గుంటూరు తూర్పు నియోజకవర్గంలోని సంగడిగుంట పవర్ పేట ప్రభుత్వ పాఠశాలలో 4వ తరగతి చదువుతున్న ఓ చిన్నారి హోంవర్క్ రాయలేదని ఒక ఉపాధ్యాయుడు చితకబాదాడు. ఈ ఘటనపై NSUI తీవ్రంగా స్పందించింది. NSUI పక్షాన, విద్యాశాఖ అధికారులు సదరు ఉపాధ్యాయుడిని తక్షణమే సస్పెండ్ చేసి, అతనిపై కఠినమైన చర్యలు తీసుకోవాలని డిమాండ్ చేశారు.

పల్నాడు జిల్లాలోని వినుకొండ పట్టణంలో గత నెల 21న వేక్షితా జ్యూయలర్స్ లో జరిగిన దొంగతనం కేసును పోలీసులు ఛేదించారు. ఈ చోరీకి పాల్పడిన అంతర్ రాష్ట్ర దొంగను అరెస్టు చేసిన పోలీసులు, అతని వద్ద నుంచి సుమారు 27 లక్షల రూపాయల విలువైన వెండి, బంగారు వస్తువులతో పాటు ఒక బుల్లెట్ వాహనం, ఒక ఆటోను స్వాధీనం చేసుకున్నారు. నరసరావుపేట డిఎస్పి హనుమంతరావు తెలిపిన వివరాల ప్రకారం, ఈ నిందితుడిపై రాష్ట్ర వ్యాప్తంగా సుమారు 25 దొంగతనం కేసులు నమోదై ఉన్నాయి.

గుంటూరులో అంతర్జాతీయ మాదకద్రవ్యాల వ్యతిరేక దినోత్సవాన్ని పురస్కరించుకుని, విద్యార్థులు మత్తుపదార్థాలకు వ్యతిరేకంగా కదం తొక్కారు. ఈ సందర్భంగా, మత్తుపదార్థాలు కేవలం సేవించే వ్యక్తిని బానిసగా మార్చడమే కాకుండా, వారిని నమ్ముకున్న వారి జీవితాలను కూడా రోడ్డున పడేస్తాయని విద్యార్థులు స్పష్టం చేశారు. డ్రగ్స్ రహిత సమాజ నిర్మాణానికి ప్రతి ఒక్కరూ అవగాహన కలిగి ఉండి, అందుకు పాటుపడాలని వారు పిలుపునిచ్చారు.

వరంగల్ నగరంలోని కాశీబుగ్గ ప్రాంతంలో ప్రజల ఆరోగ్యాన్ని ప్రమాదంలోకి నెడుతూ, అత్యంత అపరిశుభ్ర వాతావరణంలో అక్రమంగా పచ్చడి తయారీ, నిల్వలను నిర్వహిస్తున్నారనే విశ్వసనీయ సమాచారం మేరకు టాస్క్ ఫోర్స్ పోలీసులు మెరుపు దాడి నిర్వహించారు. ఈ దాడిలో ఒకరిని అరెస్టు చేయగా, దాదాపు రూ.2.25 లక్షల విలువైన కల్తీ నిల్వలను స్వాధీనం చేసుకున్నారు. ఇంతేజార్‌గంజ్ పోలీస్ స్టేషన్ పరిధిలోని కాశీబుగ్గ సాయి వీధిలో ఉన్న ఓ నివాస గృహంలో జరిపిన తనిఖీల్లో, పెద్ద ఎత్తున కుళ్లిపోయిన పచ్చడి ముడిసరుకులు, ఆహార పదార్థాలు నిల్వ ఉంచినట్లు గుర్తించారు. విచారణలో భాగంగా, వీటిని చిన్న ప్యాకెట్లలో ప్యాకింగ్ చేసి స్థానిక కిరాణా దుకాణాలు మరియు ఇతర చిన్న వ్యాపార కేంద్రాలకు సరఫరా చేస్తున్నట్లు తేలింది. ఈ అక్రమ కార్యకలాపాల్లో కాశీబుగ్గ నివాసి అరికెల శ్రీనివాస్ (51)ను అదుపులోకి తీసుకున్నారు. దాడిలో 750 కిలోల టమోటా, 900 కిలోల మామిడి, 200 కిలోల నిమ్మకాయలు, 100 కిలోల ఉసిరికాయలు, 150 కిలోల అల్లం-వెల్లుల్లి పేస్ట్‌తో కూడిన మొత్తం రూ.2,25,000 విలువైన కుళ్లిపోయిన, కల్తీ ఆహార నిల్వలను స్వాధీనం చేసుకున్నారు. పట్టుబడిన నిందితుడిని, స్వాధీనం చేసుకున్న సరుకును తదుపరి చట్టపరమైన చర్యల కోసం ఇంతేజార్‌గంజ్ పోలీస్ స్టేషన్‌కు అప్పగించినట్లు అధికారులు వెల్లడించారు. ఈ దాడిని ఏసీపీ టాస్క్ ఫోర్స్ ఎ. మధుసూదన్ పర్యవేక్షణలో ఇన్‌స్పెక్టర్ బండారి రాజు, ఆర్‌ఎస్‌ఐ ఓ. భాను ప్రకాష్ మరియు టాస్క్ ఫోర్స్ సిబ్బంది నిర్వహించారు. ప్రజలు బ్రాండ్ లేని లేదా అనుమానాస్పద ఆహార పదార్థాలు, పచ్చళ్లను కొనుగోలు చేసేటప్పుడు అప్రమత్తంగా ఉండాలని టాస్క్ ఫోర్స్ అధికారులు సూచించారు. అటువంటి అక్రమ నిల్వ కేంద్రాలు లేదా కల్తీ ఆహార పదార్థాల విక్రయాలపై సమాచారం ఉంటే వెంటనే పోలీసులకు తెలియజేయాలని వారు కోరారు.

