ચોમાસાની શરૂઆત થતાં જ ઠેર-ઠેર ચાંદીપુરા વાયરસની અસર જોવા મળી રહી છે, જેને પગલે સંજેલી તાલુકામાં પણ આ બાબતે ખાસ ધ્યાન રાખવું પડશે. ખાસ કરીને નાના બાળકોમાં રોગ પ્રતિકારક શક્તિ ઓછી હોવાને કારણે ચોમાસા દરમિયાન જીવજંતુ કરડવાથી તેઓ બીમાર પડી જાય છે અને આવી જ રીતે તેઓ ચાંદીપુરા વાયરસનો ભોગ બને છે. આ વાયરસની અસરથી બચવા માટે દરેક જગ્યાએ સફાઈ રાખવી ખૂબ જ જરૂરી છે. સંજેલીના દીપ્તેશ ભાઈ દેસાઈએ જણાવ્યું છે કે ચોમાસાને લઈ ગામડાંઓના કાચા મકાનોમાં સફાઈ માટે વિશેષ ધ્યાન આપવું જરૂરી છે. કેટલાક ડૉક્ટરોના જણાવ્યા અનુસાર, વરસાદને કારણે કાચા કે પાકા મકાનોમાં જ્યાં વધુ પડતો ભેજ હોય અથવા દીવાલો પર ખાડા અને તિરાડો હોય, ત્યાં યોગ્ય દવાનો છંટકાવ કરીને તે જગ્યા સ્વચ્છ રાખવી જોઈએ જેથી કોઈ પણ પ્રકારની જીવાતો પેદા ન થાય. આ ઉપરાંત, જો પશુપાલકો દ્વારા દરરોજ લીમડાના પાનનો ધુમાડો કરવામાં આવે તો જીવાતોથી વધુ બચાવ થઈ શકે છે.

મહીસાગર જિલ્લાના નવી ગોધર વિસ્તારમાં ચોમાસા દરમિયાન ખેતીવાડી વીજ કનેક્શન ધરાવતા ખેડૂતો મોટી સમસ્યાઓનો સામનો કરી રહ્યા છે. ટેકનિકલ ખામીઓને કારણે વીજ પુરવઠો ખોરવાઈ રહ્યો છે, જેના લીધે ખેડૂતો ભારે હાલાકી અનુભવી રહ્યા છે. આ વિસ્તારમાં વારંવાર ટ્રાન્સફોર્મર (ટીસી) બળી જવાની ઘટનાઓ બની રહી છે, જેમાં ટેકનિકલ ખામી સર્જાતા ટીસીમાંથી ધુમાડા નીકળતા જોવા મળ્યા છે. આ સ્થિતિને કારણે ખેડૂતોની સાથે એમજીવીસીએલ (MGVCL) ના કર્મચારીઓ પણ સતત પરેશાનીનો સામનો કરી રહ્યા છે.

એક તરફ કન્યા કેળવણીના મોટા ઉત્સવો યોજાઈ રહ્યા છે, તો બીજી તરફ દાહોદના ધાનપુર તાલુકાની માધ્યમિક શાળામાં પથરામાંથી પાણી ટપકી રહ્યું છે. આ વિકટ પરિસ્થિતિના કારણે શાળાના ૧૦૦થી વધુ બાળકોનું ભવિષ્ય જોખમમાં મુકાયું છે.

દાહોદની ઝાયડસ મેડિકલ કોલેજ અને હોસ્પિટલના પ્રસૂતિ તથા સ્ત્રીરોગ વિભાગ (OBGYN) ખાતે ૧૧/૦૭/૨૦૨૬ શનિવારના રોજ સવારે ૧૧:૧૫ વાગ્યા સુધીમાં દર્દીઓ અને તેમના પરિવારજનો માટે "માત્ર માતાનું દૂધ" વિષય પર એક આરોગ્ય જાગૃતિ કાર્યક્રમનું આયોજન કરવામાં આવ્યું હતું. આ કાર્યક્રમમાં હાજર રેસિડેન્ટ અને ઇન્ટર્ન ડોક્ટરોએ નવજાત શિશુના જન્મ પછીના પ્રથમ છ મહિના સુધી માત્ર માતાનું દૂધ જ આપવાના મહત્વ અંગે વિસ્તૃત માર્ગદર્શન પૂરું પાડ્યું હતું. ડોક્ટરોએ યોગ્ય સ્તનપાનની પદ્ધતિ, માતાના દૂધના પોષણમૂલ્ય અને બાળકના શારીરિક તેમજ માનસિક વિકાસમાં તેની ભૂમિકા વિશે લોકોને સમજાવ્યું હતું. આ ઉપરાંત, માતા માટે સ્તનપાનના આરોગ્યલક્ષી લાભો, માતા-બાળકના લાગણીસભર સંબંધની મજબૂતી અને અનેક બીમારીઓ સામે મળતા રક્ષણ વિશે પણ ચર્ચા કરવામાં આવી હતી. અંતમાં દર્દીઓ અને તેમના પરિવારજનોના પ્રશ્નોનું નિરાકરણ કરી પ્રથમ છ મહિના સુધી માત્ર સ્તનપાન કરાવવાની અપીલ કરવામાં આવી હતી.

