৰ্তি ট্ৰাক পাৰ্কিঙৰ পৰা ওলাবলৈ লোৱাৰ সময়তে ডিমাপুৰ দিশৰ পৰা তীব্ৰ বেগেৰে আহি থকা AS05J 5265 নম্বৰৰ এখন স্কুটীয়ে ইয়াক খুন্দা মাৰে। এই দুৰ্ঘটনাৰ ফলত স্কুটী আৰোহী গণেশ হাজৰিকাই ঘটনাস্থলীতে প্ৰাণ হেৰুৱায়। খটখটি আৰক্ষীয়ে স্থানীয় লোকৰ সহায়ত আঘাতপ্ৰাপ্ত যুৱকজনক প্ৰথমে আশা চিকিৎসালয়লৈ প্ৰেৰণ কৰে। পিছত আৰক্ষীয়ে নিহত যুৱকজনৰ মৃতদেহ আৰু দুৰ্ঘটনাত জড়িত বাহন দুখন নিজৰ জিম্মাত লয়।

বাক্সা জিলাৰ শিমলাত ১০০ গৰাকী বিশেষভাৱে শাৰীৰিক সক্ষম লোকক চেক প্ৰদান কৰা হৈছে। এই চেকসমূহৰ জৰিয়তে প্ৰতিগৰাকী হিতাধিকাৰীক ১০ হাজাৰকৈ টকা প্ৰদান কৰা হৈছে। এই চেক বিতৰণ কাৰ্যসূচীত বিধায়ক থানেশ্বৰ বসুমতাৰীয়ে উপস্থিত থাকি বিশেষভাৱে শাৰীৰিক সক্ষম লোকসকলক এই চেকসমূহ প্ৰদান কৰে।

মানাহ ৰাষ্ট্ৰীয় উদ্যানত পৰ্যটকৰ এটা দলে বনৰজাৰ বিচৰণৰ এক নান্দনিক দৃশ্য উপভোগ কৰে। এই মনোমোহা দৃশ্যে পৰ্যটকসকলক যথেষ্ট আনন্দিত কৰে।

বাক্সা জিলাৰ ডুমুনীৰ পৰা চিমলালৈ যোৱা সংযোগী পথটোৰ অৱস্থা অত্যন্ত শোচনীয়। পথটোৰ দুৰাৱস্থাই অঞ্চলটোৰ ৰাইজক যথেষ্ট সমস্যাত পেলাইছে। ঠায়ে ঠায়ে পথত বৃহৎ বৃহৎ গাঁতৰ সৃষ্টি হৈছে, য'ত এজাক বৰষুণ দিলেই পানীৰে ভৰি পৰে আৰু জলাশয়ৰ দৰে হৈ পৰে। ইয়াৰোপৰি, প্ৰায় চাৰি বছৰৰ পূৰ্বে কালদিয়া নৈৰ পানীয়ে খহাই নিয়া পথৰ এটা অংশ আজিও মেৰামতি কৰা হোৱা নাই। এই বিপদসংকুল পথটোৰে দৈনিক বহু যান-বাহন পাৰ হয়। এই পৰিস্থিতিৰ প্ৰতি লক্ষ্য ৰাখি পথচাৰীসকলে বিটিচি চৰকাৰলৈ অতি শীঘ্ৰে এই পথচোৱা পুনৰ নিৰ্মাণ কৰিবলৈ আহ্বান জনাইছে।

গোৱালপাৰা জিলাৰ গোৰাইমাৰীত শুকুৰবাৰে এক অত্যন্ত শোকাৱহ আৰু হৃদয় বিদাৰক ঘটনা সংঘটিত হয়, য’ত এটা নিৰ্মীয়মান শৌচালয়ৰ টেংকি পৰিষ্কাৰ কৰিবলৈ গৈ বিষাক্ত গেছৰ প্ৰভাৱত তিনিজন লোকে কৰুণ মৃত্যুক আঁকোৱালি লয়। এই ভয়ংকৰ অঘটনটোত আন এজন লোকো গুৰুতৰভাৱে অসুস্থ হৈ চিকিৎসাধীন হৈ আছে। নিহত লোককেইজন হৈছে ঘৰৰ মালিক তথা ভাৰতীয় সেনাবাহিনীৰ জোৱান জচোক ৰাভা আৰু দুজন মিস্ত্ৰী ক্ৰমে কৃষ্ণ ৰায় আৰু দিলীপ দাস।