పాలనాడు జిల్లాలోని సత్తెనపల్లి రంగా కాలనీలో 22 ఏళ్ల గౌస్ అనే యువకుడు తన స్నేహితుడి ఇంట్లో ఉరివేసుకుని ఆత్మహత్యకు పాల్పడ్డాడు. ఒక కేసు విషయంలో పోలీసులు గౌస్‌ను స్టేషన్‌కు పిలవడంతో అతను భయపడి ఈ దారుణానికి ఒడిగట్టినట్లు సమాచారం. ఘటనకు ముందు, ఒక హెడ్ కానిస్టేబుల్ గౌస్‌కు ఫోన్ చేసి, వెంటనే ఇంటికి వెళ్లి స్టేషన్‌కు రావాలని హుకుం జారీ చేసినట్లు తెలుస్తోంది. పోలీసుల పిలుపుతో తీవ్ర భయానికి గురైన గౌస్ ఆత్మహత్యకు పాల్పడ్డాడు. ఆత్మహత్యకు ముందు గౌస్ తన స్నేహితుడు మహేష్‌కు ఇన్‌స్టాగ్రామ్ ద్వారా సందేశం పంపాడు. పోలీసులు స్టేషన్‌కు రమ్మని ఫోన్ చేశారని అందులో పేర్కొన్నాడు. ఆ తర్వాత, "బార్గవ్ వాళ్ల ఇంట్లో ఉరివేసుకుంటున్న మహేష్ సారి రా" అంటూ మరో సందేశం పంపి ప్రాణాలు తీసుకున్నాడు. ఈ ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.

మత్తు పదార్థాలు సేవించడం వల్ల భవిష్యత్తు అంధకారమవుతుందని, కుటుంబాలు చిన్నాభిన్నం అవుతాయని ప్రొహిబిషన్ అండ్ ఎక్సైజ్ సీఐ ఆర్. దివాకర్ హెచ్చరించారు. శుక్రవారం రేపల్లె పట్టణంలో చైల్డ్ రైట్స్ అడ్వకేసి ఫౌండేషన్ ఆధ్వర్యంలో మాదక ద్రవ్యాలపై నిర్వహించిన ర్యాలీలో ఆయన ఈ విషయాలు తెలిపారు. ఈ సందర్భంగా సీఐ దివాకర్ మాట్లాడుతూ, ప్రతి ఒక్కరూ తమ కుటుంబాలను ఉన్నత స్థితిలో ఉంచుకునేలా ప్రణాళికలు సిద్ధం చేసుకోవాలని సూచించారు. గ్రామాలలో, పట్టణాలలో మత్తు పదార్థాలకు బానిసలై కుటుంబాలకు దూరమైన వ్యక్తులను తాము ఎంతోమందిని చూస్తున్నామని పేర్కొన్నారు. అలాంటి వాటికి తావివ్వకుండా, మంచి ఆరోగ్యం, మంచి జీవితం, మంచి కుటుంబం కోసం మత్తు పదార్థాలకు దూరంగా ఉండాలని ఆయన ప్రజలకు హితవు పలికారు. గ్రామాలలో ఎవరైనా మాదక ద్రవ్యాలను విక్రయించినా లేదా సేవించినా హెల్ప్‌లైన్ నెంబర్ 1922కు లేదా వాట్సాప్ నెంబర్ 897781972కు సమాచారం అందించాలని, సమాచారం అందించిన వారి వివరాలను గోప్యంగా ఉంచుతామని ఆయన స్పష్టం చేశారు. చైల్డ్ రైట్స్ అడ్వకేసి ఫౌండేషన్ మేనేజర్ పి. లక్ష్మీ ప్రసన్న మాట్లాడుతూ, ప్రతి ఒక్కరూ డ్రగ్స్, గంజాయి వంటి మత్తు పదార్థాలకు దూరంగా ఉంటూ సమాజంలో ఆదర్శవంతమైన పౌరులుగా జీవించాలని కోరారు. ఈ కార్యక్రమంలో చైల్డ్ రైట్స్ అడ్వకేసి స్వచ్ఛంద సంస్థ వాలంటీర్లు, మహిళలు, ప్రొహిబిషన్ అండ్ ఎక్సైజ్ సిబ్బందితో పాటు పలువురు పాల్గొన్నారు.