નર્મદા નદી કિનારે ત્રણ દિવસ પહેલા વરસાદ સાથે આવેલા મીની વાવાઝોડાએ ભારે તારાજી સર્જી છે. આ વરસાદ અને વાવાઝોડાના કારણે શિનોર તાલુકાના ખેડૂતો પાયમાલ થઈ ગયા છે. નર્મદા નદીના કિનારાના આ વિસ્તારોમાં કુદરતી આફતના કારણે મોટું નુકસાન થયું છે.

પંચમહાલ જિલ્લાના કાલોલ તાલુકાના ઝેરનામુવાડા ગ્રામ પંચાયત હેઠળ આવેલા વેચાણા ફળિયું અને મોટા કુવા વિસ્તારમાં છેલ્લા લગભગ બે વર્ષથી રસ્તાની ગંભીર સમસ્યા યથાવત હોવાથી ગ્રામજનોમાં ભારે આક્રોશ જોવા મળી રહ્યો છે. રસ્તાના અભાવે નાના બાળકોને શાળાએ જવામાં તેમજ બીમાર દર્દીઓને તાત્કાલિક હોસ્પિટલ લઈ જવામાં ભારે મુશ્કેલીનો સામનો કરવો પડી રહ્યો છે. ધાર્મિક યાત્રા અને સામાજિક પ્રસંગોમાં પણ આશરે 50 પરિવારોની વસ્તી ધરાવતા આ વિસ્તારના લોકોને અવરજવર માટે ભારે હાલાકી ભોગવવી પડે છે. આ ઉપરાંત, અહીં પીવાના પાણીની સુવિધાનો પણ પૂરતો લાભ લોકોને મળી રહ્યો નથી. ગ્રામજનોનો આક્ષેપ છે કે અહીં બે પાણીની ચોકીઓ ઊભી કરીને પાઇપલાઇનનું ટેસ્ટિંગ કરવામાં આવ્યું હતું, પરંતુ ત્યારબાદ ટાંકીઓ સાથે જોડાયેલી પાઇપો અને લોખંડની સીડીની ચોરી થઈ ગઈ હતી. અનેક રજૂઆતો છતાં સ્થાનિક ગ્રામ પંચાયત દ્વારા કોઈ ઉકેલ ન લાવવામાં આવતા ગ્રામજનોમાં ભારે અસંતોષ છે. આથી તેમણે જિલ્લા અને તાલુકા કક્ષાના સંબંધિત અધિકારીઓને સ્થળ પર તાત્કાલિક તપાસ કરી રસ્તા અને પાણીની સમસ્યાનું વહેલી તકે નિરાકરણ લાવવા નમ્ર અપીલ કરી છે.

કાલોલ તાલુકાના બોરુ રોડ પર આવેલી ઓમ રેસીડેન્સીના રહીશો છેલ્લા ૨ વર્ષથી વારંવાર થતા વીજકટથી ત્રાહિમામ પોકારી ઉઠ્યા છે. સોસાયટીમાં કાતોલ પંચાયત વિસ્તારના ફીડરમાંથી લાઈન આવતી હોવાથી વારંવાર પાવર કટ ઓફ થાય છે, જેના કારણે રહીશોએ આખી રાત લાઈટ વગર વિતાવવી પડે છે. આ ગંભીર સમસ્યા અંગે સોસાયટીના રહીશો દ્વારા અગાઉ તારીખ ૨૭/૦૮/૨૦૨૪ અને ૩૦/૦૯/૨૦૨૪ ના રોજ અરજીઓ આપવામાં આવી હતી તેમજ તાલુકા સ્વાગતમાં પણ પત્ર નંબર ૫૧/૨૦૨૪ દ્વારા રજૂઆત કરાઈ હતી, પરંતુ આજદિન સુધી કોઈ નક્કર નિરાકરણ આવ્યું નથી. રહીશોનો આક્ષેપ છે કે તેમની સોસાયટીથી માત્ર ૫૦ મીટર દૂર આવેલી ઓમ સાંઈ રેસીડન્સીને કાલોલ ફીડરમાંથી લાઈન અપાઈ છે જ્યાં વીજળી બંધ થતી નથી, જ્યારે તેમની સોસાયટીમાં કાતોલ પંચાયત ફીડર હોવાથી પાવર વારંવાર ગુલ થઈ જાય છે. ચોમાસામાં સામાન્ય વરસાદ કે વાવાઝોડું બંધ થયા પછી પણ આખી રાત વીજળી આવતી નથી. આ ભેદભાવ અને કલાકો સુધી લાઈટો બંધ રહેવા છતાં પૂરું બિલ વસૂલવામાં આવતું હોવાથી, સોસાયટીના પ્રમુખ અશોકભાઈ કે. પરમાર અને રહીશોએ કલેકટર, મામલતદાર તેમજ MGVCLના અધિક્ષક ઈજનેરને લેખિત રજૂઆત કરી છે. જેમાં ચોમાસાના કટ ઓફ સમય નોંધી વીજબીલમાં ૫૦% કાપ આપવા અને કાયમી ધોરણે કાલોલ ફીડર સાથે જોડાણ આપવા માંગ કરી છે. રહીશોએ ચીમકી આપી છે કે જો ૩૦ દિવસમાં આ સમસ્યાનો કાયમી ઉકેલ નહીં આવે તો તેઓ તમામ પરિવારો સાથે MGVCLની કચેરી ખાતે ભૂખ હડતાળ પર ઉતરશે. હવે તંત્ર આ રજૂઆતને કેટલી ગંભીરતાથી લે છે અને કાયમી ઉકેલ લાવે છે તે જોવાનું રહ્યું.

દાહોદ જિલ્લા અદાલત ખાતે શનિવાર, તારીખ 11/07/2026ના રોજ નામદાર નેશનલ લીગલ સર્વિસીસ ઓથોરિટી, નવી દિલ્હી તથા ગુજરાત રાજ્ય કાનૂની સેવા સત્તા મંડળ, અમદાવાદના માર્ગદર્શન હેઠળ નેશનલ લોક અદાલતનું ભવ્ય આયોજન કરવામાં આવ્યું હતું. જિલ્લા કાનૂની સેવા સત્તા મંડળના ચેરમેન અને પ્રિન્સિપાલ ડિસ્ટ્રિક્ટ જજ એચ.જી. વાઘેલાના માર્ગદર્શન હેઠળ યોજાયેલી આ લોક અદાલતમાં વિવિધ પ્રકારના કેસોનું સમાધાન દ્વારા સફળ નિરાકરણ કરવામાં આવ્યું હતું. આ નેશનલ લોક અદાલતમાં કુલ 30,355 કેસો રજૂ કરવામાં આવ્યા હતા, જેમાંથી 13,182 કેસોનો સફળતાપૂર્વક નિકાલ કરવામાં આવ્યો હતો. રજૂ થયેલા કુલ કેસોમાંથી અંદાજે 43 ટકા કેસોમાં સુખદ સમાધાન શક્ય બન્યું હતું. આ લોક અદાલત દરમિયાન કુલ રૂ. 4,54,02,781ના સેટલમેન્ટ કરવામાં આવ્યા હતા, જેના કારણે અનેક પક્ષકારોને લાંબી કાયદાકીય પ્રક્રિયામાંથી મોટી રાહત મળી હતી. પરસ્પર સમાધાન અને સહમતિથી વિવાદોનો ઝડપી અને સરળ ઉકેલ લાવવાના મુખ્ય ઉદ્દેશ્ય સાથે યોજાયેલી આ અદાલતમાં "કોઈનો જય નહીં અને કોઈનો પરાજય નહીં"ના સૂત્રને સાકાર કરવામાં આવ્યું હતું. આ પ્રસંગે ન્યાયિક અધિકારીઓ, વકીલમંડળ, જિલ્લા કાનૂની સેવા સત્તા મંડળના અધિકારીઓ તેમજ મોટી સંખ્યામાં પક્ષકારોએ ભાગ લઈ આ લોક અદાલતના આયોજનને સફળ બનાવ્યું હતું.