రాష్ట్ర లీగల్ సర్వీసెస్ అథారిటీ ఆదేశాల మేరకు, రేపల్లె మండల న్యాయ సేవ అధికార సంస్థ ఆధ్వర్యంలో రేపల్లె మండలం విజ్ఞాన్ ఒకేషనల్ జూనియర్ కాలేజీ నందు డ్రగ్స్‌పై విద్యార్థిని విద్యార్థులకు అవగాహన కార్యక్రమం నిర్వహించారు. ఈ కార్యక్రమం ర్యాలీతో ప్రారంభమై, అనంతరం విద్యార్థులచే ప్రతిజ్ఞ చేయించడంతో ముగిసింది. పారా లీగల్ వాలంటీర్లు (పీఎల్వీలు) ఆర్. శ్రీనివాసరావు, వాగోలు బాబురావు, సయ్యద్ తాహిర్ అహ్మద్, కె. వెంకయ్య, ఏ. మోషే నాగమల్లేశ్వరరావు, సిహెచ్. లు ఈ కార్యక్రమంలో పాలుపంచుకున్నారు. వారు "డ్రగ్స్ వద్దు భవిష్యత్తు ముద్దు" అనే నినాదంతో విద్యార్థులకు మత్తు పదార్థాలకు, గంజాయికి, గుట్కా, పాన్ పరాగ్ వంటి నిషేధిత పదార్థాలకు దూరంగా ఉండాలని సూచించారు. చెడు వ్యసనాలకు దూరంగా ఉన్నప్పుడే విద్యార్థులకు ఉజ్వలమైన భవిష్యత్తు ఉంటుందని, ఆ దిశగా చదువుకుని ఉన్నత శిఖరాలు అధిరోహించాలని పీఎల్వీలు పేర్కొన్నారు. రాష్ట్ర ప్రభుత్వం మత్తు పదార్థాలను పూర్తిగా నిషేధిస్తూ, దీనిపై ఉక్కు పాదం మోపుతూ చట్టం చేసిందని ఈ సందర్భంగా తెలియజేశారు. డ్రగ్స్‌కు విద్యార్థులు బానిసలు కాకుండా దూరంగా ఉన్నప్పుడే గంజాయి రహిత సమ సమాజాన్ని నిర్మించవచ్చునని వారు వివరించారు. ఈ కార్యక్రమంలో విజ్ఞాన్ ఒకేషనల్ కళాశాల సెక్రటరీ అండ్ కరెస్పాండెంట్ ఎస్.కె. సాజిద్ పాషా, డైరెక్టర్ ఎస్.కె. రిజ్వాన, అధ్యాపకుడు శశి కుమార్ తో పాటు విద్యార్థిని విద్యార్థులు పెద్ద సంఖ్యలో పాల్గొన్నారు. డ్రగ్స్ రహిత సమాజాన్ని నిర్మిద్దామని అందరూ ప్రతిజ్ఞ చేశారు.

విద్యార్థులు, యువత మత్తు పదార్థాలకు బానిసలవుతున్న ప్రస్తుత పరిస్థితులలో, ప్రభుత్వం అప్రమత్తమైంది. వారిని మత్తు పదార్థాల నుండి దూరంగా ఉంచడానికి మరియు వారిలో చైతన్యం కలిగించడానికి ప్రభుత్వం ర్యాలీలను నిర్వహిస్తోంది. ఈ కార్యక్రమంలో భాగంగా, ఈరోజు గుంటూరులో విద్యార్థులతో కలిసి ఒక భారీ ర్యాలీని నిర్వహించారు. మాదకద్రవ్యాలకు వ్యతిరేకంగా జరుగుతున్న ఈ ర్యాలీలు నేడు రెండో రోజుకు చేరుకున్నాయి.

పల్నాడు జిల్లాలో జరిగిన ఒక ఘోర రోడ్డు ప్రమాదంలో నలుగురు వ్యక్తులు అక్కడికక్కడే దుర్మరణం పాలయ్యారు. మాచర్ల నగరవనం వద్ద నిలిపి ఉన్న లారీని వేగంగా దూసుకొచ్చిన తుఫాను వాహనం ఢీకొట్టడంతో ఈ ఘటన చోటుచేసుకుంది. ఈ ప్రమాదంలో మరో నలుగురికి గాయాలయ్యాయి, వారిని వెంటనే ఆసుపత్రికి తరలించారు. మృతి చెందిన వారు హైదరాబాద్ వాసులుగా గుర్తించారు.