કાલોલ નગરમાં ગેરકાયદેસર અને ઊંચા વ્યાજે નાણાં ધીરીને પઠાણી ઉઘરાણી કરવાના મામલે પોલીસ દ્વારા 'માં ફાઇનાન્સ' નામના વ્યાજખોરીના વ્યવસાય સાથે સંકળાયેલા ત્રણ શખ્સોની અટકાયત કરવામાં આવી છે. કાલોલ તાલુકા પંચાયત બહાર ચાની લારી ચલાવી ગુજરાન ચલાવતા રણુભાઈ ભરવાડ અને વ્યાજખોરોના ત્રાસથી પરેશાન હસમુખજી તેજાજી વણઝારા દ્વારા નોંધાવવામાં આવેલી ફરિયાદોના આધારે પોલીસે આ કડક કાર્યવાહી કરી છે. નગરમાં ડેરોલ સ્ટેશન રોડ પર માતાજીના ચિત્ર અને શસ્ત્રોવાળા પોસ્ટર સાથે 'માં ફાઇનાન્સ'નું બોર્ડ લગાવીને દીપેશ રાજપૂત જરૂરિયાતમંદ લોકોને પોતાની જાળમાં ફસાવતો હતો. આ વ્યાજખોરો કોઈ પણ ડર રાખ્યા વગર અને કાયદાના ધજિયા ઉડાવીને કોરા ચેક અને અન્ય પદ્ધતિઓ દ્વારા જરૂરિયાતમંદોને વ્યાજે નાણાં આપતા હતા. જો કોઈ વ્યક્તિ નક્કી કરેલા સમય પર વ્યાજ કે મુદ્દલ ન ચૂકવે, તો તેને પોલીસની ધમકી આપી જેલમાં પુરાવી દેવા સુધીનો પઠાણી ત્રાસ આપવામાં આવતો હતો. આ ભય અને મજબૂરીના કારણે લોકો મૂંગા મોઢે વ્યાજ ભરવા મજબૂર બન્યા હતા. ચાની લારી ચલાવતા રણુભાઈ ભરવાડે વ્યાજના બાકી રૂપિયાની પઠાણી ઉઘરાણી સામે કાલોલ પોલીસ સ્ટેશનમાં ફરિયાદ નોંધાવી હતી. આ ફરિયાદ બાદ, નવનિયુક્ત નાયબ પોલીસ અધિક્ષક નવીન આહિરના માર્ગદર્શન હેઠળ કાલોલ પોલીસ ઇન્સ્પેક્ટર આર.ડી. ભરવાડ અને પોલીસ સ્ટાફે સુપેડા હોસ્પિટલ સામે આવેલા કોમ્પ્લેક્સમાં ચાલતી 'માં ફાઇનાન્સ'ની ઓફિસમાં દરોડો પાડી જરૂરી પુરાવા અને ફાઈલો જપ્ત કરી તપાસ હાથ ધરી હતી. પોલીસ કાર્યવાહી શરૂ થતાં જ ગુનામાં સંકળાયેલા આરોપીઓ રફુચક્કર થઈ ગયા હતા. ત્યારબાદ, 9 જુલાઈ 2026ના રોજ હસમુખજી વણઝારાએ પણ દીપેશ રાજપૂત અને જીગર પરમાર સામે પોલીસ ફરિયાદ નોંધાવી હતી. આખરે પોલીસે તપાસ તેજ કરીને 11 જુલાઈ 2026ના રોજ દીપેશ રાજપૂત, અરવિંદ મકવાણા અને જીગર પરમારની અટકાયત કરી વધુ કાર્યવાહી હાથ ધરી છે. પોલીસની આ મોટી કાર્યવાહીથી કાલોલ પંથકના વ્યાજખોરોમાં ભારે હડકંપ મચી ગયો છે. જો કે, હવે કાલોલ પોલીસ આ વ્યાજખોરો સામે ફરિયાદ મુજબ કડક તપાસ કરીને યોગ્ય પગલાં લે છે કે કેમ તે જોવું રહ્યું!